ଜଗନ୍ନାଥ ଭଜନ - କଳାକୃଷ୍ଣ କମଳ ଆଖି 

କବି - ଭରତ ଦାସ 

ଭଜନର ୟୁଟ୍ୟୁବ୍ ଲିଙ୍କ୍ - https://www.youtube.com/watch?v=AdSeBcVHPiM

ଫଟୋ କ୍ରେଡ଼ିଟ୍ - ୱିକିମିଡ଼ିଆ କମନସ୍ 

କଳାକୃଷ୍ଣ କମଳ ଆଖି 

ଡାକିଲେ ନ ଶୁଣ କାହିଁ ପାଇଁକି ।

ଶ୍ରୀ ନୀଳକନ୍ଦରେ ବିଜେ କରିଅଛ

ମିଛେ ଭଣ୍ଡିବାକୁ ଲୋଡ଼ୁଅଛକି ।

ଅହଲ୍ୟା ତାରଣ ଭୟ ନିବାରଣ 

ବାଳିକି ମାରି ରଖିଲ ସୁଗ୍ରୀକି ।୧।

ମହା ବଳବନ୍ତ ବିଶ୍ରବାର ସୁତ

ଛେଦି ପକାଇଲ ଦଶଶିର କି ।

ଲକ୍ଷେ ଯୋଜନରେ ଗଜ ଡାକ ଦେଲା 

ତା ଡାକ ଶୁଣିଲ ପଶାଖେଳିକି ।୨।

କୁରୁ ସଭାତଳେ ଦ୍ରୌପଦୀ ଚିନ୍ତିଲା 

ତାକୁ କୋଟି ବସ୍ତ୍ର ଦେଇଥିଲ କି ।

ଭାରତ ଯୁଦ୍ଧରେ ଘଣ୍ଟ ଘୋଡ଼ାଇଣ

ରଖିଥିଲ ଭରତିଆ ପକ୍ଷୀ କି ।୩।

ସେ ଯୁଦ୍ଧରେ ଥରେ ଅର୍ଜୁନ ରଥରେ 

ଆପଣ ସାରଥି ହୋଇଥିଲ କି ।

ଭଣଇ ଭରତ ଆହେ ଜଗନ୍ନାଥ 

ମୋ ମନ ରହିବ ନୀଳାଚଳେ କି ।୪।  

ଜଗନ୍ନାଥ ଭଜନ - ଆହେ ରାମ ହରି 

କବି - ସାଲବେଗ 

ଗାୟକ - ଅକ୍ଷୟ ମହାନ୍ତି 

ଭଜନର ୟୁଟ୍ୟୁବ୍ ଲିଙ୍କ୍ - https://www.youtube.com/watch?v=ChrXeGcukm

ଫଟୋ କ୍ରେଡ଼ିଟ୍ - ୱିକିମିଡ଼ିଆ କମନସ୍ 

ଆହେ ରାମହରି !

