ମହିମା ଭକ୍ତି କବିତା - 'ଦୁର୍ଲଭ ଜନ୍ମରେ ଥରେ ଦର୍ଶନ କର'
କବି - ଭୀମ ଭୋଇ
ଫଟୋ କ୍ରେଡ଼ିଟ - ୱିକିପିଡ଼ିଆ କମନ୍ସ୍ |
ଦୁର୍ଲଭ ଜନ୍ମରେ ଥରେ ଦର୍ଶନ କର
ପିଣ୍ଡ ପ୍ରାଣ କାଳ କାଳ ନୁହଇ ଚିର । ଘୋଷା ।
ପରଶୁ ପଥର ଖଣ୍ଡେ ଖସି ପଡ଼ିଛି ବ୍ରହ୍ମାଣ୍ଡେ
ଚିହ୍ନାଇ ହେଉଛି ହୃଦେ ସମ୍ଭାଳି ଧର ।
ଏହିପରି ସ୍ୱଦେହରେ ଆଉ କି ମିଳିବ ଥରେ
ମାଳ ଗୁନ୍ଥି ବାନ୍ଧି ରଖ ହୃଦରେ ହାର ।୧।
ଜାଣୁଛ ସକଳ ବିଧି ବିଚାରିଲେ ସର୍ବ ସିଦ୍ଧି
ଜନ୍ମ ମରଣଟି ଏ ଦେହକୁ ଅସାର ।
ସ୍ୱାମୀ ନାମେ ଅହଙ୍କାର ସର୍ବେ କର ନିରନ୍ତର
ତେବେ ଏ ଜନ୍ମ କଷ୍ଟରୁ ହୋଇବ ପାର ।୨।
କୋଟିଏ ଜନ୍ମରେ ଜନ୍ମ ହୋଇଣ ଏହୁ ଜୀବନ
ମହାଭାଗ୍ୟେ ପାଇଅଛି ଗୁରୁପୟର ।
ଗଳୁଅଛି ମକରନ୍ଦ ଲୟେ କର ପାଦବିନ୍ଦ
ଦିବସ ରଜନୀ ବହି ଆସୁଛି ଧାର ।୩।
କରୁଅଛୁ ଯାକୁ ହିତ ସକଳ ଏ ପଶୁଭୃତ୍ୟ
ନିଦାନ କାଳକୁ ସର୍ବେ ହେବ ଅନ୍ତର ।
କୋମଳ ଶରୀର ଅଙ୍ଗ ଅବଶ୍ୟ ଏ ନାଶ ଯିବ
ହେତୁ ଚେତା ଜ୍ଞାନ ଧ୍ୟାନ ହେବ ପାଶୋର ।୪।
ଜଳ ଘଟେ ଯେଉଁପରି ଏ ଦେହରେ ଅଛି ପୂରି
କାମ କ୍ରୋଧ ଲୋଭ ମୋହ ବହି ଶରୀର ।
ଶ୍ରୀଗୁରୁ ଚରଣେ ଧ୍ୟାୟି ଭଣେ ଭୀମସେନ ଭୋଇ
ନିରନ୍ତରେ ବହୁଅଛି ନୟନୁ ନୀର ।୫।
No comments:
Post a Comment