ଓଡ଼ିଶାର ଢଗ ଢମାଳୀ ସଙ୍ଗ୍ରହ - ୧୮

ସଙ୍କଳନ - ସ୍ନେହଲତା ଷଡଙ୍ଗୀ

କଳାକାର - ଜେମ୍ସ୍ ଫୋର୍ବ୍‌ସ୍ ଓ ଜନ୍ ଗ୍ରେଗ୍
୧୭୭୪ମସିହାର କଳାକୃତି (ୱିକିମିଡିଆ କମନ୍ସ୍)

୮୬

ଗଛର ଛାଇ, ମଣିଷ ହାଇ

ଯେଣେ ଗଲେ ତେଣେ ଉଧାଏ ନାହିଁ ।

ଅର୍ଥ: ଯେପରି ବଡ଼ ଗଛର ଛାଇରେ ଛୋଟ ଗଛ ବଢ଼ିପାରେ ନାହିଁ । ସେହିଭଳି କୌଣସି ମଣିଷ ପ୍ରତି ଅନ୍ୟାୟ କଲେ ତା’ର ଅନ୍ତରରୁ ଯେଉଁ ଅଶାନ୍ତି ଆସ ସେହି ପ୍ରଭାବରୁ ଅନ୍ୟାୟ କରିଥିବା ଲୋକଟି କେଉଁଠି ବି ଶାନ୍ତିରେ ରହିପାରେ ନାହିଁ ।

୮୭

ଉପରେ ପଡ଼ିଲେ ବଜେଇ ଶିଖନ୍ତି ।

ଅର୍ଥ: ମଣିଷ ଯେତେ ଅଯୋଗ୍ୟ ହେଉ ବା ଫୁଲାଫାଙ୍କିଆ ହୋଇଥାଉ, ଥରେ ଦାୟିତ୍ୱ ନିଜ ଉପରକୁ ଆସିଲେ ଧୀରେ ଧୀରେ ସବୁ କାମ ଶିଖିଯାଏ ଓ ଠିକ୍ ଭାବେ କରିବାକୁ ଚେଷ୍ଟା କରେ ।

୮୮

ଯେମିତି ଦିଅଁକୁ ସେମିତି ପୂଜା

ବାଲି ଗରଡ଼ାକୁ ଚାଉଳ ଭଜା ।

ଅର୍ଥ: ମଣିଷ ଯେଉଁଭଳି ବ୍ୟବହାର କରିବ ତଦନୁଯାୟୀ ଫଳ ପାଇବ ।

୮୯

ଘଇତା ଅଯୋଗ୍ୟ ପଣେ

ମାଇପ ଶୋଇଲା ସନ୍ତରା ବଣେ ।

ଅର୍ଥ: ଅଯୋଗ୍ୟ ଲୋକକୁ ବାହା ହେଲେ, ତାହାର କର୍ମରୁ ନିଜକୁ କଷ୍ଟ ପାଇବାକୁ ହେବ ।

୯୦

ଏକ ଦଣ୍ଡବତ ନ କରି ଶହେ ଦଣ୍ଡବତ ।

ଅର୍ଥ: ଛୋଟ କଳହକୁ ଠିକ୍ ଭାବେ ସମାଧାନ ନ କଲେ ତାହା ବିରାଟ ରୂପ ଧାରଣ କରିବ ଓ ତୁମକୁ ଅଧିକ ଅସୁବିଧାରେ ପକାଇବ ।