ବ୍ୟଙ୍ଗ-ମୁକ୍ତ ଦିବସ

ଜ୍ୟୋତି ନନ୍ଦ

ଏଦୁଆର୍ଦୋ ଗାଲେନୋ (୧୯୪୦-୨୦୧୫)
ଫଟୋ କ୍ରେଡ଼ିଟ - ୱିକିମିଡିଆ କମନ୍ସ୍

ସେପ୍ଟେମ୍ବର ୨୨ ଗୋଟିଏ ଗୁରୁତ୍ୱପୂର୍ଣ୍ଣ ଦିବସ । ସେଇ ଦିନ ଅନ୍ତତଃ ସମସ୍ତ ପର୍ଯ୍ୟାବରଣବିତ୍ ଓ କିଛି ଦାୟିତ୍ୱହୀନ ଲୋକ ଚାହାଁନ୍ତି ଯେ, ଏହି ପୃଥିବୀରୁ ସମସ୍ତ ମହାଯାନ, ମାନେ ଚାରିଚକିଆ ଯାନ ମାନେ କାର୍ ଅପହୃତ ହୋଇ ଯାଉ ।

ଏହି କଥାଟିକୁ ବିଶିଷ୍ଟ ଐତିହାସିକ ତଥା କଥାକାର ଏଦୁଆର୍ଦୋ ଗାଲିଆନୋ ଅତ୍ୟନ୍ତ ଚମତ୍କାର ଓ ପ୍ରଭାବଶାଳୀ ଢଙ୍ଗରେ କହିଛନ୍ତି । ତାଙ୍କ ମତ ଅନୁସାରେ, କାରବିହୀନ ଗୋଟିଏ ଦିନ ? ଯଦି ଏହିଦିନଟି ସଙ୍କ୍ରାମକ ହୋଇ ଯାଏ ଆଉ ସବୁ ଦିନ ଯଦି ଏହି ଭଳି ଦିନଟିଏ ହୋଇ ଯାଏ, ତେବେ ନିମ୍ନଲିଖିତ ଘଟଣାଗୁଡ଼ିକ ଘଟି ଯିବ । ଏଥିରେ ଗାଲିଆନୋଙ୍କ ସହ ଗୋଟିଏ ଅପଦାର୍ଥ ବି ରହିଛି ।

ଏହାକୁ ଅବଧାନ କରନ୍ତୁ ।

୧) ଭଗବାନଙ୍କର କାର୍ ଲୋଡ଼ା ନ ଥାଏ, ଆଉ ସମାନଭାବରେ ସଇତାନ୍ ବି କାର୍ ଲୋଡ଼େ ନାହିଁ । ତେଣୁ ସେମାନଙ୍କର କିଛି ବି ଅସୁବିଧା ହେବ ନାହିଁ ।

୨) କାର୍ ନ ଥିଲେ ଡାକ୍ତରଖାନା ଆଉ ଶ୍ମଶାନ ମାନେ ସେମାନଙ୍କର ଅନେକ ଖରିଦଦାର୍ ହରାଇବେ ନିଶ୍ଚୟ ।

୩) ରାସ୍ତାଘାଟରେ ଅପଦାର୍ଥ ସାଇକେଲ୍ ଚାଳକ ଓ ପଥଚାରୀ ମାନଙ୍କର ଚପଲ୍ ର ଫଟଫଟ ଶବ୍ଦ ଶୁଭୁ ଥିବ । ଆଉ ସେମାନଙ୍କ ଝାଳଗନ୍ଧ ତ ଦୁଃସହ ।

୪) ଆମର ଫୁସଫୁସ୍‌ମାନେ ଆଉ ଆଗ ଭଳି ସ୍ୱାଦଯୁକ୍ତ ବିଷ ଭକ୍ଷଣରୁ ବଞ୍ଚିତ ରହିବେ । 

୫) ପାଦଗୁଡ଼ିକ ଯେଉଁମାନେ ଚାଲିବା ଭୁଲି ଯାଇ ଥିଲେ, ରାସ୍ତାରେ ଖାଲି ଝୁଣ୍ଟିବେ । ତେଣୁ, "ମୁଁ ଦୁଃଖିତ" ଶବ୍ଦର ବେଶି ପ୍ରୟୋଗ ହେଉ ଥିବ ।

