ସରି ଯିବଣିଟି 

କବି - ଲକ୍ଷ୍ମୀକାନ୍ତ ମହାପାତ୍ର 

ଲକ୍ଷ୍ମୀକାନ୍ତ ମହାପାତ୍ର (ଫଟୋ କ୍ରେଡ଼ିଟ - ୱିକିମିଡ଼ିଆ କମନ୍ସ୍)
(୯ ଡିସେମ୍ବର ୧୮୮୮- ୨୪ ଫେବୃଆରୀ ୧୯୫୩)

ସରି ଯିବଣିଟି ଜୀବନୁ କିଶୋରୀ ହେ ବଂଶୀଧାରୀ ।

ବିରହରେ ସଖି ହୋଇଛି କାତର

କଳେ ଯାକିଅଛି ସେ ଧୂଆଁପତର

ଦେଖିଲି ସଖିର ଅଣ୍ଟିରେ ମାତର ଜୀବନକୁ ଅଛି ଧରି ହେ ।

ନାସାଗ୍ରତେ ତୂଳା ଦେଲେ ତତପର 

ସିଙ୍ଘାଣି ବହିଲା ନାକୁ ସରସର

ହତାଶେ ଫେରିଲା ଯହୁଁ ଡାକତର ସବୁ ଆଶା ଗଲା ସରି ହେ ।

ଲାଗୁ ନ ଥିଲା ମୋ କରକୁ ନାଟିକା

ମୁହଁ କରିଥିଲା କି ମାଲ ଆଟିକା

ମାନ ମାରି ଖାଲି ଆଖିରେ ମିଟିକା ଲାଳ ପଡ଼ୁଥିଲା ଝରି ହେ ।

ତୁମ୍ଭ ଭଳି ଯେବେ ନୋହିଲା ପାତର

କାହିଁକି ଛୁଇଁଲ ସଖିର ଗାତର

ଏବେ ପରା ଭାରି ମାରୁଛ ଚାତର କାମଟା ଯିବାରୁ ସରି ହେ ।

ତୁମ୍ଭେ ଥାଉଁ ସଖି ଯେବେଟି ମରିବ

ପୁଲିସ ନିଶ୍ଚୟେ ଗିରଫ କରିବ

ଗରିବ କଥାକୁ ସେକାଳେ ସ୍ମରିବ ଡାଲି ଭାତ ଖାଇ କରି ହେ ।