ପିଲାଙ୍କ ଗୀତ - 'ବେଙ୍ଗୁଲୀ ବେଙ୍ଗୁଲୀ ପାଣି ଦଉଁ'
ଗୋପାଳଚନ୍ଦ୍ର ପ୍ରହରାଜ (୧୮୭୪-୧୯୪୫)
ଫଟୋ କ୍ରେଡ଼ିଟ୍ - ୱିକିମିଡ଼ିଆ କମନସ୍ |
ବେଙ୍ଗୁଲୀ ବେଙ୍ଗୁଲୀ ପାଣି ଦଉଁ
ନଇବଢ଼ି କରି ଭସାଇ ଦଉଁ ।
ବେଙ୍ଗୁଲି ବୋବାଏ କେଁ-କଟର
ବେଙ୍ଗରଡ଼ି ଶୁଣି ବରଷେ ନୀର ।
ସଂସାରେ ହେଲାଣି ଭାରି ଗ୍ରୀଷମ
ମେଘ ବରଷିଲେ ହେବ ଉତ୍ତମ ।
ବରଷା ନ ହେଲେ ଏ ଗୁଳୁଗୁଳି
ତରୁଲତା ଯାକ ଯିବେ ଝାଉଁଳି ।
ଭୂଇଁ ବତୁରିଲେ ବୁଣିବା ଧାନ
ଧାନ ହେଲେ ସିନା ବଞ୍ଚିବ ପ୍ରାଣ ।
ବେଙ୍ଗୁଲି ନାନୀଟି ଫର୍କଟୀ ଗୋଡ଼ୀ
ବରଷା ଦିନେ ସେ ଛାଡ଼ଇ ରଡ଼ି ।
ଇନ୍ଦ୍ରଦେବ ଶୁଣି ବେଙ୍ଗ ବୋବାଳି
ଦୁଲୁ ଦୁଲୁ ପାଣି ଦିଅନ୍ତି ଢ଼ାଳି ।
ନଈବଢ଼ି ହୋଇ ବୁଡ଼ିବ ଦେଶ
ବେଙ୍ଗୁଲି ନାନୀର ବଡ଼ ହରଷ ।
ବେଙ୍ଗୁଲି ନାନୀଟି ଉଞ୍ଚୁ ପାଟେଈ
ପୋକଜୋକ ଯାକ ଖାଏ ଗୋଟେଇ ।
ବେଙ୍ଗୁଲୀ ନାନୀର ଦିହରେ ଆବୁ
ମାଲପା ହଳଦୀ ଲଗାଉ ଥିବୁ ।
ବେଙ୍ଗୁଲୀ ନାନୀଟି ଚାଲଇ ଡେଇଁ
ପୋକଯୋକ ଯାକ ଟୁକି ଦିଅଇ ।
ନାନୀ ବସିଥାଏ ପାଣ୍ଡିଆ ପାଡ଼ି
ଯାହା ପାଉଥାଏ ଦିଅଇ ଗିଳି ।
ବେଙ୍ଗୁଲୀ ନାନୀର ନାହିଁଟି କାନ
ଦଇବ ଦେଲାଟି କିଆଁ ଜନମ ?
No comments:
Post a Comment