ପ୍ରଭୁ ବିଜେ କରିଅଛ ନୀଳଗିରି ।

ପ୍ରଭୁ ଦର୍ଶନ ମାତ୍ରକେ ଯିବି ତରି ।।

ପ୍ରବେଶ ହୋଇଲି ବଡ଼ଦାଣ୍ଡ । ଚରଣ ଧୂଳିଲେ ପୂରିଲା ତୁଣ୍ଡ ।।

ଦାଣ୍ଡରେ ବସିଛି କୈବଲ୍ୟ ପସରା ଟଙ୍କ ତୋରାଣିରେ ମନ ତୋଷ ।୧।

ଧନ୍ୟ ପୁରସ୍ତମ କ୍ଷେତ୍ରବାସୀ । ଭାଗ୍ୟ ଥିଲେ ସାଧୁ ସଙ୍ଗେ ମିଶି ।।

ଗ୍ରାସ ପୂରାଇଣ କୈବଲ୍ୟ ପାଆନ୍ତି ମିଛେ ବୋଲୁଥାନ୍ତି ଏକାଦଶୀ ।୨।

ସିଂହଦ୍ୱାରଠାରେ ବେତବାଡ଼ି । ବାଜିଲେ ପାତକ ଯାଏ ଛାଡ଼ି ।।

ଶ୍ରୀଜଗନ୍ନାଥଙ୍କ ଦର୍ଶନ ନିମନ୍ତେ ସାଧୁଜନମାନେ ଠେଲାଠେଲି ।୩।

ବାଇଶି ପାବଚ୍ଛ ଗଲି ସୁଖେ । କୈବଲ୍ୟ ବସିଛି ବେନି ପାଖେ ।।

ବ୍ରାହ୍ମଣ କ୍ଷତ୍ରୀୟ ଶୁଦ୍ର ଚାରିବର୍ଣ୍ଣ କୈବଲ୍ୟ ଦିଅନ୍ତି ମୁଖେ ମୁଖେ ।୪।

ରୋହିଣୀ କୁଣ୍ଡର ପାଦରଜ । ସିଂହ ମାଡ଼ି ବସିଅଛି ଗଜ ।। 

ସତେ କି ଜୀବନ ସଫଳ ହୋଇବ କାକ ପଡ଼ି ହେଲା ଚତୁର୍ଭୁଜ ।୫।

ଗରୁଡ଼ ପାଖରେ ରହି ଦେଖ । କି ଶୋଭା ପାଉଛି ପଦ୍ମମୁଖ ।।

ହୀରା ନୀଳା ମୋତି ମାଣିକ୍ୟ ଜଳୁଛି  ହୃଦେ ଲମ୍ବିଅଛି ବ୍ୟାଘ୍ରନଖ ।୬।

ସଳଖ ସୁନ୍ଦର ବଡ଼ଦାଣ୍ଡ । ନବକୋଟି ଲୋକ ତହିଁ ରୁଣ୍ଡ ।।

ଦର୍ଶନ ମାତ୍ରକେ ପାପକ୍ଷୟ ଯିବ ପାପାଧି ପାତକ ହୋଇ ଖଣ୍ଡ ।୭।

ସିଂହଦ୍ୱାର ଆଗେ ତିନିରଥ ।ପାଟପତନୀରେ ମଣ୍ଡେ ନେତ ।।

ଆଗେ ବଳଭଦ୍ର ମଝିରେ ସୁଭଦ୍ରା ପଛେ ବିଜେ କଲେ ଜଗନ୍ନାଥ ।୮।

କହେ ସାଲବେଗ ମୂଢ଼ମତି । ତ୍ରାହି କରିବେ ଶ୍ରୀ ଲକ୍ଷ୍ମୀପତି ।।

ଶ୍ରୀରଙ୍ଗା ଚରଣେ ପଶୁଛି ଶରଣ ତ୍ରାହି କର ଶାଳଗ୍ରାମ ମୂର୍ତ୍ତି ।୯।

ଜଗନ୍ନାଥ ଭଜନ - ମୋତେ ସେହି ରୂପ ଦେଖାଅ ହରି 

କବି - କବି ଦ୍ୱିଜ 

ଗାୟକ - ସୁବାସ ଦାଶ

ଭଜନର ୟୁଟ୍ୟୁବ୍ ଲିଙ୍କ୍ - https://www.youtube.com/watch?v=BjSDTUkrh8U

