ପିଲାଙ୍କ ଗୀତ - 'ନବୀନ' 

ଗୋଦାବରୀଶ ମିଶ୍ର (୧୮୮୬-୧୯୫୬)

ଫଟୋ କ୍ରେଡ଼ିଟ୍ - ୱିକିମିଡ଼ିଆ କମନସ୍ 

କୁଆଁର ପୁନିଅଁ ଉତ୍ସବ ଦିନ

ବୁଲି ପ୍ରଜାପତି ଧରେ ନବୀନ ।

ଗୋଟିକି ଗୋଟି ସେ ଧରଇ ଧାଇଁ,

ଦେଖିଲେ ଗୋଟିଏ ଛାଡ଼ଇ ନାହିଁ ।

ବଢ଼େ ତା ଉତ୍ସାହ ବେଳକୁ ବେଳ,

ଲାଗିଅଛି ତାର ପୁନିଅ ଖେଳ ।

ପାଖେ ଥିଲା ଏକ କଙ୍କଡ଼ାବିଛା,

ଧରିବାକୁ କଲା ନବୀନ ଇଚ୍ଛା ।

କହିଲା ବିଛା, "ଏ କି ଉତପାତ ?

ମରିବୁ, ମୋ ଦେହେ ଦେଲେ ତୁ ହାତ ।

ଉଡ଼ି ପ୍ରଜାପତି ପାଆନ୍ତା ସୁଖ,

ଦେଉ କିଁପା ତାକୁ ତୁଚ୍ଛାରେ ଦୁଃଖ ?" 

ଶୁଣି ତା ନବୀନ ଶୁଣିଲା ନାହିଁ,

ହାତ ବଢ଼ାଇଲା ଧରିବା ପାଇଁ ।

ରାଗି ବିଛା ଦେଲା ନାଉଡ଼ ମାରି,

ପଡ଼ିଲା ନବୀନ ତଳେ କଚାଡ଼ି ।

ଚେତା ବୁଡ଼ିଗଲା ସତେ କି ତା'ର,

ଗମଗମ ଦେହୁ ବୋହିଲା ଝାଳ ।

ଘଡ଼ିକେ ଉଠି ସେ କହିଲା ବାଣୀ,

"କେଡ଼େ ଭୁଲ ମୁହିଁ କରେ ନ ଜାଣି !" 

ପ୍ରଜାପତି ଧରା ଦେଲା ସେ ଛାଡ଼ି,

କେହି ଆଉ ତାକୁ ନ ଦେଲେ ଗାଳି ।

ସେ ଦିନୁ ନବୀନ ହୋଇଲା ଭଲ,

ଯେ ଦେଖିଲା ତାକୁ କଲା ଆଦର ।

(ପାଠ ପ୍ରବେଶ - ୧୯୫୧)

ଶ୍ରୀ ମହେଶ୍ୱର ମହାନ୍ତି ସମ୍ପାଦିତ (୨୦୧୫), 'ଓଡ଼ଆ ଶିଶୁ-କିଶୋର କବିତା' (ସାହିତ୍ୟ ଏକାଡ଼େମୀ : ନୂଆଦିଲ୍ଲୀ) ରୁ ସଙ୍ଗୃହିତ ।