ଓଡ଼ିଆ ଭଜନ - 'ଏହି କଥାରେ ମୋ ମନ'

କବି - ବନମାଳି ଦାସ

ଗାୟକ - ରାଧାମଣି ମହାପାତ୍ର

ଗୀତଟିର ୟୁ୍ଟ୍ୟୁବ୍ ଲିଙ୍କ୍ - https://www.youtube.com/watch?v=QIBSWD9P3kY

୧୮୮୦ରୁ ୧୯୧୦ ମସିହାରେ ପୁରୀରେ ଅଙ୍କିତ ପଟଚିତ୍ର (ୱିକିମିଡିଆ କମନ୍ସ୍)

ମହାପ୍ରଭୁ ଏହି କଥାରେ ମୋ ମନ
ନିତି ଦେଖୁଥିବି ନୀଳାଦ୍ରିମଣ୍ଡପେ କଞ୍ଜସୁନ୍ଦର ବଦନ । ଘୋଷା ।

ଅଞ୍ଜଳିରେ ଜଳ ପିଇ ପିନ୍ଧୁଥିବି ବକଳ କରି ବସନ
ଶଚୀପତି ପଦ ତୁଚ୍ଛ ମଣୁଥିବି ଥିଲେ ତୁମ୍ଭ ସନ୍ନିଧାନ । ୧ ।

ଲୋଭୀ ହୋଇଥିବି ଅର୍ଦ୍ଧଚନ୍ଦ୍ରମୁଖ ଚନ୍ଦନଲାଗି ବେଳକୁ
ଧୀରେ ଚାହୁଁଥିବି ବିପୁଳ ଭୁଜକୁ ସୁଭଦ୍ରା କାମପାଳକୁ । ୨ ।

ଅବକାଶମାନଙ୍କରେ ମୋ ଲାଳସ ହୋଇଥିବ ଅହର୍ନିଶ
ତେତେବେଳେ ଡୋଳେ ହେଳେ ନ ଦେଖିବି ବ୍ରହ୍ମା ରୁଦ୍ର ଦିନଈଶ । ୩ ।

ନିତି ବଦନଚନ୍ଦ୍ରକୁ ଚାହିଁ ମୁହିଁ ତାପତ୍ରୟକୁ ନାଶିବି
ବୋଲେ ବନମାଳୀ ଜନ୍ତୁପତି ଭୟ ଲୋକକୁ ଚାହିଁ ହସିବି । ୪ ।

ପାରମ୍ପାରିକ ଭଜନ - 'ଗୁରୁ ମୋର ରଜକରାଜ'

ଫଟୋ କ୍ରେଡ଼ିଟ - ୱିକିମିଡିଆ କମନ୍ସ୍

ଗୁରୁ ମୋର ରଜକରାଜ,

ଗୁରୁ ମୋର ରଜକ ରାଜ ।

ମନର ମଇଳା ଘଷି ମାଜି ଧୋଇ

ଶୁଖାଇ ରଙ୍ଗାଇ କରନ୍ତି ସଜ ।୦।

ଆତ୍ମଜ୍ଞାନ ତା'ଙ୍କ ତୁଠର ପଥର

ଚିତ୍ତ ମୋ ଅଜ୍ଞାନ ଅଟଇ ଚୀର ।

ଜ୍ଞାନ ବାକ୍ୟ ପିଟଣାରେ ପିଟିପିଟି

ବାସନାର ଦାଗ କରନ୍ତି ଦୂର ।୧।

ବୁଦ୍ଧି ମୋ'ର ମୂଢ଼ ବତୁରେ ଶଙ୍କାରେ

ନିଜାନନ୍ଦ ସଙ୍ଗ ଅଟଇ ଖରା ।

ବେଦାନ୍ତ ମାର୍ତ୍ତଣ୍ଡ ଜ୍ଞାନାଲୋକେ ଦେଖ

ମନ ମୋର ଶୁଖି ହେବ ପାପରା ।୨।

ନିଜାନନ୍ଦ ରଙ୍ଗେ ରଙ୍ଗି ଅହଙ୍କାର

ନାଶ ଯିବ ନିଶ୍ଚେ ମୁହିଁ ଜାଣିଛି ।

କହ ଭକ୍ତ ଜନେ ସିଲୁ ରାଉତର

ଏହାଠୁ ଆଉ କି ସୌଭାଗ୍ୟ ଅଛି ।୩।

ମାଥିଉଙ୍କର ମଙ୍ଗଳ ସମାଚାର - ୨୯

ପବିତ୍ର ବାଇବେଲର ଓଡ଼ିଆ ଅନୁବାଦ

ଧର୍ମପ୍ରଚାରକ ମାଥିଉ (୧୪୮୨ ମସିହାର କୋବର୍ଜର ବାଇବେଲରୁ ଆନୀତ)
ମୁଦ୍ରକ - ଆନ୍ତନ୍ କୋବର୍ଜର୍ (୧୪୪୦/୧୪୪୫ - ୧୫୧୩)

ସେହି ସମୟରେ ଯୀଶୁ କହିଲେ, ହେ ପିତଃ, ସ୍ୱର୍ଗ ଓ ପୃଥ‌ିବୀର ପ୍ରଭୁ, ତୁମ୍ଭେ ଜ୍ଞାନବନ୍ତ ଓ ବିଦ୍ୟାବନ୍ତ ଲୋକମାନଙ୍କଠାରୁ ଏହି ସବୁ ବିଷୟ ଗୁପ୍ତ ରଖି ବାଳକମାନଙ୍କ ପ୍ରତି ପ୍ରକାଶ କଲ, ଏଥିନିମନ୍ତେ ତୁମ୍ଭର ଧନ୍ୟବାଦ କରୁଅଛି । ପିତଃ ! ଏମନ୍ତ ହେଉ; ଯେହେତୁ ଏହା ତୁମ୍ଭ ଦୃଷ୍ଟିରେ ପ୍ରୀତିଜନକ ହେଲା । ସବୁ ବିଷୟ ପିତା ଆମ୍ଭଠାରେ ସମର୍ପଣ କରିଅଛନ୍ତି; ପୁଣି ପିତାଙ୍କ ଦିନୁ ପୁତ୍ରଙ୍କୁ କେହି ଜାଣନ୍ତି ନାହିଁ, କେବଳ ପୁତ୍ର ଆପଣା ଇଚ୍ଛାରେ ଠାହା ପ୍ରତି ତାହାଙ୍କୁ ପ୍ରକାଶ କରନ୍ତି, ସେ ତାହାଙ୍କୁ ଜାଣେ ।

ହେ ପରିଶ୍ରାନ୍ତ ଓ ଭାରଗ୍ରସ୍ତ ଲୋକ ସମସ୍ତେ, ଆମ୍ଭ ନିକଟକୁ ଆସ, ଆମ୍ଭେ ତୁମ୍ଭମାନଙ୍କୁ ବିଶ୍ରାମ ଦେବା । 

ଆମ୍ଭର ଯୁଆଳ ଆପଣାମାନଙ୍କ ଉପରେ ଘେନ, ପୁଣି ଆମ୍ଭ ନିକଟରେ ଶିଖ, ଯେହେତୁ ଆମ୍ଭେ ବିନତ ଓ ନମ୍ରଚିତ୍ତ; ଆଉ ତୁମ୍ଭେମାନେ ଆପଣା ମନରେ ବିଶ୍ରାମ ପାଇବ । ଯେହେତୁ ଆମ୍ଭର ଯୁଆଳି ସହଜ ଓ ଆମ୍ଭ ବୋଝ ହାଲୁକା । 

ଉତ୍ସ - 'ପବିତ୍ର ବାଇବେଲ : ପୁରାତନ ଓ ନୂତନ ନିୟମ' । ବାଇବେଲ ସୋସାଇଟି ଅଫ ଇଣ୍ଡିଆ : ବାଙ୍ଗାଲୋର । ପ୍ରକାଶନର ତାରିଖ ଦିଆଯାଇନାହିଁ ।

ମାଥିଉଙ୍କର ମଙ୍ଗଳ ସମାଚାର - ୨୮

ପବିତ୍ର ବାଇବେଲର ଓଡ଼ିଆ ଅନୁବାଦ

ସିଂହାସନାୠଢ଼ ପ୍ରଭୁ ଯୀଶୁ
ପଞ୍ଚଦଶ ଶତାବ୍ଦୀର ଆୟରିଶ ପୋଥି ବୁକ୍ ଅଫ୍ କେଲ‌ସ୍‌ରୁ ଆନୀତ
ଫଟୋ କ୍ରେଡ଼ିଟ - ୱିକିମିଡିଆ କମନ୍ସ୍

ଏଥି ଉତ୍ତାରୁ ଯେଉଁ ଯେଉଁ ନଗରରେ ତାହାଙ୍କର ବହୁତ ଆଶ୍ଚର୍ଯ୍ୟକ୍ରିୟା କରାଯାଇଥିଲା, ସେହି ସେହି ନଗର ନିବାସିମାନଙ୍କର ମନଫେରଣ ନ ହେବାରୁ ସେ ସେହି ସମସ୍ତଙ୍କୁ ଧମକାଇବାକୁ ଲାଗିଲେ । ହାୟ ହାୟ କୋରାଜୀନ, ହାୟ ହାୟ ବେଥସେବା, ତୁମ୍ଭମାନଙ୍କ ମଧ୍ୟରେ ଯେ ଯେ ଆଶ୍ଚର୍ଯ୍ୟ କର୍ମ କରାଯାଇଅଛି, ତାହା ସବୁ ଯେବେ ସୋର ଓ ସୀଦୋନ ମଧ୍ୟରେ କରାଯାଇଥାନ୍ତା, ତେବେ ଅନେକ କାଳ ଆଗରୁ ସେମାନେ ଚଟ ପିନ୍ଧି ଭସ୍ମରେ ବସି ମନ ଫେରାଇଥାନ୍ତେ । କିନ୍ତୁ ଆମ୍ଭେ ତୁମ୍ଭମାନଙ୍କୁ କହୁଁ, ବିଚାର ଦିନରେ ତୁମ୍ଭମାନଙ୍କ ଦଶାରୁ ସୋର ଓ ସୀଦୋନର ଦଶା ସହନୀୟ ହେବ । ଆଉ ହେ କଫର୍ନାହୁମ, ତୁମ୍ଭେ ପରା ସ୍ୱର୍ଗ ପର୍ଯ୍ୟନ୍ତ ଉଚ୍ଚୀକୃତ ହେବ । ତୁମ୍ଭେ ନରକରେ ନିପାତିତ ହେବ; ଯେହେତୁ ତୁମ୍ଭ ମଧ୍ୟରେ ଯେଉଁ ଆଶ୍ଚର୍ଯ୍ୟ କର୍ମ କରାଯାଇଅଛି, ତାହା ଯେବେ ସିଦୋମରେ କରାଯାଇଥାନ୍ତା, ତେବେ ତାହା ଆଜି ପର୍ଯ୍ୟନ୍ତ ଥାନ୍ତା । ମାତ୍ର ଆମ୍ଭେ ତୁମ୍ଭମାନଙ୍କୁ କହୁଁ, ତୁମ୍ଭର ଦଶାରୁ ବରଂ ସିଦୋମର ଦଶା ବିଚାର ଦିନରେ ସହନୀୟ ହେବ । 

