ଓଡ଼ିଶାର ଢଗ ଢମାଳୀ ସଙ୍ଗ୍ରହ - ୧୭

ସଙ୍କଳନ - ସ୍ନେହଲତା ଷଡଙ୍ଗୀ

ଥାଇଲ୍ୟାଣ୍ଡ୍‌ର ବାଉଁଶକଳା (ୱିକିମିଡିଆ କମନ୍ସ୍)

୮୧

ଘରେ ନାହିଁ ଭୁଜେଇ ହୁଦା

ପୁଅ କରୁଛି ଦୁଆରେ ପୂଜା ।

ଅର୍ଥ: ଘରେ ସମ୍ବଳ ନାହିଁ ଅଥଚ ଫୁଟାଣି ମାରିବା ପାଇଁ ଲୋକକୁ ଦେଖଇ କରି ପଇସା ଖର୍ଚ୍ଚ ଚାଲିଛି ।

୮୨

ଲୁହା କଅଁଳ ହେଲାରୁ ବିରାଡ଼ି କାମୁଡ଼ି ଗୋଡ଼ଉଛି ।

ଅର୍ଥ: ବ୍ୟକ୍ତିକୁ ଶ୍ରଦ୍ଧା ଓ ସମ୍ମାନ କଲେ ସେ ତାହାର ପ୍ରତି ବଦଳରେ ଶ୍ରଦ୍ଧା କରିବା ପରିବର୍ତ୍ତେ ନିଜର ହାକିମାତି ଜାହିର କରିବା ।

୮୩

ଦଣ୍ଡିବା ଶକ୍ତି ଯାର ଥାଇ

ସେ ପୁଣି କ୍ଷମା ଆଚରଇ ।

ଅର୍ଥ: ଯାହାକୁ ଦୋଷୀ ବୋଲି ପ୍ରକୃତ ପ୍ରମାଣ ମିଳେ, ସେ ଯଦି ନିଜ କାର୍ଯ୍ୟ ପାଇ ପଶ୍ଚାତାପ କରେ ଓ ପ୍ରାୟଶ୍ଚିତ କରେ ତାକୁ କ୍ଷମା କରିଦେବା ଉଚିତ ।

୮୪

ଯେବେ ପୁରି ଅଛି ଡୋଲି

ତେବେ ସୁସାର ବଚନ ବୋଲି ।

ଯେବେ ପୂରିନାହିଁ ଡୋଲି

ଫୋ ଫା କରି ବୋଲି ।

ଅର୍ଥ: ମଣିଷର ପେଟ ପୁରିଥିଲେ ମନ ଶାନ୍ତି ରହେ ଓ ସେ ସବୁ କାମ ସୁରୁଖୁରୁରେ କରେ । ପେଟ ପୂରି ନଥିଲେ କାମ କରି ହୁଏନି ଓ ମନ ଉତ୍ତେଜିତ ରହେ ।

୮୫

ଯଦି ନାହିଁ ଉପୁରି

କି କରିବ ଚାକରି ।

ଅର୍ଥ: ମଣିଷ ସବୁବେଳେ ନିଜ ପ୍ରାପ୍ୟ ଧନଠାରୁ ଅଧିକ ଧନ ପାଇଲେ ବେଶି ଆନନ୍ଦ ଉପଭୋଗ କରେ ।