କବିତା - 'ସ୍ୱାଗତ'
କବି - ଶ୍ରୀମତି ନଳିନୀ ଦେବୀ
ଯୁକ୍ତରାଜ୍ୟ ଆମେରିକାର ମିଶୋରି ରାଜ୍ୟର ମହାଝରର ଚିତ୍ର (ୱିକିମିଡିଆ କମନ୍ସ୍) |
ନିଖିଳ ଜଗତ ସୁନ୍ଦର ଆଜି
ପୁଲକିତ ତବ ଦରଶେ
ଶ୍ରାନ୍ତ ହୃଦୟ ଶିହରି ଉଠଇ
କୋମଳ କର ପରଶେ ।
ଶୂନ୍ୟ ଜଗତ ଅମୀୟ ସ୍ନାତ
ଚଉଦିଗ କଳରବେ ମୁଖରିତ
ବ୍ୟୋମ ମୁଗ୍ଧ ଚନ୍ଦ୍ର ସୂର୍ଯ୍ୟ
ଶତଧାରେ ମଧୁ ବରଷେ ।
ହାସ୍ୟ ଗୋ ତବ ନବ ବିକସିତ
ପୁଷ୍ପିତ ବନ ପଲକେ
ଦୀପ୍ତ ନିଶୀଥ ତାମସ ନିବିଡ଼
ନବୀନ କିରଣେ ଝଟକେ ।
ସ୍ୱିଗ୍ଧ ନିରଦ ଦେହୁଁ ଭାରେ ଭାରେ
କି ଅମୃତମୟୀ ସୁଧାଧାରା ଝରେ
ସ୍ଫୂରଇ ତଟିନୀ ନିର୍ମଳ ନୀରେ
ନବ ଶୋଭା ରେଖା ହରଷେ ।
ପୁଷ୍ପେ ଜଡ଼ିତ ସୁନ୍ଦର ପାଣି
ସହାସ୍ୟ ଅଧରେ ଅମୀୟ ବାଣୀ
ଆସ ଆସ ମାତ ଶାରଦ ରାଣୀ !
ନବ ଆନନ୍ଦ ଦିବସେ ।
ଉତ୍ସ - 'ପରିଚାରିକା' ପତ୍ରିକାର ୨ୟ ଭାଗ, ଅଷ୍ଟମ ସଙ୍ଖ୍ୟା (୧୯୧୮ ମସିହା)
No comments:
Post a Comment