ପିଲାଙ୍କ ଗୀତ - 'ଅଦିନ ମେଘ'

ପଲ୍ଲିକବି ନନ୍ଦକିଶୋର ବଳ

କଲମ୍ବିଆର ରାଜଧାନୀ ବୋଗୋଟାରେ ଅଦିନିଆ ବର୍ଷା
ଫଟୋ କ୍ରେଡ଼ିଟ୍ - ୱିକିମିଡିଆ କମନ୍ସ୍

ଖରା କରୁଅଛି ମେଘ ବରଷୁଛି

ବିଲୁଆ ପୁଅର ବିଭା,

ଗାତରୁ ବାହାରି ହିଡ଼ରେ କଙ୍କଡ଼ା 

ଖରା ପୋଉଁଛନ୍ତି କିବା ।

ଘୋର ଘଡ଼ଘଡ଼ି ଘଡ଼ଘଡ଼ ରଡ଼ି

କମ୍ପେ ପ୍ରାଣ ତାହା ଶୁଣି,

"ଗରଜିଲା ମେଘ ନ ବରଷେ ପାଣି"

କିଏ କହୁଥାଏ ପୁଣି । 

ଜକ ଜକ ମେଘ ଦିଶଇ ବିଜୁଳି

ତାଳଗଛ ଯାଏ ଜଳି,

ପିଲାଏ ଶୁଣିଣ ମେଘ ଗରଜନ 

ଛାଡ଼ନ୍ତି ଉଝଟ ଅଳି ।

ବିଜୁଳି ଚମକେ ଦୂର ଆକାଶରେ 

ଦିଶେ ସୁନାଲଟା ପରି ,

ଶବଦ ମାତର ଘଡ଼ଘଡ଼ି ସିନା

ତାହାକୁ କିପାଇଁ ଡରି ।

ପାଣି ସାଙ୍ଗେ ପଡ଼େ ସରଗ ପଥର

ତାହା ଦେଖି ପିଲାମାନେ,

ସାଉଁଟି ଖାଇଣ ଗୀତ ଗାଉଥାନ୍ତି 

ନାଚି କୁଦି ତାନମାନେ ।