ପୁରୀ ଜିଲ୍ଲା ସ୍କୁଲ ୧୯୩୫-୧୯୪୦
ପୁରୀସ୍ଥ ସାମନ୍ତ ଚନ୍ଦ୍ରଶେଖର ମହାବିଦ୍ୟାଳୟର ଟିତ୍ର (ୱିକିମିଡିଆ କମନ୍ସ୍) ଏହି କୋଠାଟିର ପ୍ରାଚୀନତମ ଅଂଶଟିରେ ପୁରୀ ଜିଲ୍ଲା ସ୍କୁଲ ସ୍ଥାନିତ ଥିଲା |
ଭବିଷ୍ୟତର
ଖ୍ୟାତାନାମା,
ଛାତ୍ରବତ୍ସଳ
ଇଂରାଜୀ ପ୍ରାଧ୍ୟାପକ ସର୍ବେଶ୍ୱର
ଦାଶଙ୍କ ବାପାଙ୍କର ପୁରୀ ସହରକୁ
ବଦଳି ହୁଏ ୧୯୩୫ ମସିହାରେ ।
ଟ୍ରେଜେରି ଅଫିସର ଭାବରେ । ବାଳକ
ସର୍ବେଶ୍ୱରଙ୍କର ପ୍ରାଥମିକ
ଶିକ୍ଷା ସେତେବେଳକୁ ସରିଥାଏ ।
ସେ ନିଜର ଭାଇମାନଙ୍କ ସହ ନାମ
ଲେଖାନ୍ତି ପୁରୀ ଜିଲ୍ଲା ସ୍କୁଲରେ
। ଏବର ସାମନ୍ତ ଚନ୍ଦ୍ରଶେଖର
ମହାବିଦ୍ୟାଳୟର କୋଠାରେ ସେତେବେଳେ
ଜିଲ୍ଲା ସ୍କୁଲ ଚାଲୁଥାଏ । ତାଙ୍କର
ସେତେବେଳେ ସପ୍ତମ ଶ୍ରେଣୀ । ସେବେ
ଜିଲ୍ଲା ସ୍କୁଲରେ ପ୍ରଧାନଶିକ୍ଷକ
ଥିଲେ ଶ୍ରୀ ଜଗନ୍ନାଥ ତ୍ରିପାଠୀ
। ତାଙ୍କର ଥିଓସଫିରେ ଆଗ୍ରହ ଥିଲା
। ସେ ଥିଲେ ସର୍ବେଶ୍ୱରଙ୍କ ବାପାଙ୍କର
ବନ୍ଧୁ । ବେଳେବେଳେ ଘରକୁ ଆସନ୍ତି
। ଘରେ ଆଧ୍ୟାତ୍ମ ଆଲୋଚନାର ଆସର
ବସେ ।
ସେତେବେଳେ
ସପ୍ତମ ଶ୍ରେଣୀ ପର୍ଯ୍ୟନ୍ତ ଓଡ଼ିଆ
ମାଧ୍ୟମରେ ଶିକ୍ଷାର ବ୍ୟବସ୍ଥା
ଥାଏ । ଅଷ୍ଟମ ଶ୍ରେଣୀ ପରଠାରୁ
କେବଳ ଓଡ଼ିଆ ଛଡ଼ା ବାକି ସବୁ
ବିଷୟର ପରୀକ୍ଷା ଇଂରାଜୀରେ ଦେଇ
ହୁଏ । ସ୍କୁଲରେ ଥାଏ ଦୁଇଟି ସେକ୍ସନ
। ‘ଏ’ ସେକ୍ସନ ପିଲା ଇଂରାଜୀରେ
ମାଟ୍ରିକ ପରୀକ୍ଷା ଦିଅନ୍ତି ।
ଓଡ଼ିଆରେ ପରୀକ୍ଷା ଦେବାକୁ ଇଚ୍ଛୁକ
ପିଲାଏ ‘ବି’ ସେକ୍ସନରେ ଭର୍ତ୍ତି
ହୁଅନ୍ତି । ପ୍ରାୟତଃ ଛାତ୍ର ଥିଲେ