ଉତ୍ସ - 'ପବିତ୍ର ବାଇବେଲ : ପୁରାତନ ଓ ନୂତନ ନିୟମ' । ବାଇବେଲ ସୋସାଇଟି ଅଫ ଇଣ୍ଡିଆ : ବାଙ୍ଗାଲୋର । ପ୍ରକାଶନର ତାରିଖ ଦିଆଯାଇନାହିଁ ।

ମାଥିଉଙ୍କର ମଙ୍ଗଳ ସମାଚାର - ୨୭

ପବିତ୍ର ବାଇବେଲର ଓଡ଼ିଆ ଅନୁବାଦ

ମାଥିଉଙ୍କର ମଙ୍ଗଳ ସମାଚାରର ପ୍ରାରମ୍ଭ (୧୫ଶ ଶତାବ୍ଦୀର ପୋଥି)
ଫଟୋ କ୍ରେଡ଼ିଟ - ୱିକିମିଡିଆ କମନ୍ସ୍

କିନ୍ତୁ ଆମେ କାହା ସଙ୍ଗରେ ଏକାଳର ଲୋକମାନଙ୍କୁ ତୁଳନା ଦେବା ? ହାଟରେ ବସି ଯେଉଁ ବାଳକମାନେ ଆପଣା ସଙ୍ଗିଗଣକୁ ଡାକି କହନ୍ତି, 'ଆମ୍ଭେମାନେ ତୁମ୍ଭମାନଙ୍କ ପାଖରେ ବଂଶୀ ବଜାଇଲୁଁ, ମାତ୍ର ତୁମ୍ଭେମାନେ ନାଚିଲ ନାହିଁ; ଆମ୍ଭେମାନେ ବିଳାପ କଲୁଁ, ମାତ୍ର ତୁମ୍ଭେମାନେ ଦୁଃଖ କଲ ନାହିଁ,' ସେମାନେ ଏପରି ବାଳକମାନଙ୍କ ପରି; ଯେହେତୁ ଯୋହନ ଆସି ଭୋଜନ ପାନ କଲେ ନାହିଁ; ତହିଁରେ ଲୋକମାନେ କହନ୍ତି, ସେ ଭୂତଗ୍ରସ୍ତ । ମନୁଷ୍ୟପୁତ୍ର ଆସି ଭୋଜନ ପାନ କଲେ; ତହିଁରେ ଲୋକମାନେ କହନ୍ତି, ଦେଖ, ଏ ଜଣେ ପେଟୁକ ଓ ମଦ୍ୟପାୟୀ, କରଆଦାୟକାରୀମାନଙ୍କର ଓ ପାପିମାନଙ୍କର ବନ୍ଧୁ । ମାତ୍ର ଜ୍ଞାନ ନିଜ କର୍ମ ସମୁଦାୟ ଦ୍ୱାରା ନିର୍ଦ୍ଦୋଷ ଗଣିତ ହୁଏ ।  

ଉତ୍ସ - 'ପବିତ୍ର ବାଇବେଲ : ପୁରାତନ ଓ ନୂତନ ନିୟମ' । ବାଇବେଲ ସୋସାଇଟି ଅଫ ଇଣ୍ଡିଆ : ବାଙ୍ଗାଲୋର । ପ୍ରକାଶନର ତାରିଖ ଦିଆଯାଇନାହିଁ ।

ମାଥିଉଙ୍କର ମଙ୍ଗଳ ସମାଚାର - ୨୬

ପବିତ୍ର ବାଇବେଲର ଓଡ଼ିଆ ଅନୁବାଦ

କାନଭାସ୍ ଉପରେ ତୈଳଚିତ୍ର - 'ଯୀଶୁ ଖ୍ରୀଷ୍ଟଙ୍କର ୟେରୁଶେଲମ୍ ରେ ପ୍ରବେଶ' (୧୮୯୭)

ଚିତ୍ରକର - ଜ୍ୟାଁ ଲିଅଁ ଜିରମ୍ (୧୮୨୪-୧୯୦୪)

ଫଟୋ କ୍ରେଡ଼ିଟ - ୱିକିମିଡିଆ କମନ୍ସ୍

ସେମାନେ ପ୍ରସ୍ଥାନ କଲାଉତ୍ତାରେ ଯୀଶୁ ଲୋକମାନଙ୍କୁ ୟୋହନଙ୍କ ବିଷୟରେ କହିବାକୁ ଲାଗିଲେ, ତୁମ୍ଭେମାନେ ବାହାର ହୋଇ ଅରଣ୍ୟ ମଧ୍ୟରେ କଣ ଦେଖିବାକୁ ଯାଇଥିଲ ? କି ବାୟୁରେ ହଲିଲା ଗୋଟିଏ ନଳ ? ତେବେ କଣ ଦେଖିବାକୁ ଯାଇଥିଲ ? କି ସୁକ୍ଷ୍ମ ବସନ ପରିହିତ କୌଣସି ମନୁଷ୍ୟକୁ  ? ଦେଖ, ଯେଉଁମାନେ ସୂକ୍ଷ୍ମ ବସନ ପିନ୍ଧନ୍ତି, ସେମାନେ ରାଜଗୃହରେ ଥାନ୍ତି । ତେଣୁ କାହିଁକି ବାହାରେ ଯାଇଥିଲ ? କି ଜଣେ ଭବିଷ୍ୟଦ୍-ବକ୍ତାଙ୍କୁ ଦେଖିବାକୁ ? ତାହା ହିଁ ପ୍ରମାଣ ; ପୁଣି ଆମ୍ଭେ ତୁମ୍ଭମାନଙ୍କୁ କହୁ ଯେ, ସେ   ଭବିଷ୍ୟଦ୍-ବକ୍ତାଠାରୁ ବଡ଼ ।  ଯେହେତୁ "ଦେଖ, ଆମ୍ଭେ ଆପଣା ଦୂତକୁ ତୁମ୍ଭର ଅଗ୍ରସର କରି ପଠାଉଁ, ସେ ଆଗ ଯାଇ ତୁମ୍ଭର ପଥ ପ୍ରସ୍ତୁତ କରିବ" ଯାହାଙ୍କ ବିଷୟରେ ଏହି କଥା ଲିଖିତ ଥିଲା, ସେ ଏହି ବ୍ୟକ୍ତି । ଆମ୍ଭେ ତୁମ୍ଭମାନଙ୍କୁ ସତ୍ୟ କହୁଁ, ଯୋହନ ଡୁବକଙ୍କଠାରୁ ମହାନ୍ କେହି ସ୍ତ୍ରୀଲୋକର ଗର୍ଭରୁ ଜାତ ହୋଇ ନାହିଁ ; ତଥାପି ସ୍ୱର୍ଗରାଜ୍ୟ ମଧ୍ୟରେ ଅତି କ୍ଷୁଦ୍ର ଯେଉଁ ବ୍ୟକ୍ତି, ସେ ଯୋହନଙ୍କଠାରୁ ମହାନ । ଆଉ ଯୋହନ ଡୁବକଙ୍କ କାଳାବଧି ଏପର୍ଯ୍ୟନ୍ତ ସ୍ୱର୍ଗରାଜ୍ୟ ବଳାକ୍ରାନ୍ତ ହୋଇ ଆସିଅଛି, ତହିଁରେ ବିକ୍ରମୀ ଲୋକମାନେ ବଳରେ ତାହା ଅଧିକାର କରୁଛନ୍ତି । ଯେହେତୁ ସବୁ ଭବିଷ୍ୟଦ୍-ବକ୍ତା ଓ ବ୍ୟବସ୍ଥା ଯୋହନଙ୍କ ପର୍ଯ୍ୟନ୍ତ ଭବିଷ୍ୟତ୍ କଥା ପ୍ରକାଶ କରିଥିଲେ । ଆଉ ତୁମ୍ଭେମାନେ  ଯେବେ ଏହି କଥା ଗ୍ରହଣ କରିବାକୁ ସମ୍ମତ ହୁଅ, ତେବେ ଯେଉଁ ଏଲିୟଙ୍କର ଆସିବାର ଥିଲା, ସେ ଏହି ବ୍ୟକ୍ତି । ଯାହାର ଶୁଣିବାକୁ କର୍ଣ୍ଣ ଅଛି, ସେ ଶୁଣୁ । 

ଉତ୍ସ - 'ପବିତ୍ର ବାଇବେଲ : ପୁରାତନ ଓ ନୂତନ ନିୟମ' । ବାଇବେଲ ସୋସାଇଟି ଅଫ ଇଣ୍ଡିଆ : ବାଙ୍ଗାଲୋର । ପ୍ରକାଶନର ତାରିଖ ଦିଆଯାଇନାହିଁ ।

