ମେଘ ବରଷଇ ଟପର ଟପର
ନନ୍ଦକିଶୋର ବଳ (୧୮୭୫ - ୧୯୨୮)
 |
| ଫଟୋକ୍ରେଡ଼ିଟ୍ - ୱିକିମିଡ଼ିଆ କମନସ୍ |
ମେଘ ବରଷଇ ଟପର ଟପର
କେଶୁର ମାଇଲା ଗଜା,
କେଉଁ ରାଇଜରେ ରହିଲେ ମୋ ରଜା
ତେଲିଙ୍ଗି ବାଇଦ ବଜା ।
ମେଘ ବରଷଇ ଟପର ଟପର
ସୁଅରେ ବହଇ ପାଣି
ପାଣିରେ ଡାକନ୍ତି କେଁ-କଟର ହୋ
ବେଙ୍ଗ ଓ ବେଙ୍ଗୁଲୀ ରାଣୀ ।
ନୂଆପାଣି ପାଇ ଦାଣ୍ଡେ ଦୂବଘାସ
ଚକାଚକା କଅଁଳିଲା
ନାଲି ଗୁଲୁଗୁଲୁ ପାଟଶାଢ଼ି ପିନ୍ଧି
ସାଧବବୋହୂ ହସିଲା ।
ଅଳତା ସମାନ ରକତ ବନର
ଓଳିପାଣି ପଡ଼େ ତଳେ
ତଳ ପାଣି ସଙ୍ଗେ ମିଶିଗଲା ବେଳେ
ମୋତିଫୁଲ ପରି ଝଳେ ।
ପାଣିରେ ଫୁଟକା ଫୁଟିଯାଏ ଭାସି
କ୍ଷଣକେ କାହିଁ ଉଭାଏ
'ସାଧବଘରର ବୋହୂ ବୁଡ଼ିମଲା'
ବୋଲି ନାଚନ୍ତି ପିଲାଏ ।
ନୂଆପାଣି ପାଇ ଫୁଟିଉଠେ ଛତୁ
ହୁଙ୍କା ବାଲିଅରା ବିଲେ
ସକାଳୁ ଉଠିଣ ଚାଙ୍ଗଡ଼ା ଧରିଣ
ପିଲାଏ ଛତୁ ତୋଳିଲେ ।
No comments:
Post a Comment