'ରୋର୍ ଅଫ୍ ଦି ଗାଞ୍ଜେସ୍' : ଏକ ସମୀକ୍ଷା
ପରୀକ୍ଷ ଲୋକାନ୍ କର୍ମଚିତାନ୍ ବ୍ରାହ୍ମଣୋ
ନିର୍ବେଦଂ ଆୟାନ୍ ନାସ୍ତ୍ୟକୃତଃ କୃତେନ ।
ମାଣ୍ଡୁକ୍ୟ ଉପନିଷଦ୍ ୨.୧୨
ଲେଖକ - ମାର୍କ୍ ବରିଆନ୍ (ସ୍ୱାମୀ ତଦାତ୍ମାନନ୍ଦ ସରସ୍ୱତୀ)
ପ୍ରକାଶକ - ଇଶ୍ୱର୍ (ବିଜ୍ନେସ୍ ପବ୍ଲିକେଶନ୍ସ୍ ଇଙ୍କ୍), ମୁମ୍ବାଇ
ଏହି ବହିଟିକୁ ପଢିବାର ମୋତେ ସୁଯୋଗ ଦେଇଥିବାରୁ ମୁଁ ପ୍ରଥମେ ମୋର ଡି.ଏମ୍. ସ୍କୁଲର ଶିକ୍ଷାଗୁରୁ ସଞିତା ମ୍ୟାଡମଙ୍କୁ ଧନ୍ୟବାଦ ଦେବାକୁ ଚାହିଁବି । ଏ ବହିଟି ପୂଜ୍ୟ ଗୁରୁଜୀ ସ୍ୱାମୀ ଦୟାନନ୍ଦ ସରସ୍ୱତୀଙ୍କର ଶିଷ୍ୟ ସ୍ୱାମୀ ତଦାତ୍ମାନନ୍ଦ ସରସ୍ୱତୀଙ୍କର ଏକ ଆଧ୍ୟାତ୍ମିକ ଆତ୍ମଜୀବନୀ । ସ୍ୱାମୀ ତଦାତ୍ମାନନ୍ଦଙ୍କର ପୂର୍ବାଶ୍ରମର ନାମ ମାର୍କ ବରିଆନ୍ । ବହିଟି ସେହି ନାମରେ ଛପାଯାଇଅଛି ।
ଆଧୁନିକ କାଳରେ ଭାରତ ବାହାରେ ଧିରେ ଧିରେ ଭାରତୀୟ ଆଧ୍ୟାତ୍ମିକ ପରମ୍ପରାମାନଙ୍କର ପ୍ରଚାର ଓ ପ୍ରସାର ଘଟିଛି । ମାତ୍ର ପ୍ରାୟତଃ ପ୍ରଚାର ଘଟିଛି ପରମ୍ପରାଗୁଡିକର ନବ୍ୟରୂପଗୁଡିକର । ଇସ୍କନକୁ ଆମେ ବୈଷ୍ନବ ପରମ୍ପରାର ନବ୍ୟ ରୂପ ବୋଲି ଧରିପାରିବା । ଏହି ଅନୁଷ୍ଠାନର ସନ୍ୟାସୀ ରାଧାନାଥ ସ୍ୱାମୀଙ୍କର ଜୀବନୀ ଦ ଜର୍ଣି ହୋମ୍ (ଓଡିଆରେ ତୁଳସୀ ବୁକସ୍ ଦ୍ୱାରା ଘର ବାହୁଡା ଶୀର୍ଷକରେ ପ୍ରକାଶିତ) ରେ ଆମେ ଏପରି ପରମ୍ପରାର ଏକ ହୃଦୟଗ୍ରାହୀ ଚିତ୍ରଣ ଦେଖିବାକୁ ପାଉ ।
