ଏଣୁ-ତେଣୁ
ନନ୍ଦିତା ମହାନ୍ତି
ଫଟୋ କ୍ରେଡ଼ିଟ - ୱିକିମିଡିଆ କମନ୍ସ୍ |
ଆଜି
ସିନେମା ଦେଖିବା ପାଇଁ ଯାଇଥିଲି
‘ଆଇନକ୍ସ୍’ । ଅନେକ ବର୍ଷ ପରେ ,
ଝିଅର
ବାଧ୍ୟବାଧକତାରେ । ଗେଟ ଭିତରେ
ପଶୁ ପଶୁ ହିଁ ଝୁଣ୍ଟିଥିଲି ମୁଁ
। ଗେଟରେ ଛିଡା ହେଇଥିବା ମହିଳା
ଜଣକ ମୋର ବ୍ୟାଗ ତନଖି କରି ସେଥିରେ
ଥିବା କିଛି ଚିନାବାଦାମ ଭଜା,
ଦୁଇଚାରୋଟି
ଚକୋଲେଟ ଓ ଛୋଟିଆ ପାଣି ବୋତଲଟିକୁ
ବି କାଢ଼ି ନେଲେ । କୁଆଡ଼େ ସେଠି
ସିନେମା ଦେଖିବାକୁ ହେଲେ ସାଙ୍ଗରେ
କିଛି ନେଇ ଯାଇ ପାରିବନି । ଯାହା
କିଣିବ ସେଇ ହଲ୍ ର ପରିସର ଭିତରୁ ।
ତାହା ପୁଣି ପ୍ରକୃତ ଦାମ ଠାରୁ
ଆଠଦଶ
ଗୁଣ ଅଧିକ ଦେଇ ।
ସିନେମା ହଲ
ଭିତରେ ବସି ମୋର ମନେ ପଡୁଥିଲା
ରାଉରକେଲାର ରିଙ୍ଗ ରୋଡ କଡ଼,
ଦୀପକ
ହଲରେ 'ଶ୍ରୀ
ଜଗନ୍ନାଥ ‘ ସିନେମା ଦେଖିବା କଥା
। ସେତେବେଳେ ସିନେମା ଦେଖି ଯିବାଟା
ତ ଆମ ପାଇଁ କୌଣସି ପାର୍ବଣ ଠାରୁ
କମ୍ ନ ଥିଲା । ବାବା ଓ ପଡ଼ୋଶୀ ମଉସା
ସକାଳୁ ଯାଇ ଲାଇନି ଲଗେଇ ଟିକେଟ
କାଟି ଆଣୁଥିଲେ । ମା ଓ ମାଉସୀ ଶାଢ଼ି ପିନ୍ଧିବା ପୂର୍ବରୁ ଆମେ ପିଲାମାନେ
ଜାମାଯୋଡ଼ ହେଇ ଯାଇ ଛିଡ଼ା ହେଇ
ପଡ଼ୁଥିଲୁ । କମଳା ରଙ୍ଗର ଟାଉନ
ବସର ବିରାଟ ପେଟରେ ଗୋଟେ ଗୋଟେ
ସିଟରେ ବସି ପଡ଼ୁଥିଲୁ ଆମେ । ରିଙ୍ଗ
ରୋଡ଼ରେ ଧୂଆଁ ଫୋପାଡି ଧାଉଁଥିଲା
ବସ୍, ଆଉ ତା ସହିତ ଆମେ ବି ଦଉଡୁଥିଲୁ
। ବସ ପହଞ୍ଚିବା ଆଗରୁ ଆମେ ପହଞ୍ଚିବାକୁ
ଚାହୁଁଥିଲୁ ଆମ ଗନ୍ତବ୍ୟ ସ୍ଥଳିରେ
।
ହଲ ଭିତରର ଅନ୍ଧାରିଆ ପରିବେଶ, ଧଳା
ପରଦାରେ ଦେବତା ଆଉ ଅସୁରଙ୍କର
ଫାଇଟିଙ୍ଗ । ମଝିରେ ମଝିରେ ଜେନା
ମାଉସୀଙ୍କର ପରଦା ଉପରେ ଜଗନ୍ନାଥଙ୍କୁ
ଦେଖି ବାରମ୍ବାର ଦୁଇ ହାତ ଯୋଡ଼ି ମୁଣ୍ଡରେ ମାରୁଥିବାର ବା ଅଧାଗଢା
ଦିଅଁଙ୍କୁ ଦେଖି ଝରଝର କାନ୍ଦୁ
ଥିବାର ଦୃଶ୍ୟ । ଇଣ୍ଟରଭାଲରେ ହଲ
ଭିତରେ ବୁଲୁଥିବା ବାଦାମବାଲା
ଠାରୁ ଗରମ ଗରମ ଚିନାବାଦାମ ଆଉ
ବୁଟ ଭଜା ଖିଆ, ତ ଆଉ କେବେ କେବେ