ମାଥିଉଙ୍କର ମଙ୍ଗଳ ସମାଚାର - ୨୪

ପବିତ୍ର ବାଇବେଲର ଓଡ଼ିଆ ଅନୁବାଦ

କୁଷ୍ଠ ରୋଗୀଙ୍କର ଯତ୍ନ ନେଉଥିବା ଯୀଶୁ
ବଇଜାଣ୍ଟିଅମ୍ ର କଳା
ଫଟୋ କ୍ରେଡ଼ିଟ - ୱିକିମିଡ଼ିଆ କମନ୍ସ୍

ଯେ କେହି ତୁମ୍ଭମାନଙ୍କୁ ଆତିଥ୍ୟ କରେ, ସେ ଆମ୍ଭମାନଙ୍କୁ କରୁଅଛି । ଆଉ ଯେ ଆମ୍ଭଙ୍କୁ ଆତିଥ୍ୟ କରେ, ସେ ଆମ୍ଭର ପ୍ରେରଣାକର୍ତ୍ତାଙ୍କୁ କରୁଅଛି । ଆଉ ଯେଉଁ ଜନ ଆଚାର୍ଯ୍ୟକୁ ଆଚାର୍ଯ୍ୟ ମଣି ଆତିଥ୍ୟ କରେ, ସେ ଆଚାର୍ଯ୍ୟର ଫଳ ପାଇବ; ଯେ କେହି ଧାର୍ମିକକୁ ଧାର୍ମିକ ମଣି ଆତିଥ୍ୟ କରେ, ସେ ଧାର୍ମିକ ମନୁଷ୍ୟର ଫଳ ପାଇବ । ଆଉ ଯେ କେହି ଏହି କ୍ଷୁଦ୍ର ଲୋକଙ୍କ ମଧ୍ୟରୁ କୌଣସି ଏକ ଜଣକୁ ଆମ୍ଭର ଶିଷ୍ୟ ମଣି କେବଳ ଏକ ତାଟିଆ ଶୀତଳ ଜଳ ଦିଏ, ଆମ୍ଭେ ତୁମ୍ଭମାନଙ୍କୁ ସତ୍ୟ କହୁଁ, ସେ କୌଣସି ପ୍ରକାରେ ଫଳରୁ ବଞ୍ଚିତ ହେବ ନାହିଁ ।  

ଉତ୍ସ - 'ପବିତ୍ର ବାଇବେଲ : ପୁରାତନ ଓ ନୂତନ ନିୟମ' । ବାଇବେଲ ସୋସାଇଟି ଅଫ ଇଣ୍ଡିଆ : ବାଙ୍ଗାଲୋର । ପ୍ରକାଶନର ତାରିଖ ଦିଆଯାଇନାହିଁ । 

ମାଥିଉଙ୍କର ମଙ୍ଗଳ ସମାଚାର - ୨୩

ପବିତ୍ର ବାଇବେଲର ଓଡ଼ିଆ ଅନୁବାଦ

ଚିତ୍ର - 'ମେଷପାଳକମାନଙ୍କର ଆରାଧନା'
ଚିତ୍ରକର - ଗେରାଡ଼୍ ଭନ୍ ହନ୍ଥ୍ରଷ୍ଟ୍ (୧୫୯୨-୧୬୫୬)
ଫଟୋ କ୍ରେଡ଼ିଟ - ୱିକିମିଡ଼ିଆ କମନ୍ସ୍

ଆମ୍ଭେ ଯେ ପୃଥିବୀରେ ଶାନ୍ତି ଦେବାକୁ ଆସିଅଛୁ ଏହା ମନେ କର ନାହିଁ ; ଶାନ୍ତି ଦେବାକୁ ନୁହେ ମାତ୍ର ଖଣ୍ଡା ଦେବାକୁ ଆସିଅଛୁଁ ; ଯେହେତୁ ପିତା ସହିତ ପୁତ୍ରର ଓ ମାତା ସହିତ କନ୍ୟାର, ପୁଣି ଶାଶୁ ସହିତ ପୁତ୍ରବଧୁର ବିରୋଧ କରାଇବାକୁ ଆସିଅଛୁଁ । ତହିଁରେ ମନୁଷ୍ୟର କୁଟୁମ୍ବମାନେ ତାହାର ଶତୃ ହେବେ । ପୁଣି ଯେ କେହି ପିତା ବା ମାତାକୁ ଆମ୍ଭଠାରୁ ଅଧିକ ସ୍ନେହ କରେ, ସେ ଆମ୍ଭର ଯୋଗ୍ୟ ନୁହେ ; ପୁଣି ଯେ କେହି ଆପଣା ପୁତ୍ର ବା କନ୍ୟାକୁ ଆମ୍ଭଠାରୁ ଅଧିକ ପ୍ରେମ କରେ, ସେ ଆମ୍ଭର ଯୋଗ୍ୟ ନୁହେଁ । ଆଉ ଯେ କେହି ଆପଣ।  କ୍ରୁଶ ନେଇ ଆମ୍ଭର ପଶ୍ଚାଦ୍ଗାମୀ ନ ହୁଏ, ସେ ଆମ୍ଭର ଯୋଗ୍ୟ ନୁହେ । ଯେ କେହି ଆପଣା ପ୍ରାଣ ରକ୍ଷା କରେ, ସେ ତାହା ହରାଇବ ; ଯେ କେହି ଆମ୍ଭ ନିମନ୍ତେ ଆପଣା ପ୍ରାଣ ହରାଏ, ସେ ତାହା ରକ୍ଷା କରିବ ।

ଉତ୍ସ - 'ପବିତ୍ର ବାଇବେଲ : ପୁରାତନ ଓ ନୂତନ ନିୟମ' । ବାଇବେଲ ସୋସାଇଟି ଅଫ ଇଣ୍ଡିଆ : ବାଙ୍ଗାଲୋର । ପ୍ରକାଶନର ତାରିଖ ଦିଆଯାଇନାହିଁ । 

ମାଥିଉଙ୍କର ମଙ୍ଗଳ ସମାଚାର - ୨୨

ପବିତ୍ର ବାଇବେଲର ଓଡ଼ିଆ ଅନୁବାଦ

ଚିତ୍ର - 'ଦେବଦୂତଙ୍କ ଦ୍ୱାରା ପ୍ରେରିତ ପ୍ରଚାରକ ମାଥିଉ'
ଚିତ୍ରକକ - ରେମ୍ବ୍ରାଁ ହାର୍ମେନସ୍ ଭାନ୍ ରିନ୍ (୧୬୦୬-୧୬୬୯)
ଫଟୋ କ୍ରେଡ଼ିଟ - ୱିକିମିଡ଼ିଆ କମନ୍ସ୍ 

