ଟିଟିଲାଗଡ଼ର ରସରକେଲି ଗୀତ
 |
| ସମ୍ବଲପୁରୀ ନୃତ୍ୟ ଫଟୋ କ୍ରେଡ଼ିଟ - ୱିକିମିଡ଼ିଆ କମନ୍ସ୍ |
ରସରକେଲି ବୋ,
ଧାନ ମାନେ ସିଝାଇଲି ନେଇଁ ହେଲା ବତର
ଚାଉଲ ଅଡ଼େ ମାଗିଗଲିଁ ନେଇଁ ଦେଲେ ଉଧାର
ରହ ରହ ଛୁଆପୁତା ଟିକେ ଥେବ୍ ଧର
କିଏ ଖାଇବ କ୍ଷୀରି ଆଉ କିଏ ଖାଇବ ପୁରୀ
ଅଡ଼େ ଚାଉଲ୍ କେ ଚାଏର୍ ଟଙ୍କା
କେଶରୀ, ଦେଶ ଗଲା ସରି
ନକୁଲ୍, ପଏସା ସଁକୁଲ
ଦିନ, ପଏସା ଛିନ
ହେନ୍ତା କଥା ଜାଣିଥିଲେ ବାବୁ କେ
ନେଇଁ ହେଇଥିନ୍ତି ବିହା, କିଆ ଦଗାଦିଆରେ ।
ରସରକେଲି ବୋ
ପାନି ଗଲା ଖଲ ଖଲ ଟେକିଲା ଜଙ୍ଗଲ
ଘର୍ ଦୁଆରି କଲର୍ କଲର୍ ଡ଼ିଡ଼ୁଆଁ ଥିଲେ ଭଲ
କିଆ ଦଗାଦିଆରେ ।
ରସରକେଲି ବୋ,
କଂସାରୀ ଘରକେ ରାଜ, କହିଦେବୁ ଆଜ
ମୁଡ଼ର ଗରିଆ ଦେଲେ ବିପତ୍ତି ପଡ଼ିବ
ଖାକକୁ ଗରିଆ ଦେଲେ ଖସରି ପଡ଼ିବ
ଅଣ୍ଟାକୁ ଗୁନୁଚି ଦେଲେ କଣ୍ଟା ହଟିଯିବ
ନାକକୁ ବସନ୍ତୀ ଦେଲେ ନାଗର ଯୁଗେ ଯୁଗେ ଥିବ
ନାକକୁ ବସନ୍ତୀ ଦେଲେ ନାଗର ଯୁଗେ ଯୁଗେ ଥିବ
ଲାଲି, ଦେ ଚାହାଲିରେ
କାଦୋପାନି ପୁଢ଼ ଲେଖେ ନନିଗା ମରିବୁ ହନ୍ଦାଲି
କାଟିଗଲି ଝଲପା କେରି ଗଦାଇଲି ଝାରି
ବାଘଝଲିକେ ଦେଖିଯିବ ବାଗରି ଝାରି ଝାରି
ବାଏଲ୍ ଛୁଆଁକେ ଗାଧିଯିବ ଆଡ଼୍ ବଏଁଶୀ ଧରି
ସଞ୍ଜବେଲ୍ କେ ବୁଲିଯିବ ଉଁକିଆ ହାତେ ଧରି
ନଲା, ଗରଜିଗଲା ରେ
ଦୁଇହାତେ ଦୁଦି ବିଡ଼ା ଚାଏର୍ ବିଡ଼ା, ଖେଲିମା ଘିଡ଼୍ ଘିଡ଼ା
ଜୁଆ, ସକାଲ୍ ପୁଆରେ ।
ସରିଗଲା ପିଠାପନା ଝରିଗଲା ଚୂପା
ତୋର୍ ଲାଗି କହ୍ନାଇରେ ହେଲି ନାଁ ପକା
ଅସମିଆ ବାରିଆଡ଼େ ବାଜିଲା ମୁରଲୀ
କାହାର ବୁଦ୍ଧିକେ ଧରି କହ୍ନାଇ ସବୁ ଦେଲେ ଗାଲି
ରସ ଧୀରେ ବସରେ
ଲାଲି, ଦେ ଚାହାଲିରେ
ଛନେ ଘଡ଼େ ନାଇଁ ଦେଖ୍-ଲେ ସତେ କାଏଁ
ଆସ ବଲୁଥିସ, ରସ ଧୀରେ ବସରେ ।
ଉତ୍ସ - ଶ୍ରୀ ପ୍ରସନ୍ନ କୁମାର ମିଶ୍ର କୃତ 'ଓଡ଼ିଆ ଲୋକଗୀତ' । ସାହିତ୍ୟ ଅକାଦେମୀ : ୨୦୧୩ (୧୯୯୪) ।
No comments:
Post a Comment