ଏକବିଂଶ ଶତାବ୍ଦୀରେ ଗଣତନ୍ତ୍ରର ଭବିଷ୍ୟତ - ସପ୍ତମ ଓ ଅନ୍ତିମ ଭାଗ
ଲେଖକ - ଶ୍ରୀ କିଶନ ପଟ୍ଟନାୟକ
କପିରାଇଟ୍ - ଶ୍ରୀମତି ବାଣୀମଞ୍ଜରି ଦାସ
ପାଶ୍ଚାତ୍ୟର
ଗଣତନ୍ତ୍ର ଗୁଣ୍ଡାରାଜରୁ ମୁକ୍ତ
ହେଲେ ମଧ୍ୟ ଧନଶକ୍ତିର ନିୟନ୍ତ୍ରଣରୁ
ମୁକ୍ତ ନୁହେଁ । ଯେତେବେଳେ ଗଣତନ୍ତ୍ର
ଆକ୍ରମଣାତ୍ମକ ଓ ପୁଞ୍ଜିବାଦ
ବିରୋଧୀ ଥିଲା,
ସେତେବେଳେ
ଏ ଦେଶମାନଙ୍କରେ ମଜଦୁର୍ ମାନଙ୍କର
ପ୍ରତିନିଧିମାନେ ପ୍ରଧାନମନ୍ତ୍ରୀ
ଓ ରାଷ୍ଟ୍ରପତି ହେବାପାଇଁ ନିର୍ବାଚନ
କ୍ଷେତ୍ରରେ ଅବତୀର୍ଣ୍ଣ ହେଉଥିଲେ ।
କିନ୍ତୁ ଜଗତିକରଣ ତୀବ୍ରରୁ
ତୀବ୍ରତର ହେବା ସଙ୍ଗେ ସଙ୍ଗେ
ବ୍ରିଟେନ୍ ଓ ଆମେରିକାର ସବୁ
ପ୍ରମୁଖ ରାଜନୈତିକ ଦଳ ପୁଞ୍ଜିପତିମାନଙ୍କର
ଆଶ୍ରିତ ହୋଇଯାଇଛନ୍ତି । ଗଣତନ୍ତ୍ରରେ
ହଜାର ହଜାର ସଂଖ୍ୟାରେ କର୍ମୀ
ଦରକାର ହୁଅନ୍ତି । ସେମାନଙ୍କ
ଭିତରୁ ବହୁତଙ୍କୁ ପୂରା ସମୟ
ରାଜନୀତିରେ ଦେବାକୁ ପଡ଼େ । ସେମାନଙ୍କୁ
କିଏ ପାରିଶ୍ରମିକ ଦେବ ?
ସେମାନଙ୍କର
ପରିବାର ଓ ରାଜନୈତିକ କର୍ମ ପାଇଁ
ଖର୍ଚ୍ଚ କେଉଁଠୁ ଆସିବ ?