‘ଏ’ ସେକ୍ସନରେ । ଇଂରାଜୀ ପଢ଼ାରେ
ସର୍ବେଶ୍ୱରଙ୍କର ଆବାଲ୍ୟ ବିଶେଷ
ଆଗ୍ରହ ଥିବାରୁ ସେ ନାମ ଲେଖାନ୍ତି
‘ଏ’ ସେକ୍ସନରେ । ଓଡ଼ିଶା ସେତେବେଳକୁ
ସ୍ୱତନ୍ତ୍ର ପ୍ରଦେଶ ହୋଇଯାଇ
ଥିଲେ ମଧ୍ୟ,
ମାଟ୍ରିକ
ପରୀକ୍ଷା ଆଦିର ଭାର ଥାଏ ପାଟନା
ବିଶ୍ୱବିଦ୍ୟାଳୟ ଉପରେ । କାରଣ
ସେ ପର୍ଯ୍ୟନ୍ତ ବିଶ୍ୱବିଦ୍ୟାଳୟମାନେ
ମାଟ୍ରିକ ପରୀକ୍ଷାର ଆୟୋଜନ କରୁ
ଥାଆନ୍ତି । ଆଉ ଓଡ଼ିଶାରେ ସେ
ପର୍ଯ୍ୟନ୍ତ କୌଣସି ବିଶ୍ୱବିଦ୍ୟାଳୟ
ଖୋଲି ନ ଥାଏ ।
ଜିଲ୍ଲା
ସ୍କୁଲରେ ସର୍ବେଶ୍ୱର ଛାତ୍ର
ଥିଲା ବେଳେ ଓଡ଼ିଶା ସ୍ୱତନ୍ତ୍ର
ପ୍ରଦେଶ ହୁଏ । ଏହି ପରିପ୍ରେକ୍ଷୀରେ
ରାଜ୍ୟପାଳ ଜନ ହବାକଙ୍କର ପ୍ରଥମ
ଦରବାର ଆୟୋଜିତ ହୁଏ ପୁରା ଜିଲ୍ଲା
ସ୍କୁଲ ହଲ୍ରେ । ସାଙ୍ଗମାନଙ୍କ
ସହ ସେ ଯାଇ ହଲଟିର ଏହି ଉପଲକ୍ଷେ
ଅଦ୍ଭୁତପୂର୍ବ ସାଜସଜ୍ଜା ଦେଖି
ଆସନ୍ତି । ପାଖାପାଖି ସେଇ ସମୟରେ
ନିର୍ବାଚନୀ ପ୍ରଚାର ପାଇଁ ନେହେରୁ
ପୁରୀ ଆସିଥାଆନ୍ତି । ପରିଧାନ,
ଖଦଡ଼
ପଞ୍ଜାବୀ ଉପରେ ଗୋଟିଏ ‘ଜହର
ଜ୍ୟାକେଟ’ । ତଳେ ଖଦଡ଼ ପାଇଜାମା;
ଆଣ୍ଠୁ
ପାଖରୁ ପାଦ ଯାଏଁ ଚିପା । ପାଦରେ
ଥାଏ କାବୁଲି ଚପଲ । ଦୂରରେ ଠିଆ
ହୋଇଥିବାରୁ ତାଙ୍କ ଭାଷଣ
ସର୍ବେଶ୍ୱରଙ୍କୁ ଶୁଣାଗଲା ନାହିଁ
। ହେଲେ ସାନ୍ନିଧ୍ୟର ପ୍ରଭାବ
ନିଶ୍ଚୟ ପଡ଼ିଲା । ସେହିପରି ନବମ
କି ଦଶମ ଶ୍ରେଣୀରେ ପଢ଼ିଲା ବେଳକୁ
ପୁରୀକୁ ଆସିଥିବା କଙ୍ଗ୍ରେସ
ନେତ୍ରୀ ସରୋଜିନୀ ନାଇଡ଼ୁଙ୍କର
ଭାଷଣ ଶୁଣିଲେ । ତାଙ୍କର ମାନପତ୍ରଟି
