କଟକର ଲୋକଗୀତ - ଫୁଲ ବଉଳବେଣୀ

ଫଟୋ କ୍ରେଡ଼ିଟ୍ - ୱିକିମିଡ଼ିଆ କମନସ୍ 

କୁଆଁର ପୁନେଇ ଜହ୍ନ ଗୋ ଫୁଲ ବଉଳବେଣୀ ।

କୃଷ୍ଣ ଯେତେବେଳେ ମଥୁରାକୁ ଗଲେ  

କାନ୍ଦିଲେ ଯଶୋଦାରାଣୀ ଗୋ

ଫୁଲ ବଉଳବେଣୀ ।।

କରମଙ୍ଗା ଗଛ ଛାଇଲୋ ଫୁଲ ବଉଳବେଣୀ ।

କୃଷ୍ଣ ଯେତେବେଳେ ବନସ୍ତକୁ ଗଲେ 

ସଙ୍ଗେ ଥିଲେ ବଡ଼ ଭାଇ ଗୋ 

ଫୁଲ ବଉଳବେଣୀ ।।

କୁଆଁର ପୁନେଇ ଜହ୍ନ ଗୋ ଫୁଲ ବଉଳବେଣୀ ।

କୁଆଁରୀମାନେ ଯେ ପୁଚି ଖେଳୁଛନ୍ତି 

ଝୁଣ୍ଟିଆ ଶବଦ ଶୁଣ ଗୋ

ଫୁଲ ବଉଳ ବେଣୀ ।।

କଇଁଫୁଲ ଗୋଟି ଗୋଟି ଗୋ ଫୁଲ ବଉଳବେଣୀ । 

ରାଧା ଯେତେବେଳେ ଦୋଳି ଖେଳୁଥିଲେ 

ବେଣୀ ଯାଉଥିଲା ଲୋଟି ଗୋ

ଫୁଲ ବଉଳବେଣୀ ।।

ଫଟୋ କ୍ରେଡ଼ିଟ୍ - ୱିକିମିଡ଼ିଆ କମନସ୍ 

ପ୍ରସନ୍ନ କୁମାର ମିଶ୍ରଙ୍କ ଦ୍ୱାରା ସମ୍ପାଦିତ ଓ  କେନ୍ଦ୍ରୀୟ ସାହିତ୍ୟ ଏକାଡେମୀ ଦ୍ୱାରା ପ୍ରକାଶିତ ସଙ୍କଳନ 'ଓଡ଼ିଆ ଲୋକଗୀତ' (ଭୁବନେଶ୍ୱର, ୨୦୧୩; ପ୍ରଥମ ପ୍ରକାଶ ୧୯୯୪) ରୁ ଆହୃତ ।

ଗୁଲଜାର୍ ଙ୍କ କବିତା  - 'କବିତା' 

ଅନୁବାଦ - ଭରଦ୍ୱାଜ ପଣ୍ଡା (ଜୁଲୁ)

ଫଟୋ କ୍ରେଡ଼ିଟ୍ - ୱିକିମିଡ଼ିଆ କମନସ୍ 

କ୍ଷଣେ କ୍ଷଣେ ବସିଥିବା କବିତାକୁ

ପ୍ରଜାପତି ଜାଲରେ ବାନ୍ଧିଦବା ଓ

କବିତାର ପରକାଟି 

ତାକୁ ଆଲବମ୍ ରେ ପିନ୍ କରିବା

ପାପ ନୁହେଁ ତ ଆଉ କଅଣ ?

କାଗଜରେ ପଡ଼ି କବିତା ସ୍ଥାଣୁ ହୋଇଯାଏ ।

କବିତାର ରଙ୍ଗ ଆଙ୍ଗୁଳିରେ ଲାଗିଥାଏ ।

ଜହ୍ନିଫୁଲ ଠୋ ଠା 

ଡକ୍ଟର୍ କୁଞ୍ଜବିହାରୀ ଦାଶଙ୍କ ସଙ୍ଗ୍ରହରୁ

ଫଟୋ କ୍ରେଡ଼ିଟ୍ - ୱିକିମିଡ଼ିଆ କମନସ୍ 

ଜହ୍ନିଫୁଲ ଠୋ ଠା

ଯେ ନ ଦେବ ତାର ପିଲାର 

ନାକଟା ଖଣ୍ଡିଆ ଟା ।

ଦାଣ୍ଡଆଡ଼େ ବଗ 

ବାଡ଼ିଆଡ଼େ ବଗ 

ଡୁଙ୍ଗେଇ ମୂଷା କହିଯାଇଛି 

ଚାଉଳ ପୁଞ୍ଜେ ଦେବ ।

ଜହ୍ନିଫୁଲେ ଲୋ ପୂଜିଲି ତୋତେ 

କି ବର ମାଗୁଛି ଦେବୁଟି ମୋତେ ।

କାକୁଡ଼ି ଫୁଲେ ଲୋ ପୂଜିଲି ତୋତେ 

କି ବର ମାଗୁଛି ଦେବୁଟି ମୋତେ ।

କନ୍ୟାରିଫୁଲେ ଲୋ ପୂଜିଲି ତୋତେ 

କି ବର ମାଗୁଛି ଦେବୁଟି ମୋତେ ।

କଖାରୁଫୁଲେ ଲୋ ପୂଜିଲି ତୋତେ 

କି ବର ମାଗୁଛି ଦେବୁଟି ମୋତେ ।

(ଗଞ୍ଜାମ ଅଞ୍ଚଳର)

ପ୍ରସନ୍ନ କୁମାର ମିଶ୍ରଙ୍କ ଦ୍ୱାରା ସମ୍ପାଦିତ ଓ  କେନ୍ଦ୍ରୀୟ ସାହିତ୍ୟ ଏକାଡେମୀ ଦ୍ୱାରା ପ୍ରକାଶିତ ସଙ୍କଳନ 'ଓଡ଼ିଆ ଲୋକଗୀତ' (ଭୁବନେଶ୍ୱର, ୨୦୧୩; ପ୍ରଥମ ପ୍ରକାଶ ୧୯୯୪) ରୁ ଆହୃତ ।

ଜଗନ୍ନାଥ ଭଜନ - ତୁମ୍ଭ ଶୁଣିବାକୁ ମୋହ କହିବାକୁ 

କବି - ନିତ୍ୟାନନ୍ଦ ଦାସ 

ଭଜନର ୟୁଟ୍ୟୁବ୍ - ଲିଙ୍କ୍ - https://www.youtube.com/watch?v=hIGvCdy_VsI

ଫଟୋ କ୍ରେଡ଼ିଟ୍ - ୱିକିମିଡ଼ିଆ କମନସ୍ 

ତୁମ୍ଭ ଶୁଣିବାକୁ ମୋହ କହିବାକୁ 

ସମୟ ନାହିଁ ମୁରାରୀ ।

ତୁମ୍ଭ କୃପା ହେଉ ହେଉ କହୁ କହୁ

ବିପତ୍ତି ଦେଉଛି ସାରି ।

ମହାପ୍ରଭୁ ହେ ।୧।

ଦୁଃଖ-ତଟିନୀ-ତଟ-ତରୁ ହୋଇ ମୋ 

ପିଣ୍ଡେ ବଳ ନାହିଁ ମୁଳେ ।

ତୁମ୍ଭ ନିରାଶ-ପ୍ରବଳ-ପବନରେ 

ଉପୁଡ଼ୁଛି ମୁଁ ସମୁଳେ ।

ମହାପ୍ରଭୁ ହେ ।୨।

ମୁହିଁ ଗଲେ ନାଶ ତୁମ୍ଭେ କେଉଁ ଯଶ

ଲଭିବ ଆହେ କରୁଣାନିଧି ।

ମଲାଠାରେ ଜଳି ଅଧିକରେ ଜାଳି 

ସଂସାରେ କେତେ ରଖିବ ସିଦ୍ଧି ।୩।

ଦୁଷ୍ଟ ମତ୍ତନାଗ ରହିଥିଲେ ଆଗ 

କେହି ତା ପୁଚ୍ଛ ଦିଅଇ ଟିପି ?

