କିଛି ଲୋକ କବିତା ଭଲ ପାଆନ୍ତି

ୱିସ୍ୱାୱା ସିମ୍ବୋର୍ସ୍କା (୧୯୨୩-୨୦୧୨)

ଅନୁବାଦ - ଗୋର୍ବାଚୋଭ୍

ୱିସ୍ୱାୱା ସିମ୍ବୋର୍ସ୍କା

ଫଟୋ କ୍ରେଡ଼ିଟ - ୱିକିମିଡ଼ିଆ କମନ୍ସ୍

କିଛି ଲୋକ,
ଅର୍ଥାତ୍‌, ସମସ୍ତେ ନୁହନ୍ତି;
ସଂଖ୍ୟାଗରିଷ୍ଠ ବି ନୁହନ୍ତି,
ସଂଖ୍ୟାଲଘୁ ।

ଅବଶ୍ୟ ସେଥିରେ ସ୍କୁଲପଢ଼ା ପିଲାଙ୍କୁ ଗଣାଯିବନି,

ସେମାନଙ୍କୁ ତ କବିତା ପଢ଼ିବାକୁ ହିଁ ପଡ଼ିବ;

ଗଣାଯିବନି ସ୍ୱୟଂ କବିମାନଙ୍କୁ ।

ଏମିତି ଦେଖିଲେ,

ହୁଏତ ହଜାରରେ ଦୁଇ ଜଣ

କବିତା ଭଲ ପାଆନ୍ତି ।

ଯେମିତି କାହାକୁ ଭଲ ଲାଗେ,

ଚିକେନ୍‌ ନୁଡ୍‌ଲସ୍‌ ସୁପ୍‌;

ଆଉ କାହାକୁ ସମ୍ମାନ କି ନୀଳରଙ୍ଗ;

କାହାକୁ ପୁରୁଣା ସ୍କାର୍ଫ;

କିଏ ଗୋଟିଏ କଥା ପ୍ରମାଣ କରିବାକୁ ଚାହେଁ;

ତ ଆଉ କିଏ ଭଲ ପାଏ,

ପୋଷା କୁକୁରଟିଏ ରଖିବାକୁ ।

କିନ୍ତୁ ଏ କବିତା କି ପ୍ରକାର ଜିନିଷ,

ଏ ପ୍ରଶ୍ନର ବହୁ ଅନିଶ୍ଚିତ ଉତ୍ତର ଦିଆ ସରିଛି;

ମୁଁ କିନ୍ତୁ ଜାଣିନି ।

ଜାଣିନି ସିନା କିନ୍ତୁ ତାକୁ ହିଁ ଧରି ବସିଥାଏ;

ଯେମିତି, ସିଏ ତ୍ରାଣକର୍ତ୍ତା;

ଯେମିତି, ସେ ଗୋଟିଏ ଶିଡ଼ି ।।