ମଧ୍ୟ ସଭାରେ ପଢ଼ିଲେ ।
୧୯୩୭
ମସିହାର ଜାନୁଆରୀ ମାସର ନିର୍ବାଚନ
ପରେ କଙ୍ଗ୍ରେସ ଓଡ଼ିଶାରେ କ୍ଷମତା
ଗ୍ରହଣ କରିବାରେ ଦୋଦୋପାଞ୍ଚ
ହେବାରୁ କିଛି ଦିନ ପାଇଁ ଗୋଟିଏ
ରୀତିମତ ରାଜନୈତିକ ନାଟକ ଚାଲିଲା
। ଏହା ବାଳକ ସର୍ବେଶ୍ୱରଙ୍କ ଉପରେ
ପ୍ରଭାବ ପକାଇଲା । ସେ ନୂଆ ସମ୍ବିଧାନ
ବିଷୟକ ଇଂରାଜୀ ବହିଠିଏ ପଢ଼ିଲେ
। ତାହା ସହ ସେ ଇଂରାଜୀ ସମ୍ବାଦପତ୍ର
ତଥା ଓଡ଼ିଆ ‘ସମାଜ’ ପୃଷ୍ଠାରୁ
ରାଜନୈତିକ ଗତିବିଧିଗୁଡ଼ିକୁ
ସଚେତନତାର ସହ ଲକ୍ଷ୍ୟ କରିବାକୁ
ଲାଗିଲେ । ୧୯୩୮ ମସିହାରେ ପୁରୀର
ଡେଲାଙ୍ଗ ପାଖର ବେରବୋଇ ଗ୍ରାମରେ
ଗାନ୍ଧୀ ସେବା ସଙ୍ଘର ବାର୍ଷିକ
ସମ୍ମିଳନୀ ଅନୁଷ୍ଠିତ ହେଲା ।
ସେଥିରେ ଯୋଗ ଦେଇ ସର୍ବେଶ୍ୱରଙ୍କର
ରାଜନୈତିକ ଚେତନା ଶାଣିତ ହେଲା
। ଏହା ଛଡ଼ା ଗାନ୍ଧୀଜିଙ୍କର
ଦର୍ଶନର ସୌଭାଗ୍ୟ ମଧ୍ୟ ମିଳିଲା
। ଗାନ୍ଧୀଙ୍କ ଆଦର୍ଶ ତଥା ସମାଜବାଦୀ
ବିଚାର ପ୍ରତି ସର୍ବେଶ୍ୱରଙ୍କର
ଶ୍ରଦ୍ଧା ବଢ଼ୁଥାଏ । ଇଆଡ଼େ
ରାମକୃଷ୍ଣ,
ବିବେକାନନ୍ଦ
ତଥା ଶିବାନନ୍ଦଙ୍କର ଆଧ୍ୟାତ୍ମିକ
ଆହ୍ନାନଗୁଡ଼ିକ ପ୍ରତି ବି ଉନ୍ମୁଖତା
ପ୍ରସ୍ଫୁଟିତ ହେଉଥାଏ ।
୧୯୩୫ର
ନୂଆ ସମ୍ବିଧାନ ଅନୁସାରେ ଶାସନ
ଆରମ୍ଭ ହେବା ପରେ ସ୍କୁଲଗୁଡ଼ିକରେ
ହିନ୍ଦୀଶିକ୍ଷାର ପ୍ରଚଳନ ଆରମ୍ଭ
ହେଲା । ହେଲେ ଏହି ବିଷୟରେ ପରୀକ୍ଷା
ଆଦି ବାଧ୍ୟତାମୂଳକ ନ ଥିଲା ।
ନିରକ୍ଷରତା ଦୂରେଇବା ପାଇଁ ଏକ
ଆନ୍ଦୋଳନ ସରକାରୀ ଭାବରେ ଆୟୋଜିତ
ହେଲା । ବିଦ୍ୟାଳୟର ଛାତ୍ରମାନଙ୍କୁ
ଏଥିରେ ନିୟୋଜିତ କରାଗଲା । ସ୍କୁଲରେ
