ଇଣ୍ଟର୍ନେଟ୍ ଓ ବଳଦଗାଡ଼ି ବିରୁଦ୍ଧରେ ଏକ ଘୋଷଣାପତ୍ର - ୮
କିଶନ ପଟ୍ଟନାୟକ
କପିରାଇଟ - ବାଣିମଞ୍ଜରୀ ଦାସ
ସେଣ୍ଟ ରୋଲେକ୍ସ କେମିକାଲ ୱର୍କସ ର ଚିତ୍ରର ଫଟୋ କଳାକାର - ଡ଼ି.ଓ. ହିଲ୍ (୧୮୩୧) |
ଉପରୋକ୍ତ
ଦ୍ୱନ୍ଦ୍ୱର ଆଉ ଏକ ଉଦାହରଣ ହେଉଛି
ପରିବେଶ ଆନ୍ଦୋଳନ । ଗତ ଦୁଇ ତିନି
ଦଶକ ମଧ୍ୟରେ ପରିବେଶ ଆନ୍ଦୋଳନକାରୀମାନେ
ପରିବେଶର ଧ୍ୱଂସ ପାଇଁ ଆଧୁନିକ
ପ୍ରଯୁକ୍ତିବିଦ୍ୟାକୁ ଦାୟୀ
କରିଛନ୍ତି । ଆଧୁନିକ ଶିଳ୍ପ
ବ୍ୟବସ୍ଥାର ସେମାନେ ଅନେକ ସମାଲୋଚନା
କରିଛନ୍ତି । କିନ୍ତୁ ଆଶ୍ଚର୍ଯ୍ୟର
କଥା ଯେ ସେମାନେ ଏହି ପ୍ରଯୁକ୍ତିବିଦ୍ୟାର
ମୁଖ୍ୟ ଧାରାକୁ ବିରୋଧ କରନ୍ତି
ନାହିଁ । ଏହି ପ୍ରଯୁକ୍ତିବିଦ୍ୟା
ଉପରେ ଆଧାରିତ ଶିଳ୍ପ-ବ୍ୟବସ୍ଥାର
ସେମାନେ ବିରୋଧୀ ନୁହନ୍ତି । ଗୋଟିଏ
ଗୋଟିଏ ନିର୍ଦ୍ଧିଷ୍ଟ କାରଖାନା
ବା ଶିଳ୍ପ ଆଖପାଖର ପରିବେଶ ନଷ୍ଟ
କରିବ ବୋଲି ସେମାନେ ଘୋର ପ୍ରତିବାଦ
କରନ୍ତି ।
ବିଭିନ୍ନ ପରିବେଶ
ଆନ୍ଦୋଳନକାରୀ ସମୂହମାନଙ୍କୁ
ଯୋଡ଼ିକରି ଦେଖିଲେ ଜଣାପଡ଼ିବ
ଯେ ପ୍ରଚଳିତ ଶିଳ୍ପ ବ୍ୟବସ୍ଥା
ଓ ପ୍ରଯୁକ୍ତିବିଦ୍ୟାର ଧାରାକୁ
ବିରୋଧ କରିବା ଦରକାର । କିନ୍ତୁ
ସେମାନେ ବିକଳ୍ପ କଥା ଚିନ୍ତା
କରିପାରନ୍ତି ନାହିଁ । ବିକାଶଶୀଳ
ଦେଶମାନଙ୍କର ଅଧିକାଂଶ ପରିବେଶ
ଆନ୍ଦୋଳନକାରୀ ସଙ୍ଗଠନ ସରକାରୀ
କିମ୍ବା ବିଦେଶୀ ଅନୁଦାନ ବହୁ
ପରିମାଣରେ ପାଆନ୍ତି । ସେମାନଙ୍କର
ଜୀବନର ସ୍ତର ବହୁତ ଉଚ୍ଚରେ ।
ତେଣୁ ବୋଧହୁଏ ପ୍ରଚଳିତ ବ୍ୟବସ୍ଥାର
ପ୍ରତ୍ୟକ୍ଷ ବିରୋଧ କରିବା ସେମାନଙ୍କ
ପାଖରେ ସମ୍ଭବ ନୁହେଁ ।
ଦିଲ୍ଲୀର
ଗୋଟିଏ ପ୍ରସିଦ୍ଧ ପରିବେଶ
ଆନ୍ଦୋଳନକାରୀ ସଙ୍ଗଠନ ମୋଟରଗାଡ଼ି
ଓ ଦୁଇଚକିଆ ଯାନମାନଙ୍କର ଅଧିକ
ସଂଖ୍ୟା ଓ ତହିଁରୁ ନିର୍ଗତ
ଧୂଳିଧୂଅାଁ ଯୋଗୁଁ ଦିଲ୍ଲୀ
ସମ୍ପୂର୍ଣ୍ଣ ପ୍ରଦୂଷିତ ହେଉଛି
ବୋଲି ପ୍ରଚାର ଆରମ୍ଭ କରିଥିଲେ
