ଚିଙ୍ଗୁଡ଼ି ତରକାରୀ
(ଚାରି ଜଣଙ୍କ ପାଇଁ)
ଫଟୋ କ୍ରେଡ଼ିଟ - ୱିକିମିଡ଼ିଆ କମନ୍ସ୍ |
ସାମଗ୍ରୀ - ଏକ କିଲୋ ମଝି ଆକାରର ଚିଙ୍ଗୁଡ଼ି, ତେଲ ବଡ଼ ଚାମଚରେ ଆଠ ଚାମଚ (ବା ଅଶୀ ଗ୍ରାମ୍), ମଝି ଆକାରର ଆଳୁ ତିନୋଟି, ଦରପାଚିଲା ଛୋଟ ବିଲାତି ବାଇଗଣ ତିନୋଟି, ଦଶ ଗ୍ରାମ୍ ହଳଦୀ, କୋଡ଼ିଏ ଗ୍ରାମ ଅଦା, ପିଆଜ ଚାରୋଟି, ଚୋପା ଛଡ଼ା ରସୁଣ ଦଶ କୋଲା, ଡାଲଚିନି ଦୁଇ ଖଣ୍ଡ, ଗୁଜୁରାତି ଚାରୋଟି, ପୋସ୍ତ କୋଡ଼ିଏ ଗ୍ରାମ୍, ଜୀରା ଗୁଣ୍ଡ ଦଶ ଗ୍ରାମ୍, ଗୋଟା ଜୀରା ପାଞ୍ଚ ଗ୍ରାମ୍, ଲଙ୍କା ଗୁଣ୍ଡ ପାଞ୍ଚ ଗ୍ରାମ୍, ଚିନି ପାଞ୍ଚ ଗ୍ରାମ୍, ତେଜପତ୍ର ଚାରୋଟି ।
ପ୍ରଣାଳୀ - ପ୍ରଥମେ ଚିଙ୍ଗୁଡ଼ିଗୁଡ଼ିକର ଲାଞ୍ଜ, ମୁଣ୍ଡ ଓ ଗୋଡ଼ ଗୁଡ଼ିକ ଛଡ଼ାଇ ଗରମ ପାଣିରେ ସେଗୁଡ଼ିକୁ ଧୋଇ ଦିଅନ୍ତୁ । ପା଼ଞ୍ଚ ଗ୍ରାମ୍ ହଳଦୀ, ପାଞ୍ଚ ଗ୍ରାମ୍ ଲୁଣ ଚିଙ୍ଗୁଡ଼ିରେ ଗୋଳାଇ ଅଳ୍ପ ତେଲରେ (ଦୁଇ ଚାମଚ ବା କୋଡ଼ିଏ ଗ୍ରାମ୍) ସେଗୁଡ଼ିକୁ ଭାଜି ଅଲଗା ରଖନ୍ତୁ ।
ଅଦାକୁ ଚୋପା ଛଡ଼ାଇ ଛୋଟ ଛୋଟ କରି କାଟନ୍ତୁ । ପିଆଜକୁ ମଝିଆଳିଆ ଖଣ୍ଡ କରି କାଟନ୍ତୁ । ଅଦା, ରସୁଣ ଓ ପିଆଜକୁ ବିନା ପାଣିରେ ବାଟନ୍ତୁ । ପୋସ୍ତ, ଡାଲଚିନି ଓ ଗୁଜୁରାତିକୁ ଅଳ୍ପ ପାଣିରେ ଚିକ୍କଣ କରି ମିକ୍ସିରେ ଅଲଗା ବାଟନ୍ତୁ ।
ବିଲାତି ବାଇଗଣ ଓ ଆଳୁକୁ ମଝିଆଳିଆ ଖଣ୍ଡ କରି କାଟନ୍ତୁ ।
ବାକି ତକ ତେଲ (ଷାଠିଏ ଗ୍ରାମ୍) ଗରମ କରନ୍ତୁ । ତେଲ ଗରମ ହୋଇଗଲେ ସେଥିରେ ପ୍ରଥମେ ଚିନି ପକାନ୍ତୁ । ଚିନି ତରଳି ଗଲେ ସେଥିରେ ଗୋଟା ଜୀରା ଓ ତେଜପତ୍ର ପକାନ୍ତୁ । ଏହାର ଦୁଇ ମିନିଟି ପରେ ଜୀରା ଗୁଣ୍ଡ, ଲଙ୍କା ଗୁଣ୍ଡ ଓ ହଳଦୀ ଗୁଣ୍ଡ, ଏହି କ୍ରମରେ ଅଧ ମିନିଟିଏ ଲେଖା ପରେ ପରେ ଗୋଟିକ ପରେ ଗୋଟିଏ ପକାନ୍ତୁ । ହଳଦୀ ଗୁଣ୍ଡ ପକାଇବାର ମିନିଟିକ ପରେ ଅଦା, ପିଆଜ, ରସୁଣର ବଟା ମସଲା ପକାଇ କଷନ୍ତୁ । ଏବେ ଆଞ୍ଚ ପୂରା କମ କରିଦେବେ । ଅଳପ ନିଆଁରେ ଦଶ ମିନିଟି କଷନ୍ତୁ । କଷି ହୋଇଗଲେ (ତେଲ ମସଲାରୁ ଛାଡ଼ି ଆସୁଥିବ) ମସଲାରେ କଟା ଆଳୁ ଓ ବିଲାତି ବାଇଗଣ ପକାଇ ଆହୁରି ଦଶ ମିନିଟି କଷନ୍ତୁ । ତାହା ପରେ ଦୁଇ କପ ପାଣି ଦେଇ, କଡ଼େଇକୁ ଘୋଡାଇ ମଝିଆ ଆଞ୍ଚରେ ଦଶ ମିନିଟି ଆଳୁକୁ ସିଝାଇ ଦିଅନ୍ତୁ । ଏହା ପରେ ଢାଙ୍କୁଣି ଖୋଲି ସେଥିରେ ଭଜା ଚିଙ୍ଗୁଡ଼ି ପକାଇ ଦେଇ, ଚାରି କପ ପାଣି ଦେଇ, ଅଳପ ଆଞ୍ଚରେ ପାଞ୍ଚ ମିନିଟି ଛାଡ଼ି ଦିଅନ୍ତୁ । ପାଞ୍ଚ ମିନିଟି ପରେ ପୋସ୍ତ, ଡାଲିଚିନି ଓ ଗୁଜୁରାତି ବଟା ଦେଇ ପାଞ୍ଚ ମିନିଟି ଫୁଟାଇ କଡ଼େଇକୁ ନିଆଁରୁ ଓହ୍ଲାଇ ଦିଅନ୍ତୁ । ଚିଙ୍ଗୁଡ଼ି ତରକାରୀ ତିଆରି ହୋଇଗଲା ।
No comments:
Post a Comment