କୁନ୍ଦୁଲି ନାବାଳିକା ବଳାତ୍କାର ଘଟଣା ସମ୍ପର୍କରେ ପ୍ରେସ ବିଜ୍ଞପ୍ତି 

କୋରାପୁଟ, ୨୫.୧୦.୧୭

କୋରାପୁଟ ଜିଲ୍ଲାର ଲକ୍ଷ୍ମୀପୁର ରେଳଷ୍ଟସନର ଦୃଶ୍ୟ
ଫଟୋ କ୍ରେଡ଼ିଟ -  ୱିକିମିଡିଆ କମନ୍ସ୍

ଅକ୍ଟୋବର ମାସର ଦଶ  ତାରିଖ ଦିନ କୁନ୍ଦୁଲି ଅଞ୍ଚଳରେ ଜଣେ ନାବାଳିକା ପ୍ରତି ଯବାନମାନଙ୍କ ଦ୍ୱାରା ଗଣ ବଳାତ୍କାର ହୋଇଥିବାର ଅଭିଯୋଗ ହୋଇଥିଲା । ଅଭିଯୋଗକାରିଣୀ ଜଣେ ଦଳିତ ବର୍ଗର ନାବାଳିକା ଏବଂ ତାଙ୍କ ଅଭିଯୋଗ ଅନୁସାରେ ଅପରାଧକର୍ତ୍ତା ୟୁନିଫର୍ମ ପିନ୍ଧା ଓ ବନ୍ଧୁକଧାରୀ ଚାରିଜଣ ଯବାନ ହୋଇଥିବାରୁ ଘଟଣାର ଯଥେଷ୍ଟ ଗୁରୁତ୍ୱ ରହିଛି । ଘଟଣାର ପ୍ରତିବାଦରେ ଅଞ୍ଚଳବାସୀ ରାସ୍ତାରୋକୋ ସମେତ ବିଭିନ୍ନ ଭାବରେ ପ୍ରତିକ୍ରିୟା ପ୍ରକାଶ କରିଥିଲେ । ଏ ଅଞ୍ଚଳରେ ବହୁସଙ୍ଖ୍ୟାରେ ଦୀର୍ଘଦିନ ଧରି ଯବାନମାନଙ୍କୁ ମୁତୟନ କରାଯାଇଛି । ପୂର୍ବରୁ ବିଭିନ୍ନ ସମୟରେ ସେମାନଙ୍କ ଦ୍ୱାରା ସାଧାରଣଲୋକଙ୍କ ଅଧିକାର ଉଲ୍ଲଙ୍ଘନ ହୋଇଥିବାର ଅଭିଯୋଗ ମଧ୍ୟ ହୋଇଛି ।  

ଏ ପରିପ୍ରେକ୍ଷୀରେ କୁନ୍ଦୁଲି ଘଟଣାର ଗୁରୁତ୍ୱ ଉପଲବ୍ଧି କରି, ମାନବିକ ଅଧିକାର କ୍ଷେତ୍ରରେ କାର୍ଯ୍ୟରତ ଓଡ଼ିଶାର ତିନୋଟି ସଙ୍ଗଠନ ଯଥା, ପିୟୁସିଏଲ୍, ମିଥ୍ୟା ମକଦ୍ଧମା ବିରୋଧୀ ଅଭିଯାନ ଓ ଗଣତାନ୍ତ୍ରିକ ଅଧିକାର ସୁରକ୍ଷା ସଙ୍ଗଠନର ପ୍ରତିିନିଧିମାନେ ସମ୍ପୃକ୍ତ ଅଞ୍ଚଳ ଗସ୍ତ କରି ଘଟଣାର ବିଭିନ୍ନ ଦିଗ ସମ୍ପର୍କରେ ତା୨୩ ରୁ ୨୫ ଅକ୍ଟୋବର ପର୍ଯ୍ୟନ୍ତ ଅନୁସନ୍ଧାନ କରିଥିଲେ । ପ୍ରତିିନିଧିମାନେ ପୀଡ଼ିତା ନାବାଳିକା, ତାଙ୍କର ପରିବାରବର୍ଗ, ଗ୍ରାମବାସୀ, ଜେରା କରାଯାଉଥିବା ଦୁଇ ଜଣ ନାବାଳକଙ୍କ ସମେତ, ଗାଁର ଚାରି ଜଣ ଯୁବକ, କୁନ୍ଦୁଲି ଗୋଷ୍ଠି ସ୍ୱାସ୍ଥ୍ୟ କେନ୍ଦ୍ର, ପଟାଙ୍ଗୀ ଥାନା ଅଧିକାରୀ, ଜିଲ୍ଲା ଶିଶୁ ସୁରକ୍ଷା ଅଧିକାରୀ, ଡି.ଏସ୍.ପି. ଏଚ୍.ଆର୍.ପି.ସି. ଇତ୍ୟାଦିଙ୍କୁ ସାକ୍ଷାତ କରି ଘଟଣା ସମ୍ପର୍କରେ ବୁଝିଥିଲେ । ତାହା ସହିତ ଗଣମାଧ୍ୟମରେ ଲଗାତାର ଭାବେ ପ୍ରକାଶିତ ସମ୍ବାଦର ଅନୁଧ୍ୟାନ ମଧ୍ୟ କରିଥିଲେ । ଦଳ ତାହାର ପ୍ରାଥମିକ ଅନୁସନ୍ଧାନର ଆଧାରରେ ନିମ୍ନଲିଖିତ  ବିଷୟ ଉପସ୍ଥାପନ କରୁଅଛି ।