ଫଟୋ କ୍ରେଡ଼ିଟ୍ - ୱିକିମିଡ଼ିଆ କମନସ୍ 

ମୋତେ ସେହି ରୂପ ଦେଖାଅ ହରି ।

ଜୟ ଶ୍ରୀ ରାଧେ ରାଧେ ଡାକେ ବାଂଶରୀ ।।

ଯେଉଁ ରୂପେ ବଳିଦ୍ୱାରେ ହୋଇଥିଲଟି ଭିକାରୀ ।

ତିନି ପାଦ ଦାନ ଦେଇ ବଳିକି ପାତାଳେ ଥୋଇ 

ଯଶ ଜଗତେ ଅଛ ବିସ୍ତାରି ।୧।

ଗୋପପୁରେ ନନ୍ଦ ଘରେ ରଖିଥିଲ ବାଛୁରୀ ।

ଯାମଳା ଅର୍ଜୁନ ଭାଙ୍ଗି ଶକଟା ଦର୍ପକୁ ଗଞ୍ଜି 

କୁବେରର କୁମାରଙ୍କୁ ତାରି ।୨। 

କୁରୁପତି ସଭାସ୍ଥଳେ ଦ୍ରୌପଦୀ ଜଣାଣ କରି । 

ବିବଶନ ହେବା କାଳେ କୋଟି ବସ୍ତ୍ର ଦେଇ ହେଳେ 

ତାକୁ ଲଜ୍ଜାରୁ କରିଛ ପାରି ।୩।

ଆରତେ ଡାକିଲା ଗଜ ରଖିଲ ହେ ଚକ୍ରଧାରୀ ।

ତା ଡାକକୁ ଚତୁର୍ଭୁଜ ରକ୍ଷାକଲ ଦେବରାଜ 

ଥିଲଟି ତୁମ୍ବେ ଶ୍ରବଣ ଡେରି ।୪।

ଗହନ ବନେ ମୃଗୁଣୀ ଡାକିଲା ରଥାଙ୍ଗପାଣି ।

ବନେ ଶିଶୁ ଗର୍ଭାଏଣୀ ଚିନ୍ତିଲା ହେ ଚକ୍ରପାଣି 

ବ୍ୟାଧମୁଖରୁ ରଖିଲ ତାରି ।୫।

କହଇ ଦ୍ୱିଜ ଅଧମ ତୁମ୍ଭ ପାଦ ଧ୍ୟାନ କରି ।

ମୋ କର୍ମକୁ ହେଲ ବାମ ଆହେ ନବଘନ ଶ୍ୟାମ

ନ ସ୍ଫୁରିଲା ନେତ୍ରରେ ମୋହରି ।୬।  

ଜଗନ୍ନାଥ ଭଜନ - ନମସ୍ତେ ପ୍ରଭୁ ଜଗନ୍ନାଥ 

କବି - ଜଗନ୍ନାଥ ଦାସ 

ଗାୟକ - ପ୍ରଫୁଲ୍ଲ କର 

ଭଜନର ୟୁଟ୍ୟୁବ୍ ଲିଙ୍କ୍ - https://www.youtube.com/watch?v=AScvyXhKKns

ଫଟୋ କ୍ରେଡ଼ିଟ୍ - ୱିକିମିଡ଼ିଆ କମନସ୍ 

ନମସ୍ତେ ପ୍ରଭୁ ଜଗନ୍ନାଥ । ଅନାଥ ଲୋକଙ୍କର ନାଥ ।।

ନମସ୍ତେ ପ୍ରଭୁ ବାସୁଦେବ । ଭକତ ଜନଙ୍କ ବାନ୍ଧବ ।।

ନମସ୍ତେ ପ୍ରଭୁ ହୃଷୀକେଶ । ଭକତ ଜନଙ୍କ ବିଶ୍ୱାସ ।।

ନମସ୍ତେ ପ୍ରଭୁ ବିଶ୍ୱରୂପୀ । ସକଳ ହୃଦେ ଅଛ ବ୍ୟାପି।।

ତୁ ସୃଷ୍ଟି ସ୍ଥତି ଲୟ କରୁ । ଆବର ଗର୍ଭରେ ସଂହରୁ ।।

ଅଶେଷ କୋଟି ବସୁନ୍ଧରୀ । ତୋହର ଗର୍ଭେ ଛନ୍ତି ପୁରି ।।

ଚଉଦ ଭୁବନେ ଯା କିଣା । ଏ ସର୍ବ ତୋହର ରଚନା ।।