ଧର୍ମ ନିକି ଚାଳି ଦେବା ବନମାଳୀ 

ଯେଉଁଠାରେ ସିଂହ ଥାଏ ଝାମ୍ପି ।୪।

ପ୍ରବଳ ପବନ ଘାତେ ରମ୍ଭାବନ 

ହୋଇଲା ପ୍ରାୟେ ମରୁଛି ଭାଳି ।

କାଳକୁ ଗୁହାରି ଯେହ୍ନେ ନିତ୍ୟେ କରି 

ଦୁଃଖୀ ମରୁଥାଇ ଝୁରି ଝୁରି ।୫।

ଏ ଡକା ପାରଇ ତାକୁ ନ ଶ ୁଭଇ 

ସେ କେହ୍ନେ ହରିବ କଷ୍ଟ ତାର ।

ତେମନ୍ତ ତାର ଯେମନ୍ତ ଗତି ହୋଇ 

ବେଳୁ ବେଳ ଏ ମୋ ଦୁଃଖ ଭାର ।୬।

କୃପଣକୁ ଲୋଭୀ ଥାଇ ଯେହ୍ନେ ସେବି

ଧରି ନ ଛାଡ଼ଇ ଲୋଭ ବଳେ ।

ଏ ତ ନ ଦିଅଇ ସେ ତ ନ ଛାଡ଼ଇ 

ଲୋଭୀ ନାଶ-ଫଳ ପାଇଁ କାଳେ ।୭।

ପ୍ରଭୁକୁ କୃପଣ ଡରେ ନ ବୋଲଇ  

ଦୁଃଖ ଲୋଭ ପଣ ହୁଏ ସିଦ୍ଧି ।

ପ୍ରଭୁପଣ ଥିଲେ ସବୁ ହିଁ ସୁନ୍ଦର 

ଅସୁନ୍ଦର କଥା କଲେ ବିଧି ।୮।

ହୋଇ କୃପାସିନ୍ଧୁ କହିବାକୁ ବିନ୍ଦୁ 

ସରିବ ବୋଲି ଡରିବା ଠାରେ ।

ତେବେ ହେଁ ବୋଲନ୍ତି କରୁୁଣା-ସମୁଦ୍ର 

ବିବେକ ମହତ ମନ୍ଥନରେ ।୯।

ଦୁଃଖ-ଅନ୍ଧକାରେ ନାମ ସୁଧାକର 

ହୋଇ ତ କିରଣ ନ ଛାଡ଼ିଲ ।

ଏମନ୍ତ ନିଷ୍ଠୁର ହୃଦୟ କଠୋର 

ନିରାଶ-ଘନରେ ଉହାଡ଼ିଲ ।୧୦।

ସୁଖ-ସିନ୍ଧୁ ବୋଲି ଶରଣ ମୁଁ ଗଲି 

ବେଳୁ ବେଳୁ କଚାଡ଼ିଲ କୂଳେ ।

ପତିତ ପାବନ ଅପ୍ରାଧ ଭଞ୍ଜନ 

ସତ୍ୟକୁ କିଏ ଛାଡ଼ିବ ଢାଳେ ।୧୧।

ତୁମ୍ଭେ ସତ୍ୟବାଦୀ ପଣକୁ ଅସିଦ୍ଧି 

କଲେ କେହୁ ମର୍ତ୍ତ୍ୟେ ରହିବ କି ।

କହେ ନିତ୍ୟାନନ୍ଦ ମୂଢ଼ ମହାମନ୍ଦ 

କ୍ଷିତିର ସାମନ୍ତ ନୋହିବ କି ।୧୨।

ଜଗନ୍ନାଥ ଭଜନ - ଚାଲ ଦେଖିବା ସଜନୀ

ଗାୟକ - ପ୍ରଫୁଲ୍ଲ କର 

ଭଜନର ୟୁଟ୍ୟୁବ୍ ଲିଙ୍କ୍ - https://www.youtube.com/watch?v=H6_DDBV6f1Y

ଫଟୋ କ୍ରେଡ଼ିଟ୍ - ୱିକିମିଡ଼ିଆ କମନସ୍ 

ଚାଲ ଦେଖିବା ସଜନୀ ।

ପହଣ୍ଡି ବିଜୟେ ବଳିଆର ଭୁଜ ହେବେଣି ।।

ସୁରଙ୍ଗ ଅଧର ଶୋଭା ଦିଶୁଥିବ ସଜନୀ ।

ଭାସୁଥିବା ପରି ଜଳେ ପଦ୍ମରାଗ ତରଣୀ ।

ଛନ୍ଦିହୋଇଥିବେ ପ୍ରଭୁ ପିନ୍ଧି ପୀତପତନୀ ।

ଝୁଲୁଥିବ ମସ୍ତକରେ ପୁଷ୍ପଝରା ମଣ୍ଡନୀ ।୧।

ଲାଗିଥିବ ଭାଲେ ନବରତ୍ନ ଚିତା ସାଜେଣି ।

ଗଗନେ ଉଦିତ ହେଲା ପରି ପ୍ରାତ ତରଣି ।

ଅଗ୍ରେ ମିଳି ନୃତ୍ୟ କରୁଥିବେ ଢ଼ଳି ଖଟଣି ।

ଆସୁଥିବେ ପ୍ରଭୁ ରଙ୍କେ କରି ଢଳି ଚାହାଣି ।୨।

ସଙ୍ଗେ ଥିବେ ଭାଇ ବଳରାମ ଭଦ୍ରା ଭଗିନୀ ।

ଆଜ ଚକାନୟନର ଚତୁରଙ୍ଗ ସାଜେଣି ।

କହେ ଶ୍ୟାମ ଏ ଉତ୍ସବ ନାଗି ତିନି ଧରଣି । 

ଧନ୍ୟ ହେବ ନେତ୍ର ତୋର ଆଗୋ ପ୍ରାଣ ମିତଣୀ ।୩। 

ଜଗନ୍ନାଥ ଭଜନ - ତୁମ୍ଭ ପରା ପ୍ରଭୁ ଥାଉଁ ଥାଉଁ ମୁଁ ଯେ 

କବି - ନିତ୍ୟାନନ୍ଦ ଦାସ

ଗାୟକ - ନିମାଇଁଚରଣ ହରିଚନ୍ଦନ 

ଭଜନର ୟୁଟ୍ୟୁବ୍ ଲିଙ୍କ୍ - https://www.youtube.com/watch?v=kmwXNlSW7LA

ଫଟୋ କ୍ରେଡ଼ିଟ୍ - ୱିକିମିଡ଼ିଆ କମନସ୍ 

ତୁମ୍ଭ ପରା ପ୍ରଭୁ ଥାଉଁ ଥାଉଁ ମୁଁ ଯେ

ବୁଡିଲି ବିପଦ ଜଳେ ।  

ଏତେ ବେଳେ ପ୍ରଭୁ ଡାକ ନ ଶୁଣୁଛ 

ଯେତେ ଡାକିଲେ ବିକଳେ ।

ମହାପ୍ରଭୁ ହେ ।୧।

ଜଳମୀନ ଯେହ୍ନେ ମିହିର ତେଜରେ 

ତେମନ୍ତ ହେଲାଣି ଦଶା ।

ଏଥିରେ କିଞ୍ଚିତେ କରୁଣା ନୋହୁଛି 

ମୁଁ ଯେ କରିଛି ଭରସା ।

ମହାପ୍ରଭୁ ହେ ।୨।

ବିପଦ ଧାଡ଼ି ଯେତେ ମାଡ଼ି ପଡ଼ୁଛି 

କେତେ ହେଁ କହିବି ମନେ ହେଜି ।

ସିଂହ ମୃଗ ଆଗେ ପରାୟେ ତରଙ୍ଗେ

ଧଇର୍ଯ୍ୟ ବନ୍ଧ ଯାଉଛି ଭାଜି ।୩।

ଯେତେ ରୂପେ ଦଣ୍ଡ ଦୁଃଖ ଦେଉଅଛ 

କହିବାକୁ ମୋତେ ଆସୁନାହିଁ ।

ଯେତେ ଥିଲା ଆଶ ଆହେ ପୀତବାସ 

ଏମ୍ଭେ ତୁମ୍ଭ ନିରାଶକୁ ଚାହିଁ ।୪।

ପ୍ରଭୁ ହୋଇ କୃପା ନ କରୁଛ କିମ୍ପା 

ଦୀନ ପତିତ ଜନଙ୍କ ଠାରେ ।

ଅତି ହିଁ ନିରାଶପଣ କରିବାରେ 

ଭାସିଗଲି ଶୋକନଦୀ-ଧାରେ ।୫। 

ଥାଉଁ ପ୍ରଭୁପଣ କରୁଣା କୃପଣ 

ହେବାରୁ ନୀତି କି ନ ଆସଇ ।

ବୁଡୁଥିଲେ ଭେଳା ତହିଁ କଲେ ହେଳା 

ଦାରୁଣପଣ କି ନ ହୁଅଇ ।୬।

