ଇଣ୍ଟର୍ନେଟ୍ ଓ ବଳଦଗାଡ଼ି ବିରୁଦ୍ଧରେ ଏକ ଘୋଷଣାପତ୍ର - ୨
କିଶନ ପଟ୍ଟନାୟକ
କପିରାଇଟ - ବାଣିମଞ୍ଜରୀ ଦାସ
ଟାଇକୋ ବ୍ରାହେ ଙ୍କର ସେକଷ୍ଟାଣ୍ଟର ଚିତ୍ର ଫଟୋ କ୍ରେଡ଼ିଟ - ୱିକିମିଡ଼ିଆ କମନ୍ସ୍ |
ବଳଦଗାଡ଼ି
ଯୁଗରେ ସବୁ ଦେଶର କିଛି ଲୋକ ବହୁତ
ଆରାମ ଓ ବିଳାସରେ ରହୁଥିଲେ । ଆଜି
ଯେପରି ପ୍ରତ୍ୟେକ ଛୋଟ ଇଲାକାରେ
ଗୋଟିଏ ଗୋଟିଏ ଧନୀ ପରିବାର ଦେଖିବାକୁ
ମିଳନ୍ତି ସେତେବେଳେ ମଧ୍ୟ ପ୍ରତ୍ୟେକ
ଛୋଟ ଇଲାକାରେ ଜଣେ ସାମନ୍ତ ରହୁଥିଲେ
। ସେମାନେ ଭୋଗ ବିଳାସରେ ଦିନ
କାଟୁଥିଲେ । ମଧ୍ୟଯୁଗରେ ଭୋଗର
ପରିମାଣ ବହୁତ ବଢ଼ିଗଲା । ତେଣୁ
ଏବେ ମଧ୍ୟ କେଉଁଠାରେ ବିଳାସର
ଆଧିକ୍ୟ ଦେଖିଲେ ଆମେ ତାକୁ ସାମନ୍ତୀ
ବା ମୋଗଲକାଳୀନ ବୋଲି କହୁ ।
ମଝିମଝିକିଆ ଲୋକମାନେ ଥିଲେ
ଯେଉଁମାନେ ମର୍ଯ୍ୟାଦାର ସହିତ
ଜୀବନ ଅତିବାହିତ କରିପାରୁଥିଲେ
। ବଡ଼ ଭାଗ ଲୋକ ଦୁଃଖ କଷ୍ଟରେ
ଚଳୁଥିଲେ । ଏବେ ମଧ୍ୟ ପୃଥିବୀର
ବଡ଼ ଭାଗ ଲୋକେ ଦୁଃଖ କଷ୍ଟରେ
ଚଳୁଛନ୍ତି । ପୃଥିବୀର ଏକ ତୃତୀୟାଂଶ
ଲୋକ ଏପରି ଅମାନବୀୟ ସ୍ଥିତିରେ
ରହିଛନ୍ତି ଯେ ପ୍ରାଚୀନ ସଭ୍ୟତାମାନଙ୍କରେ
ଏତେ ସଂଖ୍ୟାରେ କାଙ୍ଗାଳ ଲୋକ
ଥିଲେ ବୋଲି ଅନୁମାନ କରିହୁଏ ନାହିଁ
।
ଏହା ସତ୍ୟ ଯେ ନାନାବିଧ ଔଷଧ ଓ
ଚିକିତ୍ସାର ଆବିଷ୍କାର ହୋଇଛି
। କିନ୍ତୁ ଏତେ ବେଶୀ ବେମାରୀ ଏତେ
ବ୍ୟାପକ ଭାବରେ କେବେ ଦେଖାଦେଇ
ନଥିଲା,
ଯାହା
ଆଜି ଘଟୁଛି । ଏପରି କୌଣସି ଦିନ
ନାହିଁ ଯେଉଁଦିନ ଆଫ୍ରିକା ବା
ଦକ୍ଷିଣ ଏସିଆରେ ମହାମାରୀ ଲାଗି
ନରହିଛି । ବିଜ୍ଞାନର ଜୟଗାନ କରିବା
ପାଇଁ ଆମେ ଔଷଧ ଦୋକାନକୁ ଦେଖାଇବା,
ନା
ମଣିଷ ଜୀବନର ସ୍ଥିତିକୁ ଦେଖାଇବା ?