ପୀଡ଼ିତାର ସ୍ଥିତି ସମ୍ପର୍କରେ

୧. ପୀଡ଼ିତା ଏବେ ମଧ୍ୟ ଗମ୍ଭୀର ମାନସିକ ଅସ୍ଥିରତା, ଉଦବେଗ ଓ ଭୟଭୀତ ଅବସ୍ଥାରେ ଅଛନ୍ତି । ଏହି ସମୟରେ ତାଙ୍କୁ ଉପଯୁକ୍ତ ତଥା ସମ୍ବେଦନଶୀଳ ଯତ୍ନ ଆବଶ୍ୟକ । ଏବେ ପନ୍ଦର ଦିନ ହେଲା ତାଙ୍କୁ ଡାକ୍ତରଖାନାରେ ରଖାଯାଇଛି । ଅନେକ ଦିନ ଧରି ତାଙ୍କୁ ପ୍ରସୂତି ୱାର୍ଡ୍ ରେ ରଖାଯାଇଥିଲା, ଯାହା ବଳାତ୍କାରର ଶିକାର ହୋଇଥିବା ଜଣେ ନାବାଳିକା ପାଇଁ ଏକ ଦଣ୍ଡ ଅଟେ ।

୨. ପୀଡ଼ିତାର ଶାରୀରିକ ସ୍ଥିତି ଏବଂ ଚିକିତ୍ସା ବିଷୟରେ ତାଙ୍କୁ କିମ୍ବା ତାଙ୍କର ପରିବାରଙ୍କୁ ବିଶ୍ୱାସକୁ ନିଆଯାଇ ସମସ୍ତ ସୂଚନା ଦିଆଯାଉ ନାହିଁ ।

୩. ପୀଡ଼ିତାଙ୍କର ପରିବାର ଆର୍ଥିକ ଓ ସାମାଜିକ ଦୃଷ୍ଟିରୁ ଅତ୍ୟନ୍ତ ଦୁର୍ବଳ ଶ୍ରେଣୀର । ଘଟଣା ପରେ ସେମାନେ ମଧ୍ୟ ସବୁ ଦିଗରୁ ପ୍ରଭାବିତ ଏବଂ ଘୋର ମାନସିକ ଓ ଆର୍ଥିକ ଦୁଃସ୍ଥିତି ମଧ୍ୟରେ ଗତି କରୁଛନ୍ତି ।

ତଦନ୍ତର ଦିଗ ସମ୍ପର୍କରେ

୧. ପୀଡ଼ିତାଙ୍କର ଅଭିଯୋଗ ଅନୁସାରେ ଯେଉଁ ସବୁ ଦିଗଗୁଡ଼ିକ ତଦନ୍ତର ପରିସରଭୁକ୍ତ ହେବା କଥା, ସେ ସମସ୍ତ ଦିଗ ପ୍ରତି ଆବଶ୍ୟକ ଧ୍ୟାନ ଦିଆଯାଉ ନାହିଁ । ବରଂ, ଅଭିଯୋଗରେ ଉଲ୍ଲେଖ ନଥିବା ଗାଁ ପିଲାମାନଙ୍କ ଉପରେ ତଦନ୍ତର ଧ୍ୟାନ କେନ୍ଦ୍ରିତ କରାଯାଇଛି ।

