ପୁରୁଣା ଗ୍ରାମୋଫୋନ ରେକର୍ଡ଼ ଗୀତ - 'ଆସ କିଏ ସେ ଯିବରେ'

ଶିରାରେ ଭାସୁଥିବା ରସାବଳି
ଫଟୋ କ୍ରେଡ଼ିଟ - ୱିକିମିଡ଼ିଆ କମନ୍ସ୍

ଆସ କିଏ ସେ ଯିବରେ ଆଜି ରଜା ଘର ଖାନା

ଖଣ୍ଡ ଖଣ୍ଡ ବସା ଦହି ମୁଣ୍ଡାମୁଣ୍ଡା ଛେନା

ଯୋଡ଼ା ଯୋଡ଼ା ଆରିଷା ପିଠା, ବଡ଼ ମିହିଦାନା ।

ଭଦ୍ରକର ପାଳୁଅ ଲଡ଼ୁ, ବାଲେଶ୍ୱରୀ ଗଜା,

କେନ୍ଦ୍ରାପଡ଼ା ରସାବଳୀ ରସ ଭାରି ମଜା ।

ଭୁବନେଶ୍ୱର ରସକୋରା, ଦୋ ପାଗି ଉଖୁଡ଼ା

ବାରିପଦାର ଗରମ ମୁଢ଼ି, ଧାମନଗର ଚୂଡ଼ା ।

ପୁରୀ ବେଢ଼ା ମଗଜ ଲଡ଼ୁ ଅମାଲୁ ସରପୁରି

ବିରଜା ବେଢ଼ା ମୋତିଚୁର କନ୍ଦଦିଆ ଭାରି ।

ସାକ୍ଷୀଗୋପାଳ ଗୁଡ଼ପାଟିଆ ଗହମ ଅଟା ଗଜା

ତାକୁ ପାକୁଆ ପାଟିରେ ରଗଡ଼ିଦେଲେ

ଡାକ ମାରିବ ମଜା ।

ସମ୍ବଲପୁର ଛେନାଦିଆ ଜଟଣି ଲେଡିକିନ

ଯାଜପୁରର ମୁଟମୁଟିଆ ସାତପତ୍ରିଆ ଫେଣି ।

ଆମ୍ବକଷିଆ ଅଦାଦିଆ ଆଳୁବଖରା ଚଟଣୀ

ପାଟିରେ ଦେଲେ ପେଟ ଭିତରେ ଲାଗିବ ଟଣାଟଣି ।

ବି.ଦ୍ର. - ଶିକ୍ଷାସନ୍ଧାନ ୨୦୧୧ ମସିହାରେ ଛାପିଥିବା ବିଷ୍ଣୁଚରଣ ମହାନ୍ତିଙ୍କର ଆତ୍ମଜୀବନୀ 'ଆମ ପାଠପଢ଼ା ସମୟ'ରୁ ସଙ୍ଗୃହିତ