ଓଡ଼ିଶାର ଢଗ ଢମାଳୀ ସଙ୍ଗ୍ରହ - ୧

ସଙ୍କଳନ - ସ୍ନେହଲତା ଷଡଙ୍ଗୀ

ଫଟୋ କ୍ରେଡ଼ିଟ - ୱିକିମିଡିଆ କମନ୍ସ୍

୧

କର୍ମ ଅର୍ଜନେ ସହେ ଦୁଃଖ

କେବେ ହେଁ ନୋହିବ ବିମୁଖ ।

ଅର୍ଥ : ମନୁଷ୍ୟ ଜୀବନରେ ଭଲ କର୍ମ କରିଥିଲେ ଭଲ ଫଳ ନିଶ୍ଚିତ ପାଏ । ଯଦି ଅନୀତି ଦୁର୍ନୀତିରେ ଲିପ୍ତ ରହି ଜଣେ ଖରାପ କାମ କରିଚାଲେ,  ଦୁଃଖ ତ ନିଶ୍ଚୟ ମିଳିବ । ତେଣୁ ସେଥିପାଇଁ ଅବଶୋଷ କରିବା ଉଚିତ ନୁହେଁ ।

୨

କହି ଦେଉ ଥାଇ ପରକୁ

ବୁଦ୍ଧି ନ ଦିଶଇ ଘରକୁ ।

ଅର୍ଥ : ଅନ୍ୟକୁ ତାହାର ଭୁଲ ବିଷୟରେ ଚେତାଇ ଦେବା ପୂର୍ବରୁ, ଆମର ଅନୁଶୀଳନ କରି ଦେଖିବା ଉଚିତ ଯେ, ନିଜେ ସେହି ଭୁଲଟିକୁ କରୁଛେ ନା ନାହିଁ । ଏହା ହିଁ ବୁଦ୍ଧିମତାର କାର୍ଯ୍ୟ ।

୩

ଯେଣେ ଇଚ୍ଛା ତେଣେ ଯାଅ

କର୍ମ ଘେନି ବୁଲୁ ଥାଅ ।

ଅର୍ଥ : ମଣିଷ ଦୁନିଆରେ ଯେ କୌଣସି କୋଣକୁ ଗଲେ ମଧ୍ୟ, ନିଜର କର୍ମ ଅନୁସାରେ ଫଳ ପାଇବ । ଭଲ କର୍ମର ଭଲ ଫଳ ଓ ମନ୍ଦ କର୍ମର ମନ୍ଦ ଫଳ ନିଶ୍ଚୟ ମିଳିବ ।

୪

ବଡ଼ ବଡ଼ ଗଲେ ଫସର ଫାଟି

ସାନ ଆସିଲେ ବେସର ବାଟି ।

ଅର୍ଥ : ଯେଉଁ କାର୍ଯ୍ୟକୁ ବଡ଼ ବଡ଼ ବିଦ୍ୱାନ ବା ଅନୁଭବୀ ଲୋକମାନେ କରିବାକୁ ସମର୍ଥ ହୋଇ ନାହାନ୍ତି, ତାହାକୁ ଅତି ସାଧାରଣ ମଣିଷ କରିବା ପାଇଁ ଆସ୍ପର୍ଦ୍ଧା କରିବା ।

୫

ଶାଶୂ ମାରୁଥାଇ ବୋହୂକୁ,

ବୋହୂ ମାରି ମାରି କାହାକୁ ମାରିବ

ମାରୁଥାଇ ଚୁଲି ମୁହଁକୁ ।

ଅର୍ଥ : ଉପରିସ୍ଥ ଅଫିସର ବା ମାନ୍ୟରେ ଅଧିକ ବ୍ୟକ୍ତିଙ୍କ ଠାରୁ ସବୁ ବେଳେ ଗାଳି ଶୁଣିଲେ ମନ ଉତ୍ତ୍ୟକ୍ତ ରହିବ । ତେଣୁ ମନକୁ ଶାନ୍ତ କରିବାକୁ ଯାଇ ନିଜର ଅଧସ୍ତନ କର୍ମଚାରୀ ହେଉ ବା ସର୍ବସାଧାରଣ କାହା ଉପରେ ନିଜର ଆକ୍ରୋଶକୁ ଶାନ୍ତ କରିବା ପାଇଁ ଅକାରଣରେ ଗାଳି ଦେବା ।