କରୁଣା-ନାବିକ-ନାବ ଥାଉଁ କୂଳେ 

ଖେଦ ଜଳଧିରେ ଗଲି ବୁଡ଼ି ।

ତରଳ-ତରଙ୍ଗ-ଭଉଁରୀ-ପ୍ରଖର

ଏମନ୍ତ ନଦୀରେ ଦେଇ ଛାଡ଼ି ।୭।

ମୁଁ ଯେ ମଲେ ମଲି ଭାସିଗଲେ ଗଲି 

ତୁମ୍ଭକୁ ସିନା ଏ ଅସୁନ୍ଦର ।

ତୁମ୍ଭ ନାମ ଧରି ହେବା ଏତେ ସରି 

ଜଗତେ କିବା ବୋଲିବେ ନର ।୮।

ମୋର ଏ ଦୁର୍ଗତି ଯେତେ ନ ବାଧଇ

ତୁମ୍ଭ ନିନ୍ଦା-ଲାଜେ ମରୁଅଛି ।

ପୂର୍ବର କରୁଣା ଏବେ ଦେଖି ଉଣା 

ଦିବା ନିଶି ମନେ ଗୁଣୁଅଛି ।୯।

ନାନା ରୂପେ ଶାସ୍ତି ଦେଇ ଦୁଃଖ ହସ୍ତୀ 

ଦନ୍ତରେ ଗୁନ୍ଥିବା ମନ କଲା ।

ବିପତ୍ତି-କରୀ-ନାଶନ ତୁମ୍ଭ ବାନା 

କିମ୍ପାଇ ନୀଳାଦ୍ରି ସିଂହ ହେଲା ।୧୦।

ଧଇର୍ଯ୍ୟ-କମଳ-ବନକୁ ମୋହର ଼

ଧ୍ୱଂସି ପକାଉଛି ପ୍ରବଳରେ ।

ରଖ ରଖ ପ୍ରଭୁ ପ୍ରମତ୍ତ କେଶରୀ 

ବୋଲି ଜଣାଉଛି ବିକଳରେ ।୧୧।

କେବେ ହେଁ କରୁଣା ନଦୀ ନ ବହିଲା 

ବଢ଼ିଲା ସଙ୍କଟ ଗିରିବର ।

କହେ ନିତ୍ୟାନନ୍ଦ କର୍ମହୀନ ମନ୍ଦ

ସଦୟ-କୁଳିଶେ ନାଶ କର ।୧୨।

ଜଗନ୍ନାଥ ଭଜନ - ମଣିମା ଶୁଣିମା ହେଉ ଗରିବ ଡାକ 

କବି - ସଦାନନ୍ଦ କବିସୂର୍ଯ୍ୟ ବ୍ରହ୍ମା 

ଗାୟକ - ପ୍ରଣବକିଶୋର ପଟ୍ଟନାୟକ 

ସଙ୍ଗୀତ - ବାଳକୃଷ୍ଣ ଦାସ 

ଭଜନର ୟୁଟ୍ୟୁବ୍ ଲିଙ୍କ୍ - https://www.youtube.com/watch?v=fFuzw-lVdsg

ଫଟୋ କ୍ରେଡ଼ିଟ୍ - ୱିକିମିଡ଼ିଆ କମନସ୍ 

ମଣିମା ଶୁଣିବା ହେଉ ଗରିବ ଡାକ ।

ନିରକ୍ଷ ଜନକୁ ରଖ ପଙ୍କଜ ମୁଖ ।।

କୃପାସାଗର କାହିଁକି ମୋ ବେଳକୁ ଗଲା ଶୁଖି ।

ଜାଣିଲି ମୋ କର୍ମ ବାଙ୍କ ନୁହ ସଳଖ ।୧।

ଆତଙ୍ଗ ନାଶନ ବାନା ନ ଶୁଣ ଭୃତ୍ୟ ବେଦନା 

ଏବେ ହୋଇଯିବ ମନା କେ ଦେବ ଡାକ ।୨।

ଦାସ ଯେବେ ନାଶ ଯିବ କ୍ଷିତିରେ ଅକୀର୍ତ୍ତି ହେବ ।

କୀରତିଚନ୍ଦ୍ରରେ ଲାଗିଯିବ କଳଙ୍କ ।୩।

କହେ ସଦାନନ୍ଦ ଛାର ନାହିଁ ଆନ ପ୍ରତିକାର ।

ଏ ଦୀନ ଅବସ୍ଥା ମୋର ନେତ୍ରେ ନ ଦେଖ ।୪। 

ଜଗନ୍ନାଥ ଭଜନ - ବାଧିଲା ଜାଣି କ୍ଷମା 

କବି - ବଳଦେବ ରଥ 

ଗାୟକ - ପ୍ରଫୁଲ୍ଲ କର 

ଭଜନର ୟୁଟ୍ୟୁବ୍ ଲିଙ୍କ୍ - https://www.youtube.com/watch?v=HlaVLecKiLI

ଫଟୋ କ୍ରେଡ଼ିଟ୍ - ୱିକିମିଡ଼ିଆ କମନସ୍ 

ବାଧିଲା ଜାଣି କ୍ଷମା କର ନୋହିଲେ ରମାରମଣ ଦଣ୍ଡେ ଦିଅ ଟାଳି ।

ତୁମ୍ଭକୁ ଜଗନ୍ନାଥ ଆଜ ମୋ ମନୋରଥ ଭରତି କରି ଦେବି ଗାଳି ।

ହେ କୃପାନିଧି !

କରୁଣା ସିନ୍ଧୁ ବୋଲି କରି, କହନ୍ତି ବୁଧେ ଡରି ମରି ।

କାଳ ସର୍ପ ଆପଣ, କବଳ ପ୍ରାଣ ପବନମାନଙ୍କୁ ସବୁରି ।

ହେ କୃପାନିଧି ।୧।

ଜଳଧି ଅନ୍ତେ ନିଜ ଘର ଦେବାଧିରାଜ ବୁଡାଇ ଦେଇଛ ଆପଣ ।

ତୁମ୍ଭରି ସିନା ଘେନ ଆଶ୍ଚର୍ଯ୍ୟ ନୁହେଁ ଆନ ଜନର ଘରବୁଡା ପଣ ।  

ହେ କୃପାନିଧ୍ !

ଭୁଜଙ୍ଗ ସାମ୍ୟ ଆମ୍ଭ ତୁଲେ ବତାଅ ବୋଲି ଆଜ୍ଞା ଦେଲେ ।

ମୁଁ ନୁହେଁ ଘର ବୁଡା ବତାଇବାକୁ ଛିଡା ହୋଇଛି ବତାଇବି ଭଲେ ।

ହେ କୃପାନିଧି ।୨। 

ତାହାକୁ ବୋଲି ଚକ୍ରୀ ଚକ୍ର ଥିବାରୁ ଚକ୍ରୀ ତୁମ୍ଭେ ତ ବୋଲାଅ ମଣ୍ଡଳେ ।

ବୋଲାଇ କୁଣ୍ଡଳୀ ସେ ଆପଣ ତ ବିଶେଷେ ଭୂଷିତ ମକର କୁଣ୍ଡଳେ ।

ହେ କୃପାନିଧି !

ଅଦୃଶ୍ୟ ହେବାରୁ ତା ପାଦ ତାହାକୁ ବୋଲି ଗୂଢପଦ ।

ଆପଣା ଚରଣ ତ ବିରଞ୍ଚି କୁ ଗୁପତ କାହିଁ ତା ଠାରୁ ତୁମ୍ଭ ଭେଦ ।

ହେ କୃପାନିଧି ।୩।

ହେବ ବା ଅବଧାନେ ତାହାକୁ ତ୍ରିଭୁବନେ ବୋଲନ୍ତି କାକୋଦର ନରେ ।

ଏ ତ୍ରପିଷ୍ଟକ ଯାକ ମଧ୍ୟେ  ଗୋଟିଏ କାକ ନାହିଁ କି ତୁମ୍ଭରି ଉଦରେ ।

ହେ କୃପାନିଧି !

ବିବରେ ସେ ଅତି ଲମ୍ପଟ ବିବର ବିହଙ୍ଗମ ରାଟ ।

ବିଧିରେ ସେ ଲମ୍ପଟ ଆପଣ ତ ସେ ପଟ ପଟଳେ ହୋଇଅଛ ସ୍ଫୁଟ ।

ହେ କୃପାନିଧି ।୪।

କାନ ନ ଥାଇ ଆଖି ଭୁଜଙ୍ଗ ଠାରେ ଦେଖି ନୟନଶ୍ରବା ବୋଲି ତାକୁ 

କହ କମଳାନନ କାହିଁଛ‌ି ତୁମ କାନ ସର୍ପ ବୋଲି ଚଳିବାକୁ

ହେ କୃପାନିଧି !

