ସାଲବେଗ ଭଜନ - ଆହେ ନୀଳଗିରି 

ଗାୟକ - ଶ୍ରୀମତି ସୁଧା ମିଶ୍ର

ଭଜନର ୟୁଟ୍ୟୁବ୍ ଲିଙ୍କ୍ - https://www.youtube.com/watch?v=tYyQkofm_5A

ଆହେ ନୀଳଗିରି !

ତୁମ୍ଭ ଶ୍ରୀଭୁଜେ ଦୟଣା କେରି କେରି ।।

ତୁଳସୀ ଚଉଁରା ପାଶେ ଜଗି 

ବସି ଗାଉଛନ୍ତି କେତେ ଯୋଗୀ ।

ବ୍ୟାଘ୍ର ଚର୍ମ ପାତି ସ୍ତୁତି କରୁଛନ୍ତି 

ଜପୁଛନ୍ତି ନାମ ସଂଖ୍ୟା କରି ।। ୧।

ବଡ଼ ଦାଣ୍ଡ ଦେଖି ହେଲି ତୋଷ

ରେଣୁ ମାତ୍ର ତେଣୁ କଲି ଗ୍ରାସ ।

କ୍ଷୀରି ଖେଚେଡ଼ିରେ ମନ ନ ବୋଧଇ 

ଟଙ୍କ ତୋରାଣିରେ ମନ ତୋଷ ।୨।

ସିଂହଦ୍ୱାରେ ବାଜେ ବେତବାଡ଼ି 

ବାଜନ୍ତେ ପାତକ ଯାଏ ଛାଡ଼ି ।

ଶ୍ରୀଜଗନ୍ନାଥଙ୍କ ଦର୍ଶନ ନିମିତ୍ତେ

ଏକକୁ ଆରେକ ହୁଡ଼ାହୁଡ଼ି । ୩।

ବାଇଶି ପାବଚ୍ଛେ ଗଲି ସୁଖେ 

କୈବଲ୍ୟ ପସରା ବେନି ପାଖେ ।

ଚଣ୍ଡାଳୁଁ ବ୍ରାହ୍ମଣ ଶୂଦ୍ର ପରିଯନ୍ତେ  

କୈବଲ୍ୟ ଭୁଞ୍ଜନ୍ତି ମୁଖେ ମୁଖେ ।୪।

ରୋହିଣୀ ପାଦୁକା କୁଣ୍ଡରଜ 

ସିଂହ ମାଡ଼ି ବସିଅଛି ଗଜ ।

ସତେ କି ଏ ନେତ୍ର ସୁଫଳ ହୋଇବ 

କାକ ପଡ଼ି ହେଲା ଚତୁର୍ଭୁଜ । ୫।

ଗରୁଡ଼ ପଛରେ ରହି ଦେଖ 

କି ଶୋଭା ପାଉଛି ପଦ୍ମମୁଖ ।

ହୀରା ନୀଳା ମୋତି ମାଣିକ୍ୟ ଜଳୁଛି 

ହୃଦେ ଲମ୍ବିଅଛି ବ୍ୟାଘ୍ରନଖ । ୬।