ସେ ସମୟରେ ହେଉଥାଏ ସାପ୍ତାହିକ
ଆଲୋଚନା ସଭା । ତାହା ଛଡ଼ା ଗୋଟିଏ
ସାପ୍ତାହିକ ସାହିତ୍ୟ ସଭାର ମଧ୍ୟ
ଆୟୋଜନ ହୁଏ,
ଯେଉଁଥିରେ
ଛାତ୍ରମାନେ ନିଜର ଗଳ୍ପ,
ପ୍ରବନ୍ଧ
ତଥା କବିତା ଇତ୍ୟାଦି ପଢ଼ନ୍ତି
।
ଏହି
ସମୟରେ ପୁରୀ ଜିଲ୍ଲା ସ୍କୁଲରେ
କ୍ଷିତୀଶ ଚନ୍ଦ୍ର ଦେ ଇଂରାଜୀ ଓ
ଭୂଗୋଳ ପଢ଼ାଉଥିଲେ । ଡଡଲି
ଷ୍ଟାମ୍ପଙ୍କର ‘ଦି ୱର୍ଲ୍ଡ’
ଥିଲା ଭୂଗୋଳ ପାଠ୍ୟ ପୁସ୍ତକ ।
ଏଥିରେ କିଛି କିଛି ପ୍ରମାଦ ବି
ଥିଲା । ଯେପରିକି ଲେଖାଥିଲା ଯେ,
ଓଡ଼ିଶା,
ଓଡ଼ିଶା-ବିହାର
ପ୍ରଦେଶର ଏକ ଜିଲ୍ଲା । ହେଲେ
କ୍ଷିତୀଶ ବାବୁ ପିଲାଙ୍କୁ ଭୂଗୋଳରେ
ଆଗ୍ରହୀ କରିବା ପାଇଁ ‘ନ୍ୟାଶନାଲ
ଜିଓଗ୍ରାଫିକ’ ପତ୍ରିକା ଆଣି
ତାଙ୍କୁ କ୍ଲାସରେ ଦିଅନ୍ତି,
ଯେପରି
ଭୂଗୋଳ ପାଠରେ ଆଗ୍ରହ ଜନ୍ମିବ ।
ସେବେ ଧର୍ମ ଶିକ୍ଷା ପାଇଁ ପିରିଅଡ଼ଟିଏ
ବି ଥାଏ । ତାକୁ ନିଅନ୍ତି ସ୍ଲୁଲର
ପଣ୍ଡିତେ । ଇତିହାସ ପଢ଼ାଉ ଥାଆନ୍ତି
ପ୍ରଥମ ଓଡ଼ିଆ ଉପନ୍ୟାସକାର ଉମେଶ
ସରକାରଙ୍କର ପୁଅ ଅପୂର୍ବ ସରକାର
। ସେ ଇଂଲଣ୍ଡର ଇତିହାସ ପଢ଼ାନ୍ତି
। ଘରେ ସର୍ବେଶ୍ୱର ଏହି କ୍ଲାସ
ପାଇଁ ପଢ଼ନ୍ତି ଥମାସ ଫ୍ରେଡ଼ିରିକ
ଟାଉଟଙ୍କର ‘ବ୍ରିଟିଶ ହିଷ୍ଟ୍ରି’
। ଭାରତ ଇତିହାସ ପାଇଁ ପାଠ୍ୟପୁସ୍ତକ
ଥାଏ,
ସୁରେନ୍ଦ୍ରନାଥ
ସେନ ଏବଂ ହେମଚନ୍ଦ୍ର ରାୟଚୌଧୁରୀଙ୍କ
ଦ୍ୱାରା ରଚିତ ‘ଗ୍ରାଉଣ୍ଡୱର୍କ
ଅଫ ଇଣ୍ଡିଆନ ହିଷ୍ଟ୍ରି’ । ସେହି
ସମୟରେ କିଛି ଦିନ ପାଇଁ ବିଶିଷ୍ଟ
ଐତିହାସିକ କେଦାରନାଥ ମହାପାତ୍ର