ଦେଖ, କେନ୍ଦୁଆଗଣ ମଧ୍ୟରେ ଯେପରି ମେଣ୍ଢା, ତେମନ୍ତ ଆମ୍ଭେ ତୁମ୍ଭମାନଙ୍କୁ ପଠାଉଅଛୁଁ ; ଏଥିନିମନ୍ତେ ସର୍ପ ପରି ବୁଦ୍ଧିମନ୍ତ ଓ କାପ୍ତା ପରି ଅହିଂସକ ହୁଅ । ମାତ୍ର ମନୁଷ୍ୟମାନଙ୍କଠାରୁ ସାବଧାନ ଥାଅ ; ଯେହେତୁ ସେମାନେ ତୁମ୍ଭମାନଙ୍କୁ ବିଚାରସଭାରେ ସମର୍ପଣ କରିବେ ଓ ଭଜନାଳୟରେ ପ୍ରହାର କରିବେ । ପୁଣି ତୁମ୍ଭେମାନେ ଆମ୍ଭ ସକାଶେ ଶାସନକର୍ତ୍ତା ଓ ରାଜାମାନଙ୍କ ଛାମୁରେ ସେମାନଙ୍କ ଓ ପରଜାତୀୟମାନଙ୍କ ପ୍ରତି ସାକ୍ଷ୍ୟ ଦେବା ନିମନ୍ତେ ଅଣାଯିବ । ମାତ୍ର ଏହିରୂପେ ସମର୍ପିତ ହେଲେ ତୁମ୍ଭେମାନେ କିପ୍ରକାରେ  ଅବା କି କଥାରେ ଉତ୍ତର କରିବ, ସେ ବିଷୟରେ ଭାବିତ ହୁଅ ନାହିଁ ; ଯେହେତୁ ତୁମ୍ଭମାନଙ୍କୁ ଯାହା କହିବାକୁ ହେବ, ତାହା ସେହିକ୍ଷଣି ତୁମ୍ଭମାନଙ୍କ ମନରେ ଦିଆଯିବ । କାରଣ ସେ ସମୟରେ ଯେ କହିବେ, ସେ ତୁମ୍ଭେମାନେ ନୁହ, ମାତ୍ର ତୁମ୍ଭମାନଙ୍କ ମଧ୍ୟବର୍ତ୍ତୀ ପିତାଙ୍କର ଆତ୍ମା କହିବେ । ଆଉ ଭାଇ ଭାଇକି ଓ ପିତା ପୁତ୍ରକୁ ମୃତ୍ୟୁରେ ସମର୍ପଣ କରିବେ । ପୁତ୍ରମାନେ ଆପଣା ପିତାମାତାଙ୍କ ବିପକ୍ଷରେ ଉଠି ସେମାନଙ୍କୁ ବଧ କରାଇବେ । ପୁଣି ଆମ୍ଭର ନାମ ସକାଶେ ସମସ୍ତେ ତୁମ୍ଭମାନଙ୍କୁ ଘୃଣା କରିବେ ; ମାତ୍ର ଯେଉଁ ଜନ ଶେଷ ପର୍ଯ୍ୟନ୍ତ ଧୈର୍ଯ୍ୟ ଧରି ରହିବ, ସେ ପରିତ୍ରାଣ ପାଇବ । ଆଉ ସେମାନେ ଯେବେ ତୁମ୍ଭମାନଙ୍କୁ ଏକ ନଗରରେ ତାଡ଼ନା କରନ୍ତି, ତେବେ ଅନ୍ୟ ନଗରକୁ ପଳାଅ ; ଆମ୍ଭେ ତୁମ୍ଭମାନଙ୍କୁ ସତ୍ୟ କହୁଁ, ଇଶ୍ରାୟେଲ ଦେଶର ସବୁ ନଗରରେ ତୁମ୍ଭମାନଙ୍କ ଭ୍ରମଣ ସମାପ୍ତିର ପୂର୍ବରେ ମନୁଷ୍ୟପୁତ୍ରଙ୍କର ଆଗମନ ହେବ । ଶିଷ୍ୟ ଗୁରୁଠାରୁ ବଡ଼ ନୁହେ, ଅବା ଦାସ କର୍ତ୍ତାଠାରୁ ବଡ଼ ନୁହେ ; ଶିଷ୍ୟ ଆପଣା ଗୁରୁ ଓ ଦାସ ଆପଣା କର୍ତ୍ତାର ତୁଲ୍ୟ ହେଲେ ତାହା ପକ୍ଷରେ ଯଥେଷ୍ଟ । ସେମାନେ ଯେବେ ଗୃହର କର୍ତ୍ତାଙ୍କୁ ଭୂତରାଜ ବୋଲି କହିଅଛନ୍ତି, ତେବେ ତାହାଙ୍କର ପରିଜନବର୍ଗକୁ ଆଉ କଣ ନ କହିବେ ? ତେଣୁ ତୁମ୍ଭେମାନେ‌ ସେମାନଙ୍କୁ ଭୟ କରନାହିଁ । ଯେହେତୁ ଯାହା ପ୍ରକାଶିତ ନ ହେବ, ଏମନ୍ତ ଆଚ୍ଛାଦିତ କିଛି ନାହିଁ ; ଓ ଯାହା ଜଣା ନ ଯିବ, ଏମନ୍ତ ଗୁପ୍ତ କିଛି ନାହିଁ । ଆମ୍ଭେ ତୁମ୍ଭମାନଙ୍କୁ ଯାହା ଅନ୍ଧକାରରେ କହୁଅଛୁଁ, ତାହା ତୁମ୍ଭେମାନେ ଆଲୁଅରେ କହ ; ପୁଣି ତୁମ୍ଭେମାନେ କର୍ଣ୍ଣରେ ଯାହା ଶୁଣ, ତାହା ଘର ଛାତ ଉପରେ ପ୍ରଚାର କର । ଆଉ ଯେଉଁମାନେ ଶରୀରକୁ ବଧ କରିପାରନ୍ତି, ଆତ୍ମାକୁ ବଧ କରି ନ ପାରନ୍ତି, ସେମାନଙ୍କୁ ଭୟ କର ନାହିଁ ; ମାତ୍ର ଯେ ଶରୀର ଓ ଆତ୍ମା ଦୁଇକି ନରକରେ ବିନଷ୍ଟ କରି ପାରନ୍ତି, ତାହାଙ୍କୁହିଁ ଭୟ କର । ଦୁଇଟି ଘରଚଟିଆ ପକ୍ଷୀ କଣ ଏକ ପଇସାରେ ବିକା ଯାନ୍ତି ନାହିଁ ?  ତଥାପି ତୁମ୍ଭ ପିତାଙ୍କର (ଅନୁମତି) ବିନା ସେମାନଙ୍କର ଗୋଟିଏ ଭୂମିରେ ପଡ଼େ ନାହିଁ ; କିନ୍ତୁ ତୁମ୍ଭମାନଙ୍କ ମସ୍ତକର ବାଳ ସବୁ ଗଣିତ ଅଛି ।ଏନିମନ୍ତେ ଭୟ କର ନାହିଁ ; ତୁମ୍ଭେମାନେ ଘରଚଟିଆ ପକ୍ଷିଠାରୁ ବହୁମୂଲ୍ୟ । ଆଉ ଯେ କେହି ମନୁଷ୍ୟମାନଙ୍କ ସାକ୍ଷାତରେ ଆମ୍ଭଙ୍କୁ ସ୍ୱୀକାର କରିବ, ଆମ୍ଭେ ଆପଣା ସ୍ୱର୍ଗସ୍ଥ ପିତାଙ୍କ ସାକ୍ଷାତରେ ତାହାକୁ ସ୍ୱୀକାର କରିବୁଁ । ପୁଣି ଯେ କେହି ମନୁଷ୍ୟମାନଙ୍କ ସାକ୍ଷାତରେ ଆମ୍ଭଙ୍କୁ ଅସ୍ୱୀକାର କରେ, ଆମ୍ଭେ ମଧ୍ୟ ଆପଣା ସ୍ୱର୍ଗସ୍ଥ ପିତାଙ୍କ ଛାମୁରେ ତାହାକୁ ଅସ୍ୱୀକାର କରିବୁଁ । 

ଉତ୍ସ - 'ପବିତ୍ର ବାଇବେଲ : ପୁରାତନ ଓ ନୂତନ ନିୟମ' । ବାଇବେଲ ସୋସାଇଟି ଅଫ ଇଣ୍ଡିଆ : ବାଙ୍ଗାଲୋର । ପ୍ରକାଶନର ତାରିଖ ଦିଆଯାଇନାହିଁ । 

ପର୍ବତରେ ଧର୍ମୋପଦେଶ - ୨୧

ପବିତ୍ର ବାଇବେଲର ଓଡ଼ିଆ ଅନୁବାଦ

ୟେଲ ଠାରେ ଥିବା ଗୁଟେନବର୍ଗ ବାଇବେଲ
ଫଟୋ କ୍ରେଡ଼ିଟ - ୱିକିମିଡ଼ିଆ କମନ୍ସ୍

ପୁଣି ଯେ କେହି ତୁମ୍ଭମାନଙ୍କୁ ଆତିଥ୍ୟ ନ କରେ ଓ ତୁମ୍ଭମାନଙ୍କ କଥା ନ ଶୁଣେ, ସେହି ଘରରୁ କିଅବା ସେହି ନଗରରୁ ଚାଲିଯିବାବେଳେ ଆପଣାମାନଙ୍କର ପାଦଧୂଳି ଝାଡ଼ି ପକାଅ । ଆମ୍ଭେ ତୁମ୍ଭମାନଙ୍କୁ ସତ୍ୟ କହୁଁ, ବିଚାର ଦିନରେ ସେହି ନଗରର ଦଶା ଅପେକ୍ଷା ବରଂ ସିଦୋମ ଓ ଅମୋରା ଦେଶର ଦଶା ସହନୀୟ ହେବ ।  

ଉତ୍ସ - 'ପବିତ୍ର ବାଇବେଲ : ପୁରାତନ ଓ ନୂତନ ନିୟମ' । ବାଇବେଲ ସୋସାଇଟି ଅଫ ଇଣ୍ଡିଆ : ବାଙ୍ଗାଲୋର । ପ୍ରକାଶନର ତାରିଖ ଦିଆଯାଇନାହିଁ । 

ପର୍ବତରେ ଧର୍ମୋପଦେଶ - ୨୧

ପବିତ୍ର ବାଇବେଲର ଓଡ଼ିଆ ଅନୁବାଦ

ଅଷ୍ଟାଦଶ ଶତାବ୍ଦୀର ବାଇବେଲ ବାକୁସ: ଫଟୋ କ୍ରେଡ଼ିଟ - ୱିକିମିଡ଼ିଆ କମନ୍ସ୍

ଯୀଶୁ ଏହି ବାରଜଣଙ୍କୁ ପଠାଇ ଆଜ୍ଞା ଦେଇ କହିଲେ, ତୁମ୍ଭେମାନେ ପରଜାତୀୟ ଲୋକଙ୍କ ବାଟରେ ପୁଣି ଶମିରୋଣୀୟମାନଙ୍କ କୌଣସି ନଗରରେ ପ୍ରବେଶ ନ କରି ଇଶ୍ରାୟେଲ ଗୋତ୍ରର ହଜା ଯେ ସବୁ ମେଷ, ସେମାନଙ୍କ ନିକଟକୁ ଯାଅ । ପୁଣି ଯାଉଁ ଯାଉଁ 'ସ୍ୱର୍ଗରାଜ୍ୟ ସନ୍ନିକଟ ହେଲା,' ଏ କଥା ଘୋଷଣା କରି କହ । ରୋଗିମାନଙ୍କୁ ସୁସ୍ଥ କର, କୁଷ୍ଠିମାନଙ୍କୁ ପରିଷ୍କାର କର, ମୃତ ଲୋକମାନଙ୍କୁ ଜୀବନଦାନ କର, ଓ ଭୂତମାନଙ୍କୁ ଛଡ଼ାଅ ।  ତୁମ୍ଭେମାନେ ବିନାମୂଲ୍ୟରେ ପାଇଅଛ, ବିନାମୂଲ୍ୟରେ ଦିଅ । ଆପଣା ଆପଣା ଥଳୀରେ ସୁନା କି ରୂପା କି ତମ୍ବା କିଛି ନିଅ ନାହିଁ । ଆଉ ଯାତ୍ରା ପାଇଁ ଝୁଲି କିଅବା ଦ୍ୱିତୀୟ ବସ୍ତ୍ର ଅବା ଜୁତା କିଅବା ବାଡି ଏସବୁ ନିଅନାହିଁ; ଯେହେତୁ କାର୍ଯ୍ୟକାରୀ ଲୋକ ନିଜ ଆହାରର ଯୋଗ୍ୟ । ଆଉ ତୁମ୍ଭେମାନେ ଯେଉଁ ନଗରରେ କି ଗ୍ରାମରେ ପ୍ରବେଶ କର, ସେଠାରେ କେଉଁ ଲୋକ ଯୋଗ୍ୟପାତ୍ର, ତାହା ଅନୁସନ୍ଧାନ କର, ଆଉ ସ୍ଥାନାନ୍ତର ଯିବା ସମୟ ପର୍ଯ୍ୟନ୍ତ ତାହା ପାଖରେ ରହ ।  ଆଉ ତାହାର ଗୃହରେ ପ୍ରବେଶ କରିବା ସମୟରେ ତାହାକୁ କଲ୍ୟାଣ କର । ତହିଁରେ ସେ ଗୃହସ୍ଥ ଯେବେ ଯୋଗ୍ୟପାତ୍ର ହୁଏ, ତେବେ ସେହି ମଙ୍ଗଳବାଞ୍ଛା ତାହା ପ୍ରତି ବର୍ତ୍ତୁ; କିନ୍ତୁ ସେ ଯୋଗ୍ୟ ନ ଥିଲେ ତୁମ୍ଭ ଶାନ୍ତି ତୁମ୍ଭ ପ୍ରତି ଫେରି ଆସୁ ।

