ଲୋକସଙ୍ଗୀତ ହେଉଛି ମାନବିକତାର ସଙ୍ଗୀତ : ପଣ୍ଡିତ ହରିପ୍ରସାଦ ଚୌରାଶିଆ
ଉପସ୍ଥାପନା : କେଦାର ମିଶ୍ର
ଏହି ଫଟୋଟି କବି କେଦାର ମିଶ୍ରଙ୍କ ସୂତ୍ରରୁ ମିଳିଅଛି ଚିତ୍ରୋତ୍ତଳକଙ୍କର ପରିଚୟ ଜଣା ନାହିଁ ଆମକୁ ଜଣାଇଦିଆଗଲେ ଫଟୋ କ୍ରେଡ଼ିଟ ଦିଆଯିବ |
ଅନ୍ଧାର
ଭିତରେ କେଉଁଠି ନିଖୋଜ ବୃନ୍ଦାବନର
ଠିକଣା । ବୃନ୍ଦାବନ, ଯେଉଁଠି ଅହରହ
ବାଜୁଥାଏ ବଂଶୀ । ଯେଉଁଠି ଆତ୍ମା
ନାଚୁଥାଏ ଉନ୍ମାଦିନୀ ଗୋପିକା
ପରି । ସେଠି ଜୀବନର ଏକମାତ୍ର
ପରିଚୟ ମୂର୍ଚ୍ଛନା । ସେଠି ସବୁ
ତପସ୍ୟାର ମୋକ୍ଷ ବିନ୍ଦୁ ସମାହିତ
ଥାଏ ରାଗରେ । ଅନନ୍ୟ ବଂଶୀର
ଗୁରୁକୂଳ ବୃନ୍ଦାବନ । ସେହି
ବୃନ୍ଦାବନର ଅଧିଷ୍ଠାତା ଗୁରୁ
ପଣ୍ଡିତ ହରିପ୍ରସାଦ ଚୌରାଶିଆ
। ଆମେ ଘାଟିକିଆ ଜଙ୍ଗଲର ଅଧା
ଅନ୍ଧାର ଓ ଅଧା ଆଲୋକ ଭିତରେ ଖୋଜି
ବୁଲୁଛୁ ବୃନ୍ଦାବନର ଠିକଣା ।
ଭୁବନେଶ୍ୱରର ଉପକଣ୍ଠରେ କେଇ
ବର୍ଷ ତଳେ ପଣ୍ଡିତ ହରିପ୍ରସାଦ
ଚୌରାଶିଆ ପ୍ରତିଷ୍ଠା କରିଛନ୍ତି
ଏହି ଗୁରୁକୂଳ ।
ଭାରତୀୟ ବଂଶୀ
ବାଦନ ପରମ୍ପରାର ଶିଖର ପୁରୁଷ
ତଥା ଭାରତୀୟ ସଙ୍ଗୀତ ଜଗତର ଅନନ୍ୟ
ଜ୍ୟୋତିଷ୍କ, ପଣ୍ଡିତ ହରିପ୍ରସାଦ
ଚୌରାଶିଆଙ୍କ ସହ ସାକ୍ଷାତକାରକୁ
ନେଇ ମନ ଭିତରେ ଯେତିକି ଉତ୍ତେଜନା,
ସେତିକି
ଆଗ୍ରହ । ହେଲେ ଆମେ ବାଟବଣା ।
ରାସ୍ତା ଧରି ଯେଉଁଠି ପହଞ୍ଚୁଛୁ,
ସେଇଠି
ଆଗକୁ କେବଳ ଅନ୍ଧାର । କୌଣସି ଘର
ଦିଶୁନାହିଁ । ୮ଟା ୩୦ରେ ଗୁରୁଜୀଙ୍କ
ସହ ଆମର ଦେଖା ହେବାର ଥିଲା । ସମୟ
ଗଡ଼ି ଯାଉଛି । ବୃନ୍ଦାବନର ଠିକଣା
ମିଳୁନାହିଁ । ଅନେକ ଗୋଲକଧନ୍ଦାରେ
ଘୂରିଲା ପରେ ବୃନ୍ଦାବନର ଠିକଣା
ମିଳିଲା । ପଣ୍ଡିତଜୀ ଆମକୁ
ଅପେକ୍ଷା କରିଛନ୍ତି । ବଡ଼ କଷ୍ଟ
ଲାଗିଲା, ଯାହାଙ୍କୁ ଶୁଣିବା ଲାଗି
ଓ ଯାହାଙ୍କର ପାଦ ଛୁଇଁବା ଲାଗି
ହଜାର ହଜାର ହୃଦୟ ଉଦବେଳିତ,
ତାଙ୍କୁ
ଆମ ଲାଗି ଅପେକ୍ଷା କରିବାକୁ ପଡ଼ିଲା
। ହେଲେ ପଣ୍ଡିତଜୀ ତାଙ୍କର ଗଭୀର
ଆତ୍ମୀୟତାରେ ଆମକୁ ପାଛୋଟି ନେଲେ
। ସେଇଠୁ ଆରମ୍ଭ ହେଲା ପ୍ରଶ୍ନୋତ୍ତରର ପର୍ବ ।
ପ୍ରଶ୍ନ
: ଭାରତୀୟ
ଶାସ୍ତ୍ରୀୟ ସଙ୍ଗୀତରେ ଆପଣଙ୍କର
କୌଣସି ପାରିବାରିକ ପରମ୍ପରା
ନଥିଲା । ଆପଣଙ୍କ ବାପା ଚାହୁଁଥିଲେ
ଆପଣ କୁସ୍ତିରେ ସଫଳତା ପାଆନ୍ତୁ
। ହେଲେ, ଆପଣ
ସଙ୍ଗୀତକୁ ନିଜର ଜୀବନ ଓ ଜୀବିକା
ଭାବରେ ବାଛିଲେ । ଏ ସମ୍ପର୍କରେ
ଟିକେ ବିସ୍ତୃତ ଭାବରେ ସୂଚନା
ଦେବେ କି ?
