ଜଗନ୍ନାଥ ଭଜନ - ଭଜ ନୀଳାଚଳ ବିହାରୀ

କବି - ଜୟ ସିଂହ 

ଗାୟକ - ବାଳକୃଷ୍ଣ ଦାସ 

ଭଜନର ୟୁଟ୍ୟୁବ୍ ଲିଙ୍କ୍ - https://www.youtube.com/watch?v=RZnL3udnJa0

ଫଟୋ କ୍ରେଡ଼ିଟ୍ - ୱିକିମିଡ଼ିଆ କମନସ୍ 

ଭଜ ନୀଳାଚଳ ବିହାରୀ ।

ଭବ ସିନ୍ଧୁ ଯେବେ ହୋଇବୁ ପାରି ।।

ଧବଳ ବରନା ଶ୍ରୀ ବଳଦେବଙ୍କ ପାଶେ ଛନ୍ତି ଦେଖ ବିଜୟ କରି ।

ମଧ୍ୟରେ ସୁଭଦ୍ରା ରୂପ ମନୋହର ଦର୍ଶନେ ଦୁରିତ ପାପ ନିବାରି ।୧।

କି ସୁନ୍ଦର ଚକାଡୋଳା ମୁଖପଦ୍ମ ନୟନମନକୁ ଦିଶେ ମାଧୁରୀ ।

ଭକ୍ତଜନ-ଚିତ୍ତଚାତକ-ଉଲ୍ଲାସ ବରସି ଆସେ କି କରୁଣା ବାରି ।୨।

ଜାଈ ଯୂଇ ମଲ୍ଲୀ ମାଳତୀ ସେବତୀ ଧଣ୍ଡାମାଳ ହୃଦେ ଅଛନ୍ତି ଭରି । 

ଚକାନୟନକୁ କି ଶୋଭା ପାଉଛି କାଳନ୍ଦୀ ଜଳେ କି ଆସେ ଲହରୀ ।୩।

ବ୍ରହ୍ମାଦି ନାରଦ ହେଲେ ଅଜ୍ରାମର ଯେଉଁ ପାଦପଦ୍ମ ଆଶ୍ରୟ କରି ।

ଧ୍ରୁବ ପ୍ରହଲ୍ଲାଦ ଅକ୍ରୂର ଉଦ୍ଧବ ତରି ଗଲେ ଯେଉଁ ନାମକୁ ଧରି ।୪।

ବୋଲେ ଜୟସିଂହ ନୃପତି କିଶୋର ଶ୍ରୀମତୀଶ୍ୱରଙ୍କୁ ବିନୟ କରି ।

ଯେବେ ନ ଭଜିବି ତାହାଙ୍କ ନାମକୁ ଅକାରଣେ ଜୀବ ଯିବ ବାହାରି ।୫।