ମହିମା ଭକ୍ତି କବିତା - 'ଭଜ ଅଲେଖ ରୂପକୁ' 

ଭକ୍ତ କବି ଭୀମ ଭୋଇ

ଆକାଶ ଗଙ୍ଗାର ଚିତ୍ର : ଫଟୋ କ୍ରେଡ଼ିଟ - ୱିକିମିଡ଼ିଆ କମନ୍ସ୍

ଭଜ ଅଲେଖ ରୂପକୁ ।

ଶୂନ୍ୟବ୍ରହ୍ମେ ଚିତ୍ତ ଦେଇ ଭଜ ଅରୂପ ରୂପକୁ । ଘୋଷା ।

ଅଲେଖ ରୂପକୁ ସେହି
ନିରନ୍ତରେ ଭାବୁଥାଇ
ତା ପାଦେ ଶରଣ ମୋର ଧ୍ୟାୟି ଅରୂପାନନ୍ଦଙ୍କୁ ।୧।

ଚାରିଯୁଗେ ଚାରିବେଦେ
ନ ସେବିଲେ ସ୍ୱାମୀପାଦେ
ଛପ୍ନାକୋଟି ଜନ୍ତୁଜୀବ ଚିହ୍ନି ନ ପାରିଲେ ଯା’କୁ ।୨।

ଚାରି କର୍ମ ଚାରି ଧର୍ମ
ନ ପାଇଲେ ବ୍ରହ୍ମଜ୍ଞାନ
ଛଡଋତୁ ଦିବା ନିଶି ଅନ୍ତ ନ ପାଇଲେ ଯା’କୁ ।୩।

ସିଦ୍ଧାନ୍ତୀ ଯୋଗାନ୍ତୀ ଯୋଗୀ
ବେଦାନ୍ତୀ ନାଗାନ୍ତୀ ଭୋଗୀ
କୋଟି କୋଟି ତପ କରି ଦେଖି ନ ପାରିଲେ ଯା’କୁ ।୪।

ନବ ଲକ୍ଷ ତାରାଗଣ
ଗମି ନ ପାଇଲେ ଜ୍ଞାନ

ଚନ୍ଦ୍ର ସୂର୍ଯ୍ୟ ଚାରି ଦିଗ ନ ପାଇ ଆଦ୍ୟ ମଧ୍ୟକୁ ।୫।

ତେତିଶ କୋଟି ଦେବଗଣ
ଯୋଗୀ ଋଷି ରୁଦ୍ର ଜାଣ
ରାମକୃଷ୍ଣ ବଳଦେବ ନ ଚିହ୍ନି ସ୍ୱାମୀ ପାଦକୁ ।୬।

ଭଣିଲେ ଯେ ଭୀମକନ୍ଧ
ଅରୂପ ପୟର ବିନ୍ଦ
ଧ୍ୟାୟି ଅଛି ହୃଦଗତେ ଅଲେଖ ବ୍ରହ୍ମପାଦକୁ ।୭।