ଫଣି କାୟାକୁ ବୋଲି ଭୋଗ ଥିବାରୁ ସେ ଦୁଇ ସଞ୍ଜୋଗ ।

ତାହାକୁ ବୋଲି ଭୋଗୀ, ତୁମ୍ଭେ କି ନୁହିଁ ଭୋଗୀ କରୁ ଯା ଅଛ ମହାଭୋଗ ।

ହେ କୃପାନିଧି ।୫।

ଯେବେ ଭୁଜଙ୍ଗ ନୁହଁ କାଳୀୟ ଠାରେ ଦ୍ରୋହ କଲ କାହିଁକି ଏଡେ କରି ।

କେତେ ନ ଥିଲେ ଗୋପେ ତୁମ୍ଭେ କାହିଁକି କୋପେ ତାହାଙ୍କୁ ଦେଲ ପ୍ରାଣେ ମାରି ।

ହେ କୃପାନିଧି !

ତାହାରି ନାମେ ତୁମ୍ଭ ନାମ ଅଦ୍ୟାପି ହୋଇଛି ଜନମ ।

ଯେବେ ସ୍ୱଗୋତ୍ର ଦ୍ରୋହ ନ ଥାନ୍ତା ନାଥ କହ କିପାଇଁ ହୁଅନ୍ତା ଏ ଭ୍ରମ ।

ହେ କୃପାନିଧି ।୬।

ଜାଣି ବାଳୁତ କାଳୁ ଲବଣୀ ହାଣ୍ଡି ତଳୁ ଧରି ପାଶରେ ହୃଦେ ଭିଡ଼ି ।

ଦୟା ନ କରି ତିଳେ ଯାମଳା ତରୁ ତଳେ ଜନନୀ ନେଇ ଦେଲେ ଛାଡ଼ି ।

ହେ କୃପାନିଧି ।

ଯେତକ ଥିଲା ଗର୍ଭେ ପଡ଼ି ଜୀର୍ଣ୍ଣ ହେବାକୁ ହେଲ ଭିଡ଼ି ।  

ତିନି ଜଗତଯାକେ ଜାଣି ତ ଥିବେ ଲୋକେ ସେ ତରୁ ଯିବାର ଉପୁଡ଼ି ।

ହେ କୃପାନିଧି ।୭।

ବ୍ରହ୍ମା-ଶଙ୍କର ମୁଖ୍ୟ ଦେବଙ୍କ ଠାରେ ମୋକ୍ଷ-ପ୍ରଧାନ ଧନ ଗୁଣ କଲ ।

ପତିତକୁ ନ ପୋଷିବାର କ୍ରମରେ ଆଶୀ-ବିଷ ପରାଏ ଆଭାସିଲ ।

ହେ କୃପାନିଧି !

ଅସାବଧାନେ ଗଲେ ମିଳି ଗୋଟିକୁ ଗିଳଇ କୁଣ୍ଡଳୀ ।

ଅଗଣିତ ବ୍ରହ୍ମାଣ୍ଡ ହାଣ୍ଡି ମଣ୍ଡଳୀ ରୁଣ୍ଡ କରି ଆପଣ ଅଛି ଗିଳି ।

ହେ କୃପାନିଧି ।୮। 

ଅହି ତ ବୋଲାଏ ସେ ଏକ ଅକ୍ଷର କୋଷେ ଅ-ହିତ ବୋଲାଅ ନିପୁଣ ।

କ‌ଂସ ପ୍ରମୁଖାସୁର ବିପକ୍ଷମାନଙ୍କର ଅହିତ ହୋଇଛ ଆପଣ ।

ହେ କୃପାନିଧି !

ଜଗତେ ଧରି ଯେବେ ଅହି ଘଟ ଗୋଟିକେ ନେଇ ଥୋଇ ।

ଅଛ ଯାବତ ଘଟେ ବଞ୍ଚାଅ ଯେ କପଟେ ମୋର ହାବୁଡ଼ୁ ଯିବ କାହିଁ ।

ହେ କୃପାନିଧି !୯।

କେଉଁ ଶିଶୁ କାମିନୀ ସ୍ତନ୍ୟ ପାନରୁ ଘେନି ଜୀବନ ଯାଇଛି ଜଗତେ ।

ଶୋଷି ପୁତନା ପ୍ରାଣ ଘେନିବାର ଜୀବନ ନାହିଁକି ତୁମ୍ଭ ଦିବ୍ୟ ଚିତ୍ତେ ।

ହେ କୃପାନିଧି !

ସକଳ କଥା ମୋର ଦେଖି ଅଛନ୍ତି ଲକ୍ଷ ଲକ୍ଷ ସାକ୍ଷୀ ।

ବ୍ରଜେ ଭୁଜଙ୍ଗ ଚାଲି କରି ମୁଁ ନାହିଁ ବୋଲି ଛୁଅଁ ତ ଥରେ ଚକା ଆଖି ।

ହେ କୃପାନିଧି ।୧୦।

ନୁହେଁ ଆବାସ ଘର ମାନସ ସରୋବର ଶୁଭିଲା ନାଗେଶ୍ୱର ରବ ।

କ୍ଷଣେ ନ ରହି ଧାଇଁ ଗଲଟି କାହିଁ ପାଇଁ ଆଉ ନ ଥିଲେ କେତେ ଦେବ ।

ହେ କୃପାନିଧି !

ମନ୍ତ୍ର ଜାଣିବା ଲୋକେ ବଶ ହୁଅନ୍ତି ସବୁ ଆଶୀ-ବିଷ ।

ମନ୍ତ୍ରାଧୀନ ତ ତୁମ୍ଭେ ବଞ୍ଚାଉଅଛ ଦମ୍ଭେ ଭୁଜଙ୍ଗ ନୁହ ଆଉ କିସ ।

ହେ କୃପାନିଧି ।୧୧।

କହଇ କବିସୂର୍ଯ୍ୟ ନାଥ ନୁହ ଅଧୈର୍ଯ୍ୟ ଏଣିକି ମହତ ନ ଯାଉ ।

ମୁଁ ତୁମ୍ଭ ପରିଚାର ଜାଣିଲେ କି ବିଚାର ଇତରେ ନ ଜାଣନ୍ତୁ ଆଉ ।

ହେ କୃପାନିଧି !

ଯେତେବେଳେ ମୋ ଅନ୍ତ ହେବ ଏତିକି ମାତ୍ର ମୋତେ ଦେବ ।

ପରତେ ରାଟ ଦ୍ୱାର ସୀମାରୁ ପରିହାର କରାଇ ଯହିଁ ତହିଁ ନେବ ।

ହେ କୃପାନିଧି । ୧୨।

ଜଗନ୍ନାଥ ଭଜନ - ପତିତଜନଙ୍କୁ ଉଦ୍ଧାରିବା ପାଇଁ

କବି - ନିତ୍ୟାନନ୍ଦ ଦାସ 

ଗାୟକ - ନିମାଇଁ ଚରଣ ହରିଚନ୍ଦନ  

ଭଜନର  ୟୁଟ୍ୟୁବ୍ ଲିଙ୍କ୍ - https://www.youtube.com/watch?v=mB6vjUNO0IM

ଫଟୋ କ୍ରେଡ଼ିଟ୍ - ୱିକିମିଡ଼ିଆ କମନସ୍ 

ପତିତ ଜନଙ୍କୁ ଉଦ୍ଧାରିବା ପାଇଁ ଉଡାଉଅଛ ପତାକା ।

ବାହୁ ଟେକି ତୁମ୍ଭେ ବସି ଚାହୁଁ ଚାହୁଁ ବିପତ୍ତି କରୁଛି ଡକା ।।

ମହାପ୍ରଭୁ ହେ !

ନାଶ ଗଲେ ନାଥ ପରେ କି କରିବ କରୁଣା ଭଣ୍ଡାର ଫେଇ ।

ଦୁଃଖୀ ଗଲେ ନାଶ ଅର୍ଜିବ କି ଯଶ ପଛେ ଚଉବର୍ଗ ଦେଇ ।

ମହାପ୍ରଭୁ ହେ !

