ବୈଷ୍ଣବ ପଦାବଳୀରୁ ଗୀତ - 'ସଖୀ ପ୍ରତି ଶ୍ରୀରାଧା'

କବି - ଗୋପାଳକୃଷ୍ଣ

ଗାୟକ - ଗୌରାଙ୍ଗ ଚରଣ ଦାସ

(ରାଗ- କାମୋଦୀ, ତାଳ-ଏକତାଳୀ)

ଗୀତର ୟୁଟ୍ୟୁବ୍ ଲିଙ୍କ୍ - https://www.youtube.com/watch?v=fgXx05fcKS4

ରାଧା ଓ କୃଷ୍ଣ
ଚିତ୍ରକର - କୀର୍ତ୍ତିନାଥ ମଜୁମଦାର (୧୯୧୪ରେ ପ୍ରକାଶିତ)
ଫଟୋ କ୍ରେଡ଼ିଟ୍ - ୱିକିମିଡ଼ିଆ କମନ୍ସ୍

କଦମ୍ୱ ବନେ ବଂଶୀ ବାଜିଲା ରେ।

ରାଧା ଦମ୍ଭ-ଶିଖରୀ ଭାଜିଲା ରେ। (ଘୋଷା)

ତୋ ବିନା ପ୍ରତିକାର, ଆନ କେ ନାହିଁ ମୋର,

ବିବେକ-ରତନ ମୋ ହଜିଲା ରେ ।୧।

କଢ଼ା ମୋତେ ସରଣୀ, ଆରେ ପ୍ରାଣମିତଣି !

ନୋହିଲେ ଜୀବନ ବରଜିଲା ରେ ।୨।

ଦେଖି ବ୍ରଜେନ୍ଦୁ-ମୁଖ ଲିଭାଇବି ରେ ଦୁଃଖ,

ସ୍ମରାନଳରେ ତନୁ ଭାଜିଲା ରେ ।୩।

ପଳାଇଲାନି ମନ, ବେଣୁ-ପତି ଶୋଭନ

ପୀୟୁଷ-ବାରିଧିରେ ମଜ୍ଜିଲା ରେ ।୪।

ଚାଲ ଯିବା ଲଳିତା, ବୋଲୁଁ କୀର୍ତ୍ତିଦାସୁତା

ମୁଖ-ସୁବର୍ଣ୍ଣାବ୍‌ଜ ବିରାଜିଲା ରେ ।୫।

ଏକାନ୍ତ ଶ୍ରୀ ଲଳିତା, ଶ୍ରୀ ବୃଷଭାନୁ-ସୂତା,

ଗୋପାଳ-କୃଷ୍ଣ ରହି ହେଜିଲା ରେ ।୬।

ଶବ୍ଦାର୍ଥ

ଶିଖରୀ - ପର୍ବତ 

ସରଣୀ - ମାର୍ଗ 

ବେଣୁପତି - ଶ୍ରୀକୃଷ୍ଣ 

କୀର୍ତ୍ତିଦାସୁତା - ରାଧା

ବି.ଦ୍ର. - ଏହି ଗୀତଟି ଜାନକୀବଲ୍ଲଭ ମହାନ୍ତିଙ୍କର ସମ୍ପାଦନାରେ ପ୍ରକାଶିତ 'ବୈଷ୍ଣବ ପଦାବଳୀ' ବହିରୁ ନିଆ ଯାଇଛି । ବହିଟି କଟକସ୍ଥ ପ୍ରକାଶନ ସଂସ୍ଥା ଓଡ଼ିଶା ବୁକ୍ ଷ୍ଟୋର୍ ୧୯୮୦ ମସିହାରେ ଛାପି ଥିଲେ । ଗ୍ରନ୍ଥଟି ସୃଜନିକା ସଂ‌ସ୍ଥାଙ୍କର 'ଓଡ଼ିଆ ବିଭବ' ୱେବ୍‌ସାଇଟ୍‌ରେ ଉପଲବ୍ଧ । ଆମେ ସଂସ୍ଥା ନିକଟରେ ଏଥି ପାଇଁ କୃତଜ୍ଞ ।