ପିଲାଙ୍କ ଗୀତ - 'ବିଲୁଆ ରଜା'

ମୃତ୍ୟୁଞ୍ଜୟ ରଥ (୧୮୮୨-୧୯୨୪)

ଫଟୋ କ୍ରେଡ଼ିଟ - ୱିକିମିଡ଼ିଆ କମନ୍ସ୍

ଘୋର ଜଙ୍ଗଲ ମଝିରେ ନଅର ମୋହର

ଖଟୁଛନ୍ତି ନିତି କେତେ ଛାମୁରେ ଚାକର ।

ମହାବଳ ମନ୍ତ୍ରୀ ମୋର ଚିତାବାଘ ପାତ୍ର

ଗଧିଆ ଯୋଡ଼ାଏ ଦ୍ୱାରୀ ରହିଛନ୍ତି ମାତ୍ର ।

ବାଘ ଘରେ ଗନ୍ତାଘର ଭାଲୁ କରେ ନାଟ

ନଅର ବାହାରେ ଛାଡ଼େ କୁକୁର କୁହାଟ ।

ମାଙ୍କଡ଼ ଡାଳରେ ବସି ଶିରେ ଛତା ଧରେ

ଚଅଁର ଢ଼ାଳଇ  ହାତୀ ମୋ ଗାଦିରେ ପାଖରେ ।

ମୟୁର ଗାଦି ଉପରେ ପୁଚ୍ଛକୁ ମେଲାଇ 

ରହିଥାଏ ମୋ ମୁଣ୍ଡକୁ  ମହୁଡ଼ ଚଢ଼ାଇ ।

କୁଆ, କୁମ୍ଭାଟୁଆ ମିଳି ବଜାନ୍ତି ନାଗରା 

ପହରକେ ଥରେ ଦିଏ ବିଲୁଆ ପହରା ।

କେ ପାନବରଜେ ଯାଏ, କେ ଖୋଜେ ଶିକାର

ସବୁ ଜୁଟ ହେଲେ ମୋର ବସେ ଦରବାର ।

ମନ୍ତ୍ରୀ ମୋର ମହାବଳ ସବୁ ଦିଏ ବାଣ୍ଟି

ଫିଟିଯାଏ ସଭିଙ୍କର ତହୁଁ ଦାନ୍ତପାଟି ।

ହାତୀ, ଭାଲୁ, ମାଙ୍କଡକୁ ଦିଅନ୍ତେ ଅନାଇ

ଡାଳ, ଫଳ କିଛି ତଳେ ଦିଏ ସେ ପକାଇ ।

ଚରଚା ସରନ୍ତେ ଆସି ଡଗରା ବିଲୁଆ

ରାଜ୍ୟର ବାରତା କହେ ନକରି ପରୁଆ ।

ଭାଟ ପରି ମୟୁରଟା ଛାଡ଼ୁଥାଏ ଡାକ

ରଡ଼ିଯାନ୍ତି ଥରେ ଥରେ ଦରବାରୀ ଯାକ ।

ଦେଖୁ ଦେଖୁ ହେଲା ସଞ୍ଜ ଉଠି ତତକ୍ଷଣ

ବିଲୁଆ ଭାଇଏ ମିଳି କଲେ ସଙ୍କୀର୍ତ୍ତନ ।

ସମସ୍ତେ ଚିଡ଼ିଲେ ତାଙ୍କୁ ମାତ୍ର ମୋର ଡର 

ସବୁ ବଳଠାରୁ ବଡ଼ ସିନା ବୁଦ୍ଧିବଳ ।