ଘୋର ନବଘନ ଥାଉ ଯେବେ ଦୀନ ଚାତକ ଜୀବନ ହରାଇବ ।

ସମୁଦ୍ରେ ବରଷି ଘୋର ଜଳରାଶି ଚାତକ ବନ୍ଧୁ କି ବୋଲାଇବ ।୧।

ମାଳତୀ ବକୁଳ ବିକଚ କମଳ ବନ ଥିବ ଅଳି ଯେବେ ମରି ।

ପୂର୍ଣ୍ଣ ସୁଧାକର ଅନାଇଁ ଚକୋର ମାଳିକା ଯେବେ ମରିବେ ଝୁରି ।୨।

କଳ୍ପଲତା ତଳେ ଥାଇ ଯେ ମୁଁ ଫଳେ ନିରାଶ ହୋଇବା କେଡ଼େ ଲାଜ ।

ରତ୍ନାକର ହୋଇ ରତ୍ନରଙ୍କ ଯହିଁ ଏ କଥା କେମନ୍ତ ଦେବରାଜ ।୩। 

ଥାଉ ଗଙ୍ଗା କୂଳେ ପରାଣ ବିକଳେ ତୃଷାରେ ଯେବେ ହାରିବ ପ୍ରାଣ ।

ଦିନମଣି ଥିବ ଅନ୍ଧାର ହୋଇବ ଏ କଥା ପ୍ରଭୁ ମନକୁ ଆଣ ।୪।

ସାମନ୍ତ ଯେ ଚତୁବର୍ଗ ଅଧିକାରୀ ଲକ୍ଷ୍ମୀ ପରିଚାରୀ ଥିବେ ହୋଇ । 

ଏମନ୍ତେ ସାମନ୍ତେ ଆଶ୍ରା କରି ଭୃତ୍ୟ ଭିକ୍ଷା ମାଗୁଥିବ ଦୁଃଖ ପାଇ ।୫।

ଏଥୁ ଅଧିକ କି ଅଛି ଲୋକହସା ଆଉ କି ରହିଲା ପ୍ରଭୁ ଆଣି ।

ଝମକିଲା ସିଂହ ପ୍ରାୟ ଝମକିବ ବିଅର୍ଥ ଧରିବା ଚକ୍ରପାଣି ।୬।

ଦିନବନ୍ଧୁ ବୋଲି ନାମ ଯେ ବହିଛ ଏହା ନ ଚେତ କି ଭାବଗ୍ରାହି ।

ଏ ନାମ ଏବେ ଏଣିକି ନ ବହିବ ଚକ୍ର ପରୁ ନେତ ଥୁଅ ନେଇ ।୭।

ତେବେ ତୁମ୍ଭକୁ କେ କାହିଁକି କହିବ କର୍ମ ଆଦରି ସହିବ ଦୁଃଖ ।

ନିରାଶ ଜଳଧି ତୁମ୍ଭ ନାମ ସିଦ୍ଧି ଜଗତରେ ବାଜିଯିବ ଡାକ ।୮।

ଆଉ ଭୁବନରେ ଠାକୁର ଖୋଜିବା ତୁମ୍ଭ ପରି କେହି ଥିଲେ ଜଣେ ।

ଦୁଃଖିଲୋକଙ୍କର ଦୁଃଖ ହରୁଥିବେ କୃପା ବିଲୋକନ-ନେତ୍ର-କୋଣେ ।୯।

ସୁଦର୍ଶନ ନାମେ ଚକ୍ର ବହିଥିବେ ଟେକି ବାହୁରେ ଦକ୍ଷିଣ କରେ ।

କହେ ନିତ୍ୟାନନ୍ଦ ଅପରାଧୀ ନନ୍ଦ ମୋହର ଶରଣ ତାଙ୍କ ଠାରେ ।୧୦। 

ଜଗନ୍ନାଥ ଭଜନ - କେଣେ ଘେନି ଯାଉଛ ଜଗନ୍ନାଥଙ୍କୁ 

କବି - ସାଲବେଗ 

ଗାୟକ - ଅକ୍ଷୟ ମହାନ୍ତି 

ଭଜନର ୟୁଟ୍ୟୁବ୍ ଲିଙ୍କ୍ - https://www.youtube.com/watch?v=NlatVl8IOfo

ଫଟୋ କ୍ରେଡ଼ିଟ୍ - ୱିକିମିଡ଼ିଆ କମନସ୍ 

କେଣେ ଘେନି ଯାଉଛ ଜଗନ୍ନାଥଙ୍କୁ

ଆମେ ଦ୍ରଶନ କରିବୁ କାହାକୁ ।।

ଖୁଣ୍ଟିଆ ଡାକ ଦେଲେ ପହଣ୍ଡି ବିଜେ ହେଲେ

ବିଜୟ କର ପ୍ରଭୁ ଚାପକୁ ।୧।

କୁଳବଧୂଙ୍କ ରଡ଼ି ପଣ୍ଡାଏ ଗଡ଼ାଗଡ଼ି 

ବିଧାତା ବାମ ହେଲା ଓଡ଼ିଶାକୁ ।୨।

ବଡ଼ ଦେଉଳୁ ବାହାରି ଶଗଡ଼ିରୁ ବିଜେ କରି 

ରେଣୁ ଯେ ପଡ଼ୁଥିବ ଶ୍ରୀମୁଖକୁ ।୩।

କହଇ ସାଲବେଗ ନିର୍ମାଲ୍ୟ କାହୁଁ ହେବ 

ଧିକ ଧିକ ଆମ୍ଭ ଜୀବନକୁ ।୪।

ଜଗନ୍ନାଥ ଭଜନ - ଜଗବନ୍ଧୁ ପରି ଜଣେ ସାମନ୍ତ 

କବି - ଦୀନକୃଷ୍ଣ ଦାସ 

ଗାୟକ - ଭିକାରୀ ବଳ 

ଭଜନର ୟୁଟ୍ୟୁବ୍ ଲିଙ୍କ୍ - https://www.youtube.com/watch?v=5twqhYBn0yg

ଜଗବନ୍ଧୁ ପରି ଜଣେ ସାମନ୍ତ 

ନାହିଁ ନାହିଁ ତ ।

ଚଉଦ ଭୁବନ ବାରତା ଜାଣନ୍ତି 

ଚକ୍ରରେ ଛେଦନ୍ତି ଆରତ ।।

ଯେତେବେଳେ କୃଷ୍ଣ ଗୋପପୁରେ ଥିଲେ 

ଅକୃର ଆଣିଣ ଗଲା ତ ।

ଗାଇ ଦୁହୁଁ ଦୁହୁଁ କେଶ ଫିଟିଗଲା

ଚତୁର୍ଭୁଜ ହେଲେ ଅନନ୍ତ ।୧।

ସୁଗ୍ରୀବର ସଙ୍ଗେ ମଇତ୍ର ହୋଇଣ 

ବାଳୀକି ବିନାଶ କଲେ ତ ।

ରାବଣ ଭ୍ରାତା ଯେ ଶରଣ ପଶିଲା 

ଲଙ୍କାଗଡ଼ ତାକୁ ଦେଲେ ତ ।୨।

କୁରୁସଭା ତଳେ ଦ୍ରୌପଦୀ ଚିନ୍ତିଲା  

କୋଟି ବସ୍ତ୍ର ଦିଆଇଲେ ତ । 

ଭାରତ ଯୁଦ୍ଧରେ ଭରତିଆ ପକ୍ଷୀ

ଘଣ୍ଟ ଘୋଡାଇ ରଖିଲେ ତ ।୩।

ଏମନ୍ତ ସାମନ୍ତ ତ୍ରିଭୁବନେ ନାହିଁ

ନାଶନେ ଆରତି ଆରତ ।

କହେ ଦୀନକୃଷ୍ଣ ଦାସ ଯେ ଶ୍ରୀକୃଷ୍ଣ

ପଦ୍ମ ପାଦେ ଚିତ୍ତ ଧ୍ୟାୟି ତ ।୪। 

ଜଗନ୍ନାଥ ଭଜନ - ଭୁଜତଳେ ମୋତେ ରଖ ମହାବାହୁ

କବି - ବୀରକେଶରୀ ଦେବ 

ଗାୟକ - ପ୍ରଫୁଲ୍ଲ କର 

ଭଜନର ୟୁଟ୍ୟୁବ୍ ଲିଙ୍କ୍ -https://www.youtube.com/watch?v=BsUZ_KhhJRQ

ଫଟୋ କ୍ରେଡ଼ିଟ୍ - ୱିକିମିଡ଼ିଆ କମନସ୍ 

ଭୁଜ ତଳେ ମୋତେ ରଖ ମହାବାହୁ

ବାହୁ ତଳେ ମୋତା ରଖ ।