ପାଶ୍ଚାତ୍ୟ
ଗଣତନ୍ତ୍ର ଏହି ମୌଳିକ ପ୍ରଶ୍ନର
କୌଣସି ସମାଧାନ କରିନାହିଁ ।
ରାଜନୀତିକ ଜ୍ଞାନରେ ଏହି ପ୍ରଶ୍ନକୁ
ଉଠାଯାଏ ନାହିଁ । ତେଣୁ ଦଳମାନେ
ପୁଞ୍ଜିଙ୍କ ପାଖରେ ବନ୍ଧା
ପଡ଼ିଯାନ୍ତି । ଏବେ ବିକାଶଶୀଳ
ଦେଶମାନଙ୍କରେ ସାମାଜିକ ସେବା
କାର୍ଯ୍ୟ ମଧ୍ୟ ବିଦେଶୀ ପାଣ୍ଠି
ଉପରେ ନିର୍ଭରଶୀଳ ହୋଇ ରହିଲାଣି ।
ଗଣତାନ୍ତ୍ରିକ କାର୍ଯ୍ୟ ପାଇଁ
ପ୍ରତ୍ୟେକ ସମାଜରେ ଆୟର ଏକ ଉଦ୍ଗମ ହେବା ଦରକାର । ଏହା ବ୍ୟତୀତ
ଗଣତନ୍ତ୍ରର ଅବଧାରଣା ବିକାଶଶୀଳ
ଦେଶମାନଙ୍କରେ ଅପୂର୍ଣ୍ଣ ରହିଯିବ । ଗଣତନ୍ତ୍ରକୁ
ବିସ୍ତୃତ ଓ ସୁରକ୍ଷିତ କରିବାକୁ
ହେଲେ ବିକାଶଶୀଳ ଦେଶମାନଙ୍କୁ
ନିମ୍ନଲିଖିତ ପଦକ୍ଷେପ ଗ୍ରହଣ
କରିବାକୁ ହେବ ।
ପ୍ରଥମତଃ, ଅନ୍ତର୍ରାଷ୍ଟ୍ରୀୟ ଫାଶୀବାଦ ଶକ୍ତିମାନଙ୍କ
କବଳରୁ ମୁକ୍ତ ହେବାକୁ ପଡ଼ିବ ।
ସେମାନଙ୍କ ସାଙ୍ଗରେ ଯୁଦ୍ଧ କରି
ହେବନାହିଁ । ତେଣୁ ଅସହଯୋଗର
ରଣକୌଶଳକୁ ଗ୍ରହଣ କରିବାକୁ ହେବ ।
ଗୋଟିଏ ସମୟ ପାଇଁ ୟୁରୋପ-ଆମେରିକାର
ଧନୀ ଦେଶମାନଙ୍କ ଠାରୁ ଆର୍ଥିକ
ଭାବରେ ବିଚ୍ଛିନ୍ନ ହେବାକୁ ପଡ଼ିବ।
ଦ୍ୱିତୀୟତଃ, ଏହା
ଦ୍ୱାରା ସେମାନଙ୍କଠାରୁ ଋଣ କିମ୍ବା
ଯନ୍ତ୍ରପାତି (ଟେକ୍ନୋଲୋଜି)
ପାଇପାରିବା
ନାହିଁ । ତାହା ଏକ ଆଶୀର୍ବାଦ ହେବ ।
କାରଣ ନିଜର ପୁଞ୍ଜି ଓ ନିଜେ
ତିଆରି କରିପାରୁଥିବା ଯନ୍ତ୍ରପାତି
ଉପରେ ଆମେ ଏକ ବଳିଷ୍ଠ ଭିିତ୍ତିଭୂମି
ପ୍ରସ୍ତୁତ କରିବାର ସମ୍ଭାବନା
ସୃଷ୍ଟି ହେବ । ସ୍ୱଦେଶୀ ପୁଞ୍ଜି
ଯୋଗାଡ଼ କରିବା ପାଇଁ ଭୋଗବାଦର ଓ
ବିଳାସୀ ଖର୍ଚ୍ଚର ମୂଳୋତ୍ପାଟନ
କରିବାକୁ ହେବ । ସବୁ ପ୍ରକାରର
