ପିଲାଙ୍କ ଗୀତ - ହାତୀ ନେ ଘୋଡା ନେ

କବି - ଶ୍ରୀ ରାମକୃଷ୍ଣ ନନ୍ଦ 

ଫଟୋ କ୍ରେଡିଟ୍ - ୱିକିମିଡିଆ କମନସ୍ 

ହାତୀ ନେ, ଘୋଡା ନେ 

ମୋ ପେଏଁ କାଳୀ ବଜେଇ ଦେ,

ମୋତି ନେ, ହୀରା ନେ

ମୋ ଘରଟିିକି ସଜେଇ ଦେ ।

ସୁବର୍ଣ୍ଣର ଥାଳି ନେ

ମାଣିକ୍ୟର ମାଳୀ ନେ

ମୋ ଗୁଡିଟିକୁ ଉଡେଇ ଦେ,

ମୋ ଛବି ବହି ପଢେଇ ଦେ ।

ଜାମା ନେ, ଜୋତା ନେ 

ଜରି ପାଟଛତା ନେ,

ମୋ ବରକୋଳି ଝଡ଼େଇ ଦେ,

ମୋ ଖେଳଘର ଗଢେଇ ଦେ ।

ଶାରୀ ନେ, ଶୁଆ ନେ,

ଧଳା ଭାଲୁଛୁଆ ନେ,

ମୋ ଚକଟିକୁ ବୁଲେଇ ଦେ,

ମୋ ବେଲୁନ୍ କୁ ଫୁଲେଇ ଦେ ।

ଖିରି ପୁରି ଖଜା ନେ,

ବଡ ମାଛ ଭଜା ନେ,

ମୋ ଦୋଳିଟିକୁ ହଲେଇ ଦେ,

ମୋ ସାଇକେଲ ଚଲେଇ ଦେ ।

ହୀରା ନୀଳା ମୋତି ନେ

ମୋ କଣ୍ଢେଇକି ସଜେଇ ଦେ,

ଘୋଡା ନେ, ହାତୀ ନେ,

ମୋ ପେଏଁକାଳୀ ବଜେଇ ଦେ ।

ମୂଳ ରଚନା ଶ୍ରୀ ରାମକୃଷ୍ଣ ନନ୍ଦଙ୍କର ବହି 'ଝୁମୁକା' ରେ ଛପା ଯାଇଥିଲା । ଗୀତଟିର ଏହି ପ୍ରତିଟି ଓଡିଶା ସାହିତ୍ୟ ଏକାଡେମୀ ଛାପିଥିବା ଶ୍ରୀ ରାମକୃଷ୍ଣ ନନ୍ଦ ସଙ୍କଳିତ 'ଓଡିଆ ଶିଶୁ ସଙ୍ଗୀତ ସଙ୍କଳନ' ରୁ ଆହୃତ ।