ଇଣ୍ଟର୍ନେଟ୍ ଓ ବଳଦଗାଡ଼ି ବିରୁଦ୍ଧରେ ଏକ ଘୋଷଣାପତ୍ର - ୩
କିଶନ ପଟ୍ଟନାୟକ
କପିରାଇଟ - ବାଣିମଞ୍ଜରୀ ଦାସ
ଲୁଡାଇଟମାନେ କଳ ତନ୍ତ ଭାଙ୍ଗୁଥିବାର ଦୃଶ୍ୟ ଫଟୋ କ୍ରେଡ଼ିଟ - ୱିକିମିଡ଼ିଆ କମନ୍ସ୍ |
୧୯୫୦ରୁ
୧୯୭୦ ମଧ୍ୟରେ ପୃଥିବୀର ଅଧିକାଂଶ
ଦେଶକୁ,
ପ୍ରାୟ
ସବୁ ଗୁରୁତ୍ୱପୂର୍ଣ୍ଣ ଦେଶଗୁଡ଼ିକୁ,
ରାଜନୈତିକ
ସ୍ୱାଧୀନତା ମିଳିଯାଇଥିଲା ।
୧୯୫୦ ଦଶନ୍ଧିରୁ ଏସିଆ,
ଆଫ୍ରିକା
ଓ ଲାଟିନ୍ ଆମେରିକାର ନବ-ସ୍ୱାଧୀନ
ଦେଶମାନେ ଆଧୁନିକ ବିଜ୍ଞାନ
ସାହାଯ୍ୟରେ ନିଜର ସମାଜକୁ ସମୃଦ୍ଧ
କରିବା ପାଇଁ କାର୍ଯ୍ୟରତ ଅଛନ୍ତି
। ସେମାନେ ସଞ୍ଯୁକ୍ତ ଭାବରେ କୌଣସି
ବିକାଶ ଯୋଜନା ଚଳାଉ ନାହାନ୍ତି
କିମ୍ବା ପରସ୍ପର ମଧ୍ୟରେ ଆର୍ଥିକ
ନୀତି ସମ୍ବନ୍ଧୀୟ ପରାମର୍ଶ ଆଲୋଚନା
କରୁନାହାନ୍ତି । ବରଂ ପ୍ରତ୍ୟେକ
ନିଜର ବୁଦ୍ଧିରେ ଚାଲୁଛନ୍ତି ଓ
ନିୟମିତ ଭାବରେ ୟୁରୋପ ଓ ଆମେରିକାର
ବିଶେଷଜ୍ଞମାନଙ୍କୁ ହିଁ ପରାମର୍ଶ
କରୁଛନ୍ତି । ଆଶ୍ଚର୍ଯ୍ୟର କଥା
ଏହି ଯେ ବିଭିନ୍ନ ପରିସ୍ଥିତିରୁ
ବାହାରିଥିବା ଏହି ପଛୁଆ ରାଷ୍ଟ୍ରମାନେ
ଆଧୁନିକ ବିଜ୍ଞାନ ଓ ପ୍ରଯୁକ୍ତିବିଦ୍ୟାକୁ
ଗ୍ରହଣ କରିବା ପରେ ସମାନ ରକମର
ଅଧିକ ବିପତ୍ତି ଓ ସଙ୍କଟ ଭିତରେ
ପଡ଼ିଛନ୍ତି ।
କୌଣସି ରାଷ୍ଟ୍ର
ୟୁରୋପ-ଆମେରିକାର
ସମକକ୍ଷ ହୋଇନାହାନ୍ତି । ‘ଏସିଆର
ବ୍ୟାଘ୍ର’ ବୋଲି ଦକ୍ଷିଣ କୋରିଆ,
ମାଲେସିଆ
ଓ ତାଇୱାନ୍ ଭଳି ଯେଉଁ ଚାରି ପାଞ୍ଚଟି
ଦେଶର ଉଦାହରଣ ଦିଆଯାଏ,
ସେଗୁଡ଼ିକ
ୟୁରୋପ-ଆମେରିକାର
ଧନୀ ଦେଶମାନଙ୍କ ତୁଳନାରେ କିଛି