କଳାଧନ ଉଦ୍ଖାତ କରିବାକୁ ହେବ ।
ଯେଉଁ କଳାଧନ ବିଦେଶରୁ ଅବୈଧ ଭାବରେ
(ହାୱାଲା
ବାଟ ଦେଇ)
ଭାରତକୁ
ଚାଲିଆସୁଛି, କେବଳ ତାହାର ପରିମାଣ
ହେଉଛି ବାର୍ଷିକ ତିରିଶି ହଜାର୍
କୋଟି ଟଙ୍କା । ଏସବୁ ପ୍ରକ୍ରିୟାରୁ
ବିଚ୍ଛିନ୍ନ ହେବା ଫଳରେ ଏକ ସରଳ
ଜୀବନ ଦର୍ଶନର ବାୟୁମଣ୍ଡଳ ତିଆରି
ହେବ । ବିଶେଷାଧିକାର ଓ ଆଡ଼ମ୍ବରକୁ
ଲୋପ କରାଯିବ । ବଳକା ଧନରେ ଅଳ୍ପ
ପୁଞ୍ଜି ଓ ନିଜ ଦେଶରେ ତିଆରି
ହେଉଥିବା ଯନ୍ତ୍ରପାତି ସାହାଯ୍ୟରେ
ଯେଉଁ ଶିଳ୍ପ ଓ କୃଷି ବ୍ୟବସ୍ଥା
ତିଆରି ହେବ, ତହିଁରେ ସମସ୍ତଙ୍କୁ
ଧନ୍ଦା ଯୋଗାଇ ଦିଆଯାଇପାରିବ । ସର୍ବସାଧାରଣଙ୍କ ପାଇଁ ଶିକ୍ଷା
ଓ ସ୍ୱାସ୍ଥ୍ୟର ଆୟୋଜନ କରିବାକୁ
ହେବ । କେରଳରେ ସମସ୍ତଙ୍କୁ ଶିକ୍ଷା
ମିଳୁଥିବାରୁ ଶିକ୍ଷା କର୍ମନିଯୁକ୍ତିର
ଏକ ବିରାଟ କ୍ଷେତ୍ର ହୋଇଛି ।
ଏହିପରି ଭାବରେ ଆର୍ଥିକ ସୁରକ୍ଷା
ଲୋକମାନଙ୍କ ପାଇଁ ଫେରିଆସିପାରିବ ।
ସାମ୍ରାଜ୍ୟବାଦୀ ଦେଶମାନେ
ଅତିସମୃଦ୍ଧି ବଳରେ ଲୋକଙ୍କୁ
ଯେଉଁ ଆର୍ଥିକ ସୁରକ୍ଷା ଓ ସାମାଜିକ
ସମାନତା ଦେଇପାରିଛନ୍ତି,
ବିକାଶଶୀଳ
ଦେଶ ଭୋଗବାଦ ଓ ବେକାରୀର ଉତ୍ପାଟନ
କରି ତାହା ହାସଲ କରିପାରିବେ ।
କେବଳ ଚାକିରୀରେ ସ୍ଥାନ ସଂରକ୍ଷଣ
ସାମାଜିକ ସମାନତା ଦେଇପାରିବ
ନାହିଁ । ଆର୍ଥିକ
ସୁରକ୍ଷା ହିଁ ଏହା ପୂରଣ କରିପାରିବ ।
ସମସ୍ତଙ୍କୁ ଆର୍ଥିକ ସୁରକ୍ଷା
ଓ ଶିକ୍ଷା ମିଳିଯିବା ପରେ ସ୍ଥାନ
ସଂରକ୍ଷଣକୁ ଲୋପ କରିଦିଆଯିବ ।
ଗଣତନ୍ତ୍ର ସମାଜବାଦ ନୁହେଁ । ତେଣୁ
ଧନୀ ରହିବେ । କିନ୍ତୁ ତଳେ ଥିବା
ଲୋକଙ୍କଠାରୁ ପାଞ୍ଚ ପ୍ରତିଶତ ଲୋକେ, ଯାହାଙ୍କର ଆୟ ପାଞ୍ଚ ଗୁଣରୁ ଦଶ ଗୁଣ