ବିପୁଳ ଭୁଜ ବିସ୍ତାରି ଦେଲେ ଛାର

କି କରି ପାରିବ ଦୁଃଖ ।।

ସଜ ହୋଇଥିବ ନନ୍ଦିଘୋଷ ରଥ ୁ

ମୁଁ ଥିବି ତୁମ୍ଭ ସେବାରେ ।

ତୁମ୍ଭେ ଦୀନବନ୍ଧୁ ନିର୍ଦ୍ଦୟ ହୋଇଲେ

କି ବୋଲିବେ ଏ ସଂସାରେ ।୧।

ଏ ଗଜବାଜି-କ୍ଷିତିପତି ସମ୍ପତ୍ତି 

ରତିଏ ରୁଚଇ ନାହିଁ ।

ଭୁବନମୋହନ ଚକାନୟନକୁ 

ଯେତେବେଲେ ଦିଏ ଚାହିଁ ।୨।

ଦିନକୁ ଦିନ ତ ଦୁଃଖ ଅତିରେକ

ସୁଖ ତ ଦିଶଇ ନାହିଁ ।

ଭାସି ଯାଉଅଛି ଏ ଭବସାଗରେ 

ରକ୍ଷାକର ଭାବଗ୍ରାହୀ ।୩।

ଶ୍ରୀକ୍ଷେତ୍ର ନବରେ ମହା ଐୁଶ୍ୱର୍ଯ୍ୟରେ 

ଥିଲେ ହେ କମଳା ସାଇଁ ।

ବାଇଶି ପାବଚ୍ଛ ନ ଉଠିବା ଯାଏଁ 

 ଆନନ୍ଦ ନ ପାଏ କାହିଁ ।୪।

ସେବାରୁ ଅନ୍ତର ହେଲି ଯେବେ ପ୍ରଭୁ

ଏ ପ୍ରାଣ ଥିବ କିପାଇଁ ।

ଓହ୍ଲାଇ ନ ଦିଅ କିପାଁ ମୋ ମଥାରୁ 

ଜଞ୍ଜାଳ ଭାର ଗୋସାଇଁ ।୫।

ମୁଁ ଛାର ପତିତ ଭରସା ରଖିଛି

ଶ୍ରୀରଙ୍ଗା ଚରଣ ତଳେ ।

ଶ୍ରୀ ବିରକେଶରୀ ମହାରାଜା ଭଣେ

ଦୟା କର ଏତେ ବେଳେ ।୬।

ଜଗନ୍ନାଥ ଭଜନ - ମେଘ ମାଳାକୁ ନିନ୍ଦେ କଳାକୁ 

କବି - ହୃଦାନନ୍ଦ ଦାସ 

ଗାୟକ - ସୁବାସ ଦାଶ 

ଭଜନର ୟୁଟ୍ୟୁବ୍ ଲିଙ୍କ୍ - https://www.youtube.com/watch?v=VguViE37Im4

ଫଟୋ କ୍ରେଡ଼ିଟ୍ - ୱିକିମିଡ଼ିଆ କମନସ୍ 

ମେଘମାଳାକୁ ନିନ୍ଦେ କଳାକୁ

ଚାହାଁ ବାରେ ମନ ଚକାଡ଼ୋଳାକୁ ।।

ଏ ଭବ ସରିତେ ତରିଗଲେ ଭକ୍ତେ 

ଆଶ୍ରେ କରି ଯାର ନାମ ଭେଳାକୁ ।

ସଦାଶିବ ହର ହୋଇଲେ ଅମର 

କୋଳେ ଧରିଛନ୍ତି ଗିରିବାଳାକୁ ।

ଗୁନ୍ଥିମାଳାକୁ ପିନ୍ଧି ଗଳାକୁ 

ନାମ ଜପୁଛନ୍ତି କଳାଧଳାକୁ ।୧।

ସତ୍ୟରେ ଶ୍ରୀପତି ସମୁଦ୍ରକୁ ମନ୍ଥି 

ତହିଁରେ ଜାତ କଲେ କମଳାଙ୍କୁ ।

ଦେବାସୁର ଯୁଦ୍ଧେ ଅମୃତ ବିବାଦେ 

ମୋହିନୀ ହୋଇଲେ ଦେବଛଳାକୁ ।

ରାହୁ ଗଳାକୁ ଛେଦି ହେଳାକୁ

ମୋହକଲେ ମହାଦେବ ଭୋଳାକୁ ।୨।

ତ୍ରେତୟା ଯୁଗରେ ରାମ ଅବତାରେ 

ଭଜ ମନ ବାରେ  ରଘୁବଳାକୁ ।

ପାଇ ସୀତାଛଳ ଘେନି କପିବଳ 

ସିନ୍ଧୁରେ ବାନ୍ଧିଲେ ଶିଳା ଭେଳାକୁ । 

ଜାତଖେଳାକୁ ରଣସ୍ଥଳୀକୁ 

ରଣେ ଛେଦିଲେ ବିଶ୍ରବାବଳାକୁ ।୩।  

ଦ୍ୱାପର ଯୁଗରେ ଜନ୍ମି ଗୋପପୁରେ 

ଓପାଡ଼ି ପକାଇଲେ ଯାମଳାକୁ ।

କାଳିନ୍ଦୀରେ ପଶି କାଳୀଦର୍ପ ଧ୍ୱଂସି 

ନିବାରିଲେ ମହା ବିଷଜାଳାକୁ ।

ଯାଇ ମେଳାକୁ ରଙ୍ଗ ସ୍ଥଳୀକୁ

କପଟେ ମାଇଲେ ସେ ମଉଳାକୁ ।୪।

ଏ କଳି ଯୁଗରେ କଳ୍ପବଟ ମୂଳେ 

ମାଡ଼ି ବସିଛନ୍ତି ଲକ୍ଷେ ଶିଳାକୁ ।

ବିକାଇଲେ ଅନ୍ନ ନେଲେ ଜାତିଧର୍ମ

କେହି ନ ଖୋଜଇ କାହା ଧର୍ମକୁ ।

କ୍ଷେତ୍ରସ୍ଥଳକୁ ମୁକ୍ତି ଖଳାକୁ 

ଭାବେ ହୃଦାନନ୍ଦ ସନ୍ଥମେଳାକୁ ।୫। 

ଜଗନ୍ନାଥ ଭଜନ - ନ ଗଲୁ ମନ କ୍ଷେତ୍ରସ୍ଥଳକୁ 

କବି - ଭିକାରୀ 

ଗାୟକ - ଭିକାରୀ ବଳ 

ଭଜନର ୟୁଟ୍ୟୁବ୍ ଲିଙ୍କ୍ - https://www.youtube.com/watch?v=p5O_IoHgqCY

ଫଟୋ କ୍ରେଡ଼ିଟ୍ - ୱିକିମିଡ଼ିଆ କମନସ୍ 

ନ ଗଲୁ ମନ କ୍ଷେତ୍ରସ୍ଥଳକୁ 

ଧନ ଦାରାସୁତ ଆବୋରି ବସିଛୁ

କେହି ନୋହେ ସଙ୍ଗ ଗଲାବେଳକୁ ।।

ତୁଳସୀ ଚଉରା ଠାରେ ନୃତ୍ୟଲୀଳା ପ୍ରଦକ୍ଷିଣ କର ଯୋଡ଼ି କରକୁ ।

ମଧ୍ୟେ ପଞ୍ଚକୋଶୀ ପ୍ରଭୁଛନ୍ତି ବସି ସେଠାରୁ ଦେଖ ତୁ ନୀଳଚକ୍ରକୁ ।

ଧ୍ୱଜାଖଣ୍ଡକୁ ଚାହାଁ ଆଗକୁ ଚଉକିଛନ୍ତି ଅଠର ନଳାକୁ ।୧।

ସେ ଅଠର ନଳା ପଶ୍ଚିମରୁ ଜଳା ବହିଯା'ନ୍ତେ ପଥ ପୂର୍ବ ଭାଗକୁ ।

ଜନକପୁର ବାଲି ଆପେ ହରି ଚାଲି ସେ ରେଣୁ ନ ମିଳେ ବ୍ରହ୍ମା ଶିବଙ୍କୁ ।

ଧ୍ୟାୟି ତାହାଙ୍କୁ ଚଉବାହାକୁ ବଜାଏ ଡମ୍ବରୁ ଚଢ଼ି ଷଣ୍ଢକୁ ।୨।

ଧନ୍ୟ ବଡ଼ ଦାଣ୍ଡ ସର୍ବ ପାପ ଖଣ୍ଡ ସକଳ ତୀର୍ଥ ସେବନ୍ତି ତାହାକୁ ।

ଗୋରୁ ବିପ୍ର ମାରି ଗୁରୁ ପତ୍ନୀ ହରି ସେ ଠାବକୁ ଗଲେ ବହେ ପାପକୁ ।