ନୁହନ୍ତି । ଅବଶ୍ୟ ମଧ୍ୟ-ଆଫ୍ରିକା
ବା ଦକ୍ଷିଣ-ଏସିଆର ଦେଶମାନଙ୍କ
ତୁଳନାରେ ସେମାନଙ୍କୁ ସମୃଦ୍ଧ
ବୋଲି କୁହାଯିବ । ଏହି ଆପେକ୍ଷିକ
ସମୃଦ୍ଧି କେତେକ ରାଜନୈତିକ ଓ
କୂଟନୈତିକ କାରଣରୁ ସମ୍ଭବ ହେଲା
। ୧୯୪୫ ମସିହା ପରେ ସୋଭିଏତ ତଥା
ଚୀନ ଦେଶର ସାମ୍ୟବାଦ ବିଶ୍ୱର
ଧନୀ ପୁଞ୍ଜିବାଦୀ ଦେଶମାନଙ୍କ
ମନରେ ଏକ ଆତଙ୍କ ସୃଷ୍ଟି କରିଥିଲା
। ଏସିଆର ଅନ୍ୟ ଦେଶମାନଙ୍କୁ
ସାମ୍ୟବାଦୀ ପ୍ରଭାବର କବଳରୁ
ସୁରକ୍ଷିତ କରିବା ଉଦ୍ଦେଶ୍ୟରେ
ଧନୀ ସାମ୍ରାଜ୍ୟବାଦୀ ଦେଶମାନେ
ପୂର୍ବ-ଏସିଆର ଉପରୋକ୍ତ ଦେଶମାନଙ୍କୁ
ବିଶେଷ ଭାବରେ ସାହାଯ୍ୟ କଲେ ।
ଏହି ଦେଶମାନଙ୍କର ବାଣିଜ୍ୟରେ
ଅଭିବୃଦ୍ଧି ପାଇଁ ବିଶେଷ ଧ୍ୟାନ
ଦେଲେ । ଜାପାନ ୧୯୪୫ ମସିହା ଆଗରୁ
ଏକ ମହାଶକ୍ତି ଓ ସାମ୍ରାଜ୍ୟବାଦୀ
ଦେଶଭାବରେ ଉଠିସାରିଥିଲା । କିନ୍ତୁ
ପଶ୍ଚିମର ଧନୀ ଦେଶମାନେ ଜାପାନକୁ
ମଧ୍ୟ ଅଭିବୃଦ୍ଧିରେ ସହଯୋଗ କଲେ
। ଦ୍ୱିତୀୟ ବିଶ୍ୱଯୁଦ୍ଧର ପରାଜିତ
‘ଶତ୍ରୁ’ ଦେଶ ହୋଇଥିଲେ ସୁଦ୍ଧା,
ଯୁଦ୍ଧ
ପରବର୍ତ୍ତୀ କାଳରେ ଆମେରିକାର ସହଯୋଗରେ
ଜାପାନ ଏକ ଆର୍ଥିକ ମହାଶକ୍ତିରେ
ପରିଣତ ହେଲା ।
ତେଣୁ ଯେଉଁ ଉଦାରୀକରଣର
ବିକାଶ ପଦ୍ଧତିକୁ ଭାରତ ଆଜି
ଅନୁସରଣ କରୁଛି,
ସେଇ
ପଦ୍ଧତିରେ ଜାପାନ କିମ୍ବା ଏସିଆର
‘ବ୍ୟାଘ୍ର’ ମାନେ ସମୃଦ୍ଧ ହେଲେ
ବୋଲି କହିବା ଭୁଲ ହେବ । ଆଧୁନିକ
ବିଶ୍ୱର ଯେଉଁ ଦେଶମାନେ ସମୃଦ୍ଧ
କିମ୍ବା ଆର୍ଥିକ ମହାଶକ୍ତି
ବୋଲାଉଛନ୍ତି, ସେମାନଙ୍କର ଏକ
ସାମ୍ରାଜ୍ୟବାଦୀ ପଟ୍ଟଭୂମି