ଉତ୍ସ - 'ପବିତ୍ର ବାଇବେଲ : ପୁରାତନ ଓ ନୂତନ ନିୟମ' । ବାଇବେଲ ସୋସାଇଟି ଅଫ ଇଣ୍ଡିଆ : ବାଙ୍ଗାଲୋର । ପ୍ରକାଶନର ତାରିଖ ଦିଆଯାଇନାହିଁ । 

ପର୍ବତରେ ଧର୍ମୋପଦେଶ - ୨୦

ପବିତ୍ର ବାଇବେଲର ଓଡ଼ିଆ ଅନୁବାଦ

ବାର ପ୍ରେରିତଙ୍କର ମଣ୍ଡଳି (ଚତୁର୍ଥ ଶତାବ୍ଦୀ, ପୁଷ୍କିମ ସଙ୍ଗ୍ରହାଳୟ)
ଫଟୋ କ୍ରେଡ଼ିଟ - ୱିକିମିଡ଼ିଆ କମନ୍ସ୍ 

ଅନନ୍ତର ଯୀଶୁ ସେମାନଙ୍କ ଭଜନାଳୟରେ ଉପଦେଶ ଦେଉଁ ଦେଉଁ, ରାଜ୍ୟର ସୁସମାଚାର ଘୋଷଣା କରୁ କରୁ, ପୁଣି ଲୋକମାନଙ୍କ ମଧ୍ୟରେ  ଯେତେ ପ୍ରକାର ରୋଗ ଓ ବ୍ୟଥା ଥିଲା, ତାହା ସବୁ ସୁସ୍ଥ କରୁ କରୁ ସମସ୍ତ ନଗର ଓ ଗ୍ରାମ ଦେଇ ଭ୍ରମଣ କଲେ । ତହିଁରେ ଲୋକସମୁହକୁ ଅତି କ୍ଲାନ୍ତ ଓ ଅରକ୍ଷକ ମେଷପରି ଛିନ୍ନଭିନ୍ନ ଦେଖି ସେମାନଙ୍କ ପ୍ରତି ତାହାଙ୍କର ଦୟା ଜାତ ହେଲା । ପୁଣି ସେ ଆପଣା ଶିଷ୍ୟମାନଙ୍କୁ କହିଲେ, ଶସ୍ୟ ବହୁତ, ମାତ୍ର ମୂଲିଆମାନେ ଅଳ୍ପ; ଏଣୁ କ୍ଷେତ ମଧ୍ୟକୁ ଆଉ ମୂଲିଆମାନଙ୍କୁ ପଠାଇବା ପାଇଁ ଶସ୍ୟର ଅଧିକାରୀଙ୍କ ନିକଟରେ ପ୍ରାର୍ଥନା କର ।

ଏଥିଉତ୍ତାରେ ଯୀଶୁ ଆପଣାର ବାରଜଣ ଶିଷ୍ୟଙ୍କୁ କତିକି ଡାକି ସେମାନଙ୍କୁ ଅପବିତ୍ର ଭୂତଗଣ ଛଡ଼ାଇବାର ପୁଣି ସର୍ବପ୍ରକାର ରୋଗ ଓ ବ୍ୟାଧି ଉପଶମ କରିବାର ପରାକ୍ରମ ଦେଲେ । ସେହି ବାର ପ୍ରେରିତଙ୍କର ନାମ ଏହି, ପ୍ରଥମ ଶିମୋନ ଯାହାକୁ ପିତର କହନ୍ତି, ଓ ତାହାର ଭାଇ ଆନ୍ଦ୍ରିୟ । ଜେବଦିର ପୁତ୍ର ଯାକୁବ ଓ ତାହାର ଭାଇ ଯୋହନ । ଫିଲିପ ଓ ବାର୍ଥଲମୀ, ଥୋମା ଓ କର ଆଦାୟକାରୀ ମାଥିଉ । ଆଲଫିର ପୁତ୍ର ଯାକୁବ, ଓ ଥଦ୍ଦୀୟ । କିଣାନୀୟ (ବା ଉଦ୍ଯୋଗୀ) ଶିମୋନ, ଓ ଖ୍ରୀଷ୍ଟଙ୍କୁ ଯେ ପରହସ୍ତଗତ କଲା, ସେହି ଇସ୍କାରିଓତୀୟ ଯିହୁଦା । 

ଉତ୍ସ - 'ପବିତ୍ର ବାଇବେଲ : ପୁରାତନ ଓ ନୂତନ ନିୟମ' । ବାଇବେଲ ସୋସାଇଟି ଅଫ ଇଣ୍ଡିଆ : ବାଙ୍ଗାଲୋର । ପ୍ରକାଶନର ତାରିଖ ଦିଆଯାଇନାହିଁ । 

ପର୍ବତରେ ଧର୍ମୋପଦେଶ - ୧୯

ପବିତ୍ର ବାଇବେଲର ଓଡ଼ିଆ ଅନୁବାଦ

ଜେଫଥାଙ୍କର ପୁତ୍ରୀଙ୍କର ବିଳାପ : ମାଚିଜୋସ୍କି ବାଇବେଲର ଅଳଙ୍କରଣ
ଫଟୋ କ୍ରେଡ଼ିଟ - ୱିକିମିଡ଼ିଆ କମନ୍ସ୍

ଯୀଶୁ ସେଠାରୁ ଚାଲି ଯିବାବେଳେ ଦୁଇ ଜଣ ଅନ୍ଧ ତାଙ୍କ ପଛେ ଚାଲି ଉଚ୍ଚସ୍ୱରରେ ଡାକି କହିଲେ, ହେ ଦାଉଦ-ସନ୍ତାନ, ଆମ୍ଭମାନଙ୍କ ପ୍ରତି ଦୟାକରନ୍ତୁ । ଯୀଶୁ ଘର ଭିତରେ ପ୍ରବେଶ କରନ୍ତେ ସେହି ଦୁଇ ଅନ୍ଧ ଲୋକ ତାଙ୍କ ନିକଟକୁ ଆସିଲେ । ତହୁଁ ଯୀଶୁ ସେମାନଙ୍କୁ ପଚାରିଲେ, ଏହି କର୍ମ କରିବାକୁ ଆମ୍ଭର ସାମର୍ଥ୍ୟ ଅଛି, ତୁମ୍ଭେମାନେ କି ଏହା ବିଶ୍ୱାସ କର ? ସେମାନେ ଉତ୍ତର କଲେ, ହଁ ପ୍ରଭୋ ! ଏଥିରେ ସେ ସେମାନଙ୍କର ଚକ୍ଷୁ ସ୍ପର୍ଶ କରି କହିଲେ, ତୁମ୍ଭମାନଙ୍କ ବିଶ୍ୱାସ ପ୍ରମାଣେ ତୁମ୍ଭମାନଙ୍କୁ ଘଟୁ । ସେହିକ୍ଷଣି ସେମାନଙ୍କର ଆଖି ଖୋଲି ଗଲା । ତହୁଁ ଯୀଶୁ ସେମାନଙ୍କୁ ଦୃଢ଼ ଆଜ୍ଞା ଦେଇ କହିଲେ, ଦେଖ, ଏ ବିଷୟ ଯେମନ୍ତ କେହି ନ ଜାଣେ । ମାତ୍ର ସେମାନେ ପ୍ରସ୍ଥାନ କରି ସେହି ଦେଶର ସବୁଠାରେ ତାହାଙ୍କର କୀର୍ତ୍ତି ପ୍ରକାଶ କଲେ । ସେମାନେ ବାହାରି ଯାଉଛନ୍ତି, ଦେଖ, ଲୋକମାନେ ଜଣେ ଭୂତଗ୍ରସ୍ତ ଘୁଙ୍ଗା ମନୁଷ୍ୟକୁ ତାଙ୍କ ପାଖକୁ ଆଣିଲେ । ତହିଁରେ ଭୂତ ଛଡ଼ାଯାନ୍ତେ ସେ ଘୁଙ୍ଗା କଥା କହିଲା; ପୁଣି ସବୁ ଲୋକ ଆଶ୍ଚର୍ଯ୍ୟ ମଣି କହିଲେ, ଇଶ୍ରାୟେଲ ମଧ୍ୟରେ ଏପରି କେବେହେଁ ଦେଖା ଯାଇ ନାହିଁ । ମାତ୍ର ଫାରୁଶିମାନେ କହିଲେ, ସେ ଭୂତମାନଙ୍କ ଅଧିପତି ଦ୍ୱାରା ଭୂତଗଣଙ୍କୁ ଛଡ଼ାଏ । 

ଉତ୍ସ - 'ପବିତ୍ର ବାଇବେଲ : ପୁରାତନ ଓ ନୂତନ ନିୟମ' । ବାଇବେଲ ସୋସାଇଟି ଅଫ ଇଣ୍ଡିଆ : ବାଙ୍ଗାଲୋର । ପ୍ରକାଶନର ତାରିଖ ଦିଆଯାଇନାହିଁ । 

