ନିରୋ
ମାହମୁଦ ଦାରବିସ୍
ଅନୁବାଦ - ଜ୍ୟୋତି ନନ୍ଦ
ରୋମୀୟ ସମ୍ରାଟ ନିରୋଙ୍କର ଅବୟବର ଶଙ୍ଖମର୍ମର ସ୍ଥାପତ୍ୟ ରୋମର କାପିଟୋଲାଇନି ସଙ୍ଗ୍ରହାଳୟ ଠାରେ ସ୍ଥିତ ଫଟୋ କ୍ରେଡ଼ିଟ - ୱିକିମିଡିଆ କମନ୍ସ୍ |
କ'ଣ ଚାଲିଥିବ ନିରୋଙ୍କ ମନ ଅଗଣାରେ ଯେତେବେଳେ ସେ ଦେଖୁଥିବେ ଜଳୁଛି ସାମ୍ନାରେ ଲେବାନନ୍ ? ତାଙ୍କର ଆଖିଦୁଇଟି ଉଲ୍ଲସିତ ପର୍ଯ୍ୟଟକ ଆଉ ସେ ଜଣେ ଯେମିତି ନାଚୁଥାଏ ବରଯାତ୍ରୀ ଭଳି ସେଇଭଳି ନିଜେ ଚାଲୁଛନ୍ତି: ଏଇ ପାଗଳାମୀ ମୋର ପାଗଳାମୀ, ମୁଁ ଜାଣେ ବେଶ୍, ସେମାନେ ନିଆଁ ଲଗାଇଦିଅନ୍ତୁ ସେଇ ସବୁଠି ଯାହା ମୋର ଅକ୍ତିଆର୍ ରେ ନାହିଁ । ଆଉ ଯେତେକ ଶିଶୁ ଅଭ୍ୟାସ କରିନିଅନ୍ତୁ ନିଜନିଜ ଭିତରେ ଆଉ ବନ୍ଦ କରନ୍ତୁ ଏ ପାଟିତୁଣ୍ଡ ହୋହଲ୍ଲା, ଯେତେବେଳେ ମୁଁ ସୁର ଦେଉଛି ମୋର ପ୍ରିୟ ବଂଶୀରେ !
ଏବଂ କ'ଣ ଚାଲିଥିବ ନିରୋଙ୍କ ମନ ଅଗଣାରେ ଯେତେବେଳେ ସେ ଦେଖୁଥିବେ ସାମ୍ନାରେ ଜଳୁଛି ଇରାକ୍ ? ଏହା କ'ଣ ଖୁସି କରୁଥିବ ତାଙ୍କୁ ଆଉ ସେ ଚେଇଁ ଉଠିବେ ସ୍ମୃତିକୁ, ଇତିହାସର ଅରଣ୍ୟରେ, ତାଙ୍କର ନାଆଁ ସୁରକ୍ଷିତ ଯେଉଁଠି ଜଣେ ଶତ୍ରୁ ତାଲିକାରେ, ହାମୁରାବି, ଗିଲଗାମେଶ୍ ସହ ଓ ଆବୁ ନୁଆସ୍ ସହ : ମୋ ଆଇନ୍ ରୁ ସବୁ ଆଇନ୍, ଶାଶ୍ଵତର କମଳଟି ଫୁଟିଅଛି ମୋ ଉଦ୍ୟାନରେ ଆଉ କବିତା - ମାନେ କ'ଣ ସେଇଟା ?
ଏବଂ କ'ଣ ଚାଲିଥିବ ନିରୋଙ୍କ ମନ ଅଗଣାରେ ଯେତେବେଳେ ସେ ଦେଖୁଥିବେ ସାମ୍ନାରେ ଜଳୁଛି ପାଲେଷ୍ଟାଇନ୍ ? ସେ କ'ଣ ଖୁବ୍ ଆନନ୍ଦିତ ତାଙ୍କର ନାଆଁଟି ଯେତେବେଳେ ଲେଖାହୋଇଯାଇଛି ଧର୍ମପ୍ରବର୍ତ୍ତକ ସୂଚୀରେ ଜଣେ, ଯାହାକୁ କେହି କେବେ ବିଶ୍ୱାସ କରିନି ? ଧର୍ମପ୍ରବର୍ତ୍ତକ ହତ୍ୟାର ସେ, ଈଶ୍ୱର ଯାହାକୁ ଅର୍ପିଥିଲେ ସଂଶୋଧନ କରିବାକୁ ଅସୁମାରୀ ଭୁଲ୍ ସବୁକୁ ଅପାର୍ଥିବ ପୁସ୍ତକ ପୃଷ୍ଠାରୁ:ମୁଁ ବି ଜଣେ ପ୍ରବକ୍ତା ଈଶ୍ୱରଙ୍କ !
ଏବଂ କ'ଣ ଚାଲିଥିବ ନିରୋଙ୍କ ମନ ଅଗଣାରେ ଯେତେବେଳେ ସେ ଦେଖୁଥିବେ ସାମ୍ନାରେ ଜଳୁଛି ପୃଥିବୀ ? ମୁଁ ସେଦିନର ଅଧିପତି, ଯେତେବେଳେ ଡକାଯିବ ଶେଷ ବିଚାର ପାଇଁ ସମସ୍ତ ଶବକୁ ନିଜନିଜ କବରରୁ । ତାହା ପରେ ବନ୍ଦ କରିବାକୁ ନିର୍ଦ୍ଦେଶ ଦେବେ ସବୁ କ୍ୟାମେରାକୁ କାରଣ ସେ ଚାହିଁବେ ନାହିଁ ଦେଖିବାକୁ ନିଜ ହାତକୁ ନିଆଁ ଭିତରେ ଏକ ଦୀର୍ଘ ଆମେରିକାନ୍ ଫିଲ୍ମର ସମାପ୍ତିରେ !
ଆବୁ ନୁଆସ୍ ଙ୍କର ଚିତ୍ର (୧୯୧୬) ଚିତ୍ରକର - ଖାଲିଲ ଜିବ୍ରାନ |
[ ଆବୁ ନୁଆସ୍ (୭୫୦-୮୧୪) ହେଉଛନ୍ତି ଜଣେ ପାରସ୍ୟର ନିଷିଦ୍ଧ କବି ଯିଏ ଯୌନତା ଓ ମଦିରା କୁ ଉପଜୀବ୍ୟ କରି କବିତା ଲେଖୁଥିଲେ।ତମେ ଥରକ ପାଇଁ ବଚିଛ,ଏଇ ଭାବଧାରାର ସେ ଜଣେ ଆଦ୍ୟସ୍ୱର । ଗିଲଗାମେଶ୍ ପୃଥିବୀର ପ୍ରଥମ ସାହିତ୍ୟ କର୍ମର ନାୟକ ]
No comments:
Post a Comment