ତଳେ ହସ୍ତକୁ ଦେଇ ମସ୍ତକୁ ଗଡ଼ଘାଲି ଶୁଅ ବଡ଼ ଦାଣ୍ଡକୁ ।୩।

ଛଣ ପୋତି ସାଧୁ ବୈଷ୍ଣବ ମହନ୍ତ କରୁଛନ୍ତି ଲୀଳା ଗାଇ ନାମକୁ ।

ଗଡ଼ୁଆ ଗଞ୍ଜାଇ ବିଡ଼ା ବିଡ଼ା ଖାଇ ଡାକୁଛନ୍ତି ସେ ମୁକତି ଧାମକୁ ।

ଚଉବାହାକୁ ଧ୍ୟାୟି ତାହାଙ୍କୁ ମିଳୁଛି ଅବଢ଼ା ଛେକ ବେଳକୁ ।୪।

ସେ ଅରୁଣ ସ୍ତମ୍ଭ ମେରୁ ସରି ଦମ୍ଭ ଦେଖ  ସିଂହଦ୍ୱାରେ ଗଜସିଂହକୁ ।

ବାଇଶ ପାବଚ୍ଛ ଲଗା ତହିଁ ହସ୍ତ କୈବଲ୍ୟ ପସରା ବେନି ପାଶକୁ ।

ଚାହାଁ ଆଗକୁ ବିକାକିଣାକୁ ବହି ନେଉଛନ୍ତି ବଡ଼ଦାଣ୍ଡକୁ ।୫।

ସେଠାବରୁ ଧୀରେ କଳ୍ପବଟ ମୂଳେ ଦେଖ ବଟପୁଟଶାୟୀ ପ୍ରଭୁଙ୍କୁ ।

ପଦାଙ୍ଗୁଳି ନେଇ ବଦନରେ ଦେଇ ହସୁଛନ୍ତି ଚାହିଁ ମାତା ମୁଖଙ୍କୁ ।

ତହିଁ ଆଗକୁ ଦକ୍ଷଭାଗକୁ ପାହାରୀ ରଖିଛି ଗଜମୁଖକୁ ।୬।

ମୁକତି ମଣ୍ଡପେ ବସିଛନ୍ତି ବିପ୍ରେ ପଢ଼ୁଛନ୍ତି ବେଦ ସ୍ମୃତି ଶାସ୍ତ୍ରକୁ ।

ସେ ରୋହିଣୀ କୁଣ୍ଡ ସର୍ବ ପାପ ଖଣ୍ଡ କାକ ପଡ଼ି ହେଲା ଚତୁର୍ଭୁଜକୁ ।

ଗଲା ସ୍ୱର୍ଗକୁ ଯାଅ ଆଗକୁ ବିମଳା ଦେଖ ପଶ୍ଚିମ ଭାଗକୁ ।୭।

ସେଠାରେ ହିରଣ୍ୟ କୋପେ ନାରାୟଣ ଚିନ୍ତା କର ବାରେ ହୃଦେ ତାହାଙ୍କୁ ।

ମାତା ସରସ୍ୱତୀ ତହିଁ ଆଗେଛନ୍ତି ନମସ୍କାର କର ତାଙ୍କ ପାଦକୁ ।

ତହିଁ ଆଗକୁ ଉତ୍ତର ଦିଗକୁ ମାତା ମହାଲକ୍ଷ୍ମୀ ଦେଖ ତାହାଙ୍କୁ ।୮।

ସେଠାବରୁ ଏକ କୁଣ୍ଡ ଯାଇ ଦେଖ ତହିଁ ନେଇ କ୍ଷେପ ବୀଜ ଗର୍ଭକୁ ।

ପର ପ୍ରାୟ ପ୍ରଭୁ ଫିଙ୍ଗି ଦେଉଅଛ ଏ ନିନ୍ଦା ହୋଇବ ଆଉ କାହାକୁ ।

ଚଉବାହାକୁ ଚାହାଁ ଉର୍ଦ୍ଧ୍ୱକୁ ଉଡୁଛି ପତକା ତିନିପୁରକୁ ।୯।

ଜଗମୋହନରେ ପଶି ଯାଅ ଥରେ ଆଲିଙ୍ଗନ କର ପକ୍ଷୀରଜକୁ ।

ରତ୍ନବେଦୀ ପରେ ଚାହିଁ ଦିଅ ଥରେ ଦେଖ କଳାଧଳା ମୁଖ ଶୋଭାକୁ ।

ପାଦ ତଳକୁ ଲଗା ଶିରକୁ ପରିକ୍ରମା କର ରତ୍ନବେଦୀକୁ ।୧୦।

ଆଗେ ରତ୍ନଦୀପ ଜଳେ ଦପଦପ ଥୟ ହୋଇ ଲୟ କର ତାହାକୁ ।

କହଇ ଭିକାରୀ ସାହା କେହି ନାହିଁ ଦଣ୍ଡେ ନ ଛାଡଇ ରହି ଧନ୍ଦାକୁ ।

ଧରି ନାମକୁ ଡାକେ ତୁମ୍ଭକୁ ଅନ୍ତେ ନୋହୁ ଗତି ଯମପୁରକୁ ।୧୧।

ଜଗନ୍ନାଥ ଭଜନ - ଜଗବନ୍ଧୁ ଅଙ୍କେ ରତନ ପଲଙ୍କେ

କବି - ଦୀନକୃଷ୍ଣ ଦାସ

ଗାୟକ - ସୁବାସ ଦାଶ 

ଭଜନର ୟୁଟ୍ୟୁବ୍ ଲିଙ୍କ୍ - https://www.youtube.com/watch?v=eU5F5hLj2Y4

ଫଟୋ କ୍ରେଡ଼ିଟ୍ - ୱିକିମିଡ଼ିଆ କମନସ୍ 

ଜଗବନ୍ଧୁ ଅଙ୍କେ ରତନ ପଲଙ୍କେ 

ପହୁଡ଼ିଲେ ସିନ୍ଧୁ ଜେମାଦେଇ ।।

ଦିବ୍ୟ ସୁବାସ ଜଳ ସୁନାଝରୀରେ 

ସୁବାସ ପଇଡ଼ ତଳେ ଥୋଇ ।

କୁସୁମ ବିଞ୍ଚଣୀ ଧରି କେ ବିଞ୍ଚଇ 

ବେନି ସଖୀ ହେଲେ କୁହାକୁହି ।୧।

ପୂଗ ଖଇର ଅଳାଇଚ ଲବଙ୍ଗ 

ଜାତି ଶ୍ରୀଫଳ କରିଣ ଏକ ଅଙ୍ଗ ।

ବିଚିତ୍ର କରିଣ ବିଡ଼ିଆ ସଜାଇ 

ରତ୍ନ ବଟାରେ ଖଞ୍ଜିଲେ ନେଇ ।୨।

କେ ବୋଲେ ଆରେ ମୀନନୟନା 

ଘନ କୋଳେ କି ଚନ୍ଦ୍ର ଚକୋର ସିନା ।

ଝଳି ଅଙ୍ଗରେ ମରକତ କୁନ୍ଦନ 

ମୀନାକୁ ଫୁଙ୍କି ଦେଇଛି ବିହି ।୩।

କହେ ଦୀନକୃଷ୍ଣ ସେ ଶୋଭାବର୍ଦ୍ଧନ 

ପଡ଼ିବି ଚରଣେ ହୋଇବେ ପ୍ରସନ୍ନ ।

ଯେଉଁ ଚରଣ କୋଟି ବ୍ରହ୍ମା ମୁନୀନ୍ଦ୍ର

ଯୋଗେନ୍ଦ୍ର ନ ପାନ୍ତି ଧ୍ୟାୟି ଧ୍ୟାୟି ।୪। 

ଜଗନ୍ନାଥ ଭଜନ - ଜଗନ୍ନାଥ କଲେ ଯା ଅନାଥ 

କବି - ବୀରକେଶରୀ ଦେବ

ଗାୟକ - ବିଜୟ କୁମାର ଜେନା 

ଭଜନର ୟୁଟ୍ୟୁବ୍ ଲିଙ୍କ୍ - https://www.youtube.com/watch?v=Zw3fm6wylRU

ଜଗନ୍ନାଥ କଲେ ଯା ଅନାଥରେ ଆଉ କେ ହରିବ ଦୁଃଖ ।

ଜଗତେ ଏ ପରା ପଡ଼ିଗଲେ ଧରା କି ବୋଲିବେ ପଦ୍ମମୁଖ ।।

ଯୋଗୀ ଅନୁରାଗୀ କହନ୍ତି କି ଲାଗି ଶରଣ ରକ୍ଷଣ ବାନା ।

ଅନ୍ଧକାର ଘୋଟି ଗଲେ ବକ୍ଷ ଫାଟି ନ ଚାହାନ୍ତି ଥରେ ଅନା ।୧।

ସାହା ଚଉବାହା ନୋହିଲେଟି ଯାହା ଦେଖି ମୋ ଜୀବନ ବ୍ୟଥା ।