ପଣ୍ଡିତଜୀ-
ଆପଣ
ଠିକ୍ କହିଛନ୍ତି । ବାପା ଥିଲେ
କଡା ମିଜାଜର ଲୋକ । ଆମ ପରିବାରରେ
ସଙ୍ଗୀତର ସେମିତି କିଛି ପରମ୍ପରା
ନଥିଲା । ତେବେ ଆମର ଘରପାଖରେ
ରହୁଥିବା ପଣ୍ଡିତ ଭୋଳାନାଥଙ୍କଠାରୁ
ମୁଁ ପ୍ରାରମ୍ଭିକ ଭାବରେ ବଂଶୀବାଦନ
ଶିଖିଲି । ଗାଇବା ଓ ବଂଶୀ ବଜାଇବା
ଦୁଇଟା ଯାକ ଏକାସାଙ୍ଗରେ ଶିଖୁଥିଲି
। ସେଇଟା ପୁଣି ବାପାଙ୍କୁ ଲୁଚାଇ
ଲୁଚାଇ । ଟିକେ ବଡ଼ ହେଲା ପରେ
ସଙ୍ଗୀତକୁ ନେଇ ଆଗ୍ରହ ବଢିଲା,
ସେତେବେଳେ
ଅଲ୍ ଇଣ୍ଡିଆ ରେଡ଼ିଓ କଟକରେ ଚାକିରି
ପାଇଁ ଦରଖାସ୍ତ ଦେଲି ଓ ପାଇଗଲି
। କଟକ
ମୋ ସଙ୍ଗୀତ ଜୀବନରେ ଗୋଟେ ନୂଆ
ମୋଡ଼ ଆଣିଦେଲା ।
ସେତେବେଳେ କଟକରେ
ଏକ ବିରାଟ ସାଂସ୍କୃତିକ ବିପ୍ଲବ
ଚାଲିଥାଏ । ନିମାଇଁ ହରିଚନ୍ଦନ,
ସିଂହାରୀ
ଶ୍ୟାମସୁନ୍ଦର କର,
ବାଳକୃଷ୍ଣ
ଦାସ, ପଣ୍ଡିତ
ଭୁବନେଶ୍ୱର ମିଶ୍ର ପ୍ରମୁଖ ସଙ୍ଗୀତ
କ୍ଷେତ୍ରରେ ଏକ ଚମତ୍କାର ପରିମଣ୍ଡଳ
ସୃଷ୍ଟି କରିଥା’ନ୍ତି
। ସେତେବେଳେ ଷ୍ଟେସନ ଡାଇରେକ୍ଟର
ଥାନ୍ତି ପି.ଭି.