ସେହିପରି ଆମେ ବର୍ତ୍ତମାନ ବେଦାନ୍ତର ନବ୍ୟ ରୂପର (ଯାହା ନବ୍ୟବେଦାନ୍ତ ଭାବରେ କଥିତ) ପ୍ରସାର ପାଶ୍ଚାତ୍ୟ ଦେଶ ମାନଙ୍କରେ, ଓ କେତେକାଂଶରେ ଭାରତରେ ମଧ୍ୟ, ଦେଖିବାକୁ ପାଉଛୁ । ନବ୍ୟବେଦାନ୍ତବାଦୀମାନେ ମୋକ୍ଷ ପ୍ରାପ୍ତି ପାଇଁ ଆଧ୍ୟାତ୍ମିକ ଅନୁଭୂତି ଉପରେ ବେଶି ଗୁରୁତ୍ତ୍ୱ ଦିଅନ୍ତି । ମାତ୍ର ଶାସ୍ତ୍ର ମତରେ ଓ ତର୍କ ସଙ୍ଗତି ଅନୁସାରେ, ଆତ୍ମଜ୍ଞାନ ତଥାକଥିତ ଆଧ୍ୟାତ୍ମିକ ଅନୁଭୂତିର ବିଷୟ ନୁହେଁ । ଏହାର ପ୍ରାପ୍ତି ବେଦଜ୍ଞ, ଶାସ୍ତ୍ରଜ୍ଞ, ବ୍ରହ୍ମନିଷ୍ଠ ଗୁରୁଙ୍କଠାରୁ ଶାସ୍ତ୍ର ଶ୍ରବଣ ବିନା ଲାଭ କରାଯାଇ ନ ପାରେ । ବେଦାନ୍ତ ଏହି ଜ୍ଞାନ ପ୍ରାପ୍ତିର ଏକ ମାର୍ଗ ଓ ପ୍ରମାଣର ବିଷୟ । ତଥାକଥିତ ଅନଭୂତି ବା ତତ୍ତ୍ୱର ବିଷୟ ନୁହେଁ ।
 |
| ଶ୍ରୀ ଶଙ୍କରାଚାର୍ଯ୍ୟ |
ମାତ୍ର ନବ୍ୟବେଦାନ୍ତୀମାନଙ୍କର ଶାସ୍ତ୍ରନିଷ୍ଠା ନାହିଁ । ହେଲେ ପାଶ୍ଚାତ୍ୟ ଦେଶମାନଙ୍କରେ ଏହି ମାର୍ଗର ହିଁ ବେଶି ପ୍ରସାର ଘଟିଛି । ଏହି ପରିପ୍ରେକ୍ଷୀରେ ଜଣେ ପାରମ୍ପରିକ ବେଦାନ୍ତୀ ସନ୍ୟାସୀ ଭାବରେ ସ୍ୱାମୀ ତଦାତ୍ମାନନ୍ଦ ସରସ୍ୱତୀଙ୍କର ଜୀବନର ଓ ଜୀବନୀର ଏକ ବିଶେଷ ତାତ୍ପର୍ଯ୍ୟ ରହିଛି ।
ସ୍ୱାମୀଜୀଙ୍କର ଜନ୍ମ ଯୁକ୍ତରାଜ୍ୟ ଆମେରିକାର ୱିସ୍କନସିନ୍ ରାଜ୍ୟର ମିଲାଅକି ସହରରେ । ଏକ ଭକ୍ତ କାଥଲିକ୍ ପରିବାରରେ । ପିଲାବେଳେ ମାର୍କଙ୍କର ଇଶ୍ୱରଭକ୍ତିରେ ଅନେକ ଦାର୍ଢ୍ୟତା ଥିଲା । ମାତ୍ର ସେ ସମୟର ଆନୁଷ୍ଠାନିକ ଧର୍ମାଚାରର ଅନ୍ଧ ଅନୁଶାସନ ଓ ସ୍ଥୁଳ ବିଶ୍ୱାସଭିତ୍ତିକ ଶିକ୍ଷା ଯୋଗୁଁ ସେ ନିଜର ଭକ୍ତି ଓ ବିଶ୍ୱାସ ହରାଇଲେ । ପରେ ଶିକ୍ଷାଲାଭ ପରେ ସେ ଜଣେ କମ୍ପ୍ୟୁଟର୍ ଇଂଜିନିଅର୍ ଭାବରେ ଆମେରିକାର କାଲିଫର୍ନିଆ ରାଜ୍ୟରେ ଅନେକ ବର୍ଷ ସଫଳତାର ସହିତ କାମ କଲେ । ଏହା ଭିତରେ ତାଙ୍କର ବିବାହ ଓ ବିବାହ ବିଚ୍ଛେଦ ଘଟିଲା । ଭବସାଗରର ଘୂର୍ଣନରେ ଅତିଷ୍ଠ ହୋଇ ସେ ଆଧ୍ୟାତ୍ମିକ ମାର୍ଗରେ ଅଗ୍ରସର ହେଲେ ଓ ସ୍ୱାମୀ ଦୟାନନ୍ଦ ସରସ୍ୱତୀଙ୍କୁ ଗୁରୁ ଭାବରେ ଲାଭ କଲେ । ଆମେରିକାରେ ନିଜ ଗୁରୁଙ୍କର ଏକ ଆଶ୍ରମ ଅନେକ ବର୍ଷ ପରିଚାଳନା କଲାପରେ ସେ ପରିଶେଷରେ ଗଂଗାତଟରେ ସନ୍ୟାସ ଗ୍ରହଣ କଲେ । ଏବେ ସେ ଆମେରିକାର ନିଉ ଜର୍ସିସ୍ଥ ଆର୍ଶ ବୋଧ କେନ୍ଦ୍ରଠାରେ ଅବସ୍ଥାପିତ ।
ବହିଟିର ପ୍ରତ୍ୟେକ ପୃଷ୍ଠା ଜଣେ ସାଧକର ସଚ୍ଚୋଟ ଜମାନବନ୍ଦୀ । ଗୋଟିଏ ଆଧ୍ୟାତ୍ମିକ ପରମ୍ପରାରେ ବଢି, ଆଉ ଗୋଟିଏ ପରମ୍ପରାକୁ ଆଦରେଇନେଇ, ସ୍ୱାମୀଜୀ ବେଦାନ୍ତରେ ନିଜର ପରାକାଷ୍ଠା ପ୍ରତିପାଦିତ କରିଛନ୍ତି । ବହିଟି ଅତୀତ ଓ ବର୍ତ୍ତମାନର କାଳ ପ୍ରବାହ ମଧ୍ୟରେ ସ୍ୱଚ୍ଛନ୍ଦ ଭାବରେ ଗତି କରି ଅତୀତର ମାର୍କ ବରିଆନ୍ ଓ ବର୍ତ୍ତମାନର ସ୍ୱାମୀ ତଦାତ୍ମାନନ୍ଦଙ୍କର ମଧ୍ୟରେ ଥିବା ଶୂନ୍ୟକୁ ଆଲୋକିତ କରେ । ଏହି ବହିଟି ଓଡିଆକୁ ଅନୁଦିତ ହେଲେ ଭାଷାରେ ଥିବା ଆଧ୍ୟାତ୍ମିକ ଆତ୍ମଜୀବନୀର ଅଭାବ ଅନେକାଂଶରେ ଦୂର ହୋଇପାରିବ ।
 |
| ସ୍ୱାମୀ ତଦାତ୍ମାନନ୍ଦ ସରସ୍ୱତୀ |
ନ ତତ୍ର ସୂର୍ଯୋ ଭାତି ନ ଚନ୍ଦ୍ରତାରକଂ
ନେମା ବିଦ୍ୟୁତୋ ଭାନ୍ତି କୁତଃ ଅୟଂ ଅଗ୍ନିଃ ।
ତଂ ଏବ ଭାନ୍ତଂ ଅନୁଭାତି ସର୍ବଂ
ତସ୍ୟ ଭାସା ସର୍ବଂ ଇଦଂ ବିଭାତି ।।
କଠ ଉପନିଷଦ ୨.୨.୧୫
No comments:
Post a Comment