ଆପଣ
କହିପାରନ୍ତି,
ଏଥିରେ
ବିଜ୍ଞାନର ଦୋଷ ନାହିଁ । ମଣିଷର
ଦୋଷ,
ସମାଜର
ଦୋଷ । ତାହା ହିଁ ହେଉ । କିନ୍ତୁ
ଏହି କଥାଟିକୁ ଶିକ୍ଷିତ ଲୋକମାନେ
କହିପାରିବେ ନାହିଁ । ‘ଆଧୁନିକ
ବିଜ୍ଞାନ ମାଧ୍ୟମରେ ମନୁଷ୍ୟ
ତା’ର ସମାଜକୁ ସୁଖପ୍ରଦ ଓ ଯୁକ୍ତିଯୁକ୍ତ
କରିପାରି ନାହିଁ’ -
ଏହି
କଥାକୁ ଯଦି କିଛି ବିଦ୍ୟାଳୟର
ପାଠ୍ୟପୁସ୍ତକ ମାନଙ୍କରେ ଲେଖାଯାଇ
ପାରିବ,
କିମ୍ବା
ଶିକ୍ଷିତ ଲୋକମାନେ ସ୍ପଷ୍ଟଭାବରେ
ଏହି କଥାକୁ କହିପାରିବେ,
ତାହା ହେଲେ
ବିଜ୍ଞାନ ବିଷୟକ ଆମର ଚେତନା
ବଦଳିଯିବ । ଆଧୁନିକ ସଭ୍ୟତା
ସମ୍ବନ୍ଧରେ ସତ୍ୟର ଏକ ଗୁରୁତ୍ୱପୂର୍ଣ୍ଣ
ଅଂଶ ଉଦ୍ଘାଟିତ ହେବ ।
ଆଧୁନିକ
ବିଜ୍ଞାନ ମଣିଷ ସମାଜକୁ କେତେ
ପ୍ରଭାବିତ କରିଛି ସେ ବିଷୟରେ
ବିଶ୍ୱବିଦ୍ୟାଳୟର ଛାତ୍ରମାନେ
ଅନେକ ପାଠ ଓ ପ୍ରବନ୍ଧ ପଢ଼ନ୍ତି
। ‘ବିଜ୍ଞାନ ଓ ସମାଜ’,
‘ଆଧୁନିକ
ଶିଳ୍ପ ଓ ମନୁଷ୍ୟ ଜୀବନ’ ଆଦି
ଶିରୋନାମାରେ ସନ୍ଦର୍ଭମାନ ପଢ଼ିବା
ଶୁଣିବା ପରେ ପ୍ରତ୍ୟେକ ଶିକ୍ଷିତ
ଲୋକର ବିଜ୍ଞାନ ଓ ପ୍ରଯୁକ୍ତି
ବିଦ୍ୟା ବିଷୟରେ ଏକ ଧାରଣା ବଦ୍ଧମୂଳ
ହୋଇଯାଏ ଯେ ବୃହତ ଶିଳ୍ପ ଓ ନଗର
ଜୀବନର କେତେକ ଅସଙ୍ଗତି ଯୋଗୁଁ
ମାନସିକ ଦୁଶ୍ଚିନ୍ତା ବଢ଼ିଛି
ସତ,
କିନ୍ତୁ
ମୋଟ ଉପରେ ମନୁଷ୍ୟ ସମାଜର କାର୍ଯ୍ୟ
ଅଧିକ ଯୁକ୍ତିସଙ୍ଗତ ହୋଇଛି ଓ ଭୌତିକ ସୁଖସୁବିଧା ସମସ୍ତଙ୍କ