କୃଷ୍ଣମୂର୍ତ୍ତି
। ସେ ମହାଶୟ ମୋତେ ବହୁତ ଉତ୍ସାହିତ
କରିଛନ୍ତି । କଟକରେ ଆମେ ସେତେବେଳେ
ବହୁତ ସଙ୍ଗୀତ ସମାରୋହରେ ଗୀତ
ବାଦ୍ୟ କରିଛୁ । ମୁଁ ଓଡ଼ିଶୀ
ନୃତ୍ୟରେ ବହୁ ଶିଳ୍ପୀଙ୍କ ସାଙ୍ଗରେ
ବଜାଇଛି । ଗୋଟେ ସମୟ ଥିଲା,
ଯେତେବେଳେ
କେଉଁ ନୃତ୍ୟାଙ୍ଗନା ସାଙ୍ଗରେ
ବଜାଇବି, ତାକୁ
ନେଇ ଗୋଟେ ପ୍ରକାର ପ୍ରତିଯୋଗିତା
ଚାଲିଲା । ସଂଯୁକ୍ତା ପାଣିଗ୍ରାହୀ,
କୁମକୁମ ମହାନ୍ତିଙ୍କ ପରି ବହୁତ ବଡ଼
ନୃତ୍ୟାଙ୍ଗନାଙ୍କ ସାଙ୍ଗରେ ମୁଁ
ସେତେବେଳେ ବଜାଇଛି । ଭୁବନେଶ୍ୱର
ବାବୁଙ୍କ ସଙ୍ଗେ ମିଶି କିଛି
ସିନେମାରେ ମ୍ୟୁଜିକ ମଧ୍ୟ
କରିଛୁ । କଟକ ଗୋଟେ ପ୍ରକାର ମୋ’
ଲାଗି ସଙ୍ଗୀତର ନୂଆ
ଅଧ୍ୟାୟ ଖୋଲିଥିଲା । ତା’ପରେ
ମୋର ବଦଳି ହେଲା ବମ୍ବେକୁ ।
ପ୍ରଶ୍ନ-
କୁହାଯାଏ
ବମ୍ବେରେ ଆପଣ ଅନ୍ନପୂର୍ଣ୍ଣା
ଦେବୀଙ୍କଠାରୁ ସଙ୍ଗୀତ ଶିଖିବା
ପରେ ଆପଣଙ୍କର ବାସ୍ତବ ଶାସ୍ତ୍ରୀୟ
ପ୍ରତିଭା ଉନ୍ମୋଚିତ ହୋଇଥିଲା
। ଅନ୍ନପୂର୍ଣ୍ଣା ଦେବୀ କାହାକୁ
ଶିଖାଇବାକୁ ଆଗ୍ରହୀ ନଥିଲେ ।
କେବଳ ଆପଣଙ୍କ କ୍ଷେତ୍ରରେ ତା’ର
ବ୍ୟତିକ୍ରମ ହୋଇଥିଲା ବୋଲି
ଶୁଣାଯାଏ । ଏ ସମ୍ପର୍କରେ ଆମକୁ
କିଛି କୁହନ୍ତୁ ?
ପଣ୍ଡିତଜୀ-
ବମ୍ବେ
ଯିବା ପର୍ଯ୍ୟନ୍ତ ମୁଁ ବିଧିବଦ୍ଧ
ଭାବରେ ସଙ୍ଗୀତର କଳାକୌଶଳ ଜାଣି
ନଥିଲି । ବଜଉଥିଲି,
ସମସ୍ତେ
କହୁଥିଲେ ବଢିଆ ବଜାଉଛି । ବହୁତ
ସଙ୍ଗୀତ ନିର୍ଦ୍ଦେଶକଙ୍କ ସହିତ
ବମ୍ବେରେ କାମ କରିଛି । ତେବେ
ବଂଶୀକୁ ନେଇ ଜଣେ ଏକକ ଶିଳ୍ପୀ
ଭାବରେ ପରିଚୟ ତିଆରି କରିବାର
ଆଗ୍ରହ ସେପର୍ଯ୍ୟନ୍ତ ମୋର ନଥିଲା
। ସେତେବେଳେ ମୋତେ ମୋର ଜଣେ ବନ୍ଧୁ
କହିଥିଲେ ସଙ୍ଗୀତ ଶିଖିବା ଲାଗି
। କାହାପାଖରୁ ଶିଖିବି ?
କେମିତି
ଶିଖିବି ? ମୁଁ
କିଛି ଜାଣୁନଥାଏ । କେହି ଜଣେ
କହିଲା, ଅନ୍ନପୂର୍ଣ୍ଣା
ଦେବୀଙ୍କ ପାଖକୁ ଯିବା ପାଇଁ ।
ଅନ୍ନପୂର୍ଣ୍ଣା ଦେବୀ କଡ଼ା ମିଜାଜର
ଗୁରୁ । ତାଙ୍କ
ପାଖକୁ କେହି ଯିବାକୁ ସାହସ କରନ୍ତି
ନାହିଁ । ଅନେକ ଥର ଯାଇ ତାଙ୍କ
ପାଖରୁ ଫେରିଛି । ଶେଷରେ ମୋତେ
ସେ ତାଙ୍କର ଶିଷ୍ୟ ଭାବରେ ଗ୍ରହଣ
କଲେ ।
ଆଜି ପର୍ଯ୍ୟନ୍ତ ସେ ମୋର
ଗୁରୁ ଓ ମା’ ।
ତାଙ୍କର ପାଦ ତଳେ
ବସି ଯାହା ଶିଖିଛି, ସେଇଟା
ଆଜି ପର୍ଯ୍ୟନ୍ତ ମୋର ସମ୍ବଳ ।
ତାଙ୍କ ପରି ସୁରବାହାର୍ ବଜାଇବା
ଲୋକ ପୃଥିବୀରେ ବିରଳ । ତାଙ୍କ
ପାଖରୁ ମୁଁ ଶିଖିଲି ଗୁରୁ ଶିଷ୍ୟର
ପରମ୍ପରା କ’ଣ । ଗୁରୁ
ଶିଷ୍ୟଠାରୁ କିଛି ଆଶା କରେ ନାହିଁ
। ମୋର ଗୁରୁଙ୍କୁ ମୋ’ ଜୀବନରେ
କିଛି ଦେଇନାହିଁ । ତାଙ୍କଠୁ ଅନେକ
କିଛି ପାଇଛି । ଆଜି ମୁଁ ଯାହା
ହେଇଛି, ତାହା
ହେଉଛି ଗୁରୁଙ୍କର ଅବଦାନ ।
ପ୍ରଶ୍ନ
: ଯଦିଓ
ଆପଣ ଶାସ୍ତ୍ରୀୟ ସଙ୍ଗୀତର ଜଣେ
ଧୂରୀଣ ଶିଳ୍ପୀ, ତଥାପି ଆପଣଙ୍କର ପଲ୍ଲୀ ସଙ୍ଗୀତ ପ୍ରତି ଗଭୀର
ଆକର୍ଷଣ ଦୃଶ୍ୟମାନ ହୋଇଥାଏ । ଅନେକ
ସମୟରେ ଆପଣ ଲୋକ ସଙ୍ଗୀତକୁ ଯଥେଷ୍ଟ
ମହତ୍ତ୍ୱ ଦେଇଥା’ନ୍ତି । ଏହାର
କାରଣ କ’ଣ ?
