ପିଲାଙ୍କ ଗୀତ - 'ଧୂଳିଘର' 

କବି - ଚିନ୍ତାମଣି ମହାନ୍ତି (୧୮୬୭-୧୯୪୩)

ଚିତ୍ର - ଚିଲଡ୍ରେନ୍ସ୍ ଗେମ୍ସ୍ (୧୫୬୦) : ଚିତ୍ରକାର, ପିଏତର୍ ବ୍ରୁଏଜେଲ୍, ଦି ଏଲ୍ଡର୍
ଫଟୋ କ୍ରେଡ଼ିଟ୍ - ୱିକିମିଡ଼ିଆ କମନସ୍   

ଆସ ଆସ କିଏ ଦେଖିବ ଧୂଳିଘର ମୋହର 

ସରୁ କୁଟିକମଗୁଡ଼ିକ ଆହା କେଡ଼େ ସୁନ୍ଦର !

ଏଇ ଘରଟିରେ ଖେଳିବି ମୁହିଁ ନିତି କଣ୍ଢେଇ

ଏଘର ଗୁହାଳ, ଏ ଘର ହେବ ଧାନ ମରେଇ ।

ଶୋଇବାଘର ଏ ହୋଇବ ହାଣ୍ଡିଶାଳ ତେଣିକି 

ଏହି ଯେ ଚାଳିଆ ଖଣ୍ଡିକ ଏଠି ପଡ଼ିବ ଢ଼େଙ୍କି ।

ଏଘରେ ବସି ମୁଁ ପଢ଼ିବି ଏକୁଟିଆ ନିରୋଳେ
ବିଭୁଙ୍କୁ ପ୍ରାର୍ଥନା କରିବି ପ୍ରେମ ଭକତି ଭୋଳେ ।

ଧୂଳିଘର ଦେଖି ମୋହର ପରିହାସ କରନା 

ଲୁଚିଅଛି ଏହା ଭିତରେ ମୋର ଶିଶୁ କଳ୍ପନା ।

ଲୁଚିଥାଏ ଯଥା କୁସୁମହାର ମଧ୍ୟରେ ସୁତା

ଅଥବା ସୁକୀର୍ତ୍ତି ମଧ୍ୟରେ ଯଥା ସତ୍ୟ ସାଧୁତା ।

ସ୍ୱଭାବେ ଶିଶୁ ମୁଁ ବିଭୁଙ୍କ ଭାବେ ସଦା ମଗନ

ତେଣୁ ତାଙ୍କ ବିଶ୍ୱ ସର୍ଜନା କରେ ଅନୁକରଣ । 

ଶ୍ରୀ ମହେଶ୍ୱର ମହାନ୍ତି ସମ୍ପାଦିତ (୨୦୧୫), 'ଓଡ଼ଆ ଶିଶୁ-କିଶୋର କବିତା' (ସାହିତ୍ୟ ଏକାଡ଼େମୀ : ନୂଆଦିଲ୍ଲୀ) ରୁ ସଙ୍ଗୃହିତ ।