ଗୋଟିଏ ମୃତ ଖଟିର ଚିତ୍ରାବଳୀ
ଲେଖା - ଶୈଲେନ ରାଉତରାୟ । ଫଟୋ - ଜ୍ୟୋତିଶଙ୍କର ସିଂହ
 |
| ଫଟୋ କ୍ରେଡିଟ୍ - ଜ୍ୟୋତିଶଙ୍କର ସିଂହ |
ଓଡିଶାର ଜନଜୀବନ ବିଭବଶାଳୀ । ମାତ୍ର ଦୀର୍ଘ ଦିନର ରାଜନୈତିର ଓ ସାଂସ୍କୃତିକ ପରାଧିନତା ଯୋଗୁଁ ଆମେ ଆମର ସାମାଜିକତାର ଅନେକ ତାତ୍ପର୍ଯ୍ୟପୂର୍ଣ ବିଭାବଗୁଡ଼ିକର ଅଣଦେଖା କରୁ । ଆତ୍ମସଚେତନତା ଅଭାବରୁ ସେ ଗୁଡ଼ିକ ଆମର ଆଧୁନିକ ଜୀବନଚର୍ଯ୍ୟା ଓ ରାଷ୍ଟ୍ରୀୟ ଜୀବନର ଅଂଶ ବନିପାରନ୍ତି ନାହିଁ । ଏ ପରି ବିଭାବଗୁଡ଼ିକ ମଧ୍ୟରୁ, ଆମ ନାଗରିକ ଜୀବନର, ଏକ ଗୁରୁତ୍ତ୍ୱପୂର୍ଣ ଅଙ୍ଗ ହେଲା ଖଟି । ଏବେ ରାସ୍ତା ଚଉଡ଼ା ଆଳରେ ଭୁବନେଶ୍ୱର ମ୍ୟୁନିସିପାଲିଟି କର୍ପୋରେସନ୍ ଖଟିଗୁଡ଼ିକ ବିରୁଦ୍ଧରେ ଏକ ଅଘୋଷିତ ଯୁଦ୍ଧ ଚଲାଇଛି । ଏଇ ଯୁଦ୍ଧର ସଦ୍ୟତମ କାଜୁଆଲିଟି ହେଲା ଚନ୍ଦ୍ରଶେଖରପୁର ଅଞ୍ଚଳର ସର୍ଭେ ଅଫ୍ ଇଣ୍ଡିଆ ଖଟି ।
 |
| ଫଟୋ କ୍ରେଡିଟ୍ - ଜ୍ୟୋତିଶଙ୍କର ସିଂହ |
ସର୍ଭେ ଅଫ୍ ଇଣ୍ଡିଆ ଖଟିଟି ମରିସାରିଛି । ତା'କୁ ସରକାର୍ ସର୍ଭେ ଅଫ୍ ଇଣ୍ଡିଆ ଅଫିସିର କଡ଼ ରାସ୍ତାକୁ ବିମାନ ଓହ୍ଲାଇବା ପାଇଁ ଦରକାର ରନ୍ୱେ ଭଳି ଚଉଡ଼ା କରିବା ପାଇଁ ମାରିଦେଲା । ଚଉଡ଼ା ରାସ୍ତା ମହାପାତ୍ର ବାବୁଙ୍କ ଚାହା ଦୋକାନକୁ ଖାଇଲା, ଶନି ମହାରାଜଙ୍କର ମନ୍ଦିରକୁ ହଜମ କରିଦେଲା, ଖରା ବରଷାରେ ଖଟିର ଲୋକଙ୍କୁ ଓ ରାସ୍ତାରେ ଯା' ଆସ୍ କରୁଥିବା ଲୋକଙ୍କୁ ଛାଇ ଦେଉଥିବା ଓ ପରସ୍ପରକୁ ବିଭାହୋଇସାରିଥିବା ବର ଓ ଓସ୍ତ ଗଛକୁ ମଧ୍ୟ ଚାଟି ସଫା କରି ଦେଲା ।
 |
| ଫଟୋ କ୍ରେଡିଟ୍ - ଜ୍ୟୋତିଶଙ୍କର ସିଂହ |
ଖଟିଟିକୁ ଅନେକ ପ୍ରକାରର ଲୋକ ଆସୁଥିଲେ । ଅଫିସରମାନଙ୍କୁ ଅପେକ୍ଷା କରୁଥିବା ଡ୍ରାଇଭର୍, ଆକ୍ଟିଭିଷ୍ଟ୍ଙ୍କୁ ଅପେକ୍ଷା କରୁଥିବା ଓଡ଼ିଆ କବି, କବିଙ୍କୁ ଅପେକ୍ଷା କରୁଥିବା ସାହିତ୍ୟର ଛାତ୍ର, ଓ ସାହିତ୍ୟର ଛାତ୍ରଙ୍କୁ ଅନନ୍ତ କାଳରୁ ଅପେକ୍ଷା କରିଥିବା କାର୍ଯ୍ୟରହିତ ବେକାର ସମାଜବିଜ୍ଞାନୀ - ସମସ୍ତେ, ସବୁ ପ୍ରକାରର ଲୋକ ଆସୁଥିଲେ । ମହାପାତ୍ରବାବୁଙ୍କ ଚାହା ଦୋକାନରେ ମିଳୁଥିଲା ସହରର ସବୁଠାରୁ ଭଲ ରାସ୍ତାକଡ଼ିଆ ବ୍ଲାକ୍ କଫି - ମାତ୍ର ପାଞ୍ଚ ଟଙ୍କା ଦାମ୍ରେ । ଏବେ ସବୁ ଗପସପ, ସବୁ କୋଳାହଳ, ସବୁ କାହାଣୀ, ରାସ୍ତାର ପେଟରେ । ଖାଲି ବାକି ଅଛି ରାସ୍ତା, ତାହାର ପେଟ ଓ ପେଟର ଅସରନ୍ତି ଭୋକ ।
 |
| ଫଟୋ କ୍ରେଡିଟ୍ - ଜ୍ୟୋତିଶଙ୍କର ସିିଂହ |
No comments:
Post a Comment