ପଣ୍ଡିତଜୀ-
ସେଇଟା
ହିଁ ତ ଆମର ମୁଖ୍ୟ ସଙ୍ଗୀତ । ଆଗେ
ମ୍ୟୁଜିକ କ’ଣ ଥିଲା
! ଗାଁ
ଗହଳିରେ ଲୋକେ ଚାଷବାସ କରି ଘରକୁ
ଆସୁଥିଲେ । ପରିବାର ଭିତରେ ଗୀତ
ଗାଉଥିଲେ, ନାଚ
କରୁଥିଲେ । ଏହା ତ ହେଉଥିଲା ।
ସେମାନେ କ’ଣ କ୍ଲାସିକାଲ୍
ବା ଗଜଲ୍ ଗାଉଥିଲେ କି ?
କ’ଣ
ଗାଉଥିଲେ ? ଗାଁ
ଗହଳରେ ଲୋକସ୍ୱର ହିଁ ଥିଲା ।
ସେଇଟା ହିଁ ଓରିଜିନ୍ ଅଫ ମ୍ୟୁଜିକ୍
। ସେଇଟା ଆଜି
ବଜାଇଲେ ଆଜିର ଆଧୁନିକ ଲୋକମାନେ
ବି ଖୁସି ହେଉଛନ୍ତି । ଲୋକ ସଙ୍ଗୀତ
ହେଉଛି ମାନବିକତାର ସଙ୍ଗୀତ ।
ସେଇଟା ଆମେ କାହିଁକି ଭୁଲିଯିବା
। ମୁଁ ଯେଉଁଠିକୁ ଯାଏ କ୍ଲାସିକାଲ୍
ବଜାଏ । କ୍ଲାସିକାଲ୍ ଜାଣିଛି,
କ୍ଲାସିକାଲ୍
ଶିଖିଛି , ତେଣୁ
ବଜାଉଛି । କିନ୍ତୁ ପଲ୍ଲୀ ଗୀତ
ସମସ୍ତଙ୍କ ପାଖରେ ପହଞ୍ଚିଥାଏ
। ଏପରିକି ଯେଉଁମାନେ
ସଙ୍ଗୀତର ବ୍ୟାକରଣ ବୁଝୁନାହାନ୍ତି, ସେମାନଙ୍କ ପାଖରେ ବହୁତ ଆଗ୍ରହ
ଅଛି, ସେଇ
ତରୁଣ ପିଲାମାନେ ମଧ୍ୟ ବସି କରି
ତାକୁ ଶୁଣୁଛନ୍ତି ଓ ଭଲପାଉଛନ୍ତି
।
ପ୍ରଶ୍ନ-
ବମ୍ବେ ଫିଲ୍ମ ଶିଳ୍ପର ସିନେମାଗୁଡ଼ିକରେ ଆପଣ ପାଶ୍ଚାତ୍ୟ
ଓ ପ୍ରାଚ୍ୟ ସଙ୍ଗୀତର ଫ୍ୟୁଜନ ପ୍ରସ୍ତୁତ କରିଥା’ନ୍ତି
। ଚାନ୍ଦିନୀ, ଲମହେ ଓ ସିଲସିଲା
ଇତ୍ୟାଦି ଚଳଚ୍ଚିତ୍ରରେ ଆପଣ
ଏବଂ ଶିବକୁମାର ଶର୍ମାଙ୍କ ସଙ୍ଗୀତ ସିନେ ସଙ୍ଗୀତକୁ ଗୋଟିଏ ନୂଆ
ଧାରା ଦେଇଛି । ଏ ସମ୍ପର୍କରେ
ଟିକିଏ ବିସ୍ତୃତ ଭାବରେ କହିବେ କି
?