ପୁରୀ ଜିଲ୍ଲା ସ୍କୁଲର ଶିକ୍ଷକ
ହୋଇ ଆସିଲେ ।
ସର୍ବେଶ୍ୱର
ବାବୁଙ୍କ ବାପା ପିଲାମାନଙ୍କ
ଶିକ୍ଷା ପ୍ରତି ତୀକ୍ଷ୍ଣ ଦୃଷ୍ଟି
ରଖିଥାଆନ୍ତି । ସେ ନିଜେ ସଂସ୍କୃତ
ଶିକ୍ଷାର ଦାୟିତ୍ୱ ନେଇ ଥାଆନ୍ତି
। ଶୋଇଲା ପୂର୍ବରୁ ରାତିରେ
ପିଲାମାନଙ୍କୁ ମୌଖିକ ଭାବରେ
ପାଞ୍ଚୋଟି ପାଞ୍ଚୋଟି ଲେଖାଏଁ
ଓଡ଼ିଆ ବାକ୍ୟକୁ ସଂସ୍କୃତ ଓ
ଇଂରାଜୀକୁ ଅନୁବାଦ କରିବାକୁ
ପଡ଼େ । ଘରେ ଟିଉସନ ମାଷ୍ଟର ଖଞ୍ଜା
ଥାଆନ୍ତି । ଏକାଦଶ ଶ୍ରେଣୀ ଶେଷରେ
ସେବେ ମାଟ୍ରିକ ପରୀକ୍ଷା ଅନୁଷ୍ଠିତ
ହେଉଥାଏ । ସର୍ବେଶ୍ୱର ବାବୁ ୧୯୩୯
ମସିହାର ଜୁନ ମାସ,
ଅର୍ଥାତ୍,
ଏକାଦଶ
ଶ୍ରେଣୀର ଷାଣ୍ମାସିକ ପରୀକ୍ଷା
ବେଳକୁ ପୂରା ମାଟ୍ରିକ ପରୀକ୍ଷାର
ପାଠ ପଢ଼ି ସାରି ଥାଆନ୍ତି । ଦିନକୁ
ତେର ଚଉଦ ଘଣ୍ଟା ପଢ଼ାପଢ଼ି କରି
ଟେଷ୍ଟ ପରୀକ୍ଷା ଫଳ ବେଶ୍ ଭଲ ହେଲା
। ସେ ପ୍ରଥମ ହେଲେ । ୧୯୪୦ ମସିହାର
ଫେବ୍ରୁଆରୀ ମାସରେ ପରୀକ୍ଷା ହୋଇ
ଦୁଇ ମାସ ପରେ ଅପ୍ରେଲରେ ଫଳ
ବାହାରିଲା । ସର୍ବେଶ୍ୱର ଓଡ଼ିଶାରେ
ପ୍ରଥମ ଶ୍ରେଣୀରେ ପ୍ରଥମ ହେଲେ
ଓ ମାସିକ କୋଡ଼ିଏ ଟଙ୍କିଆ ଡିଭିଜନାଲ
ବୃତ୍ତି ପାଇଁ ଯୋଗ୍ୟ ବିବେଚିତ
ହେଲେ । ତାହା ପରେ ତାଙ୍କର କଲେଜ
ପଢ଼ା ଆରମ୍ଭ ହୁଏ । ସେ ଆଉ ଏକ ଜୀବନ
।
ବି.ଦ୍ର.
- ଏହି
ଲେଖାଟି ସର୍ବେଶ୍ୱର ଦାଶଙ୍କର
ଆତ୍ମଜୀବନୀ ‘ମୋ କାହାଣୀ’ରୁ
ସଙ୍ଗୃହିତ । ଏହି ବହିଟି ୨୦୦୯
ମସିହାରେ ଭୁବନେଶ୍ୱରସ୍ଥ ସଂସ୍ଥା
‘ଶିକ୍ଷାସନ୍ଧାନ’ ଛପାଇଥିଲେ ।
No comments:
Post a Comment