ଅଛି । ଏବେ ମଧ୍ୟ ଆର୍ଥିକ
କ୍ଷେତ୍ରରେ ସେମାନେ ବିକାଶଶୀଳ
ଦେଶମାନଙ୍କୁ ଉପନିବେଶ ପରି
ବ୍ୟବହାର କରୁଛନ୍ତି । ତେଣୁ
ଆଧୁନିକ ପ୍ରଯୁକ୍ତିବିଦ୍ୟା
ଦ୍ୱାରା ଯେକୌଣସି ଦେଶ ଧନୀ ଓ
ଶିଳ୍ପୋନ୍ନତ ହୋଇପାରିବ ବୋଲି
ଯେଉଁ ପ୍ରଚଳିତ ଧାରଣା ଅଛି,
ତାହା
ଠିକ୍ ନୁହେଁ । ଆଧୁନିକ ବିକାଶ
ପଦ୍ଧତି କହିଲେ ଆର୍ଥିକ କ୍ଷେତ୍ରରେ
ଅତ୍ୟାଧୁନିକ ଯନ୍ତ୍ରବିଦ୍ୟାର ପ୍ରୟୋଗ । ଯେଉଁ ଦେଶର ନିଜସ୍ୱ
ପୁଞ୍ଜି ନାହିଁ,
ସେ
ଧନୀ ଦେଶରୁ ଋଣ ନେଉ,
କିମ୍ବା
ବିଦେଶୀ କମ୍ପାନୀମାନଙ୍କୁ ଡାକି
ଆଣୁ,
ଏହାହିଁ
ଆଧୁନିକ ବିକାଶ ପଦ୍ଧତି ।
ଗତ
ଅର୍ଦ୍ଧଶତାବ୍ଦୀ ଧରି ବିକାଶଶୀଳ
ଦେଶମାନେ ଆର୍ଥିକ କ୍ଷେତ୍ରରେ
ବିଜ୍ଞାନର ଏତାଦୃଶ ପ୍ରୟୋଗ କରିବା
ଫଳରେ କେତେ ଲାଭ କ୍ଷତି ହୋଇଛି,
ତାହାର
ବିଧିବଦ୍ଧ ସମୀକ୍ଷା ହୋଇନାହିଁ
। କିନ୍ତୁ ସଞ୍ଜୁକ୍ତ ରାଷ୍ଟ୍ର
ସଙ୍ଘ (ୟୁ.ଏନ୍.ଓ.)ର
ମାନବୀୟ ବିକାଶ ସର୍ବେକ୍ଷଣର
ରିପୋଟ ଆଜିକାଲି ପ୍ରତିବର୍ଷ
ପ୍ରକାଶିତ ହେଉଛି । ଏହାକୁ ଅନୁଧ୍ୟାନ
କଲେ ଜଣାପଡ଼ିବ ଯେ ଆଧୁନିକ
ବୈଜ୍ଞାନିକ କୌଶଳରୁ ପାରୁ ପର୍ଯ୍ୟନ୍ତ
ବ୍ୟବହାର କରିବାର ଚେଷ୍ଟା କରି
ସେମାନେ କେଉଁ ଅବସ୍ଥାରେ ପହଞ୍ଚିଛନ୍ତି
। କ୍ଷୁଧା ଓ ବାସହୀନ ଲୋକମାନଙ୍କର
ସଂଖ୍ୟା ପ୍ରାଚୀନ ଓ ମଧ୍ୟଯୁଗ
ତୁଳନାରେ ବଢ଼ିଛି । ଜୀବନଧାରଣ
ଓ ଜୀବିକା ଦୃଷ୍ଟିରୁ ପୃଥିବୀର
ଏକ ତୃତୀୟାଂଶ ଲୋକ ଅସହାୟ । ପ୍ରାଚୀନ
ଓ ମଧ୍ୟଯୁଗ ମାନଙ୍କରେ ୧୫-୨୦
ବର୍ଷରେ କେବେ ଥରେ ମହାମାରୀ
କିମ୍ବା ନିରବଚ୍ଛିନ୍ନ ଅନାବୃଷ୍ଟି