ପର୍ବତରେ ଧର୍ମୋପଦେଶ - ୧୮

ପବିତ୍ର ବାଇବେଲର ଓଡ଼ିଆ ଅନୁବାଦ

ବାଇବେଲର ପୋଥିଚିତ୍ର (୧୬୩୭-୩୮)
ଆର୍ମେନୀୟ କଳାକାର ମାଲନଜରଙ୍କର କଳାକୃତି

ତାହାଙ୍କର ଏହି ସବୁ କଥା କହିବା ସମୟରେ ଜଣେ ଅଧିପତି ଆସି ତାହାଙ୍କୁ ପ୍ରଣାମ କରି କହିଲା, ମୋର କନ୍ୟାଟି ଏକ୍ଷଣି ମଲା; ମାତ୍ର ଆପଣ ଆସି ତାହା ଦେହରେ ହାତ ଦେଉନ୍ତୁ, ତହିରେ ସେ ବଞ୍ଚିବ । ତହୁଁ ଯୀଶୁ  ଓ ତାଙ୍କ ଶିଷ୍ୟମାନେ ଉଠି ତାହାର ପଛେ ପଛେ ଗଲେ । ଏଥିମଧ୍ୟରେ ଦେଖ, ବାରବର୍ଷ ପର୍ଯ୍ୟନ୍ତ ପ୍ରଦରରୋଗଗ୍ରସ୍ତା ଏକ ସ୍ତ୍ରୀଲୋକ ପଶ୍ଚାତରୁ ଆସି ତାଙ୍କର ବସ୍ତ୍ରର ଦଶି ଛୁଇଁଲା । ଯେହେତୁ କେବଳ ତାଙ୍କ ବସ୍ତ୍ର ଛୁଇଁ ପାରିଲେ ମୁଁ ସୁସ୍ଥା ହେବି, ସେ ସ୍ତ୍ରୀ ଏହା ମନେ ମନେ ଭାଳିଥିଲା । ସେତେବେଳେ ଯୀଶୁ ମୁଖ ଫେରାଇ ତାହାକୁ ଦେଖି କହିଲେ, ଆଗୋ କନ୍ୟେ, ସୁସ୍ଥିରା ହୁଅ, ତୁମ୍ଭର ବିଶ୍ୱାସ ତୁମ୍ଭକୁ ସୁସ୍ଥ କରିଅଛି; ସେହିକ୍ଷଣି ସେ ସ୍ତ୍ରୀଲୋକଟି ସୁସ୍ଥା ହେଲା । 

ଯୀଶୁ ସେହି ଅଧିପତି ଘରକୁ ଆସି ବାଦ୍ୟକର ଆଦି ଅନେକ ଲୋକଙ୍କୁ କୋଳାହଳ କରିବାର ଦେଖି ସେମାନଙ୍କୁ କହିଲେ, ବାଟ ଛାଡ଼, କନ୍ୟାଟି ତ ମରିନାହିଁ, ଶୋଇ ପଡ଼ିଛି ।ଏଥିରେ ସେମାନେ ତାହାଙ୍କୁ ଉପହାସ କଲେ । ମାତ୍ର ସମସ୍ତଙ୍କୁ ବାହାର କଲାଉତ୍ତାରେ ସେ ଭିତରକୁ ଯାଇ କନ୍ୟାର ହସ୍ତ ଧରିବା ମାତ୍ର ସେ ଉଠିଲା । ତହିଁରେ ସେହି ଦେଶର ସବୁଠାରେ ଏହି କର୍ମର ସୁଖ୍ୟାତି ବ୍ୟାପିଗଲା । 

ଉତ୍ସ - 'ପବିତ୍ର ବାଇବେଲ : ପୁରାତନ ଓ ନୂତନ ନିୟମ' । ବାଇବେଲ ସୋସାଇଟି ଅଫ ଇଣ୍ଡିଆ : ବାଙ୍ଗାଲୋର । ପ୍ରକାଶନର ତାରିଖ ଦିଆଯାଇନାହିଁ । 

ପର୍ବତରେ ଧର୍ମୋପଦେଶ - ୧୭

ପବିତ୍ର ବାଇବେଲର ଓଡ଼ିଆ ଅନୁବାଦ

'ବାବିଲୋନର ବେଶ୍ୟା'
ମାର୍ଟିନ ଲୁଥର କୃତ ବାଇବେଲର ୧୫୩୪ ମସିହାର ଅନୁବାଦରୁ ଆହୃତ
ଫଟୋ କ୍ରେଡ଼ିଟ - ୱିକିମିଡ଼ିଆ କମନ୍ସ୍

ଏଥି ଉତ୍ତାରେ ଯୀଶୁ ଘର ମଧ୍ୟରେ ଭୋଜନ କରିବାକୁ ବସିଅଛନ୍ତି, ଆଉ ଦେଖ, ଅନେକ କରସମ୍ପାଦକ ଓ ପାପିଷ୍ଠ ଲୋକ ଆସି ତାହାଙ୍କ ଓ ତାହାଙ୍କ ଶିଷ୍ୟମାନଙ୍କ ସଙ୍ଗରେ ବସିଲେ । ଫାରୁଶିମାନେ ତାହା ଦେଖି ତାହାଙ୍କ ଶିଷ୍ୟମାନଙ୍କୁ କହିଲେ, ତୁମ୍ଭମାନଙ୍କର ଗୁରୁ କି ନିମନ୍ତେ କରସମ୍ପାଦକ ଓ ପାପୀବର୍ଗ ସହିତ ଭୋଜନ କରନ୍ତି ? ଯୀଶୁ ତାହା ଶୁଣି ସେମାନଙ୍କୁ ଉତ୍ତର କଲେ, ସୁସ୍ଥ ଲୋକର ବୈଦ୍ୟଠାରେ ପ୍ରୟୋଜନ ନାହିଁ,  ମାତ୍ର ଅସୁସ୍ଥ ଲୋକର ପ୍ରୟୋଜନ ଅଛି । ଏଣୁ "ବଳିଦାନରୁୁ ଆମ୍ଭେ ଦୟାକୁ ଭଲ ଜାଣୁ," ଏହି କଥାର ଅର୍ଥ ଯାଇ ଶିଖ । ଯେହେତୁ ଆମ୍ଭେ ଧାର୍ମିକ ଲୋକଙ୍କୁ ନୁହେଁ, ମାତ୍ର ପାପିମାନଙ୍କୁ ଡାକିବାକୁ ଆସିଅଛୁଁ ।

ସେ ସମୟରେ ୟୋହନଙ୍କର ଶିଷ୍ୟମାନେ ତାହାଙ୍କ ନିକଟକୁ ଆସି କହିଲେ, ଆମ୍ଭେମାନେ ଓ ଫାରୁଶିମାନେ ଅନେକଥର ଉପବାସ କରିଥାଉଁ, ମାତ୍ର ତୁମ୍ଭର ଶିଷ୍ୟମାନେ ଉପବାସ କରନ୍ତି ନାହିଁ, ତାହାର କାରଣ କଣ ? ଯୀଶୁ ସେମାନଙ୍କୁ କହିଲେ, ଯେପର୍ଯ୍ୟନ୍ତ ବରଯାତ୍ରିମାନଙ୍କ ସଙ୍ଗରେ ବର ଥାନ୍ତି, ସେପର୍ଯ୍ୟନ୍ତ କି ସେମାନେ ବିଳାପ କରିପାରନ୍ତି ? ପୁଣି ଯେତେବେଳେ ସେମାନଙ୍କ ନିକଟକୁ ବର ନିଆଯିବେ, ଏପରି ସମୟ ଆସିବ; ସେତେବେଳେ ସେମାନେ ଉପବାସ କରିବେ । ପୁରାତନ ବସ୍ତ୍ରରେ କେହି ନୂତନ ବସ୍ତ୍ରର ତାଳୀ ଦିଏ ନାହିଁ, ଯେହେତୁ ସେହି ତାଳୀରେ ପୁରାତନ ବସ୍ତ୍ର ଛିଣ୍ଡି ଯାଏ, ପୁଣି ସେହି ଛିଦ୍ର ଅଧିକ ମନ୍ଦ ଦିଶେ । ଆଉ ପୁରାତନ କୁମ୍ପାରେ କେହି ନୂତନ ଦ୍ରାକ୍ଷାରସ ରଖେ ନାହିଁ; ଯେହେତୁ ତାହା କଲେ କୁମ୍ପା ଫାଟିଯାଇ ଦ୍ରାକ୍ଷାରସ ଗଳି ପଡ଼େ, ପୁଣି କୁମ୍ପାସବୁ ନଷ୍ଟ ହୁଏ; ମାତ୍ର ନୂଆ କୁମ୍ପାରେ ନୂଆ ଦ୍ରାକ୍ଷାରସ ରଖିଲେ ଦୁଇର ରକ୍ଷା ହୁଏ ।      

ଉତ୍ସ - 'ପବିତ୍ର ବାଇବେଲ : ପୁରାତନ ଓ ନୂତନ ନିୟମ' । ବାଇବେଲ ସୋସାଇଟି ଅଫ ଇଣ୍ଡିଆ : ବାଙ୍ଗାଲୋର । ପ୍ରକାଶନର ତାରିଖ ଦିଆଯାଇନାହିଁ । 

ପର୍ବତରେ ଧର୍ମୋପଦେଶ - ୧୬

ପବିତ୍ର ବାଇବେଲର ଓଡ଼ିଆ ଅନୁବାଦ

ଫଟୋ କ୍ରେଡ଼ିଟ - ୱିକିମିଡ଼ିଆ କମନ୍ସ୍

ଅନନ୍ତର ଯୀଶୁ ନାବରେ ପାରିହେଲେ, ଆଉ ନିଜ ନଗରକୁ ଆସିଲେ । ଆଉ ଦେଖ, କେତେ ଲୋକ ଜଣେ ପକ୍ଷାଘାତୀକି ଖଟ ଉପରେ ଶୁଆଇ ତାହଙ୍କ ନିକଟକୁ ଆଣିଲେ ; ତହିଁରେ ଯୀଶୁ ସେମାନଙ୍କର ବିଶ୍ୱାସ ଦେଖି ସେହି ପକ୍ଷାଘାତୀକି କହିଲେ, ହେ ପୁତ୍ର, ସୁସ୍ଥିର ହୁଅ, ତୁମ୍ଭର ପାପ ସବୁ କ୍ଷମା ହେଲା । ଏ କଥା ଶୁଣି ଥୋକାଏ ଅଧ୍ୟାପକ ମନେ ମନେ କହିଲେ, ଏହି ମନୁଷ୍ୟ ଇଶ୍ୱରଙ୍କୁ ନିନ୍ଦା କରୁଅଛି । ସେତେବେଳେ ଯୀଶୁ ସେମାନଙ୍କର ଏହି ଭାବନା ବୁଝି କହିଲେ, କାହିଁକି ମନେ ମନେ ଏମନ୍ତ କୁ ଭାବନା କରୁ ଅଛ ? ତୁମ୍ଭର ପାପସବୁ କ୍ଷମା ହେଲା, କିଅବା ତୁମ୍ଭେ ଉଠି ଚାଲ, ଏହି ଦୁଇ ମଧ୍ୟରୁ କେଉଁଟା କହିବା ସହଜ ? ପୁଣି ପୃଥିବୀରେ ପାପ ମାର୍ଜନା କରିବାକୁ ମନୁଷ୍ୟପୁତ୍ରଙ୍କର ପରାକ୍ରମ ଅଛି, ଏହା ଯେପରି ତୁମ୍ଭେମାନେ ଜାଣିବ, (ଏଥର ସେ ପକ୍ଷାଘାତୀକି କହିଲେ,) ଉଠ, ଆପଣା ଖଟ ଉଠାଇ ନିଅ, ଆଉ ଘରକୁ ଯାଅ । ଏଥିରେ ସେ ଉଠି ଆପଣା ଘରକୁ ଚାଲିଗଲା । ଲୋକ ସମସ୍ତ ଏରୂପ ଦେଖି ଭୀତ ହେଲେ, ଆଉ ଇଶ୍ୱର ମନୁଷ୍ୟକୁ ଏମନ୍ତ ପରାକ୍ରମ ଦେଇଅଛନ୍ତି, ଏଥିପାଇଁ ତାହାଙ୍କର ଧନ୍ୟବାଦ କଲେ ।