ତୁ ବ୍ରହ୍ମା ରୁଦ୍ର ବିଷ୍ଣୁ ତୁହି । ତୋ ବିନୁ ଅନ୍ୟ ଗତି ନାହିଁ ।।

ସୃଷ୍ଟି ତୋହର ଖେଳଘର । ଅଶେଷ ମାୟା ତୋ ଆବର ।।

ତୋହର ନିଶ୍ୱାସ ମରୁତ । ଦେବେ ହୋଇଲେ ତହୁଁ ଜାତ ।।

ତୁହିଟି ଅଗ୍ନି ଦେବ ଇନ୍ଦ୍ର । ନୟନୁ ଜାତ ସୂର୍ଯ୍ୟ ଚନ୍ଦ୍ର ।।

ଭୁଜରୁ ଅନନ୍ତ ମୂରତି । କଣ୍ଠରୁ ଜାତ ସରସ୍ୱତୀ ।।

ସଦା ଚଞ୍ଚଳ ନିଦ୍ରା ନାହିଁ । ଏ ରୂପେ ଶୂନ୍ୟେ ଅଛୁ ରହି ।।

ଅଶେଷ ତୋହର ମହିମା । କେ ଜାଣିପାରେ ଗୁଣସୀମା ।।

ତୋ ନାମ କରୁଥିଲେ ଲୟ । କୋଟିଏ ଜନ୍ମ ପାପ କ୍ଷୟ ।।

ନାମ ଘୋଷିଲେ ସର୍ବସିଦ୍ଧି । ଖଣ୍ଡଇ ରୋଗ ଶୋକ ଆଦି ।।

ଆରତ ଭଞ୍ଜନ ତୋ ବାନା । ଆତଙ୍ଗ କାଳେ ବଜ୍ର ସେହ୍ନା ।।

ହୋଇଲୁ ଦଶ ଅବତାର । ନାଶିଲୁ ଅବନୀର ଭାର ।

ଦୁଷ୍ଟ ନିବାରି ସନ୍ଥ ପାଳୁ । ତୁ ନାଥ ପରମ ଦୟାଳୁ ।।

ତୁ ଅଟୁ ଦରିଦ୍ରର ଧନ । ତୋ ପାଦେ ରହୁ ମୋର ମନ ।।

ସତୀ ଯୁବତୀଙ୍କର ମନେ । ନିଜର ସ୍ୱାମୀ ଥାନ୍ତି ଯେହ୍ନେ ।।

ସେହି ପ୍ରକାରେ ମୋର ମନ । ତୋ ପାଦେ ରହୁ ଭଗବାନ ।।

କହଇ ଦାସ ଜଗନ୍ନାଥ । କମଳ ଚରଣକୁ ଆଶ ।।

ଜଗନ୍ନାଥ ଭଜନ - ଆହେ ପ୍ରଭୁ କଳା ଶ୍ରୀମୁଖ

କବି - ବନମାଳୀ ଦାସ 

ଗାୟକ - ରଘୁନାଥ ପାଣିଗ୍ରାହୀ 

ଭଜନର ୟୁଟ୍ୟୁବ୍ ଲିଙ୍କ୍ - https://www.youtube.com/watch?v=jhmgn2arOQQ

ଫଟେ କ୍ରେଡ଼ିଟ୍ - ୱିକିମିଡ଼ିଆ କମନସ୍ 

ଆହେ ପ୍ରଭୁ କଳା ଶ୍ରୀମୁଖ ।

କାଳେ କାଳେ ମୋର ନଗଲା ଦୁଃଖ ।

କି ଅବା ଛାମୁରେ ଜଣାଇବି ମୁହିଁ ସାକ୍ଷାତେ ମୋ ଦୀନ ଅବସ୍ଥା ଦେଖ ।

ତେଣୁ ଶ୍ରୀଛାମୁକୁ ଯାଇ ନ ପାରଇ 

ଖଣ୍ଡିଏ ତ ମୋର ନ ଥାଇ ଭେକ । ୧।

ସାଉଙ୍କ ଜଞ୍ଜାଳ କୁଟୁମ୍ବଙ୍କ ଗୋଳ ଅନ୍ତର ବେଦନା ସବୁ ଅଧିକ ।

କା ଆଗେ କହିବି କେ କଷ୍ଟ ଫେଡ଼ିବ 