ପଣ୍ଡିତଜୀ- ସିନେମାରେ
ଚରିତ୍ରର ଦାବି ଅନୁଯାୟୀ ଗୀତ
କରାଯାଏ । ‘ଚାନ୍ଦନୀ’
ସିନେମାରେ ‘ଓ
ମାଇଁ ଚାନ୍ଦିନୀ...’ ଭଳିଆ
ଗୀତ ଦରକାର ଥିଲା । ଯେଉଁ ସ୍କ୍ରିପ୍ଟ
ରେ ଯାହା ଦରକାର, ସେଇଟା
କରିବା ସଙ୍ଗୀତ ନିର୍ଦ୍ଦେଶକ
ଭାବରେ ଆମର ଦାୟିତ୍ୱ । ସେଇଠି
ଶ୍ରୀଦେବୀ ଥିଲେ, ତେଣୁ
ନାଚ ଗୀତର ଆବଶ୍ୟକତା ଥିଲା,
ସେହି
ଚରିତ୍ରରେ ଯଦି ନିରୂପା ରାୟ
ଥା’ନ୍ତେ,
ତା’ହେଲେ
ସଙ୍ଗୀତ ଅଲଗା ହୋଇଥା’ନ୍ତା
। ଯେମିତିକା ସ୍କ୍ରିପ୍ଟ୍ ଓ
ଷ୍ଟୋରୀ ଡିମାଣ୍ଡ୍ କରିଛି, ସେମିତି ସଙ୍ଗୀତ ମୁଁ କରିଛି ।
ଧରନ୍ତୁ ଯେମିତି ମୋ ଶରୀର ଅଛି, ସେମିତି ପୋଷାକ ମୁଁ ପିନ୍ଧିବି
। ମୁଁ ମୋଟା ଲୋକ, ପତଳା
ଲୋକଙ୍କର ଲୁଗା କେମିତି ପିନ୍ଧିବି
। ପିନ୍ଧିଲେ ଅଜବ ଲାଗିବି ନାହିଁ
କି ? ସେମିତି
ପତଳା ଲୋକ ମୋଟା ଲୋକଙ୍କ ଲୁଗା
ପିନ୍ଧିଲେ ଅଦ୍ଭୁତ ଦିଶିବେ ।
ସେହି ଭଳି ସିନେମାରେ ଷ୍ଟୋରୀର
କେଉଁ ମ୍ୟୁଜିକ ସୁଟ୍ କରିବା, ସେଇଟା
ଗୁରୁତ୍ୱପୂର୍ଣ୍ଣ । ଅମିତାଭ ବଚ୍ଚନଙ୍କ ହୋରୀ ଗୀତ ଅଲଗା ପ୍ରକାର
ହେଲା । ରଙ୍ଗ ବରସେ୍....
ସେଇ
ଗୀତକୁ ଯଦି ପାଶ୍ଚାତ୍ୟ ଢଙ୍ଗରେ
କରିଥା’ନ୍ତି,
ସେଇଟା
ଆଦୌ ଭଲ ଲାଗିନଥା’ନ୍ତା
। ହୋଲି ହେଉଛି ଭାରତର ଗୋଟେ
ଗୁରୁତ୍ୱପୂର୍ଣ୍ଣ ଉତ୍ସବ । ତା’କୁ
ନେଇ ଅନେକ ସଙ୍ଗୀତ ଓ ନୃତ୍ୟର
ପରମ୍ପରା ଆମର ରହିଛି । ସେହି
ଦେଶୀ ପରମ୍ପରାରୁ ଆଣି ଗୀତକୁ
ତିଆରି କରାଗଲା । ଆଜି ସେଇ ଗୀତଟା ପ୍ରସିଦ୍ଧ ହୋଇଗଲା । ସେହି ଗୀତ ନ
ବାଜିଲେ ଆଜି କେହି ଆଉ ହୋଲି ପାଳୁ
ନାହାନ୍ତି ।
ପ୍ରଶ୍ନ
: ଆପଣ
ଅମିତାଭ ବଚ୍ଚନଙ୍କୁ ଗୀତ ଗାଇବାକୁ
କେମିତି ବାଛିଲେ ?