ଅନନ୍ତର ଯୀଶୁ ସେଠାରୁ ଯାଉଁ ଯାଉଁ କରସଞ୍ଚୟ ସ୍ଥାନରେ ବସିଥିବା ମାଥିଉ ନାମକ ଏକ ଜଣକୁ ଦେଖି ତାହାକୁ କହିଲେ, ଆମ୍ଭର ପଛେ ଆସ । ତହିଁରେ ସେ ଉଠି ତାହାଙ୍କର ପଶ୍ଚାତ୍ ଗମନ କଲା ।

ଉତ୍ସ - 'ପବିତ୍ର ବାଇବେଲ : ପୁରାତନ ଓ ନୂତନ ନିୟମ' । ବାଇବେଲ ସୋସାଇଟି ଅଫ ଇଣ୍ଡିଆ : ବାଙ୍ଗାଲୋର । ପ୍ରକାଶନର ତାରିଖ ଦିଆଯାଇନାହିଁ । 

ପର୍ବତରେ ଧର୍ମୋପଦେଶ - ୧୫

ପବିତ୍ର ବାଇବେଲର ଓଡ଼ିଆ ଅନୁବାଦ

ଫଟୋ କ୍ରେଡ଼ିଟ - ୱିକିମିଡ଼ିଆ କମନ୍ସ୍

ଅନନ୍ତର ପାରି ହୋଇ ସେ ଗାଦରୀୟ ଦେଶରେ ଉପସ୍ଥିତ ହୁଅନ୍ତେ ଦୁଇ ଜଣ ଭୂତଗ୍ରସ୍ତ ଲୋକ କବରସ୍ଥାନରୁ ବାହାରି ତାହାଙ୍କ ସାଙ୍ଗରେ ଦେଖା କଲେ । ସେମାନେ ଏପରି ଭୀଷଣ ଥିଲେ, ଯେ ସେହି ବାଟ ଦେଇ କେହି ଯାଇ ପାରୁ ନ ଥିଲେ । ଆଉ ଦେଖ, ସେମାନେ ଉଚ୍ଚସ୍ୱରରେ କହିଲେ, ହେ ଇଶ୍ୱରଙ୍କ ପୁତ୍ର ଯୀଶୁ, ତୁମ୍ଭ ସଙ୍ଗରେ ଆମ୍ଭମାନଙ୍କର କି ସମ୍ପର୍କ ? ତୁମ୍ଭେ କି ନିରୂପିତ ସମୟ ପୂର୍ବରୁ ଆମ୍ଭମାନଙ୍କୁ ଯନ୍ତ୍ରଣା ଦେବାକୁ ଆସିଅଛ ? ସେ ସମୟରେ କିଛି ଦୂରରେ ପଲେ ଘୁଷୁରି ଚରୁଥିଲେ । ତହିଁରେ ଭୂତମାନେ ବିନତି କରି ତାହାଙ୍କୁ କହିଲେ, ଯେବେ ଆମ୍ଭମାନଙ୍କୁ ଛଡ଼ାଅ, ତେବେ ଏହି ଘୁଷୁରି ପଲରେ ଆଶ୍ରୟ ନେବାକୁ ଅନୁମତି ଦିଅ । ସେ କହିଲେ, ଯାଅ ; ତେଣୁ ସେମାନେ ବାହାର ହୋଇ ଘୁଷୁରି ପଲରେ ଆଶ୍ରୟ ନେଲେ ; ଆଉ ଦେଖ ! ସମସ୍ତ ଘୁଷୁରି ଗଡ଼ନ୍ତି ସ୍ଥାନ ଦେଇ ଅତି ବେଗରେ ଧାଇଁ ସମୁଦ୍ରରେ ବୁଡି ମଲେ । ପୁଣି ରକ୍ଷକମାନେ ପଳାଇ ନଗର ମଧ୍ୟରେ ଉପସ୍ଥିତ ହୋଇ ସମସ୍ତ ଘଟଣା ଏବଂ ଭୂତଗ୍ରସ୍ତ ଲୋକଙ୍କ ପ୍ରତି କଣ ଘଟିଲା, ତାହା ମଧ୍ୟ କହିଲେ । ଆଉ ଦେଖ ! ନଗରର ସମସ୍ତ ଲୋକ ଯୀଶୁଙ୍କ ସଙ୍ଗରେ ଦେଖା କରିବାପାଇଁ ବାହାରକୁ ଆସିଲେ ; ପୁଣି ତାହାଙ୍କୁ ଦେଖି ସେମାନଙ୍କ ଅଞ୍ଚଳରୁ ପ୍ରସ୍ଥାନ କରିବାକୁ ବିନତି କଲେ ।  

ଉତ୍ସ - 'ପବିତ୍ର ବାଇବେଲ : ପୁରାତନ ଓ ନୂତନ ନିୟମ' । ବାଇବେଲ ସୋସାଇଟି ଅଫ ଇଣ୍ଡିଆ : ବାଙ୍ଗାଲୋର । ପ୍ରକାଶନର ତାରିଖ ଦିଆଯାଇନାହିଁ । 

ପର୍ବତରେ ଧର୍ମୋପଦେଶ - ୧୫

ପବିତ୍ର ବାଇବେଲର ଓଡ଼ିଆ ଅନୁବାଦ

୧୧୫୦ ମସିହାର ଫ୍ରାନ୍ସ୍ ଦେଶର ଏକ ବାଇବେଲର ପୋଥି ଚିତ୍ର
ଫଟୋ କ୍ରେଡ଼ିଟ - ୱିକିମିଡ଼ିଆ କମନ୍ସ୍

ଅନନ୍ତରେ ସେ ନାବରେ ଚଢ଼ନ୍ତେ ତାହାଙ୍କର ଶିଷ୍ୟମାନେ ତାହାଙ୍କ ପଶ୍ଚାତ୍ ଗମନ କଲେ । ଆଉ ଦେଖ, ସମୁଦ୍ରରେ ଏପରି ପ୍ରବଳ ଝଡ଼ ଉଠିଲା, ଯେ ମହାଢ଼େଉରେ ନାବ ଆଚ୍ଛନ୍ନ ହେଲା; ମାତ୍ର ସେ ନିଦ୍ରିତ ଥିଲେ । ଏନିମନ୍ତେ ଶିଷ୍ୟମାନେ ଆସି ତାହାଙ୍କର ନିଦ୍ରା ଭାଙ୍ଗି କହିଲେ, ହେ ପ୍ରଭୁ, ରକ୍ଷା କରନ୍ତୁ, ଆମ୍ଭେ ସମସ୍ତେ ମଲୁଁ । ପୁଣି ସେ ସେମାନଙ୍କୁ କହିଲେ, ହେ ଅଳ୍ପ ବିଶ୍ୱାସିମାନେ, କିହେତୁ ଭୟ କର ? ତହୁଁ ସେ ଉଠି ବାୟୁ ଓ ସମୁଦ୍ରକୁ ଧମକ ଦେଲେ; ତହିଁରେ ସମସ୍ତ ସୁସ୍ଥିର ହେଲା । ଏଣୁକରି ଲୋକମାନେ ଆଶ୍ଚର୍ଯ୍ୟ ଜ୍ଞାନ କରି କହିଲେ, ଆଃ ! ଏ କିପ୍ରକାର ମନୁଷ୍ୟ, ଯେଣୁ ବାୟୁ ଓ ସମୁଦ୍ର ଏହାଙ୍କର ଆଜ୍ଞା ମାନନ୍ତି । 

ଉତ୍ସ - 'ପବିତ୍ର ବାଇବେଲ : ପୁରାତନ ଓ ନୂତନ ନିୟମ' । ବାଇବେଲ ସୋସାଇଟି ଅଫ ଇଣ୍ଡିଆ : ବାଙ୍ଗାଲୋର । ପ୍ରକାଶନର ତାରିଖ ଦିଆଯାଇନାହିଁ । 

ପର୍ବତରେ ଧର୍ମୋପଦେଶ - ୧୫

ପବିତ୍ର ବାଇବେଲର ଓଡ଼ିଆ ଅନୁବାଦ

ମାଲ୍ମେସବରି ବାଇବେଲ (ଇଂଲଣ୍ଡର ୱିଲ୍ଟଶାୟାରର ମାଲ୍ମେସବରି ଆବେ ରେ ପ୍ରଦର୍ଶିତ
ବେଲଜିୟମରେ ୧୪୦୭ ଖ୍ରୀଷ୍ଟାବ୍ଦରେ ଲିଖିତ
ଫଟୋ କ୍ରେଡ଼ିଟ ୱିକିମିଡ଼ିଆ କମନ୍ସ୍