ପର୍ଯ୍ୟନ୍ତ ହେବ,
ସେମାନେ
ଧନୀ ହେବେ । ତାହା ଉପରକୁ ଏକ ଅତି
ଧନୀ ଶ୍ରେଣୀ ରହିବେ ନାହିଁ ।
ତୃତୀୟତଃ, ବିବିଧତାକୁ
ସମ୍ମାନ ଓ ସମାନତା ଦେବା ଏକ
ମୂଳମନ୍ତ୍ର ହେବ । ସ୍ୱାୟତ୍ତତା ବା
ବିକେନ୍ଦ୍ରୀକରଣ ନୂତନ ଗଣତାନ୍ତ୍ରିକ
ବ୍ୟବସ୍ଥାର ଅନିର୍ବାର୍ଯ୍ୟ ଅଙ୍ଗ
ରୂପେ ଗଣାଯିବ । କେନ୍ଦ୍ର ସରକାର
ପାଖରେ ଅତି ସୀମିତ କାର୍ଯ୍ୟ ରହିବ ।
ତାଠାରୁ ବେଶୀ ରହିବ ରାଜ୍ୟ ପାଖରେ ।
କିନ୍ତୁ ସବୁଠାରୁ ଅଧିକ କାମ ଓ
କ୍ଷମତା ରହିବ ଗ୍ରାମପଞ୍ଚାୟତ ଓ
ଅଞ୍ଚଳମାନଙ୍କରେ । ନାଗରିକମାନଙ୍କର
ଦୈନନ୍ଦିନ କାର୍ଯ୍ୟକଳାପ ସାଙ୍ଗରେ
ସମ୍ପୃକ୍ତ ସବୁ ବିଭାଗ ଗ୍ରାମ ଓ
ପ୍ରଖଣ୍ଡ କରିବେ । ପୁଲିସି ଓ ଅଦାଲତ୍ ବ୍ୟବସ୍ଥାର ବଡ଼ଭାଗ ଗ୍ରାମ
ଓ ପ୍ରଖଣ୍ଡରେ ରହିବ । ବିଶ୍ୱବିଦ୍ୟାଳୟର
ଶିକ୍ଷିତ ଲୋକମାନଙ୍କୁ ତାଙ୍କର
ମୁର୍ଖତା ଯୋଗୁଁ ଏହା ୟୁଟୋପିଆ
ଭଳି ଲାଗିବ । ସେମାନେ କଅଣ ଜାଣନ୍ତି
ୟୁରୋପ୍ ର ଗଣତାନ୍ତ୍ରିକ ଦେଶମାନଙ୍କରେ
ସ୍ଥାନୀୟ ଶାସନ ଅଧିନରେ ପୁଲିସ
ଓ ଅଦାଲତ୍ ର ବିଭାଗମାନ ଥାଏ ।
ଚତୁର୍ଥତଃ, ପ୍ରଶାସନର
ସଂରଚନା ଓ ସ୍ୱଭାବର ପରିବର୍ତ୍ତନ
ଔପନିବେଶିକ ଦେଶମାନଙ୍କରେ ସୁସ୍ଥ
ଗଣତନ୍ତ୍ର ସ୍ଥାପନାର ଏକ
ଗୁରୁତ୍ୱପୂର୍ଣ୍ଣ ଦିଗ । ଯେଉଁ
ଦିନ ଗ୍ରାମର କ୍ଷୁଦ୍ର ଚାଷୀ ନିଜର ନ୍ୟାଯ୍ୟ କାମ ପାଇଁ ପ୍ରଶାସନ ପାଖକୁ
ଯିବେ ଓ ଖାଲି ହାତରେ ଫେରିଆସିବେ ନାହିଁ,
ଅଦାଲତରେ
ମାଲିମକଦ୍ଦମା ଛିଣ୍ଡିବାକୁ ବର୍ଷ
ବର୍ଷ ଧରି ସମୟ ଲାଗିବ ନାହିଁ,
ସେହି
ଦିନ ଭାରତର ପ୍ରଜା ଜାଣିବ ଯେ ତାକୁ
ସ୍ୱରାଜ ମିଳିଛି ଓ ଅଧିକାର ମିଳିଛି ।
ଯେଉଁ ଶିକ୍ଷିତ ବ୍ୟକ୍ତିମାନେ