ପଣ୍ଡିତଜୀ-
ସେ
ନିଜେ କହିଲେ ମୁଁ ଗାଇବି । ମୁଁ
କହିଲି, ହଉ । ସେ ରାତି ଦୁଇଟାରେ ଆସି
ମେହେନତ କରି ରିଆଜ କଲେ । ତାଙ୍କ
ଗଳାକୁ ଗୀତଟି ସାଜିଲା । ଗୀତଟି
ଟପ୍ ହୋଇଗଲା । ତା’ପରେ
ତାଙ୍କ ପଛରେ ଲୋକ ପଡ଼ିଗଲେ ଗୀତ
ଗାଇବା ପାଇଁ । ତା’ପରେ
ଜିସ୍କି ବିୱି ଲମ୍ବି ଜିସ୍କି
ବିୱି ମୋଟୀ ...ଇତ୍ୟାଦି
ବହୁ ଗୀତ ଗାଇଲେ । କିନ୍ତୁ ଏହି
ଗୀତଟି କ୍ଲାସିକ୍ ହୋଇ ରହିଗଲା
। ଆମ ପିଲାମାନେ ଓ ପିଲାମାନଙ୍କର
ପିଲାମାନେ ମଧ୍ୟ ତାକୁ ଶୁଣିବେ
। “ରଙ୍ଗ୍ ବରଷେ୍” ସବୁ ହୋଲିରେ
ରଙ୍ଗ ବରଷଉ ଥିବ ।
ପ୍ରଶ୍ନ
: ଅନ୍ୟ
ସିନେମା ଗୀତ ଯଥା ଲମହେ,
ସିଲସିଲା ଓ ଚାନ୍ଦିନୀ,
ଇତ୍ୟାଦି
ବିଷୟରେ କିଛି କୁହନ୍ତୁ ?
ପଣ୍ଡିତଜୀ- କେତେଗୁଡ଼େ
ସିନେମା ଆମେ କରିଛୁ । ଯେମିତିକି
ସିଲସିଲା, ଫାସଲେ,
ବିଜୟ,
ଚାନ୍ଦିନୀ,
ଲମହେ,
ପରମ୍ପରା
....ଗୁଡାଏ
ପିକଚର୍ ମୁଁ କରିଛି । ତା’ପରେ
ମୁଁ ବଲିଉଡ୍ ମ୍ୟୁଜିକ୍ ଛାଡିଦେଲି
। ଦୁନିଆରେ ଅନେକ ଜିନିଷ ଅଛି
କରିବାକୁ । ଗୁରୁକୁଳ ଆମ ପରମ୍ପରାର
ଗୋଟେ ଗୁରୁତ୍ୱପୂର୍ଣ୍ଣ ଅଂଶ ।
ଆମେ ସେଇ ବିଷୟରେ ଶୁଣିଛୁ, କିନ୍ତୁ
କିଛି ଦେଖିନୁ । ନିଜ ଘରେ ଗୁରୁ
ଶିଷ୍ୟମାନଙ୍କ ସାଙ୍ଗରେ ରହୁଥିଲେ । ଶିଷ୍ୟମାନେ
ଗୁରୁଙ୍କ ସେବା କରିବେ,
ସଙ୍ଗୀତ
ଶିଖିବେ, ସଂସ୍କୃତ
ଶିଖିବେ । ମୁଁ ଭାବିଲି ମୁଁ ସେମିତି
ଗୋଟେ ଗୁରୁକୂଳ ତିଆରି କରିବି ।
ଫିଲ୍ମ ଇଣ୍ଡ୍ରଷ୍ଟି ଛାଡ଼ି ଗୁରୁକୂଳ
ଗଢିବାରେ ସମୟ ଦେଲି । ଏବେ ମୁମ୍ବାଇରେ
ଗୋଟେ ଗୁରୁକୂଳ ଅଛି,
ଭୁବନେଶ୍ୱରେ
ବି ଅଛି ।
ପ୍ରଶ୍ନ
: ଆପଣ
ବେଳବେଳେ ମଜାରେ କୁହନ୍ତି ଯେ
କୃଷ୍ଣ ଭଗବାନଙ୍କର ଭଳିଆ ଆପଣ
ବଂଶୀ ବଜାଇ ପାରିଲେ ନାହିଁ ?
