ପିଲାଙ୍ଗ ଗୀତ - 'ବାଳ‌ିକା ଓ ପକ୍ଷୀ'

ପଲ୍ଲୀ କବି - ନନ୍ଦକିଶୋର ବଳ 

୩ଟି ପକ୍ଷୀ (ଜର୍ମାନୀ - ପଞ୍ଚଦଶ ଶତାବ୍ଦୀ)
ପ୍ରିଣ୍ଟ୍ ଶିଳ୍ପୀ - ମାଷ୍ଟର୍ ଅଫ୍ ଦ ପ୍ଲେୟିଙ୍ଗ୍ କାର୍ଡ଼୍ସ୍ 

ବାଳିକା - 

ସାନ ଚଢ଼େଇରେ ସାନ ଚଢ଼େଇ ତୁ

ମୋ ପାଖକୁ ଆସ ଧାଇଁ,

ଶାଗୁଆ ବନର ପିଞ୍ଜରାଟିଏ ମୁଁ 

ରଖିଛି ତୋହରି ପାଇଁ ।

ଅନେକ ସୁନ୍ଦର ଟିକି ଟିକି ଫୁଲ

ଦେବି ମୁହିଁ ତୋତେ ଆଣି,

ପାଚିଲା ପିଜୁଳି ଦେବି, ଲାଗିଥିବ

ଯହିଁରେ କାକର ପାଣି ।

ପକ୍ଷୀ - 

ଧନ୍ୟ ଧନ୍ୟ ମୋର ଟିକି ଭଉଣୀ ଗୋ,

ତୁମରି ଯତନ ପାଇଁ,

ନିର୍ମଳ ଶୀତଳ ପବନ ସମାନ 

ମୋର ପ୍ରିୟ ଆଉ ନାହିଁ ।

ପୁରାତନ ବରଗଛେ ଯେଉଁ ସାନ 

ବସା ମୋହର ଅଛଇ,

ସୁନା ପିଞ୍ଜରାର ସୁଖଠାରୁ ତାହା 

ଅନେକ ଭଲ ଅଟଇ ।

ବାଳିକା -

ସାନ ଚଢ଼େଇରେ ସାନ ଚଢ଼େଇ ତୁ

କେଉଁଠାକୁ ଯିବୁ ଉଡ଼ି,

ଯେତେବେଳେ ସବୁ ବିଲବାଡ଼ି ଯିବ

ବରଷା ଜଳରେ ବୁଡ଼ି ।

ଓଦା ହୋଇଯିବ ପୁରାତନ ବର-

ଗଛ ବରଷା ଜଳରେ,

ସାନ ଚଢ଼େଇରେ ସାନ ଚଢ଼େଇ ତୁ

ରହ ମୋହରି ସାଙ୍ଗରେ ।

ପକ୍ଷୀ - 

ନାହିଁ ନାହିଁ ନାହିଁ ସାନ ବାଳିକା ଗୋ

ଉଡ଼ି ଚାଲିଯିବି ମୁହିଁ,

ଶ୍ୟାମଳ ବନର ବିଲ ଅଛି ପୁଣି

ନିର୍ମଳ ଆକାଶ ଯହିଁ ।

ଯେତେବେଳେ ନବ ବସନ୍ତ ଫେରିବ

ଦକ୍ଷିଣା ପବନ ସଙ୍ଗେ,

ସେତେବେଳେ ମୋର ଆନନ୍ଦ ସଙ୍ଗୀତ 

ପୁଣି ମୁଁ ଗାଇବି ରଙ୍ଗେ ।

ବାଳ‌ିକା -

ସାନ ଚଢ଼େଇରେ ସାନ ଚଢ଼େଇ ତୋ

କିଏ ଦେଖାଇବ ପଥ ?

ନିର୍ଜନ ପର୍ବତ ପଥ ଭୟଙ୍କର 

ବିଜନ ସମୁଦ୍ର ପଥ ।

ନିର୍ବୁଧିଆ ପକ୍ଷୀ ଆ'ରେ ମୋ ଘରେ
ମୋହରି ସାଥିରେ ଥିବୁ,

ନ ମାନି ମୋ ବୋଲ ଚାଲିଗଲେ ନିଶ୍ଚେ 

ଜାଣିଥା ପଥ ହୁଡ଼ିବୁ । 

ପକ୍ଷୀ -

ଟିକି ଭଉଣୀ ଗୋ ଟିକି ଭଉଣୀ ଗୋ

ପଥ ଦେଖାନ୍ତି ଈଶ୍ୱର,

ନିର୍ଜନ ପର୍ବତ ଅବା ଜନପ୍ରାଣୀ-

ଶୂନ୍ୟ ସମୁଦ୍ର ଉପର ।

ପ୍ରଭାତ ପବନ ସମାନ ସ୍ୱାଧୀନ 

ହୋଇ ମୁହିଁ ଉଡ଼ିଯିବି,

ସୂର୍ଯ୍ୟକିରଣର ପଛେ ପଛେ ଯିବି 

କେଭେ ପଥ ନ ହୁଡ଼ିବି ।