ଚର୍ଯ୍ୟାଗୀତିକା: ଆଦ୍ୟସ୍ୱର ୧୪ - କାହ୍ନୁ

ଅନୁସୃଜନ - ଜ୍ୟୋତି ନନ୍ଦ

ଫଟୋ କ୍ରେଡ଼ିଟ୍ - ୱିକିମିଡିଆ କମନ୍ସ୍

ତ୍ରିଶରଣ ବୋଲି ନାବ ତିଆରିଲି ତହିଁ ଆଠଗୋଟି ଘର,

ଭସାଇଣ ଦେଖେ କରୁଣା ଶୂନ୍ୟତା ଦେହ ତ ଜୁର ନିଜର ।

ସ୍ୱପ୍ନ ଆଉ ମାୟା ଜାଣି ଏ ଜୀବନ ଭବନଦୀ ସନ୍ତରିଲି,

ନଈ ମଝିଟାରେ କାହିଁ ବଡ଼ ଢେଉ ମଗନ କରିଲା ଖାଲି ।

ଦେହ ନଉକାରେ ପଞ୍ଚ ତଥାଗତ ଛିଡ଼ା ହୋଇଲେଣି ଆସି,

ଏଥର କାହ୍ନୁପା ନିଶ୍ଚେ ଛିଣ୍ଡାଇବ ମାୟା ମୋହ ବନ୍ଧା ରସି ।

ଗନ୍ଧ ରସ ଆଉ ପରଶଟି ଥାଉ ନିଦ୍ରାହୀନ ସ୍ୱପ୍ନ ପରି,

ଚିତ୍ତ-କର୍ଣ୍ଣଧାର ମାଗେ ଶୂନ୍ୟତା କାହ୍ନୁ ସଙ୍ଗମେ ଯାଏ ଚଳି ।