୨. ସବୁଠାରୁ ଉଦବେଗର ବିଷୟ ହେଉଛି ଯେ, ତଦନ୍ତ ଆଳରେ କିଶୋର ନ୍ୟାୟ ବ୍ୟବସ୍ଥାର ବିଭିନ୍ନ ଆଇନକାନୁନ ଉଲଙ୍ଘନ କରାଯାଇ, ଦୁଇ ନାବାଳକଙ୍କୁ ବିଭିନ୍ନ ଭାବରେ ମାନସିକ ଓ ଶାରୀରିକ ନିର୍ଯ୍ୟାତନା ଦିଆଯାଉଛି । ସେମାନଙ୍କ ପରିବାର ବର୍ଗଙ୍କୁ ମଧ୍ୟ ବିଭିନ୍ନ ଭାବରେ ହଇରାଣ ହରକତ କରାଯାଉଛି । ବାରମ୍ବାର କୋରାପୁଟ ଏସ୍.ପି. ଅଫିସକୁ ଡାକି ଗାଁର ଅନ୍ୟ ଦୁଇ ଯୁବକ ଓ ନାବାଳକଙ୍କୁ ଦୀର୍ଘ ସମୟ ଧରି ଅଟକ ରଖିବା, ମାଡ଼ ଦେବା, ରାତିରେ ନାବାଳକକୁ ନେଇ ପୀଡ଼ିତା ସହିତ ମୁହାଁମୁହିଁ କରେଇବା, ରାତିରେ ପୁଲିସ ଫୋର୍ସ ନେଇ ଗାଁ ତନଖି କରିବା, ନାବାଳକର ମିଛ ଧରା ପରୀକ୍ଷା କରେଇବା ଇତ୍ୟାଦି ଭାବରେ ନିର୍ଯ୍ୟାତନା ଦେଉଥିବାର ଅଭିଯୋଗ ହୋଇଛି ।

୩. ଅପର ପକ୍ଷେ, ପୀଡ଼ିତା ଅଭିଯୋଗରେ ଉଲ୍ଲେଖ କରିଥିବା ‘ଯବାନ’ମାନଙ୍କ ସମ୍ପୃକ୍ତିକୁ ନେଇ ତଦନ୍ତକୁ ସେଭଳି ଗୁରୁତ୍ୱ ଦିଆଯାଉଥିବା ଜଣାପଡ଼ୁ ନାହିଁ - ଯେପରି କି, ସନ୍ଧାନୀ କୁକୁରର ବ୍ୟବହାର ନ କରିବା, ବୟାନ ଅନୁଯାୟୀ ସନ୍ଦିଗ୍ଧ ଅପରାଧୀର ସ୍କେଚ୍ ଜାରି ନ କରେଇବା, ସମ୍ପୃକ୍ତ ଅଞ୍ଚଳକୁ କୁମ୍ବିଂ ପାଇଁ ଆସୁଥିବା ଆନ୍ଧ୍ର-ଓଡ଼ିଶା ମିଳିତ ସୁରକ୍ଷା ବଳକୁ ତଦନ୍ତ ପରିସରଭୁକ୍ତ ନ କରିବା, ଟେଲିଫୋନ୍ ସିଡ଼ିଆର୍ କୁ ତଦନ୍ତରେ ଅନ୍ତର୍ଭୁକ୍ତ ନ କରିବା ଇତ୍ୟାଦି ।

ସୁପାରିଶ

୧. ପୀଡ଼ିତାଙ୍କର ମାନସିକ ସ୍ଥିତି ଓ ସ୍ୱାସ୍ଥ୍ୟରେ ଉନ୍ନତି ପାଇଁ ଆବଶ୍ୟକ ବ୍ୟବସ୍ଥା ଗ୍ରହଣ କରାଯିବା ଦରକାର । ସେ ପୁଣି କେମିତି ସ୍କୁଲ ଯାଇ ପାରିବେ ତଥା ଏକ ସ୍ୱାଭାବିକ ଓ ମର୍ଯ୍ୟାଦାପୂର୍ଣ୍ଣ ଜୀବନ ବିତେଇପାରିବେ, ସେହି ବ୍ୟବସ୍ଥା କରାଯିବା ଦରକାର ।

୨. ତଦନ୍ତ ନାମରେ ଗ୍ରାମବାସୀ, ଯୁବକ ତଥା ନାବାଳକମାନଙ୍କୁ ମାନସିକ ବା ଶାରୀରିକ ନିର୍ଯ୍ୟାତନା ଦିଆ ନ ଯାଉ ।

୩. ପୀଡ଼ିତାଙ୍କର ଅଭିଯୋଗପତ୍ର ଆଧାରରେ ସମସ୍ତ ଦିଗକୁ ତଦନ୍ତ କରାଯାଉ ।

ପ୍ରମୋଦିନୀ ପ୍ରଧାନ, ଶରନ୍ୟା ନାୟକ - ପିପୁଲସ୍ ୟୁନିଅନ ଫର୍ ସିଭିଲ୍ ଲିବର୍ଟିଜ୍ (ପିୟୁସିଏଲ୍), ଓଡ଼ିଶା

ନରେନ୍ଦ୍ର ମହାନ୍ତି - ମିଥ୍ୟା ମକଦ୍ଧମା ବିରୋଧୀ ଅଭିଯାନ, ଓଡ଼ିଶା

ଦେବ ରଞ୍ଜନ - ଗଣତାନ୍ତ୍ରିକ ଅଧିକାର ସୁରକ୍ଷା ସଙ୍ଗଠନ, ଓଡ଼ିଶା