। ଦିଲ୍ଲୀରେ ବେମାରୀ ଓ ମୃତ୍ୟୁର
ସଂଖ୍ୟା ଏଥିଯୋଗୁଁ ଉଲ୍ଲେଖନୀୟ
ଭାବରେ ବଢ଼ିଥିବାର ତଥ୍ୟଗତ ପ୍ରମାଣ
ସେମାନେ ଖବରକାଗଜ ଓ ଟେଲିଭିଜନ
ମାଧ୍ୟମରେ ପ୍ରଚାର କଲେ । ଶେଷରେ
ଦିଲ୍ଲୀ ସରକାରଙ୍କୁ ବାଧ୍ୟ ହୋଇ
ଆଇନ କରିବାକୁ ପଡ଼ିଲା ଯେ ପୁରୁଣା
ଗାଡ଼ି ମୋଟର ସ୍କୁଟର ଆଦିକୁ
ରାସ୍ତାରେ ଚାଲିବା ପାଇଁ ଅନୁମତି
ଦିଆଯିବ ନାହିଁ,
କାରଣ
ପୁରୁଣାମାନେ ହିଁ ବେଶୀ ପ୍ରଦୂଷଣ
କରନ୍ତି । କିନ୍ତୁ ପରିବେଶ
ଆନ୍ଦୋଳନକାରୀମାନେ କେବେ ମଧ୍ୟ
କହିଲେ ନାହିଁ ଯେ,
ଦିଲ୍ଲୀରେ
ଗାଡ଼ିମୋଟର ସଂଖ୍ୟାକୁ ଅଧା
କିମ୍ବା ଏକ ତୃତୀୟାଂଶ ପର୍ଯ୍ୟନ୍ତ
କମେଇ ଦିଆଯାଉ ।
ସବୁ ଗାଡ଼ି ପ୍ରଦୂଷଣ
କରନ୍ତି । କଲିକତା,
ମାନ୍ଦ୍ରାଜ ଓ ବମ୍ବେଇର ଗାଡ଼ି ସଂଖ୍ୟା ମିଶାଇଲେ
ଯାହା,
ଏକା
ଦିଲ୍ଲୀରେ ତାଠାରୁ ବେଶୀ ଗାଡ଼ି
ଚାଲିଛି । ରାସ୍ତାଗୁଡ଼ିକରେ
ମଣିଷ ଚାଲିବାର ଜାଗା ନଥାଏ ।
ନିର୍ଦ୍ଧିଷ୍ଟ ସମୟମାନଙ୍କରେ
ଏକ ବିଭତ୍ସ ଦୃଶ୍ୟ ରାସ୍ତାମାନଙ୍କରେ
ଦେଖାଯାଏ । ପେଁ ପାଁ ଧଡଧଡର
କୁତ୍ସିତ ରଡ଼ି ଆକାଶ ଓ ପବନକୁ
କମ୍ପାଇ ଦିଏ । ଯାହାପାଖରେ ନିଜର
ଶୀତତାପ ନିୟନ୍ତ୍ରିତ ନୂଆ ମୋଟର
ଗାଡ଼ି ନଥାଏ ସେ ନିଜକୁ ବୋଝେଇ
ମାଲର ଗୋଟିଏ ଅଂଶ ବୋଲି ଧାରଣା
କରେ । ମୋଟରଗାଡ଼ିଗୁଡ଼ିକର ସଂଖ୍ୟାକୁ କମେଇଦେଲେ ପବନ କେତେ
ସ୍ୱଚ୍ଛ,
ରାସ୍ତା
କେତେ ଖୋଲା ଓ ଆକାଶ କେତେ ସୁନ୍ଦର
ଦିଶନ୍ତା । କିନ୍ତୁ ଆମ ବନ୍ଧୁମାନେ
କେବଳ ପୁରୁଣା ଗାଡ଼ିମାନଙ୍କୁ
ହଟେଇବା ଆନ୍ଦୋଳନ କଲେ । ମାଲିକମାନେ
ନୂଆ ମୋଟରଗାଡ଼ି କିଣନ୍ତୁ ।
ଦେଶବ୍ୟାପୀ ଏହା କଦାପି ସମ୍ଭବ
ନୁହେଁ । ଦିଲ୍ଲୀରୁ ପୁରୁଣା ଗାଡ଼ି
କାନପୁରକୁ ଯିବ ଓ କାନପୁରର ପୁରୁଣାଗାଡ଼ି କଟକକୁ ଆସିବ ।
ମୋଟରଗାଡ଼ିକୁ ଉତ୍ସାହିତ
କରାଯାଉଛି । ବିକାଶଶୀଳ ଦେଶମାନଙ୍କରେ
ଏତେ କ୍ରୟ ଶକ୍ତି ନାହିଁ ଯେ ସମସ୍ତେ
ନୂଆ ଗାଡ଼ି ବ୍ୟବହାର କରିବେ ।
