ପାଶୋରା ବହି, ବିସ୍ମୃତ ଇତିହାସ 

ଅନ୍ଧ  ଯୁଗର କାହାଣୀ  ବହିଟି ୧୯୭୫ ମସିହାରେ ଜାରି ହୋଇଥିବା ଜରୁରିକାଳୀନ ପରିସ୍ଥିତି ଉପରେ ଲିଖିତ ୧୬ଟି ଗପର ଏକ ସଙ୍କଳନ । ସମ୍ପାଦକ ହେଲେ ହୃଷିକେଶ ମଲ୍ଲିକ ଓ ଶତୃଘ୍ନ ପାଣ୍ଡବ । ବହିର ଦ୍ୱିତୀୟ ସଂସ୍କରଣ ଛପା ଯାଇଥିଲା ୧୯୯୩ ମସିହାରେ । ଏହି ସଂସ୍କରଣଟି ମୋ' ପାଖରେ ଅଛି । ପ୍ରଥମ ସଂସ୍କରଣଟିର ପ୍ରକାଶନର ବର୍ଷର ବହିରେ ଉଲ୍ଲେଖ ନାହିିଁ । ଏଥିରେ ବିଚିତ୍ର ବୋଲି କିଛି ନାହିଁ । ବଡ଼ ବଡ଼ ପ୍ରକାଶକ ମାନେ ଏହା କରନ୍ତି । ତେଣୁ ସମାବେଶର ପ୍ରକାଶକ ଜଗଦୀଶ ବାବୁ ଏପରି କାହିଁକି କଲେ ବୋଲି ଆମେ ତାଙ୍କୁ ହଲାପଟା କରିବାର କିଛି କାରଣ ନାହିଁ । ମୁଖବନ୍ଧ ଲେଖିଥିବା ଗାଳ୍ପିକ ଅଖିଳ ମୋହନ ପଟ୍ଟନାୟକଙ୍କର ହସ୍ତାକ୍ଷରରେ ବି ତାରିଖ ନାହିଁ । ତେଣୁ ପ୍ରକାଶନର ତାରିଖ ବାରିବାର ଉପାୟ କିଛି ନାହିଁ ।

ଇତିହାସ ପ୍ରତି ଏପରି ମନୋଭାବ ନିରୁତା ଓଡ଼ିଆ । ଯେପରି ଦେଖନ୍ତୁ  ୧୯୭୫ର ଜରୁରିକାଳୀନ ପରିସ୍ଥିତିକୁ ନେଇ ଆମର ବର୍ତ୍ତମାନର ଗତିବିଧିଗୁଡ଼ିକ । ଜରୁରିକାଳୀନ ପରିସ୍ଥିତି ଘୋଷଣା ହେବାର ୨୦୧୫ ମସିହାରେ ୪୦ ବର୍ଷ ପୂର୍ତ୍ତି ହେଲା । ଅନେକ ସମୀକ୍ଷକମାନଙ୍କର କହିବାର ହେଲା, ଆମେ ଏବେ ଏକ ଅଘୋଷିତ ଜରୁରି କାଳୀନ ପରିସ୍ଥିତି ମଧ୍ୟରେ ଜୀବନଯାପନ କରୁଛେ । ହେଲେ ଓଡ଼ିଶାରେ ଏ ସବୁ ବିଷୟରେ କିଛି ସୋରଶବଦ ନାହିଁ । ଖବର କାଗଜମାନଙ୍କରେ ଏ ସମ୍ବନ୍ଧରେ ରିପୋର୍ଟ୍ ପ୍ରକାଶିତ ହେଉ ନାହିଁ, କି ବିଶ୍ୱବିଦ୍ୟାଳୟମାନଙ୍କରେ ଏ ବିଷୟରେ ସମ୍ପାନ ବା ଆଲୋଚନାଚକ୍ର ଆୟୋଜିତ ହେଉନାହିଁ । ଏପରି ପରିସ୍ଥିତିରେ ଖାଲି ନିଜକୁ ନିଜର ଅର୍ଧଜାଗ୍ରତ ଅବସ୍ଥା ବିଷୟରେ ଚେତେଇ ଦେବା ପାଇଁ, କିଛି ଦିନ ପରେ ଅନ୍ଧ  ଯୁଗର କାହାଣୀ  ବହିଟିର ଏହି ବ୍ଲଗରେ ଏକ ସମୀକ୍ଷା ପ୍ରକାଶିତ କରିବାର ଚେଷ୍ଟା କରିବୁ, ଯଦି କେହି ସହୃଦୟ ସମୀକ୍ଷକ ମିଳିଲେ ତା'ହେଲେ । ବର୍ତ୍ତମାନ ପାଇଁ ଏଠାରେ ଖାଲି ପୁସ୍ତକଟିର ମଲାଟଟି ଦିଆଗଲା ।