ଅନନ୍ତର ଯୀଶୁ ପିତରର ଗୃହକୁ ଆସି ତାହାର ଶାଶୁକୁ ଶଯ୍ୟାଗତା ଓ ଜରରେ ପୀଡ଼ିତା ଦେଖିଲେ । ତହିଁରେ ସେ ତାହାର ହସ୍ତ ଛୁଇଁବାମାତ୍ର ଜ୍ୱର ଛାଡ଼ିଲା, ତହୁଁ ସେ ଉଠି ସେମାନଙ୍କର ସେବା କଲା ।

ସଞ୍ଜବେଳେ ଉପସ୍ଥିତ ହେଲେ ଲୋକମାନେ ଅନେକଅନେକ ଭୂତଗ୍ରସ୍ତ ଲୋକଙ୍କୁ ତାହାଙ୍କ ନିକଟକୁ ଆଣିଲେ; ତହିଁରେ ସେ ଗୋଟିଏ କଥା ଦ୍ୱାରା ଭୂତଗଣକୁ ଛଡ଼ାଇଲେ, ପୁଣି ସବୁ ପୀଡ଼ିତ ଲୋକମାନଙ୍କୁ ସୁସ୍ଥ କଲେ । ଏଥିରେ "ସେ ଆମ୍ଭମାନଙ୍କର ଦୁର୍ବଳତା ସବୁ ନେଲେ ଓ ବ୍ୟାଧି ସବୁ ସହିଲେ," ଏହି ଯେ କଥା ଯିଶାଇୟ ଭବିଷ୍ୟଦ୍-ବକ୍ତାଙ୍କ ଦ୍ୱାରା ଉକ୍ତ ଥିଲା, ତାହା ସିଦ୍ଧ ହେଲା । ଏଥିଉତ୍ତାରେ ଯୀଶୁ ଆପଣାର ଚାରିଆଡ଼େ ଲୋକସମୂହକୁ ଦେଖ‌ି ହ୍ରଦର ଆର ପାରିକି ଯିବାକୁ ଆଜ୍ଞା କଲେ । ଏଥିମଧ୍ୟରେ ଜଣେ ଅଧ୍ୟାପକ ଆସି କହିଲା, ହେ ଗୁରୁ, ଆପଣ ଯେ କୌଣସି ସ୍ଥାନକୁ ଯିବେ, ମୁଁ ଆପଣଙ୍କର ପଛେ ପଛେ ଯିବି । ତହିଁରେ ଯୀଶୁ କହିଲେ, କୋକିଶିଆଳୀମାନଙ୍କର ଗାତ ଅଛି, ଆଉ ଆକାଶର ପକ୍ଷୀ ଗଣର ବସା ଅଛି; ମାତ୍ର ମନୁଷ୍ୟପୁତ୍ରର ମୁଣ୍ଡ ରଖିବାର ସ୍ଥାନ ନାହିଁ । ଅନନ୍ତର ଅନ୍ୟ ଏକ ଶିଷ୍ୟ ତାହାଙ୍କୁ କହିଲା, ହେ ପ୍ରଭୁ, ମୋହର ପିତାଙ୍କୁ କବର ଦେବାପାଇଁ ମୋତେ ଅନୁମତି ଦେଉନ୍ତୁ । ଯୀଶୁ ତାହାକୁ କହିଲେ, ଆମ୍ଭର ପଶ୍ଚାତ ଆସ; ମୃତମାନେ ଆପଣା ମୃତମାନଙ୍କୁ କବର ଦେଉନ୍ତୁ ।

ଉତ୍ସ - 'ପବିତ୍ର ବାଇବେଲ : ପୁରାତନ ଓ ନୂତନ ନିୟମ' । ବାଇବେଲ ସୋସାଇଟି ଅଫ ଇଣ୍ଡିଆ : ବାଙ୍ଗାଲୋର । ପ୍ରକାଶନର ତାରିଖ ଦିଆଯାଇନାହିଁ । 

ପର୍ବତରେ ଧର୍ମୋପଦେଶ - ୧୪

ପବିତ୍ର ବାଇବେଲର ଓଡ଼ିଆ ଅନୁବାଦ

ଲିଙ୍କନ ପ୍ରଥମ ଥର ରାଷ୍ଟ୍ରପତି ଭାବରେ ଶପଥ ଗ୍ରହଣରେ
ବ୍ୟବହାର କରିଥିବା ବାଇବେଲ
ଫଟୋ କ୍ରେଡ଼ିଟ - ୱିକିମିଡ଼ିଆ କମନ୍ସ୍

ସେ ପର୍ବତରୁ ଓହ୍ଲାଇଲା ଉତ୍ତାରେ ଅପାର ଲୋକମାନେ ତାହାଙ୍କ ପଛେ ପଛେ ଗମନ କଲେ ।  ଆଉ ଦେଖ, ଜଣେ କୁଷ୍ଠୀ ଆସି ତାହାଙ୍କୁ ଭଜନା କରି କହିଲା, ହେ ପ୍ରଭୁ, ଯେବେ ଆପଣଙ୍କର ଇଚ୍ଛା ହୁଏ, ତେବେ ମୋତେ ପରିଷ୍କୃତ କରି ପାରନ୍ତି । ଯୀଶୁ ହାତ ବଢ଼ାଇ ତାହାକୁ ଛୁଇଁ କହିଲେ, ଆମ୍ଭର ଇଚ୍ଛା ଅଛି ପରିଷ୍କୃତ ହୁଅ; ସେହି କ୍ଷଣରେ ସେ ଆପଣା କୁଷ୍ଠରୁ ମୁକ୍ତ ହେଲା । ଅନନ୍ତର ଯୀଶୁ ତାହାକୁ କହିଲେ, ସାବଧାନ, ଏହା କାହାକୁ କୁହ ନାହିଁ; ମାତ୍ର ଯାଜକ ନିକଟକୁ ଯାଇ ଆପଣାକୁ ଦେଖାଅ, ପୁଣି ଲୋକମାନଙ୍କ ନିକଟରେ ପ୍ରମାଣ ଦେବା ନିମନ୍ତେ ମୋଶାଙ୍କ ଦ୍ୱାରା ନିରୂପିତ ନୈବେଦ୍ୟ ଉତ୍ସର୍ଗ କର ।

ଯୀଶୁ କଫର୍ନାହୁମ ନଗରରେ ପ୍ରବେଶ କଲାଉତ୍ତାରେ ଜଣେ ଶତସେନାପତି ତାହାଙ୍କ ନିକଟକୁ ଆସି ବିନତିପୂର୍ବକ କହିଲେ, ହେ ପ୍ରଭୁ, ମୋହର ଦାସ ପକ୍ଷାଘାତ ବ୍ୟାଧିରେ ପୀଡ଼ିତ ହୋଇ ଗୃହରେ ଶଯ୍ୟାଗତ ଅଛି । ଯୀଶୁ କହିଲେ, ଆମ୍ଭେ ଯାଇ ତାହାକୁ ସୁସ୍ଥ କରିବା । ସେହି ସେନାପତି ତାହାଙ୍କୁ କହିଲେ, ପ୍ରଭୋ, ଆପଣ ଯେ ମୋ ଗୃହକୁ ଆସିବେ, ଏପରି ଯୋଗ୍ୟ ମୁଁ ନୁହେଁ; କଥା ମାତ୍ର ଆଜ୍ଞା କରନ୍ତୁ, ତହିଁରେ ମୋହର ଦାସ ସୁସ୍ଥ ହେବ । ଯେହେତୁ ମୁଁ ନିଜେ ପରାଧୀନ ହେଲେ ହେଁ ମୋ ଅଧୀନରେ ଥୋକାଏ ସେନା ଅଛନ୍ତି । ଜଣକୁ ଯାଅ କହିଲେ ସେ ଯାଏ; ଅନ୍ୟକୁ ଆସ କହିଲେ ସେ ଆସେ, ଆଉ ମୋହର ଦାସକୁ ଏହି କର୍ମ କର କହିଲେ ସେ ତାହା  କରେ । ଯୀଶୁ ଏହା ଶୁଣି ଚମତ୍କୃତ ହୋଇ ଆପଣା ପଶ୍ଚାତ୍-ଗାମୀ ଲୋକମାନଙ୍କୁ କହିଲେ, ଆମ୍ଭେ ତୁମ୍ଭମାନଙ୍କୁ ସତ୍ୟ କହୁଁ, ଇଶ୍ରାୟେଲ ମଧ୍ୟରେହେଁ ଏଡ଼େ ବଡ଼ ବିଶ୍ୱାସ ପାଇ ନାହୁଁ । ଆଉ ଆମ୍ଭେ କହୁଁ, ଅନେକ ପୂର୍ବ ଓ ପଶ୍ଚିମରୁ ଆସି ଅବ୍ରହାମ ଇସ୍ହାକ ଓ ଯାକୁବ ସହିତ ସ୍ୱର୍ଗରାଜ୍ୟରେ ଏକତ୍ର ବସିବେ । ମାତ୍ର ରାଜ୍ୟର ସନ୍ତାନମାନେ ବାହାର ଅନ୍ଧକାରରେ ପକାଯିବେ; ସେହି ସ୍ଥାନରେ କ୍ରନ୍ଦନ ଓ ଦନ୍ତର କିତିମିତି ହେବ । ଏଉତ୍ତାରୁ ସେ ଶତସେନାପତିଙ୍କୁ କହିଲେ, ଯାଅ, ତୁମ୍ଭର ବିଶ୍ୱାସାନୁସାରେ ତୁମ୍ଭ ପ୍ରତି ଘଟୁ; ତହିଁରେ ସେହିକ୍ଷଣି ତାଙ୍କର ଦାସ ସୁସ୍ଥ ହେଲା ।

ଉତ୍ସ - 'ପବିତ୍ର ବାଇବେଲ : ପୁରାତନ ଓ ନୂତନ ନିୟମ' । ବାଇବେଲ ସୋସାଇଟି ଅଫ ଇଣ୍ଡିଆ : ବାଙ୍ଗାଲୋର । ପ୍ରକାଶନର ତାରିଖ ଦିଆଯାଇନାହିଁ ।