ପଣ୍ଡିତଜୀ- ତାଙ୍କ
ଭଳିଆ ମୁଁ କାହିଁକି, କୌଣସି ମଣିଷ
ବଜାଇ ପାରିବ ନାହିଁ । ହରିପ୍ରସାଦ
କେବେ ଶ୍ରୀକୃଷ୍ଣ ହୋଇପାରିବେନି
। ସେମିତି ଶ୍ରୀକୃଷ୍ଣ ମଧ୍ୟ
କେବେ ହରିପ୍ରସାଦ ହୋଇପାରିବେନି
। (ଏତକ
କହି ଗୁରୁଜୀ ବେଶ୍ ମନଖୋଲା ହସ
ହସିଥିଲେ ।) ମୁଁ
ଆପଣ ହୋଇପାରିବିନି କି ଆପଣ ବି
ମୋ’ ଭଳିଆ ହୋଇପାରିବେ
ନାହିଁ । ଭଗବାନ ସମସ୍ତଙ୍କୁ
ସୁନ୍ଦର କରିଛନ୍ତି । ସାରା ପୃଥିବୀ
ହେଉଛି ସୁନ୍ଦର । କୃଷ୍ଣଙ୍କର
ନାଁ ଶୁଣି ହଜାର ହଜାର ଗୋପୀ ପାଗଳୀ
ହେଉଥିଲେ । ମୀରା
ବି ଥିଲେ, ରାଣୀମାନେ
ବି ଥିଲେ । ମୁଁ ଆଜ୍ଞା ଯଦି ସେଇଆ
କରିବି, ତା’ହେଲେ
ମୋତେ ଜେଲ୍ ଯିବାକୁ ପଡ଼ିବ ।
ଯାହାହେଉ ଭଗବାନ କୃଷ୍ଣଙ୍କ ସମୟରେ
କୋର୍ଟ କଚେରୀ ନଥିଲା । (ନିଜ
ରସିକତାରେ ଆହୁରି ହସିଲେ ଗୁରୁଜୀ
। )
ଆପଣଙ୍କୁ
ଆଉ ଗୋଟିଏ କଥା କହୁଛି । ସଙ୍ଗୀତ
ଖାଲି ମଣିଷମାନେ ଶୁଣନ୍ତି ନାହିଁ । ପଶୁପକ୍ଷୀ,
କୀଟପତଙ୍ଗ
ଓ ବୃକ୍ଷଲତାମାନେ ମଧ୍ୟ ସଙ୍ଗୀତ
ଶୁଣନ୍ତି । କାଲିଫର୍ଣ୍ଣିଆରେ
ଏକ କ୍ୟାମ୍ପସରେ ୧୦୦ଟି ଗାଈ ଥିଲେ । ତାହାର
ଯେ ତତ୍ତ୍ୱାବଧାରକ, ସେ ସଙ୍ଗୀତକୁ
ନେଇ ଗାଈମାନଙ୍କ ସହ ଏକ୍ସପରିମେଣ୍ଟ୍
କଲେ । ସଙ୍ଗୀତ ବାଜୁଥିବା ପର୍ଯ୍ୟନ୍ତ
ଗାଈ ମନଯୋଗ ସହକାରେ କ୍ଷୀର ଦେଉଥାଏ । ସଙ୍ଗୀତ
ବନ୍ଦ ହୋଇଗଲେ ଗାଈର କ୍ଷୀର ଦେବା
ବନ୍ଦ ହୋଇଯାଏ । ସେହି ସକାଶେ
ଗାଈକୁ ମ୍ୟୁଜିକ୍ ଶୁଣାଇଲେ ।
ଯେଉଁ ଗାଈ ଦୁଇ ଲିଟର କ୍ଷୀର ଦେଉଥିଲା,
ସେ ଦଶ ଲିଟର କ୍ଷୀର ଦେଲା । ସେ
କ୍ଷୀରର ସ୍ୱାଦ ମଧ୍ୟ ଅଲଗା ହେଲା ।
ମୁଁ ମୋର ନିଜ ଗୁରୁକୂଳରେ ଗଛଲତାଙ୍କ
ସହ ସଙ୍ଗୀତର ସମ୍ପର୍କକୁ ଅନୁଭବ
କରିଛି । ବମ୍ବେରେ ବଗିଚା କରିବାକୁ
ଜାଗା ନାହିଁ । ଅଳ୍ପ ଟିକେ ମାଟିରେ
ଏତେ ବଡ଼ ବଡ଼ ଗଛ କେମିତି ହେଲା ।
ଆମ ଗୁରୁକୂଳରେ ବେଶ୍ ମୋଟା ମୋଟା
ଗଛ । ଆପଣ ନିଜେ ଦେଖିଲେ କହିବେ
ଏସବୁ ହେଲା କେମିତି । ଗଛଲତା ବି
ବେଶ୍ ଭଲ ସଙ୍ଗୀତ ଶୁଣିପାରନ୍ତି
।
ପ୍ରଶ୍ନ
: ଆପଣ
ଏତେ ଜାଗା ବୁଲିଛନ୍ତି,
ଏତେ
ଜାଗାରେ ସଙ୍ଗୀତ ସହ ଆପଣଙ୍କର
ସମ୍ପର୍କ ରହିଛି । ସବୁ ରାଜ୍ୟର
ସବୁ ଜାଗାର ସଙ୍ଗୀତ ସହିତ ଆପଣଙ୍କର
ସମ୍ପର୍କ ରହିଛି । ଆପଣଙ୍କର କେଉଁ ଜାଗାରେ ସଙ୍ଗୀତ ସବୁଠୁ ଅଧିକ
ପସନ୍ଦ ?