ପାଇଁ ଉପଲବ୍ଧ ହୋଇପାରିଛି,
ଯାହା
ଆଗରୁ କେବେ ନଥିଲା । ସମାଜଶାସ୍ତ୍ରରେ
ବଡ଼ ବଡ଼ ପଣ୍ଡିତମାନେ ମଧ୍ୟ ଏକଥା
ଲେଖିଛନ୍ତି ଯେ ସମାଜ ଓ ଜୀବନ
ଅଧିକ ଯୁକ୍ତିସଙ୍ଗତ ଓ ନ୍ୟାୟସଙ୍ଗତ
ହୋଇପାରିଛି । ବିଂଶ ଶତାବ୍ଦୀର
ପ୍ରଥମ ଭାଗରେ ଏହିସବୁ ଧାରଣା
ବିକାଶଶୀଳ ଦେଶମାନଙ୍କରେ ପ୍ରଚାରିତ
ହୋଇସାରିଥିଲା । ସେତେବେଳେର
ଉଦାରବାଦୀ ଓ ପ୍ରଗତିଶୀଳ ନେତା ଓ ଚିନ୍ତକମାନେ ଏହା ଉପରେ
ବିଶ୍ୱାସ ରଖି ଭାବୁଥିଲେ ଯେ ଆମ
ଦେଶଟିମାନ ଔପନିବେଶିକ ଦାସତ୍ୱରୁ
ମୁକ୍ତ ହୋଇଯିବା ପରେ ଆଧୁନିକ
ବିଜ୍ଞାନର ବାଟ ଧରି ୟୁରୋପୀୟ
ଦେଶମାନଙ୍କ ପରି ସଭ୍ୟ ଓ ସମୃଦ୍ଧ
ହୋଇଯିବେ । ଏପରି ଭାବିବା ପଛରେ
ସେମାନଙ୍କର ବିଶ୍ୱାସ ଥିଲା ଯେ
ୟୁରୋପ ଆମେରିକାର ଅଦ୍ଭୁତପୂର୍ବ
ସମୃଦ୍ଧି କେବଳ ବିଜ୍ଞାନ ଓ
ପ୍ରଯୁକ୍ତି ବିଦ୍ୟା ଦ୍ୱାରା
ସମ୍ଭବ ହୋଇଛି ।
ଆଜି
ମଧ୍ୟ ଉଚ୍ଚଶିକ୍ଷିତ ଲୋକମାନଙ୍କ
ମୁଣ୍ଡ ଭିତରେ ଏହି ଧାରଣା ଅପରିର୍ବିତ
ରହିଛି । ସାରା ଦୁନିଆରେ ବିଜ୍ଞାନ
ସଙ୍କ୍ରାନ୍ତରେ ଲୋକମାନଙ୍କର
ବୁଦ୍ଧି ଗୋଳମାଳିଆ ଅବସ୍ଥାରେ
ଅଛି । ଯଦି କୌଣସି ଭାରତୀୟ
ବିଶ୍ୱବିଦ୍ୟାଳୟ ପ୍ରଫେସର୍ଙ୍କୁ
ପଚାରିବା -
‘ଭାରତ,
ପାକିସ୍ତାନ କିମ୍ବା ବଙ୍ଗଳାଦେଶ କ’ଣ ୟୁରୋପ, ଆମେରିକା
ପରି ସମୃଦ୍ଧ ହୋଇପାରିବ ?’