ସଂସାରେ ମୋ ସରି ନାହିଁ ନିରେଖ ।୨।

ମନ ମଧ୍ୟେ ମୋର ହରଷ ନ ଥାଇ ହୃଦୟ ମଧ୍ୟରେ ସଦା ବିମୁଖ ।

ଚଉବର୍ଗ ଦାନୀ ଆଶ୍ରେ କରି ମୁଁ ଯେ 

କାହିଁକି ଆଉ ନ ପାଇଲି ସୁଖ ।୩।

ବାତ ଚକ୍ର ପ୍ରାୟେ ମନ ଭ୍ରମୁଥାଇ ଦଣ୍ଡେ ନ ରହଇ ତୁମ୍ଭର ପାଖ ।

କହେ ବନମାଳୀ ଶଙ୍ଖରେ ପୂରାଇ 

ଚକ୍ର ଉହାଡ଼ିଣ ଘୋଡ଼ାଇ ରଖ ।୪। 

ଜଗନ୍ନାଥ ଭଜନ - ମଣି ବିମାନେ ଗୋବିନ୍ଦ  

କବି - ବନମାଳୀ ଦାସ

ଭଜନର ୟୁଟ୍ୟୁବ୍ ଲିଙ୍କ୍ - https://www.youtube.com/watch?v=Chq4mEU_lPM

ଫଟୋ କ୍ରେଡ଼ିଟ୍ - ୱିକିମିଡ଼ିଆ କମନସ୍ 

ମଣି ବିମାନେ ଗୋବିନ୍ଦ ।

ଚଉପାଶେ ଘେରିଛନ୍ତି ସହଚରୀ ବୃନ୍ଦ ।।

ନିର୍ମଳ ଚନ୍ଦ୍ର ବଦନ ଆହା କି ପସନ୍ଦ ।

ତେରଛ ଚାହାଁଣି ତୁଲେ ହାସ ମନ୍ଦ ମନ୍ଦ ।୧।

ସଙ୍ଗରେ ପଞ୍ଚପାଣ୍ଡବ ଲଭନ୍ତି ଆନନ୍ଦ ।

ପଟୁଆରୀ ନିଯୋଗେ ଗାଆନ୍ତି ଗୀତ ଛନ୍ଦ ।୨।

ମନ୍ତ୍ରୀପଦେ ଲୋକନାଥ ଦେବ ସଦାନନ୍ଦ ।

କରନ୍ତି ସକଳ ନିର୍ଭା ସେ ସଭା ସମ୍ପଦ ।୩।

ବଡ଼ଦାଣ୍ଡ ଉଛୁଳଇ ଗହଗହ ନାଦ ।

ଶଙ୍ଖଭେରୀ ତୂରୀ ଘଣ୍ଟା କାହାଳି ଶବଦ ।୪।

ବୋଲେ ବନମାଳୀ ଧ୍ୟାୟୀ ଚରଣାରବିନ୍ଦ ।

ଚାପକୁ ବିଜୟେ ଆହା ଗୋପୀ-ହୃଦ-ଚାନ୍ଦ ।୫। 

ଜଗନ୍ନାଥ ଭଜନ - ବଡ଼ ମାୟାବୀ ଜୀବ ନୋହେ କାହାରି 

କବି - ଯଶୋବନ୍ତ ଦାସ 

ଭଜନର ୟୁଟ୍ୟୁବ୍ ଲିଙ୍କ୍ - https://www.youtube.com/watch?v=boNGwJ2XyXs

ଫଟୋ କ୍ରେଡ଼ିଟ୍ - ୱିକିମିଡ଼ିଆ କମନସ୍ 

ବଡ଼ ମାୟାବୀ ଜୀବ ନୋହେ କାହାରି

ଦିନେ ନ ଭଜୁ ରାମ କୃଷ୍ଣ ଶ୍ରୀହରି ।।

ଯେତେବେଳେ ମାତା ଗର୍ଭେ ହେଲୁ ସଞ୍ଚାର 

ଅଣାକାର ଭୂମି ସେ ଯେ ନାହିଁ ଆକାର ।

ପ୍ରଥମମାସେ ତୁ ଯେ ହେଲୁ ଧବଳ ବର୍ଣ୍ଣ,

ଦ୍ୱିତୀୟ ମାସେ ତୁ ଯେ ଜଳେ ଯେସନ ମୀନ, 