ପଣ୍ଡିତଜୀ- ଭାରତର
ଯେତେ ପ୍ରକାର ସଙ୍ଗୀତ ଅଛି, ସେତେ
ବିବିଧତା ଆଉ କେଉଁଠି ନାହିଁ ।
ବଂଶୀ ହେଉଛି ଭାରତର । ବଂଶୀ କେଉଁଠି
ମିଳିବ ନାହିଁ । ବାଉଁଶ ଗଛ ନାହିଁ
। ସେମାନେ କ’ଣ
କରିଥା’ନ୍ତି ଷ୍ଟିଲ୍,
ସିଲିଭର୍,
ଗୋଲ୍ଡ୍ ନେଇ କରନ୍ତି । କିନ୍ତୁ ବାମ୍ବୋ (ବାଉଁଶ) ନେଇ ନୁହେଁ । ମୁଁ ଦେଖିଲି ଆମର ସଙ୍ଗୀତର ଯେଉଁ ମୂଲ୍ୟ ବାହାରେ
ଅଛି, ତାହା
ଅନ୍ୟ କେଉଁଥିର ନାହିଁ । ସେଇ ସଙ୍ଗୀତ
ସେମାନଙ୍କୁ ଏତେ ଆକର୍ଷିତ କଲା,
ସେମାନେ
ଆସି କରି ଆମଠୁ ଶିଖିଲେ। ଦେଖନ୍ତୁ । ମୋ ଗୁରୁକୂଳରେ ଦୁନିଆର ଏତେ ଲୋକ । ଏଇଠି
ସେ ଆସି ରହିବାକୁ ଚାହୁଁଛନ୍ତି । ତଳେ
ବସି କଣ୍ଟା ଚାମୁଚ ଫୋପାଡ଼ି ହାତରେ
ଖାଉଛନ୍ତି । ସଙ୍ଗୀତ ସକାଶେ ସେମାନେ
ସବୁ ଛାଡ଼ିଦେଇଛନ୍ତି ।
ପ୍ରଶ୍ନ
: ଶେଷ
ପ୍ରଶ୍ନ ପଚାରିବି । ଆପଣ ଓଡ଼ିଶାରେ
ବାହା ହେଲେ, ଆପଣ
ଓଡ଼ିଶାରୁ ବୋହୂ ନେଇଛନ୍ତି
ଏବଂ ଏବେ ଓଡ଼ିଶାରେ
ରହୁଛନ୍ତି । ସେହି ଦୃଷ୍ଟିରୁ
ଓଡ଼ିଶୀ ସଙ୍ଗୀତକୁ ପରବର୍ତ୍ତୀ
ସମୟରେ ନୂଆକରି ଗଢିବାରେ ଆପଣଙ୍କର
ବହୁତ ବଡ ଅବଦାନ ସମସ୍ତେ ଆଶା
କରୁଛନ୍ତି । ଏ ସମ୍ପର୍କରେ ଆପଣ
କ’ଣ କହିବେ ?
ପଣ୍ଡିତଜୀ- ଆଶା
ତ ବହୁତ କରୁଛନ୍ତି । ହେଲେ
ସୁବିଧା କ’ଣ କରୁଛନ୍ତି
? ସୁବିଧା
ନ ଦେଲେ କେମିତି କରିବି । କେମିତି
ଆସିବି, ସରକାର
କିଛି ସାହାଯ୍ୟ କରୁନାହାନ୍ତି
। ମୋ ଗୁରୁକୂଳରେ ସବୁ ଛାତ୍ର
ମାଗଣାରେ ରୁହନ୍ତି । ଗୁରୁକୂଳର
ପରମ୍ପରା ସେଇଆ । ପଇସା ନେଇ
ଶିକ୍ଷାଦାନ କରିବାର କୌଣସି ଅର୍ଥ
ନାହିଁ । ମୋ ପାଇଁ ପିଲାଙ୍କୁ
ତାଲିମ ଦେବା ହେଉଛି ଗୋଟେ ପ୍ରକାରର ସାଧନା । ତେବେ ଗୁରୁକୂଳକୁ ଚଳାଇବା
ଲାଗି ଅନେକ କିଛି ଆବଶ୍ୟକତା ରହିଛି
। ଶିକ୍ଷକମାନଙ୍କୁ ଦରମା ଦେବାକୁ
ପଡ଼ିବ । ଜିନିଷପତ୍ର
କିଣିବାକୁ ପଡ଼ିବ । ସଙ୍ଗୀତର
ଆସବାବପତ୍ର ରହିବ । ସେସବୁ ଆସିବ
କେଉଁଠୁ ? ବମ୍ବେରୁ
ମୁଁ ନିୟମିତ ଆସିବି କେମିତି ?
ମୁଁ
ଏକଥା ମଧ୍ୟ କହୁନାହିଁ ଯେ ସରକାର
ସବୁ କରିବେ । ସରକାର ଜାଗା ଦେଇଛନ୍ତି
। କିନ୍ତୁ ମୁଁ ଘର କରିଛି । ତେବେ
ସମାଜରେ ଯେଉଁମାନେ ଧନୀ ଓ ବଡ଼
କମ୍ପାନୀ ସବୁ ଅଛନ୍ତି,
ସେମାନଙ୍କର
ଆମ ସଂସ୍କୃତି ପ୍ରତି କିଛି
ଦାୟିତ୍ୱବୋଧ ରହିବା ମଧ୍ୟ ଦରକାର
।
No comments:
Post a Comment