ପିଲାଙ୍କ ଗୀତ - କଇଁଚି କାକୁଡ଼ି ନଳିତା ପିତା 

କବି -ନାରାୟଣ ପ୍ରସାଦ ସିଂହ

ଗାୟକ - ନିର୍ମଳା ମିଶ୍ର 

ଗୀତର ୟୁଟ୍ୟୁବ୍ ଲିଙ୍କ୍ - https://www.youtube.com/watch?v=Itv6swEkOZs

ଫଟୋ କ୍ରେଡ଼ିଟ୍ - ୱିକିମିଡ଼ିଆ କମନସ୍ 

କଇଁଚି କାକୁଡ଼ି ନଳିତା ପିତା,

ବାବୁନି ହେବ ଜଗତ ଜିତା 

କହିବେ ଲୋକେ କିଏ ତା' ମାତା ।

ବେଶୀ ପାଠ ପଢ଼ି ସେ ତ ବିଲାତରୁ ଫେରିବ 

ଗୋପବନ୍ଧୁ ମଧୁସମ ତା' ଯଶ ବଢ଼ିବ

ଦେଶ ଦଶ ସେବା କରି ନାଁ ତା'ର ପଡ଼ିବ ।

ମାଆ ମନ ଆଶା ପୂରିବ ସେ ଦିନ 

ଲୋଡ଼େନା ମୁଁ କିଛି ଧନ କି ରତନ

ଆଣିବି ଖୋଜି ଖୋଜି ବୋହୂ ସୁନା ସୀତା ।

ରଜା ହୁଅ ମନ୍ତ୍ରୀ ହୁଅ ଦେଶେ ବଡ଼ ହୁଅ ରେ

ମାଆ ପାଖେ ହେଲେ ତୋର ପରିଚୟ ପୁଅ ରେ

ବୁକେ ଭରା ତୋର ଲାଗି ମମତାର ସୁଅରେ ।

ଗରବ ତୁ ମୋର ଗଉରବ ମୋର

ଦୁନିଆରେ ତୁହି ବଇଭବ ମୋର

ତୋ' ମୁଖେ ହସେ ଭରା ମୋ ସୁଖ ବାରତା ।