ମିଳନ

କୁନ୍ତଳା କୁମାରୀ ସାବତ (୧୯୦୧-୧୯୩୮)

କୁନ୍ତଳା କୁମାରୀ ସାବତ

କର ଦୂର କର ଦୂର ସରମର ଆବରଣ,

ଅଙ୍ଗେ ଅଙ୍ଗେ ମୋର କର ଆଲିଙ୍ଗନ,

ହିଆରେ ଥୁଅ ଶ୍ରୀଚରଣ ।

ଗୋଟା ତନୁ ମୋର ଚିର ତୃଷାତୁର,

ସହିବ କେତେ ସେ ବସନର ଭାର,

ନିତି ଲାଜେ ଲାଜେ କେତେ ମରୁଥିବି,

ପାଇବାର ଆଶା ନ ପାଇ ଝୁରିବି;

ଲୋକ ଲୋକାନ୍ତରେ କେତେ ଭ୍ରମୁଥିବି

ସହିବି ଜନମ ମରଣ ।

କିମ୍ପା ଏ ସାଧନା, କିମ୍ପା ଏ ବେଦନା,

କହିବି କହିବି ନ ଫିଟେ ରସନା,

କେତେ ଦୂରେ ଦୂରେ ରହିଥିବି ଆଉ,

ସହିବି ବିଚ୍ଛେଦ କଷଣର ଦାଉ,

(ଏବେ) ନଦୀ ସିନ୍ଧୁ ସମ ମିଶ ମୋ ମାନସେ,

ମର ହେଉ ନାରାୟଣ ।