ଗୋପବନ୍ଧୁ ଦାଶ କୃତ କଠୋପନିଷଦ୍ ର ଓଡ଼ିଆ ପଦ୍ୟାନୁବାଦ 

ଦ୍ୱିତୀୟ ଅଧ୍ୟାୟ 

ଦ୍ୱିତୀୟ ବଲ୍ଲୀ : ଶ୍ଲୋକ ୨

ଫଟୋ କ୍ରେଡ଼ିଟ୍ - ୱିକିମିଡ଼ିଆ କମନ୍ସ୍ 

ସର୍ବବ୍ୟାପୀ ସର୍ବଗାମୀ ସର୍ବ ଅଧିଷ୍ଠାନ

ଉଜ୍ଜଳ ଦ୍ୟୁଲୋକେ ଆତ୍ମା-ରବି ଅଂଶୁମାନ 

ଅନ୍ତରୀକ୍ଷେ ସମୀରଣ ଅନଳ ଅଧ୍ୱରେ 

ସେହି ଏକା ପ୍ରତିଷ୍ଠିତ ବିଶ୍ୱବେଦୀ ପରେ ।

ଉଜ୍ଜ୍ୱଳ ପବିତ୍ର ସୋମଯୋଗ ଶୁଦ୍ଧଧାରେ 

ନରଦେହେ ବରଦେହେ ପ୍ରକାଶ ସଂସାରେ ।

ସତ୍ୟେ ଆତ୍ମା ଅବସ୍ଥିତି ଆକାଶେ ସଞ୍ଚାର 

ବିଶ୍ୱେ ମହାମୁଖେ ଆତ୍ମା ଯଦି ଉପଚାର ।

ଜଳେ ସ୍ଥଳେ ଧରାଧାରେ ହୁଏ ଯେ ଉଦ୍ଭବ

ସରିତ ନିର୍ଝର ମୀନ ମୁକ୍ତ ବ୍ରୀହି ଯବ ।

ସ୍ଥାବର ଜଙ୍ଗମ ଆଦି ଯେତେ ବସ୍ତୁଚୟ 

ସେ ସକଳେ ଏକମାତ୍ର ଆତ୍ମାର ଉଦୟ ।

ସର୍ବଭୂତମୟ କିନ୍ତୁ ସତ୍ୟ ସନାତନ

ଏକ ଅଦ୍ୱିତୀୟ ନିତ୍ୟ ଅପରିବର୍ତ୍ତନ ।

ସର୍ବ ମୂଳଧାରା ସେହି ସକଳ ନିଦାନ 

ତବ ଜିଜ୍ଞାସିତ ବସ୍ତୁ ବ୍ରହ୍ମ ସୁମହାନ ।

ନିଗୁଢ଼ ଏ ବ୍ରହ୍ମତତ୍ତ୍ୱ ସ୍ଥିର କରି ମନ 

କର ନଚିକେତ, ଏହା ହୃଦରେ ଧାରଣ । (ନ.ଉ. ୨।୨।୨୯.୩୦)