ପାଶ୍ଚାତ୍ୟର ଅବଗୁଣ ଓ ଅନାବଶ୍ୟକ
ଗୁଣମାନଙ୍କୁ ଗୌରବାନ୍ୱିତ କରନ୍ତି,
ସେମାନେ
ଜାଣନ୍ତି ନାହିଁ ଯେ ଯେଉଁ ଧନୀ
ଦେଶମାନେ ଆମ ଦେଶରେ ଏଭଳି ଏକ
ଅମଲାତାନ୍ତ୍ରିକ ଯନ୍ତ୍ରୀଘର
ତିଆରି କଲେ,
ସେମାନଙ୍କ
ଦେଶରେ ସାଧାରଣ ଭାବରେ କୌଣସି
ନାଗରିକ ଚାହିଁଲେ ପ୍ରଶାସନଠାରୁ
ନିଜର ପ୍ରାପ୍ୟ ନେଇପାରେ । ଅଦାଲତ୍ ରେ ବିଳମ୍ବ ହୁଏନାହିଁ । ସରକାର ଉପରେ
ଯଦି ନାଗରିକର ପଇସା ରହିଛି,
ନାଗରିକକୁ
ଗୋଡ଼ାଇବାକୁ ପଡ଼େ ନାହିଁ । ବିଳମ୍ବ
ହେଲେ ସରକାର ନିଜେ ନାଗରିକ ପାଖକୁ
ଯାଇ ପଇସା ଦେଇଆସେ । ପ୍ରଫେସର ମାନେ
ଚାକିରି ଛାଡ଼ିବାର ତିନିବର୍ଷ ପରେ
ମଧ୍ୟ ପେନ୍ସନ୍ ନ ପାଇବା ଘଟଣାରେ
ଯଦି ଲଜ୍ଜିତ ହେଉଥାନ୍ତେ,
ତାହା ହେଲେ ସେମାନେ ଦରମା ବଢ଼ାଇବା
ପାଇଁ ନୁହେଁ, ବରଂ ପ୍ରଶାସନର
ଢଙ୍ଗ ବଦଳାଇବାକୁ ଆନ୍ଦୋଳନ
କରନ୍ତେ ।
ପଞ୍ଚମତଃ, ସାଧାରଣ ଭାବରେ ଜଣେ ସଚ୍ଚୋଟ ମଣିଷ ରାଜନୈତିକ କର୍ମୀ
ହୋଇପାରିବେ । ସେ ନିଜର କାର୍ଯ୍ୟଦକ୍ଷତାର
ଯୋଗ୍ୟତା ଅନୁସାରେ ଦେଶର ଶାସକ
ହୋଇପାରିବେ । ଏଥିପାଇଁ ଏକ ଆର୍ଥିକ
ବ୍ୟବସ୍ଥା ରାଜକୋଷରୁ ନୁହେଁ,
ସମାଜରେ
ତିଆରି କରିବାକୁ ହେବ । କେବଳ
ପ୍ରାରମ୍ଭ ପାଇଁ ସରକାରୀ କୋଷରୁ
କେତେକ ସଂସ୍ଥା ଗଢ଼ିବାକୁ ହେବ ।
ଏହି ସଂସ୍ଥାମାନେ ରାଜନୈତିକ
କର୍ମୀମାନଙ୍କର ଭାର ଗ୍ରହଣ କରିବେ । ସର୍ତ୍ତ ରହିବ ଯେ କର୍ମୀମାନେ ସରଳ
ଜୀବନଯାପନ କରିବେ । ତଥା, କେତେ ପ୍ରକାରର
ସାଧୁତାର ଅନୁଶାସନରେ ରହିବେ ।
ଭାରତର ସ୍ୱାଧୀନତା ଆନ୍ଦୋଳନ
ବେଳେ ଏହି ଭଳି ସଂସ୍ଥାମାନଙ୍କର
ଆବିର୍ଭାବ ହୋଇଥିଲା ।
No comments:
Post a Comment