ଆସିଲେ ଲୋକମାନେ କୀଟପତଙ୍ଗ ପରି
ମରୁଥିଲେ । କିନ୍ତୁ ପ୍ରତିଦିନ,
ଜୀବନ
ଯାକ ଅଧାଖିଆ ହୋଇ ବାସହୀନ ହୋଇ
ରହୁଥିବା ଲୋକଙ୍କର ସଂଖ୍ୟା ଅନେକ
ପ୍ରାଚୀନ ବା ମଧ୍ୟଯୁଗୀୟ ସଭ୍ୟତା
ତୁଳନାରେ ଆଜି ବହୁତ ବେଶୀ ।
ତେଣୁ
ଏ କଥାରୁ ଠିକ୍ ଭାବରେ ବୁଝିବାକୁ
ହେବ ଯେ ଆଧୁନିକ ବିଜ୍ଞାନ କାହାକୁ,
କେଉଁଠାରେ,
କିପରି
ସୁଖ ଦେଇଛି । ଅଳ୍ପ କେତେକ ଦେଶକୁ ଓ ସବୁ ଦେଶର କେତେକ ଅଳ୍ପ ସଂଖ୍ୟକ
ଗୋଷ୍ଠୀଙ୍କୁ
ଆଧୁନିକ ବିଜ୍ଞାନ ନିଶ୍ଚୟ ଶକ୍ତିଶାଳୀ
କରିଛି ଓ ସୁଖ ଦେଇଛି । ପୃଥିବୀଯାକର
ଉପଯୋଗୀ ଓ ଉପଭୋଗ୍ୟ ଜିନିଷମାନଙ୍କୁ
ତାଙ୍କ ପାଖରେ ଠୁଳ କରିଦେଇଛି ।
ବସ୍ତୁମାନଙ୍କର ଉପଭୋଗରୁ ସୁଖ
ମିଳେ । ଆଉ ଗୋଟିଏ ପ୍ରକାରର ସୁଖ
କ୍ଷମତାରୁ ମିଳିଥାଏ । ବିଶେଷ
ପ୍ରୟୋଜନ ନହେଲେ ମଧ୍ୟ ଯିଏ ବହୁତ
ଜିନିଷ ନିଜ ପାଖରେ ରଖିଥାଏ, ବଞ୍ଚିତ
ଲୋକମାନଙ୍କ ସମକ୍ଷରେ ତାହାର ଏକ
କ୍ଷମତା ସୃଷ୍ଟି ହୁଏ । ଏହି କ୍ଷମତା
ଯୋଗୁଁ ସେ ଗର୍ବ ଓ ସନ୍ତୋଷ ଅନୁଭବ
କରେ । ଏହା ହେଉଛି କ୍ଷମତାର ସୁଖ
। ଯେଉଁ ଉପାୟରେ ଓ ଯେପରି ଭାବରେ
ଆଧୁନିକ ପ୍ରଯୁକ୍ତି ବିଦ୍ୟା
କେତେକ ଦେଶକୁ ବା କେତେକ ଶ୍ରେଣୀ
ବିଶେଷଙ୍କୁ ଉପଭୋଗ ତଥା କ୍ଷମତାର
ସୁଖ ଦେଇଛି,
ସେହି
ଉପାୟରେ ସବୁ ଲୋକଙ୍କ ପାଇଁ ସୁଖ
କିମ୍ବା ସବୁ ଦେଶକୁ ଶକ୍ତି ସମ୍ପନ୍ନ
କରାଯାଇପାରିବ ନାହିଁ । କାରଣ
ଏହି ଯେ ପ୍ରଯୁକ୍ତିବିଦ୍ୟାର
ମୁଖ୍ୟ କୌଶଳ ହେଉଛି ଠୁଳ କରିବା
(କେନ୍ଦ୍ରୀକରଣ),
ସୃଷ୍ଟି
କରିବା ନୁହେଁ ।
No comments:
Post a Comment