ଲେମ୍ବୁ ଲୁଣ ବୋଳା ପୋଡ଼ା ମକା ଖିଆ ।
ସିନେମା ଦେଖା ଠାରୁ ବୋଧେ ବେଶୀ
ଆକର୍ଷଣୀୟ ଥିଲା ଏ ସବୁ ।
ଇଣ୍ଟର୍ମିଶନରେ
ଝିଅ ଠୁଙ୍ଗାଏ ମକାଖଇ (ପପକର୍ଣ୍ଣ) ଆଣି ମୋ
ହାତରେ ଧରେଇ ଦେଇ କହିଲା, "ମାମା, ପପକର୍ଣ୍ଣ... ସେଇ
ମକା ମ ।“ ପାଟିରେ ଦି‘ଟା ପକେଇଲି
। ସଞ୍ଚରି ଗଲା ଏକ ଖଟା-ମିଠା
ଚଟପଟା ସ୍ଵାଦ ଜିଭ ସାରା । ହେଲେ
ମୋର ସ୍ଵାଦଗ୍ରନ୍ଥି ସବୁ ବୋଧେ
ଖୋଜୁଥିଲେ ଆଉ କିଛି । ଏଇ ଜିଭଟା
ପରା ଭାରି ଦଗାଦିଆ । ଚିମୁଟି ଦେଇ, ସାଙ୍ଗେ
ସାଙ୍ଗେ ଟାଣି ନେଇ ଛିଡ଼ା କରିଦେବ
ଅତୀତର ସେଇ ଅର୍ଗଳି ଭିତରେ, ଯେଉଁଠି
ପ୍ରବେଶ ନିଷେଧର ବୋର୍ଡ଼ ଲାଗିଥିବ
।
ବାସ୍ କେବଳ ମାନସ ଚକ୍ଷୁରେ
ଦିଶିଯିବ... ସିନେମା
ହଲ ସାମ୍ନାରେ,
ଠେଲାଗାଡିରେ
ବସିଥିବ ବିହାରୀ ବୁଢ଼ା । ମୁଣ୍ଡରେ
ଠେକା ପରି ବାନ୍ଧିଥିବ ଗୋଟେ
ଗାମୁଛା । ଠେଲାରେ ଗୋଟେ ପଟେ ଗଦା
ହେଇଥିବ ମକା । ଆଉ ଗୋଟେ ପଟେ ଦିକ
ଦିକ ହେଇ ଜଳୁଥିବ କୋଇଲା ଆଞ୍ଚ ।
ସିଏ ଗୋଟିଏ ଗୋଟିଏ ମକାରୁ ଚୋପା
ଛଡ଼େଇ କୋଇଲା ଆଞ୍ଚରେ ପକଉଥିବ।
ମଝିରେ ମଝିରେ ପାଟି କରୁଥିବ “ଭୁନା ହୁଆ ଭୁଟ୍ଟା ଲେଲୋ ବାବୁ,
ଦୋ
ରୁପିଏ ମେ ଏକ୍ । ପାଞ୍ଚ୍ କା ତିନ୍ ।“
ଆଞ୍ଚରୁ ହାଲକା ଧୂଆଁ ଉଠୁଥିବ
। କୋଇଲା ଜଳିବାର ଆଉ ମକା ପୋଡ଼ାର ମିଶାମିଶି ସୁନ୍ଦର ବାସ୍ନା ଘୁରି
ବୁଲୁଥିବ ଚାରିପଟେ । ନାକ ପଟ ଦେଇ
ପେଟ ଯାଏଁ ପହଞ୍ଚି ଯାଉଥିବ ।
ବିହାରୀ ବୁଢ଼ା ଗୋଟେ ପୋଡ଼ା ମକା ଉପରେ
ଲେମ୍ବୁ ଓ କଳାଲୁଣ ବୋଳିବ ବଡ଼ ଯତ୍ନରେ, ତା' ପରେ ତାକୁ ମକା ଚୋପାରେ ଗୁଡେଇ
ଧରେଇ ଦେବ ହାତରେ । ମକା ଚୋବାଉ ଚୋବାଉ ଆମେ କେତେବେଳେ
ଯେ ଘରେ ପହଞ୍ଚି ଯିବୁ, ଜଣା ବି
ପଡ଼ିବନି ।
ଅତୀତଟା
ଏମିତି,
ଯେଉଁଠିକି
ଆଉ କେବେ ଫେରି ଯାଇ ହେବନି, ହେଲେ
ମୃତ୍ୟୁ ଯାଏଁ ,ସେ ସିଏ କେବେ ପିଛା
ଛାଡ଼ିବନି । ବେଳ ଅବେଳରେ ଏମିତି
ଆସି ଛିଡ଼ା ହେଇଯିବ ସାମ୍ନାରେ, ବିନା ନିମନ୍ତ୍ରଣରେ,
ଆ ମୋତେ
ଛୁଉଁ କହି ।
No comments:
Post a Comment