ଚଉଦିଗ ପୂରି ଯିବଟି ପ୍ରସରି ଲୁଚିବ କାହିଁ ଏ କଥା ।୨।

ଯେହୁ ଅପବାଦ ନ ମଣି ପ୍ରମାଦ ମେଣ୍ଟାଇବ ମନସାଧ ।

ନାହିଁ ପ୍ରତିକାର ହୃଦୟ ମାତର ଲଭୁଥିବ ଅବସାଦ ।୩।

ଗଜପତି ବୋଲେ ପ୍ରଭୁ ଯେବେ ଭଲେ ନ ଶୁଣିବେ ମୋ ଗୁହାରି ।

ପୋଡୁ ମୋ  ନିଶ୍ୱାସ ପୋଡୁ ମୋ ବିଶ୍ୱାସ ବଡ ଦୟାମନ୍ତ ହରି ।୪।

ଜଗନ୍ନାଥ ଭଜନ - କାହିଁପାଇଁ ଚକାଡ଼ୋଳା 

କବି - ସାଲବେଗ 

ଗାୟକ - ଶ୍ୟାମାମଣୀ ଦେବୀ 

ଭଜନର ୟୁଟ୍ୟୁବ୍ ଲିଙ୍କ୍ - https://www.youtube.com/watch?v=UqWfWgQYdJk

ବୃନ୍ଦାବନର ମଦନମୋହନ ମନ୍ଦିର
ଫଟୋ କ୍ରେଡ଼ିଟ୍ - ୱିକିମିଡ଼ିଆ କମନସ୍ 

କାହିଁ ପାଅଁ ଚକାଡୋଳା କଲ ମୋତେ ମାନ ।

କଳାନିଧ୍ ବନମାଳୀ ନନ୍ଦେରି ନନ୍ଦନ ।୧।

କୁଞ୍ଜଲତା ତଳେ ମୁଁ ଯେ କରିବି ଶୟନ ।

ପ୍ରଦକ୍ଷିଣ କରୁଥିବି ଗିରି ଗୋବର୍ଦ୍ଧନ ।୨।

ରାଧାକୁଣ୍ଡେ ଶ୍ୟାମକୁଣ୍ଡେ କରିବି ସ୍ନାହାନ ।

ସାଫଲ୍ୟ କରିବି ମୁଁ ଯେ ମଣିଷ ଜୀବନ ।୩।

ଏ  ପିଣ୍ଡରେ ଜୀବ ଥିଲେ ଯିବି ବୃନ୍ଦାବନ ।

ଦର୍ଶନ କରିବି କୁଞ୍ଜେ ମଦନମୋହନ ।୪।

କହେ ସାଲବେଗହୀନ ଜାତିରେ ଯବନ ।

ରାଧାକୃଷ୍ଣ ଭଜୁ ଭଜୁ ଯାଉ ଏ ଜୀବନ ।୫। 

ଜଗନ୍ନାଥ ଭଜନ - କାଳିଆ କାହ୍ନୁ ଆଉ ବିଳମ୍ବ କର କାହିଁକି 

କବି - ଗୌରଚରଣ ଅଧିକାରୀ 

ଗାୟକ - ବାଳକୃଷ୍ଣ ଦାସ 

ଭଜନର ୟୁଟ୍ୟୁବ୍ ଲିଙ୍କ୍ - https://www.youtube.com/watch?v=X03n1diCRJE

ଫଟୋ କ୍ରେଡ଼ିଟ୍ - ୱିକିମିଡ଼ିଆ କମନସ୍ 

କାଳିଆ କାହ୍ନୁ ଆଉ ବିଳମ୍ବ କର କାହିଁକି ।

ବରଷକ ଥରେ ବିଜୟ ରଥରେ ପତିତ ତାରିବା ପାଇଁକି ।।

ଚଉଦ ବ୍ରହ୍ମାଣ୍ଡ ରୁଣ୍ଡ ହୋଇଛନ୍ତି ଦର୍ଶନ କରିବା ପାଇଁକି ।

ଅନେକ କାଳର ଦୁଃଖ ଉପେକ୍ଷିବେ କଳାଶ୍ରୀମୁଖକୁ ଚାହିଁକି ।୧। 

ଆଗେ ଗଜପତି ଉଭା ହୋଇଛନ୍ତି ଶିରେ ଯୋଡ଼ି କର ଦୁଇକି ।

ସୁନା ଶୋଧନୀରେ ମାର୍ଜନା କରନ୍ତି ପହଣ୍ଡି ବିଜୟେ ଭୂଇଁକି ।୨।

ଛତିଶା ନିଯୋଗ ଉଭା ହୋଇଛନ୍ତି ଯେ ଭାଜନ ହେବେ ଯହିଁକି ।

ଅାକାଶେ ଇନ୍ଦ୍ର ଅମର ବୃନ୍ଦ ପୁଷ୍ପ ବୃଷ୍ଟି କରୁଛନ୍ତି ତହିଁକି ।୩।

ତାଳଧ୍ୱଜ ରଥେ ବିଜୟ କରନ୍ତୁ କହିଦିଅ ବଡ଼ଭାଇଙ୍କି ।

ଦେବୀରଥ ବଡ଼ ସୁନ୍ଦର ଦିଶିବ ଭଉଣୀ ହଳଦୀ ମୁହୀଁକି ।୪।

ତୁମ୍ଭେ ପଛରେ ପଛକେ ଆସୁଥାଅ କରି ନବରଙ୍ଗ ଛଇକି ।

ମଥା ଦୋହଲାଇ ଟାହିଆ ହଲାଇ ଠାବେ ଠାବେ ରହିରହି କି ।୫।

ସେବକମାନଙ୍କ ଅଙ୍ଗ ଶ୍ରମଝାଳ ଗମଗମ ପଡ଼େ ବହି କି ।

ଝଙ୍କାଝଙ୍କି କରିବାରୁ ବାଧୁଥିବ ପରା ସୁକୁମାର ଦେହିକି ।୬।

ଦେବଦାସୀ ନାଟ ଉକୁଟ କରନ୍ତି ତା ତା ଧିମ୍ରିକିଟି ଥେଇକି ।

ବାଜେ ଖୋଳ ତାଳ ମହୁରୀ ମଞ୍ଜୁଳ ମର୍ଦ୍ଦଳ ତା ଧେଇ ଧେଇକି ‌।୭।

କା ନେତ୍ରୁ ଲୋତକ ବହେ ଥକଥକ କେହି ନାଚେ ଗୀତ ଗାଇକି ।

ଜଗମୋହନିଆ ଜଗତଜନଙ୍କୁ ଲଗାଇଛି ପ୍ରେମ ବାଇକି ।୮।

କେତେ ଖାଇବ କଦଳୀ କରମଙ୍ଗା ସରପୁଳୀ ଖଣ୍ଡଖଇକି ।

ନାଡ଼ି ବଡ଼ି ଗଜା ମନୋହର ଖଜା ଛେନାପୁର ବସାଦହିକି ।୯।

କେ କେତେ ଢ଼ମାଳୀ ଗୀତ ଶୁଣାଇବେ କେ କେତେ କରିବେ ଟାହିକି ।

ଖଣ୍ଡି ଚିରଦୁଃଖ ମଣ୍ଡି ଦେବେ ଆଜ କ୍ଷେତ୍ର ବଡ଼ଦାଣ୍ଡ ସାହୀକି ।୧୦।

ନ'ଦିନ ଅବଧି ଲକ୍ଷ୍ମୀକି ପ୍ରବୋଧି ଆସିଅଛ ପରା କହିକି ।

ତୁନି ହୋଇ ଆସ ଚିହ୍ନି ଅଛଟିକି ଜଳପତି ଜେମାଦେଈକି ।୧୧।

ଆହେ ଚକାଡୋଳା ବୃନ୍ଦାବନଲୀଳା ମନେ ଆଉ ପଡୁନାହିଁକି ।

ଆହେ ବଂଶୀଧରା ଚରାଇବ ପରା ଜଗତ-ଭଗତ-ଗାଈଙ୍କି ।୧୨।

ପାପ-ଅନ୍ଧକାର ଛାର କି କରିବ ଆଉ ସେ ପାରିବ ଛୁଇଁକି ।

ନୀଳଶଇଳ ଶିଖରୀ ପୂର୍ଣ୍ଣଚନ୍ଦ୍ର ଆସୁଛନ୍ତି ପରା ଉଇଁକି ।୧୩।

ଅପଲକ ଦୃଷ୍ଟି କର ରେ ମାନସ ଆଉ ଏ ସମୟ ପାଇକି ।

ଗଉରଚରଣ ପଶିଲା ଶରଣ ନନ୍ଦିଘୋଷ ରଥ ଛାଇକି ।୧୪।