ସିଦ୍ଧାର୍ଥ ସିଦ୍ଧାର୍ଥ 

କେଦାର ମିଶ୍ର

ଏ ପୃଥିବୀର ସବୁଠୁ ଦୁଃଖଦ ଖବର ହେଉଛି ଜଣେ ତରୁଣ କବିର ଅବସାନ । ଉଦୟ ପୂର୍ବରୁ ଅବସାନ ର ଏହି ବିଷାଦକୁ ଗ୍ରହଣ କରିବା ଆଦୌ ସହଜ ନୁହଁ । ସିଦ୍ଧାର୍ଥ ମହାପାତ୍ର, ମାତ୍ର ୨୫ ବର୍ଷର ଜଣେ ତରୁଣ କବି । କବିତା ଲେଖୁଥିଲେ ଇଂରାଜୀରେ । ପ୍ରକାଶ ଅପେକ୍ଷାରେ ଥିଲା ତାଙ୍କର ଏକ ଇଂରାଜୀ ଉପନ୍ୟାସ । ଜୀବନ କଣ ଜାଣିବା ଆଗରୁ, କବିତା ରେ ଜୀବନର ଉତ୍ସବ ଆରମ୍ଭ ହେବା ଆଗରୁ ମରଣ ତାଙ୍କୁ ବରଣ କରି ନେଇଛି । ପଣ୍ଡିଚେରୀ ସମୁଦ୍ର ରେ ବୁଡିଯାଇଥିବା ଏହି ତରୁଣ ଲେଖକ ଆମ ସାହିତ୍ୟର ଏକ ଅଧାଲେଖା କବିତା । 

ସିଦ୍ଧାର୍ଥ ମହାପାତ୍ର
ଫଟୋ କ୍ରେଡ଼ିଟ - ନିନାଜ଼ ଅଖତର୍

ମରିବା କଣ ଏତେ ସହଜ ? ଏଇ ଯେମିତି ସମୁଦ୍ରରେ ବୁଡ ପକେଇ ଉଠି ନ ଆସିବା ? ସିଦ୍ଧାର୍ଥ ! ତମର ମୃତ୍ୟୁ ଏତେ ସହଜ ଓ ଆକସ୍ମିକ ହୋଇପାରେ, ସେ କଥା ତମେ କଣ ଭାବିଥିଲ୍ ! ହାଃ ମୃତ୍ୟୁ ! ମାତ୍ର ଚବିଶ ପଚିଶ ବର୍ଷର ଗଜା ବୟସରେ ମୃତ୍ୟୁ ! ତମେ କବି ହେବାକୁ, ଲେଖକ ହେବାକୁ ଜୀବନ ଭିତରେ ବାଟ ଭୁଲିଥିବା ବେଳେ ଏ ଅତାଳତାଳ ମୃତ୍ୟୁ ତମ ପ୍ରେମରେ ପଡିଲା କେମିତି ?

ଜାଣେନା, କିଏ କାହାକୁ ଭଲପାଇ ବରଣ କରିଛି ! ଏମିତି ଦେଖିଲେ ତମ ନାଁ ସିଦ୍ଧାର୍ଥ ମହାପାତ୍ର, ପଚିଶ ବର୍ଷର ଗୋଟେ ବାଇୟା ଟୋକା ! ବୟସଠୁ ଟିକେ ଅଧିକ ବୟସ୍କ ଓ ଅଧିକ ଗମ୍ଭୀର । ଯେମିତି ତମେ କାହାକୁ ବି ଖାତିର କରନା, ଅଥଚ ସମସ୍ତଙ୍କୁ ଭଲ ପାଅ ।ଏତେ ସାନ ପିଲା ତମେ, ଅଥଚ ତମ କବିତାରେ ଏତେ ଏତେ ମୃତ୍ୟୁର ସଙ୍କେତ କାହିଁକି ? ଥରେ ଦୁଇ ଥର ଭାବିଛି, ସେକଥା ପଚାରିବି। ଆଜି ଆଉ ପଚାରିବାର କିଛି ନାହିଁ । ତମେ ମୃତ୍ୟୁକୁ ବଞ୍ଚୁଥିଲ ସିଦ୍ଧାର୍ଥ ! ତେଣୁ ମୃତ୍ୟୁ ତମକୁ ଟାଣିନେଲା ନିଜ ପାଖକୁ ।

*

ତମ ସହ ପ୍ରଥମ ଦେଖା ପ୍ରାୟ ତିନି ବର୍ଷ ତଳେ, ବାଣୀ ବିହାରର ଇଂରାଜୀ ବିଭାଗରେ। ପ୍ରଥମ ଦେଖାରୁ ତମର ବେପରୁଆ ଚାଲି, ବେଖାତିର ଭାବ ଓ ଆଖିର ଦୃଢତା ବହୁତ ଭଲ ଲାଗିଥିଲା । ତମେ ସେଦିନ କବିତାଟିଏ ପଢିଥିଲ ଯାହାକି ଆମ ସମସ୍ତଙ୍କୁ ଚମକେଇ ଦେଇଥିଲା । ଲାଗିଥିଲା, ଏଇ ଯେମିତି ଗୋଟେ ପ୍ରଚଣ୍ଡ ପ୍ରତିଶୃତି ବିଜୁଳି ପରି ଚମକି ଉଠୁଚି ।

ତାପରେ ବହୁ ଥର ଦେଖା ହେଇଛି । ତମ କବିତା ଆଉ କିଛି ପଢିଛି । ମଝିରେ ଶୁଣିଲି, ତମେ କୁଆଡେ ଇଂରାଜୀରେ ଗୋଟେ ଉପନ୍ୟାସ ଲେଖିଛ । ସେ ଉପନ୍ୟାସ କୁଆଡେ ଗଲା ସିଦ୍ଧାର୍ଥ ? ତମ ସହିତ ସେ ଉପନ୍ୟାସ ସେଇ ସମୁଦ୍ର ରେ ବୁଡି ଯାଇଛି କି ?

ମୁଁ ଜାଣେ,ତମରି ବୟସରେ ଗୋଟେ ଲେଖକର ଜୀବନ ହେଉଛି ନିରୋଳ ଦୁଃସାହସ, ଆଉ ତମେ ଦୁଃସାହସୀ ଥିଲ । ବି.ଟେକ୍. ପାଠ ଛାଡି କବିତାର ପ୍ରେମରେ ସାହିତ୍ୟ ପଢିବାକୁ ଆସିଥିଲ । ତମର କବିତା ସେଇ ଦୁଃସାହସର କବିତା, ଜୀବନ କୁ ବାଜି ଲଗାଇବାର କବିତା।

ଆଜି ତମେ ନାହଁ । ପଚିଶ ବର୍ଷ ବୟସର ଜଣେ ଈଶ୍ୱର ସମୁଦ୍ର ଶୟନ କରିବାକୁ ଆମଠୁ ବିଦାୟ ନେଇଛି । ଏ ବିଦାୟ ବଡ ଦାରୁଣ ସିଦ୍ଧାର୍ଥ ! ତମର ବିଦାୟରେ କିଛି ଲେଖିବା, ନା, ସେ ଦୁଃସାହସ ମୋର ନାହିଁ ।

ବିଦାୟ ସିଦ୍ଧାର୍ଥ, ବିଦାୟ ପ୍ରିୟ  ତାରୁଣ୍ୟ ! ବିଦାୟ ପ୍ରିୟ ଈଶ୍ୱର !