ସେ
ଭାରି ଅଡ଼ୁଆରେ ପଡ଼ିଯିବେ । ମୁଣ୍ଡ
ଭିତରର ବୁଦ୍ଧି ଅନୁସାରେ ସେ
କହନ୍ତି,
‘ହଁ’
। କିନ୍ତୁ ଚାରିଆଡ଼ର ବାସ୍ତବତାକୁ
ମନେପକେଇ ସେ ଦ୍ୱିଧାରେ ପଡ଼ିଯିବେ
। ବିଜ୍ଞାନ ଓ ବିକାଶର ଅନ୍ତଃସମ୍ବନ୍ଧ ବିଷୟରେ ବିଶ୍ୱବିଦ୍ୟାଳୟରୁ
ମିଳିଥିବା ଶିକ୍ଷା ଓ ସଞ୍ଚାର
ମାଧ୍ୟମ ଦ୍ୱାରା ଅହରହ ପ୍ରଚାରିତ
ଚଟପଟିଆ ଜ୍ଞାନଗୁଡ଼ିକ ଦ୍ୱାରା
ପ୍ରଭାବିତ ହୋଇ ସେ ଭାବିବେ ଯେ
ବିଜ୍ଞାନ ଦ୍ୱାରା ଏହା ସମ୍ଭବ ।
ଆଧୁନିକ ବିଜ୍ଞାନ ଓ ପ୍ରଯୁକ୍ତିବିଦ୍ୟାକୁ
ବ୍ୟବହାର କରି ଭାରତ ଅଚିରେ ଏକ
ଆର୍ଥିକ ମହାଶକ୍ତି ହୋଇଯିବ ନାହିଁ
କାହିଁକି ?
ଅନ୍ୟ
ଆଡେ଼ ପୃଥିବୀର ନଗ୍ନ ବାସ୍ତବତାକୁ
ମନେପକାଇ ସେ ଅଟକିଯିବେ ଓ ଥଙ୍ଗେଇ ଥଙ୍ଗେଇ କହିବେ,
‘ଆମେରିକା
ହୋଇପାରିବ ନାହିଁ ତ କ’ଣ ହେଲା,
ଦକ୍ଷିଣ
କୋରିଆ ଭଳି ହୋଇପାରିବ ନିଶ୍ଚୟ’
।
ପ୍ରଥମ
କଥା,
ଦକ୍ଷିଣ
କୋରିଆ ହୋଇପାରିବ କି ?
କିନ୍ତୁ
ଧରାଯାଉ ଦକ୍ଷିଣ କୋରିଆ ଭଳି
ହେବାଟା ସମ୍ଭବ ଓ ଏହା ଏକ
ବ୍ୟବହାରିକ ଲକ୍ଷ୍ୟ । ତେବେ
ଜାଣିବା କଥା ଯେ ଦକ୍ଷିଣ କୋରିଆ
ଆମେରିକାର ପାଖାପାଖି ଜିନିଷ
ନୁହେଁ । ଆମେରିକାର ପ୍ରତି ବ୍ୟକ୍ତିର
ଆୟ ତିରିଶ ହଜାର ଡଲାର ହେବା ବେଳକୁ
ଦକ୍ଷିଣ କୋରିଆର କେବଳ ଆଠ ହଜାର
ଡଲାର । ଦ୍ୱିତୀୟ ପ୍ରଶ୍ନ ଉଠିବ
ଯେ ଦକ୍ଷିଣ କୋରିଆ କାହିଁକି
ଆମେରିକା ଭଳି ହୋଇପାରୁ ନାହିଁ ?
ଭାରତ
କାହିଁକି ବା ଦକ୍ଷିଣ କୋରିଆକୁ
ଆଦର୍ଶ ରୂପେ ଗ୍ରହଣ କରିବ ?
କାହିଁକି
ଆମେରିକା ବା ବିଲାତର ସମୃଦ୍ଧିକୁ
ଆଦର୍ଶ ରୂପେ ନେବନାହିଁ ?
ଏହି
ପ୍ରଶ୍ନର ଉତ୍ତର ଖୋଜିବାକୁ ଗଲେ
କେତେଗୁଡ଼ିଏ ସତ୍ୟର ଦର୍ଶନ
ମିଳିପାରିବ । କିନ୍ତୁ ବିଶ୍ୱବିଦ୍ୟାଳୟର
ପାଠରେ କିମ୍ବା ସାର ମାଧ୍ୟମରେ
ଏହି ପ୍ରଶ୍ନଗୁଡ଼ିକୁ ପଚାରିବା
ମନା ।
No comments:
Post a Comment