ପଶ୍ଚିମ ଓଡ଼ିଶାର ପାଞ୍ଚଟି ଚଷାଗୀତ

ଫଟୋ କ୍ରେଡ଼ିଟ୍ - ୱିକିମିଡ଼ିଆ କମନସ୍ 

୧

ଏ କଖାରୁ ପତର ତ ମାରିଦେଲି ଆଂଶୁ

କଳା ଭ୍ରମରକୁ ଯେ କହିବ ଚାକେରି ଛାଡ଼ି ଆସୁ ଯେ ।

ଛାଡ଼ି ମୁଁ ନ ପାରଇ ରାଜା ଘର ସେବା 

ତନୁ ପାତେଳିକି କହିବ 

ଆନ ବରେ ଯାଆ ଯାଆ ଯେ ।

ଆନବର, ସ୍ୱାମୀରେ ମୋହର କାର୍ଯ୍ୟ ନାହିଁ

ବରଷକେ ଥରେ ହୋ ନ'ଇଲେ 

ମରିବି ବିଷ ଖାଇ ହୋ । (ବୌଦ୍ଧ)

୨

ଘୁମାଇଁ ଘୁମାଇଁ କେତେ ଯାଉ ଦିନ 

ଶୋଇଲା ଶ଼େଜରେ ତ ହଜିଲା ବାହାବିଦ ।

ମୋ'ର ବାହାବିଦ ତ ପାଇଥିଲେ ଦେବ 

ଯେଉଁଥି ପାଇଁ ଅଳି ହେ କରୁଛ 

ତହିଁରେ ଜଉମୁଦ ହୋ । (ସୋନପୁର)

୩

ଏ କହଇ ଅଙ୍ଗଦ ଯେ ଶୁଣ ହେ ଦଶକନ୍ଧ

ଏଡ଼େ ବଡ଼ କ୍ଷେତ୍ରୀ ହୋଇ ଅରଜିଲୁ ମନ୍ଦ
ଶ୍ରୀରାମ ଘରଣୀକୁ ତୁ ଆଣିଲୁ ଚୋରାଇ

ଜାଣିଲେ ରାମ ତ ମାଡ଼ ମାରିବେ

ଦରିଆ ପାର ହୋଇ । (ବରଗଡ଼)

୪

ଏ ନାବ ତ ଦଦରା ଲୋ ଝଲକି ପଶେ ପାଣି

ଜଣ ଜଣ କରି ପାରି ଯେ କରିବି 

ଗୋପର ଗଉଡ଼ୁଣୀ

ଗୋପର ଗଉଡ଼ୁଣୀ ଗୋପେ ହୁଅ ବାଇ

ଶ୍ରୀରାମ ବିଭା ବେଳେ ଲୋ ନ ଗଲ ବନ୍ଦାଇ

ତେଣୁ ଶାପ୍ୟ ଲୋ ପାଇଲ 

ବୁଲାଇ ବିକ ଦହି  ଗୋ। (ବଲାଙ୍ଗୀର)

୫

ଏ ଦହି ବହି ତ ବୁଲିଗଲେ ସାହି

ରାଧିକାର ଦହି ତ ଛୁଇଁ ନ ଯୋଗାଇ

ବଡ଼ ଦୋଚାରୁଣୀ ମାଇଁ ଯେ ରାଧିକା 

କହ୍ନେଇ ସଙ୍ଗେ ବାଇ ହୋ । (ବଣେଇ)

ଉତ୍ସ - ଶ୍ରୀ ଚକ୍ରଧର ମହାପାତ୍ର ସଙ୍କଳିତ 'ଉତ୍କଳ ଗାଉଁଲି ଗୀତ'