ପିଲାଙ୍କ ଗୀତ - ଆ' ଜହ୍ନମାମୁଁ 

କବି - ଶ୍ରୀ ଲକ୍ଷ୍ମୀକାନ୍ତ ମହାପାତ୍ର (୧୮୮୮-୧୯୫୩)

ଫଟୋ କ୍ରେଡିଟ୍ - ୱିକିମିଡିଆ କମନସ୍ 

ଆ ଜହ୍ନମାମୁଁ ଓହ୍ଲେଇ ଆ'

ମୋ ଧନମଣିକି ଗେହ୍ଲେଇ ଯା,

ଟିକାଟିଏ ଯା' ଦେଇ, 

ମୁଣ୍ଡେ ଟିକା ନାଇ ଧନମଣି ମୋର 

ନାଚିବ ତା'-ଧେଇ-ଧେଇ ।

ଆ ଜହ୍ନମାମୁଁ ଶରଗଶଶୀ

ମୁରୁକି ମୁରୁକି ଦବୁଟି ହସି 

ହସିବ ମୋ ଧନମଣି,

ତୋ' ହସ ମିଠା କି ଧନ ହସ ମିଠା

ହେବ ସିନା ଜଣାଜଣି ।

ଆ' ଜହ୍ନମାମୁଁ ଖେଳିବା ପୁଚି

ମେଘ ଉହାଡରେ ଯାଆନା ଲୁଚି 

ଗଡି ଯାଉଅଛି ବେଳ,

ଧମମଣି ସାଙ୍ଗେ ଖେଳିବୁ ନାହିଁକି

ଆସି ଲୁଚକାଳି ଖେଳ ?

ଆ' ଜହ୍ନମାମୁଁ କତିକି ଧାଇଁ

ଧନା ପରା ତୋତେ ରହିଛି ଚାହିଁ -

ଅଗଣାରେ ଶେଯ ପାରି,

ଥକା ହୋଇ ଦୁହେଁ ଶୋଇପଡିବ ରେ

ନିଦ ଯେବେ ଦେବ ଘାରି ।

ମୂଳ ରଚନା 'ଜହ୍ନମାମୁଁ' ପତ୍ରିକାର ଫାଲ୍ଗୁନ ୧୩୩୯ ସଂଖ୍ୟାରେ ପ୍ରକାଶିତ । ଗୀତଟିର ଏହି ପ୍ରତିଟି ଓଡିଶା ସାହିତ୍ୟ ଏକାଡେମୀ ଛାପିଥିବା ଶ୍ରୀ ରାମକୃଷ୍ଣ ନନ୍ଦ ସଙ୍କଳିତ 'ଓଡିଆ ଶିଶୁ ସଙ୍ଗୀତ ସଙ୍କଳନ' ରୁ ଆହୃତ ।