ପିଲାଙ୍କ ଗୀତ - 'ଚୁଟିଆ ମୂଷା'
ପଲ୍ଲିକବି ନନ୍ଦକିଶୋର ବଳ
 |
| ଲରା ନ୍ୟୁମେରଫ୍ ଙ୍କର ବହି, 'ଇଫ୍ ୟୁ ଗିଭ୍ ଏ ମାଉସ୍ ଏ କୁକି'ରେ, ଫେଲିସିଆ ବଣ୍ଡ୍ ଆଙ୍କିଥିବା ଚିତ୍ର ଫଟୋ କ୍ରେଡ଼ିଟ୍ - ୱିକିମିଡିଆ କମନ୍ସ୍ |
ଚୁଟିଆ ମୂଷାରେ ଚୁଟେଇ ମୂଷି,
ଧାନ ଅମାରକ ଖାଉଥା ବସି ।
କରୁଥା ଯାହା ତୋ ମନର ଖୁସି,
ଘର ଛାଡ଼ି ମୁହିଁ ଯାଉଛି ରୁଷି ।
ଟିକି ଟିକି ଧାନ ଶଏ ଭରଣ,
ସାତଟା ଅମାର କଲୁଣି ଶୂନ୍ୟ ।
ଗଣେଷବାହନ ଅଟୁରେ ମୂଷା,
ତୋତେ ମାରିବାକୁ ନାହିଁ ଭରସା ।
ପାଠ ନ ଆସିବ ମାରିଲେ ତୋତେ,
ଅବଧାନ ବେତ ମାରିବେ ମୋତେ ।
ଟୁଉକୁ ମୂଷାରେ ଟୁକେଇ ମୂଷି,
ଖାଇବୁ ଯେତେକ ଖା'ରେ ଖୁସି ।
ଅମାରେ ଯେତେକ ଧାନ ତୁ ଖାଉ,
ଚାଉଳ ହାଣ୍ଡିରୁ ଚାଉଳ ନେଉ ।
ବିହନ ଓଳିଆ କାଟୁ କିପାଇଁ,
ଏତେ ଖାଇ ପେଟ ପୂରଇ ନାହିଁ ?
ରାତିରେ ବାହାରି ରୁଉଟୁ ରୁଟୁ,
କଖାରୁ ଗଛଟି ମୂଳରୁ କାଟୁ ।
ଝାଉଁଳି ପଡ଼ଇ ପିଢ଼ା କଖାରୁ,
କେତେ କଷିଫୁଲ ଅଯଥା ମାରୁ !
ଖରା ଗଡ଼ିଯାଏ ବୁଡ଼ଇ ବେଳ,
ସାହି ପିଲାମାନେ ହୋଇଣ ମେଳ ।
ଗୀତ ଗାଇ ଗାଇ ବୁଲନ୍ତି ଗାଆଁ,
"ଜହ୍ନିଫୁଲ ଫୁଟେ ଠୋ-ଠା ।
ଚୁଟିଆ ମୂଷା କହି ଯାଇଛି
ଚାଉଳ ମୁଠିଏ ଦେଇ ଯା ।"
No comments:
Post a Comment