ତୃତୀୟ ମାସେ ତୁ ଯେ ଶୂନ୍ୟେ ମେଲିଲୁ ଡାଳ,

ଚତୁର୍ଥେ ଅସ୍ଥିଖଞ୍ଜା ତୋହରି ।୧।

ପଞ୍ଚମେ ନାଭି କମଳ କଲା ଭିଆଣ,

ଷଷ୍ଠରେ ବାସ୍ତରୀ ନାଡ଼ି ଖଞ୍ଜିଲା ଜାଣ ।

ସପ୍ତମେ ନାସା ଜ୍ୱିହା ଆବର ମୁଖ କର୍ଣ୍ଣ,

ଚକ୍ଷୁ ଭ୍ରୂଲତା କାମ କମାଣରେ ନିର୍ମାଣ।

ଗଙ୍ଗା ଜମୁନା ନଦୀ ବହଇ ଅନୁକ୍ଷଣ,

ଆପେ ମନକୁ କଲା ବିଚାରି ।୨।

ଅଷ୍ଟମେ ଅଙ୍ଗୁଷ୍ଠି ହସ୍ତ ପାଦ ଖଞ୍ଜିଲା,

ନବ ମାସେ ଚମଡ଼ାକୁ ଢାଙ୍କୁଣି ଦେଲା।

ଦଶ ମାସରେ ଶେଷ କଲା ହୋଇ ହରଷ 

ସ୍ତୁତି ଯେ କଲୁ ତୁହି ଭୋ ଦେବ ନନ୍ଦଶିଶ୍ୟ,

ଯଦି ମର୍ତ୍ତ୍ୟମଣ୍ଡଳେ ମୁହିଁ କରିବି ବାସ,

ତୋ ନାମ ଗାଉଥିବି ସୁମରି ।୩।

ଯେଉଁ ବିନ୍ଧାଣୀ ତୋତେଟି କଲା ନିର୍ମାଣ,

ସେହି ତୋ ଦେହେ ରହିଲା ଏହା ତୁ ଜାଣ ।

ରଖିଣ ଦଶବାଟ ଲଗାଇଲା କବାଟ 

ସୁଷୁମୁନା ଦୁଆରେ ରହିଲେ ନନ୍ଦଚାଟ,

ଯେବେ ପାଇବୁ ଭେଟ ମାୟାକୁ ତୁହି କାଟ,

ଗୁରୁ ସେବିଣ ଦେଖ ଶ୍ରୀହରି ।୪।

ଜନମ ହୋଇ ପଡିଲୁ ମର୍ତ୍ତ୍ୟମଣ୍ଡଳ,

କୁଆଁ ବୋଲନ୍ତେ ସବୁ ଗଲା ପାଶୋର ।

ଅନ୍ତୁଡ଼ିଶାଳେ ରହି ହରି ଭଜିଲୁ ନାହିଁ,

ପାଞ୍ଚ ବରଷ ଗଲା ବାଳ ଭାବରେ ବହି

ବାର ବରଷେ ବସ୍ତ୍ର ପିନ୍ଧୁ ହରଷ ହୋଇ,

ତେବେ ନ ବୋଲୁ ମୁଖେ ଶ୍ରୀହରି ।୫।

ପନ୍ଦର ବରଷେ ହେଲୁ ଅମରମତା,

କୋଡ଼ିଏ ବରଷେ କଲୁ କାମିନୀ ଚିନ୍ତା।

କାମିନୀ ସଙ୍ଗେ ରହି ଦିନ ହରିଲୁ ତୁହି,

ସେ ରୂପେ ଗଲା ତୋର ଯୁବା ବୟସ ବହି,

ହରି କଥାକୁ ଦିନେ ମନ ନ କଲୁ ତୁହି,

ହେବୁ କେମନ୍ତେ ଏ ଭବୁ ପାରି ।୬।

ବୃଦ୍ଧ ବୟସ ଯେ ଏବେ ହେଲା ତୋହରି,

ଅବଶ୍ୟ ଦେଖିବୁ ଥରେ ଶମନପୁରୀ ।

କହଇ ଯଶୋବନ୍ତ ଗୁରୁଙ୍କୁ ସେବା କର,

ସେ ନାମ ଧରି ହୃଦେ ଭବୁ ହୋଇବୁ ପାର,

ପୂର୍ବଜନ୍ମ କଳୁଷ ଚିତ୍ତରୁ ହେବ ଦୂର

ବସିବୁ ବଇକୁଣ୍ଠ ଆବୋରି ।୭।