ନୂଆ ସ୍କୁଟରଟିଏ ମଧ୍ୟ କିଣିହୁଏ
ନାହିଁ । ଆଇନ କଲେ ମଧ୍ୟ କାର୍ଯ୍ୟକାରୀ
ହେବ ନାହିଁ । ତେବେ ଯେଉଁମାନଙ୍କର
ଆର୍ଥିକ ଅବସ୍ଥା ଭଲ ସେମାନେ ଆଇନ
ଫଳରେ ପୁରୁଣା ଗାଡ଼ି ବିକ୍ରି
କରିଦେବେ । ସଞ୍ଜୋଗର ଗୋଟିଏ ତ୍ରିଭୁଜ
ସୃଷ୍ଟି ହେଲା । ପୁରୁଣା ଗାଡ଼ି
ବନ୍ଦ କରିବା ପାଇଁ ଆଇନ ହେଲା ।
ପଞ୍ଚମ
ବେତନ ଆୟୋଗର ସୁପାରିଶ ପରେ ଦରମା
ହୁ ହୁ ହୋଇ ବଢ଼ିଲା । ବିଦେଶୀ
କମ୍ପାନୀମାନେ ଉଦାରୀକରଣ ନୀତିଦ୍ୱାରା
ଆକୃଷ୍ଟ ହୋଇ ଭାରତରେ ଗୁଡ଼ିଏ
ନୂଆ ବ୍ରାଣ୍ଡ ଓ ମଡେ଼ଲର ମୋଟରଗାଡ଼ି
ଉତ୍ପାଦନ
ଆରମ୍ଭ କରିସାରିଥିଲେ । ପ୍ରଫେସରମାନେ
ମାରୁତି କିଣିଲେ,
ଅଫିସରମାନେ
ଏଷ୍ଟିମ୍ କିଣିଲେ । ଧନୀ ଲୋକମାନଙ୍କୁ
ମାରୁତିରେ ଚଢ଼ିବାକୁ ଲାଜ ଲାଗିଲା
। ତେଣୁ ସେମାନେ ସବୁଠୁ ଦାମିକା
ଗାଡ଼ିର ବରାଦ କଲେ । ବ୍ୟଙ୍ଗାତ୍ମକ
ଭାବରେ ଆମେ କହିପାରିବା ଯେ ପରିବେଶ
ଆନ୍ଦୋଳନ ମୋଟରଗାଡ଼ି ଓ ସ୍କୁଟର
କମ୍ପାନୀମାନଙ୍କର ବିକ୍ରି
ବଢ଼ାଇଦେଲା । ସତେ ଯେପରି ଏହା
ହେଉଛି ସଂସାରର ଲୀଳା । ଗୋଟିଏ
ଭଲ ଉଦ୍ଦେଶ୍ୟ ଏକ ମନ୍ଦ ଉଦ୍ଦେଶ୍ୟ ସାଙ୍ଗରେ ଯୋଡ଼ି ହୋଇଯାଉଛି ।
ଉପରୋକ୍ତ
ଉଦାହରଣରୁ ପରିବେଶ ଆନ୍ଦୋଳନକାରୀମାନଙ୍କର
ଦୃଷ୍ଟିକୋଣ ସ୍ପଷ୍ଟ ହୋଇଯାଉଛି
। ସେମାନେ ପ୍ରଚଳିତ ପ୍ରଯୁକ୍ତିବିଦ୍ୟା
କିମ୍ବା ତାହା ଉପରେ ଆଧାରିତ ବିକାଶ
ପ୍ରଣାଳୀକୁ ଅସ୍ୱୀକାର ନକରି
ଭାବୁଛନ୍ତି ଯେ ସତର୍କତା ଅବଲମ୍ବନ
କଲେ,
କିମ୍ବା
ଯନ୍ତ୍ରମାନଙ୍କରେ ସାମାନ୍ୟ
ସୁଧାର କରିଦେଲେ ପରିବେଶ ସୁରକ୍ଷିତ
ହୋଇଯିବ । ଅସଲ କଥା ସେମାନେ ପରିବେଶ
ବ୍ୟତୀତ ଅନ୍ୟାନ୍ୟ ଦିଗକୁ ପରୀକ୍ଷା
କରୁନାହାନ୍ତି । ଗୋଟିଏ ପଟେ ଯେଉଁ
ଯନ୍ତ୍ର ପରିବେଶ ଧ୍ୱଂସ କରୁଛି,
ସେହି
ଯନ୍ତ୍ର ଗରିବ ଶ୍ରେଣୀର ଆର୍ଥିକ
ଶୋଷଣ କରୁଛି ଓ ସେହି ଯନ୍ତ୍ର ସମାଜ
ଓ ସଂସ୍କୃତିକୁ ବିଭତ୍ସ କରିପକାଉଛି
।
No comments:
Post a Comment