୬) ନୀରବତା ସମସ୍ତଙ୍କ କାନ ବଧିରା କରି ଦେବ ।

୭) ଜାତୀୟ ରାଜପଥ ଗୁଡ଼ିକ ମରୁଭୂମି ହୋଇ ଯିବ ।

୮) ରାଜପଥ କଡ଼ରେ ଥିବା ପଂକଚର୍ ମରାମତି ଆଉ ପବନ ଭର୍ତି ବାଲା ମାନେ ସବୁ ବେଲୁନ୍ ବିକାଳି ହୋଇ ଯିବେ । ଓ "ମୁଁ ଆପଣଙ୍କୁ କେମିତି ସାହାଯ୍ୟ କରି ପାରେ" ବୋର୍ଡ ସହିତ ଯୌନଶକ୍ତି ବର୍ଦ୍ଧକ ତାବିଜ ବିକ୍ରି କରୁ ଥିବେ ।

୯) ଟେଲିଭିଜନ, ଖବରକାଗଜ ଓ ପତ୍ରିକା ମାନେ ଆଉ ସେମିତି ସୁନ୍ଦର ସୁନ୍ଦର ବିଜ୍ଞାପନ ନ ଦେଉ ଥିବାରୁ ସ୍ତ୍ରୀଲୋକଙ୍କ ପିନ୍ଧା କପଡ଼ାର ବିକ୍ରି ବଢ଼ିବ ।

୧୦) ତେଲବିକ୍ରୀ ରାଷ୍ଟ୍ରମାନେ ନାଇଜେରିଆ କି ସୋମାଲିଆ ଭଳି ଦରିଦ୍ର ହୋଇ ଯିବେ ।

୧୧) ଆମର ତେଲମନ୍ତ୍ରୀ କଥାକଥାକେ ହଳନ୍ତର ପ୍ରୟୋଗ ବନ୍ଦ କରି ନୂତନ କରି ଗଢ଼ା ଯାଇ ଥିବା ଧର୍ମଶାସ୍ତ୍ର ପ୍ରବଚନ ମନ୍ତ୍ରଣାଳୟର ଦାୟିତ୍ୱରେ ରହି ବେଦପାଠ କରିବେ ।

୧୨) ସ୍ୱାମୀ-ସ୍ତ୍ରୀଙ୍କ ସମ୍ପର୍କ ଯଥାବିଧି ଅପରିବର୍ତ୍ତିତ ରହିବ । କାରଣ ପଡ଼ୋଶୀଙ୍କ ଅମୁକ କାର୍ ଆମର ଅମୁକ ଅଛି ବୋଲି ଯେଉଁ ଦାମ୍ପତ୍ୟ କଳହଟି ଥାଏ, ତାହା ବନ୍ଦ ହୋଇ ଗଲେ ମଧ୍ୟ, କାର ଚଳାଇବାରେ ଅନଭିଜ୍ଞା ପତ୍ନୀଙ୍କର ସଚରାଚର କାର୍ ଚଳାଇବା ସମ୍ପର୍କରେ ଯେଉଁ ଉପଦେଶାବଳୀ, ତାହା ଅନ୍ୟତ୍ର ପ୍ରୟୋଗ ହେବ । ତେଣୁ ନବବିବାହିତ ପତିମାନେ ସତର୍କତା ଅବଲମ୍ବନ କରିବା ବାଞ୍ଛନୀୟ ।

୧୩) ଆମ ରାଜନେତାମାନେ ସାଇକଲ୍ କି ଘୋଡ଼ା ଆଦି ଭଳିକି ଭଳି କଳ୍ପନାର ସଦୁପଯୋଗ କରି ଯେଉଁ ସଚିବାଳୟକୁ ଯାଉ ଥିଲେ, ତାହା ଆଉ ଦେଖିବାକୁ ମିଳିବ ନାହିଁ । ଆଉ ସବୁଠୁ ବଡ଼ କଥା, ଅଳ୍ପ କେତେ ଫୁଟ୍ ଉପରୁ ବ୍ୟୋମଜାନରେ ମରାଳମାଳନୀ ଚିଲିକାକୁ ଦେଖାଇ ନିଜର ବନ୍ଧୁବତ୍ସଳତା ପ୍ରମାଣିତ କରିବାର ସୁଯୋଗ ମିଳିବ ନାହିଁ କାହାକୁ । ଆଉ କୌଣସି ବ୍ୟଙ୍ଗ ହେବ ନାହିଁ ।

ଆହା !

ବ୍ୟଙ୍ଗ ନାହିଁ ମାନେ, ଈଶ୍ୱର କି ସଇତାନ ରହି ପାରିବେ ପୃଥିବୀରେ ?